Read xamtanga ማቲወስት ወንጌል 28 Bible Online

ማቲወስት ወንጌል 28 - xamtanga bible

ማቲወስት ወንጌል 28

¹ቅዳምሲንቭት ዲቈት ግረ ጛምርሲዝ ሸወጪዙ በወትረ ግርየይዝ ግረቨዝ መግደላዊት ማርያምስመ ላየ ማርያምስ መቃቭርድየንት ቓልጥጘ ፊር።

²ድጝግትም ዝቨድ ኻይልዝ ተናውፅሽቱ፤ ኣደረት መላክም ሲመይስ ጊም መቃቭርድ ዲቭሽተው ቕርጘድየንት ጊልብር ጝዲጊል ጐዩ።

³ጝሚልክድ መቭረቂዝጘ ኣቭርቅርቀው፣ ጝኣልቨድም ኣይዝጘ ፃረው ዊኑ።

⁴ሊሚደቍ ዊተድርድም መላክድየንት ጐውትጛንስቅ ቀጥቀጥ ይጛ ቢድኒዝጘ ኣቕ።

⁵መላክድም እቍንድዛት፦ «ኣይዝዀጥን ጐውትርነ! ሲቅልሸው እየሱስት ደምዝርነቅ ኣርነጘ ኣርቕኩን።

⁶ጘጝ እንል እጀውም፤ በውገ ዊግተጘ ጕኩ፤ ላቝጥን እርሸድ ዊነው ስፍረድየንት ቓልጥን።

⁷ነንም ቃዝየዝ ፊትርን ጝክንደጢዝ፦ ‹ክርጘይስ ጕኩ! ክታትም ቀድም ገሊለ ፊርጡ! ጝጊስም ቓልትርንቅ!› ይርን ድቍጥን፤ እንወ ድቍኩን!» ዩ።

⁸እቍንድም ጐውትዝመ ዲስተዝ እቻቕጝ ክንደጢዝ ድቍጥጘ በውዝ መቃቭሪስ ጕጝ ውጢጛ ፊር።

⁹በውዝም እየሱስ ጛት ችጝ፦ «ዲግተ ክታጭስ ኣነ!» ዩ፤ ጛይም እየሱስትል ኣልትጝ ጝልኵድ ፃይጝ ሲግድ።

¹⁰ኣይንድም እየሱስ፦ «ጐውትርነ! ፊጥን፤ ገሊለ ፊርጛንስ ማጥን ይፅንስ ድቍጥን፤ ይት ጝጊስ ቓልጥቍ» ዩ።

¹¹እቍንድ ገነ ጒደነይል ፅብጛ፣ መቃቭርድ ሊሚድጛ ዊነቍ ዊተድሪስ ላው ላውድ ኻትመይል ፊርጝ ኣቐው ገቨድቅ ካኽነጣነ ኻልቅጢዝ ድቍ።

¹²ካኽነጣነ ኻልቅጥድም ሽመቅሊጅቅ ኣኽቭሽጝ ማኽርኽርሽ፤ ዊተድሪዝም ንቕፀው ጊንዝቭ ይውጝ፦

¹³« ‹ይን ኽርይን ፅብና ጝክንደጥድ ኻር ተርጝ ስ› ይጥን።

¹⁴እኒን ጂጘድ ቅመተይል ችጝሽ እኳ ይን ኣልትን ኣስርድዝንቅ፤ ክታግልም ውርቅ ጭቓ ዊገ ችጛይየጘ ፃቭንቅ» ይ።

¹⁵ዊተድርድም ጊንዝቭድ ለምርጝ ኣዚትጘጘ ፃቭ፤ እንም ነኳን ኣሽ ኣይዅዳኒዝ ማኽሊል ዊግሻ ፅበኵ።

¹⁶ፅጭ ለው ክንደጥድም እየሱስ ፊርጥጘ ኣዘው ገሊለቱ ኣበይል ፊር።

¹⁷እየሱስት ቓልጛንድም ሲግድ፤ ላው ላውድ ግን ተጠራጥርሽ።

¹⁸እየሱስም ጝታጐ ኣልት፦ «ሲመይስመ ዝቨዝቅ ስልጣን እጝቅ ይጭስ ነይሽትኩ።

¹⁹እንዝ ማጥን ፊጥን፤ ኣልሚዝ ኽዝቭድቅ ኣይርት ሽዝ፣ ዅርት ሽዝ፣ መንፈስ ቅዱስት ሽዝ ጣምቅርና፣ ያን ክታት ኣዘውድየንትም እጝቅትቅ ፋፅምጛንስ ማጥን ክንስርና ይክንደጥ ፃቭጥን፤ እንወ ያን ኣልሚዝ ኻትሸነይል ኣሽ ዊትርቅ ክታጅቅ የጝ» ዩ።