Read xamtanga ማቲወስት ወንጌል 4 Bible Online

ማቲወስት ወንጌል 4 - xamtanga bible

ማቲወስት ወንጌል 4

¹እንዝ ግረ ዳቪለውስ ፊትናንስ ማጥን መንፈስ ቅዱስ እየሱስት በራኸል ቃው ፊሱ።

²እየሱስም ጝግል ኣርቨ ግርቅዝመ ኣርቨ ጨንዝ ፃመት ግረ ግድርዱ።

³ፊትነተድም እየሱስ ትጐ ኣልት፦ «ክት እደረት ዅር ኣረውዝየ እስቲ እንዛይ ቕርጝድዛት፦ ‹ሚ ኣጥን ይር› ኣዝ!» ዩ።

⁴እየሱስ ግን፦ « ‹እጅር እደረት ምቸይስ ፈው ቃልዝቅጚ ሚዝ ጭቝ ፅባውም› ይሽት ፃፍሽኩ» ዩ።

⁵እንዝ ግረ ዳቪለውስ እየሱስት ቅድስት ኻትመ እየሩሳልየምትል ፊስ መቅደስ ጝኒዝ ጫፍ ጕልላቲል ችብስ፦

⁶« ‹ክልኵጣንድ ቕርጘዝ ፅጋራይጘጘ፣ ክት ጝታናንጣኒዝ ጕይጛንስ ማጥን ጝመላካንድዛት ክማጥን ኣዝጡ› ይሽት ፃፍሽኩ፤ እደስለስ ክት እደረት ዅር ኣረውዝየ እኒስ ሳ ዊርውርጭ» ዩ።

⁷እየሱስም፦ « ‹ክኣምላክ ኣደረት ፊትንትንተ› ይሽት ቈሽ ፃፍሽኩ» ዩ።

⁸እንደ ገነም ዳቪለውስ እየሱስት ጭቕጘ ሊግዘው ኣበል ፊስ ኣልሚዙ ቲተቲተው ቅምቲዝመ ጝክቭሪዝ እጝቅትቅ ቓሊሱነ፣

⁹«ይልኲል ደፋሽር ይጭስ ሲግድራን እኒንትቅ ክጭስ ነቅጭር» ዩ።

¹⁰ኣይንድ እየሱስ፦ «እፈ ሲጣን ክተ! ይበዊስ እለ ፊጥ! ‹ክኣምላክ ኣደረስ ሲግጭ፣ ጝት ጭቝም ኣምልክ› ይሽት ፃፍሽኩ» ዩ።

¹¹ኣይንድ ዳቪለውስ ጝት በር ፊሩ። መላካንም ተርጝ እየሱስት ኣግልግል።

¹²እየሱስም ይዃንስ እፁሸጘ ወሻንድ ገሊለ ትጐ ዋጥሩ።

¹³ናዝሪትትም በር ዛቭለውንስመ ንፍታሊምት ኣውራጀይል ችጝሽረይ ቅፍርናዀም ትጐ ፊር ጐዩ።

¹⁴እንም ኣቐውድ ነቭይ ይሳያስ፦ «ዛቭለንት ዝቨ፣ ንፍታሊምት ዝቨ፣ ዮርዳኖስት እጂ ባኽር ጒደነይዝ ደርቸይል ፅበው ኣኽዛቫኒዙ ገሊለም፣

¹⁶ጥመይል ፅበው ኽዝቭ፣ ኽየው ብርኻን ቓሉ፤ ክርጘዙ መጅወ ፅበው ዝቨል ፅበቊዝም፣ ብርኻን ፉ» የው ዊግተውድ ፋፅምሻንስ የጝ።

¹⁷እየሱስም ኣይኒስ ኪርም፦ «ምጝግስተሰማያት ኣልትርኵችነ ንስኻ ጥውጥን» ያ ሲቭክጠ ኪርሙ።

¹⁸እየሱስ ገሊለት ባኽሪዝ ጋቢዝ ዲቋንድ ሊጘ ዚን እቅ የነትም ቢጥሮስ ይሽተው ስሙንስመ ጝዝን እንድርያስስ ቓሉ፤ ጛይም ኻዘ ፃውረቍ ዊን፤ ጝታመረቭድየንትም ባኽሪል ማልጛ ዊን።

¹⁹ጘጝም፦ «ላቝጥን ይት ቲክንጥን፤ ነስየ እቅድ ይጭስ ፃውርድርነቅ ፃቭጭር» ዩ።

²⁰ጛይም በውዝ ጝታመረቭድ በርጝ ጝት ቲክን።

²¹ጝጊስ ዲቍ የጘ ቈሽ ላጥ ሊጘ ዚን ዘቭዲወስት ቝር ያይቈቭስመ ይዃንስስ ቓል ጭጙ፤ ጛይም ጝታይር ዘቭዲወስ ጅቅ ታኰል ኣቕጝ ጝታመረቭድየንት ኣስልጛ ዊን።

²²ጛይም በውዝ ታኰይዝመ ጝታይርስ በርጝ ጝት ቲክን።

²³እየሱስም ጝታምኵራቫኒል[4] ክንሳ፣ እደረት ምጝግስቲዙ ወንጌልድየንትም ሲቭካ፣ ቲተቲተው ፅውዘዝመ ቕጅወዝ ፃይሸቍ እቅድዛትም ቓዛ፣ ገሊለት ዝቨይልቅ ጅልዋ ዊኑ።

²⁴ጝጂጘድም ድፍን ሰውርየ ኣሽ ወይሽታንስቅ ጝሉ ጝሉ ፅውዘዝመ ደውየዝ ፃይሽጝ ተሰቃይሸቍድዛት፣ ጋኒናንዝ ፃይሸቍድዛት፣ ማለው ፅውዘ ፃየቍድዛት፣ ለውሻሻንድዛት፣ እጝቅትቅ ጝጐ ነስ፤ ጘጝም እጝቅትቅ ቓዙ።

²⁵ገሊለስ፣ ፅቃ ኻትምጢስ፣[5] እየሩሳልየምስ፣ ይዅዳስመ ዮርዳኖስ ዊርቨይዝ እጂስ፣ ተረቍ ንቕፀቍ እቅ እየሱስት ቲክን።