Read xamtanga ማቲወስት ወንጌል 3 Bible Online

ማቲወስት ወንጌል 3 - xamtanga bible

ማቲወስት ወንጌል 3

¹ኣይንት ወራቲዝ ጣምቀተ ይዃንስ፦ «ምጝግስተሰማያት ኣልትርኵችነ ንስኻ ጥውጥን» የው ሲቭካ ይዅዳቱ በራኸይዝ ፃቭ ተሩ።

³ነቭይ ይሳያስ፦ « ‹ኣደረት ጒደነድ ኣስልጥን! ጥርግየድየንትም ጭቅ ሽጥን!› ያ በራኸይስ ቓፀው እጅርዙ ድመ» የው ዊግተውድ ጝማጥን የጝ።

⁴ይዃንስት ኣልቨድ ግምለዙ ፅቭቀዝ ተሲተው ዊኑ፤ ጝይዊልም ኣኽር ከምራ ዊኑ፤ ጝዅረድም ኣብጠዝመ በራኸዙ ሳረዝ ዊኑ።

⁵ኣይንድ ኽዝቭ እየሩሳልየምስ፣ ድፍን ይዅዳ ኻግሪስ፣ ዮርዳኖስት ጅልወይል ፅበው ኻግሪስቅ ይዃንስ ትጐ ገይሽታ ዊኑ።

⁶ጝኽጥያትድም ነዚታ ዮርዳኖስ ዊርቨይል ይዃንስት ናኒዝ ጣምቅሻ ዊኑ።

⁷ይዃንስም ንቕፀቍ ፈርሳንዝመ ሰዱቃንዝ ጣምቅሽጥጘ ጝጐ ተርጛንድ ቓላንድ፦ «እፈ ሲቭረዝ ቝር ክታትርነ! ተረው ቍጠይስ ኣምልጥትርነ ማጥን ክታት ኣው ማኽሩ?

⁸ነስየ ንስኻ ጥውርነጘ ቓሊሰው ሰቭ ሰራጭጥን።

⁹ክታእዘኒዝ፦ ‹ይን ኣቭርኻምት ቝር የጝ› የነውዝ ኣምልጥንቅ ይርን ኻስቭትርነ፤ እደረ እንዛይ ቕርጚስ ኣቭርኻምስ ዅል ጒሰነው ቸለኵ የኵን።

¹⁰እንወ ዘፋኒዝ ስሪል ባፅ ኣስልሽኩ፤ ነስየ ቀሰው ፍረ ፍርዛው ዘፍድቅ ቀቭሽት ልየዝ ቃጥልሽጡ።

¹¹ያንስ ንስኻዝ ኣቓንስ ማጥን ክታት ኣቝዝ ጣምቀኵን፤ ይግረይል ተረውድ ግን ይጊስ ዲቈኵ፤ ያንም ጝፃብጣንድ እኳ ፃቅጨ ጥውጨቅም፤ ጘጝም ክታት መንፈስ ቅዱስዝመ ልየዝ ጣምቅጡ።

¹²ጝመሽንድየንት ጝናኒዝ ፃይኩ፤ ጝዋርነድየንትም ቐናዝ ዊር ሽጡ፤ ዚርወድየንት ጝቅፋነይል ድውጡ፤ ገለቨድየንት ግን ስታው ልየዝ ቃጥልጡ።»

¹³ኣይንድ እየሱስ ይዃንስት ናኒዝ ጣምቅሽጠ ገሊለስ ዮርዳኖስ ትጐ ተሩ።

¹⁴ይዃንስ ግን፦ «እንስ ኣቓውም! ያን ክናኒዝ ጣምቅጨ ጥውሻመ ክት ይጐ ተትራ?» የው ኪልክልጠ ኪርሙ።

¹⁵እየሱስም፦ «በጭ ግድ እጅረር፤ ፅድቅድቅ እነሽን ፋፅምነ ጥውሸኵ» ዩ። ይዃንስም ቲስመም እየሱስት ጣምቁ።

¹⁶እየሱስም ጣምቅሽ ኣቚስ ፈጘ በውዝ ሲመይ ቢቱ፤ እደረት መንፈስድም እርግቨት ተክ ጊም እየሱስትል ጐያንድ ቓሉ።

¹⁷ኣይንድም፦ «እንወ! ያን ጝቍዝ ዲስ የው ይቀነው ይዅርድ ጘጝ የጝ» የው ድመ ሲመይስ ተሩ።