Read xamtanga ማቲወስት ወንጌል 5 Bible Online

ማቲወስት ወንጌል 5 - xamtanga bible

ማቲወስት ወንጌል 5

¹እየሱስም ንቕፀው ኽዝቭ ኣኽቭሸጘ ቓላንድ ኣበል ፍ ጐዩ፤ ጝክንደጥድም ጝጐ ኣልት።

²ጘጝም እንት ያ ክንስጠ ኪርሙ፦

³«መንፈስዝ ድኽ ኣቐቍ እቅ ቀቫሸቍ ጛይ፤ ምጝግስተሰማያት ጝታወ ጚነ።

⁴ኻዝነቍ እቅ ቀቫሸቍ ጛይ፤ ዲብሽተነው ችጝጥቍነ።

⁵ገርኻን እቅ ቀቫሸቍ ጛይ፤ ዝቨት ዊርስጥቍነ።

⁶ፅድቅ ግድርደቍ ዝቛንደቍም እቅ ቀቫሸቍ ጛይ። እቭትጥቍነ።

⁷ስቝርት ፃቨቍ እቅ ቀቫሸቍ ጛይ፤ ጛይም ሳቝርሽጥቍነ።

⁸ንፅዅ እዘን ፃየቍ እቅ ቀቫሸቍ ጛይ፤ እደረት ቓልጥቍነ።

⁹ኣርቅሰቍ እቅ ቀባሸቍ ጛይ፤ እደረት ቝር ይሽትጥቍነ።

¹⁰ፅድቅዝ ማጥን ሲድሽሸቍ እቅ ቀባሸቍ ጛይ፤ ምጝግስተሰማያት ጝታወ ጚነ።

¹¹«እቅ ይቍዝ ክታት ዛሽጛንድ፣ ሲድስጛንድ፣ ኻሽትዝም ክታሽድ ጨቅጛንድ፣ ቀቫሽርነቅ የጝ።

¹²ሲመይስ ችጝትርኑ ክታወየድ ኽየው ኣቓንስቅ ዲስ ይጥን፤ ኽየው ዲስተም ፃቭጥን፤ ክታበውገ ዊነቍ ነቭያታንድዛትም እነሽጝ ሲድስጝኵ።»

¹³«ክትን ዝቨት ጭወጥረ የጝ፤ ዊገድ ግን ጭወጥረ ጝጣምነድ ባን ወረጘዝ ጣምትጡ? ቢዘይል ማልሽት እቀ ልኵዝ ደድሽጠ ኣቕሽጚ ጝዝለ ውርም ጣቅማው።

¹⁴ክትን ኣልሚዝ ብርኻን የጝ፤ ኣበል ተሲትረይ ኻትመ ጭቭርተ ቸላይም።

¹⁵እቅም መቭራት ኣቭርኽዝጝ ጝኒዝ ኣቒል ፅበቍ እቂዝቅ ኣቭርኽጠ ማጥን ንየ ዲቭየይል እቝርጘኵጚ ቃቀዝ ኣቒል እቝራቍም።

¹⁶እኒዝጘም እቅ ክትን ሰራሽርነው ቀሰው ሰቭድየንት ቓልጝ ሲመይ ፅበው ክታይርድየንት ሚዝየንዝጛንስ ማጥን ክታብርኻንድ እቀ በዊልቅ ኣቭርኽነ።»

¹⁷«ያን ክታግስ ወሪትት ኽጊዝመ ነቭያታኒዝ ሸርጨ ተጠር ተኪነ፤ ያን ተጠውድ ጛት ፋፅምጨ የጝጚ ሸርጨም ኣየው።

¹⁸እማንዝ የኵን፤ ሲመይስመ ዝቨስ ዲቍጥጚስቅ ወሪትት ኽግድ እጝቅቅ ፋፅምሸኵጚ ኽጊስ ላይ ፊድል ዊንም ላይ ነቍጥ እኳ ሸርሻይም።

¹⁹ነስየ ኣውማው እጅር እንዛይ ትዛዛኒስ ላይ እጥን ትዛዝሸንት እኳ ፋዝሽ፣ ላጥ እቂዝም ፋዝጛንስ ማጥን እነሽ ክንስሽ፣ ምጝግስተሰማያትስ እጝቂስቅ እጥን ኣጡ። እንዛይ ትዛዛንድዛት ፋፅመው፣ ላጥ እቂዝም ፋፅምጛንስ ማጥን ክንሰው ኣውማው እጅርድቅ ምጝግስተሰማያትስ ኽየው ኣጡ።

²⁰ኣቓንስቅም ክታፅድቅድ ፈሪሳኒዝመ ወሪትት ኽግ ክንሰጢዙ ፅድቂስ ዲቊየውዝየ ስሪስቅ ምጝግስተሰማያት ጥዋይርነቅም የኵን።

²¹«በውገትቍ እቂዝ፦ ‹ኒቭስ ቁተ! ኒቭስ ቍወውድቅ ፍርድዝ ቐፃሽጠ ጥውሸኵ› ይሽተጘ ወሽርንኵርኑ።

²²ያን ግን ጝዝኒል ጊነዝ ቈጣሸው እጅርድቅ ፍርድዝ ቐፃሽጠ ጥውሸኵ፤ ጝዝንድየንት፦ ‹ኻጝ› የው ዛሸውድቅ ሸጐውዙ ፊርድዝ ቐፃሽጠ ጥውሸኵ፤ ‹ዲቋር› የው ዛሸው እጅር ቈሽ ግኻነመሳትዙ ፍርድዝ ቐፃሽጠ ጥውሸኵ የኵን።

²³እንዝ ማጥን ክሚቨድ መሰዊየይል ፃቭር እደረስ ኣልስራንድ፣ ክት ቂይምሸው ክዝን ፅበጘ ኣጅርሽ፣

²⁴ክሚቨድ መሰዊየይዝ ጋቢል እቝርነ በዊል ፊትር ክዝን ጅቅ ኣርቅጭ፤ ጝዝ ግረ ዋጥርድር ክሚቨድ ኣልሽ።

²⁵ክቃርኘድ ኪሱዝ ጝጅቅ ፍርድ ጝንል ፊትርሽ፣ ገነ ጒደነይል ፅብርና ክቃርኘይጅቅ ቲስመም፤ ኣለዝየ ክቃርኘድየን ደጘዝ ዲቍስ ይወኵ፤ ደጘድ ቈሽ እፅቈተዝ ዲቍዝ ይወኵ፤ ጘጝም ወኽኒ ጝንል ድውጡ።

²⁶እማንዝ የኵን፤ ጝዝ ግረ ቐፃሽረው ጊንዝቪስ ላይ ሳንቲምቅ እዳቒጝቀ እጝቅትቅ ኪፍልቲስቅ ጝጊስ ፋርም።

²⁷« ‹ሻርሙጥተ› ይሽተጘ ወሽርንኵርኑ።

²⁸ያን ግን፦ እውነት ቓል ጝርት ማርቕፀው እጅርድቅ ኣይንድ ጝእዘኒዝ ጝርጅቅ ሻርሙጥኩ የኵን።

²⁹ክለው እልድ ክት ቀስሽ ጝት እለ ፊስር ማል፤ ክሰውነትድ ምሉዝ ግኻነመሳትል ጥወነዊስ ክሰውነቲስ ላው ኣካል ብራን ቺዘኵ።

³⁰ክለው ናንድ ክት ቀስሽ ጝት ቅዝር ማል፤ ክሰውነትድ ምሉዝ ግኻነመሳትል ጥወነዊስ ክሰውነቲስ ላው ኣካል ብራን ቺዘኵ።

³¹« ‹ጝውነት ዳቕረው እጅርድቅ ጝርድቕሪዝ ማስረጀ ኣቐው ወረቂት ጝርስ ይው በርስነ› ይሽተጘ ወሽርንኵርኑ።

³²ያን ግን ጝዲጊል ሻርሙጥር ችጝሽሩዝ ኣየውዝየቅ፣ ጝውነት ዳቕረው እጅርድቅ ሻርሙጥተ ፃቨኵ፤ ዳቕርሽረይ እውነት ድወው እጅርም ሸርሙጠይዝጘ እጊተኵ የኵን።

³³«ቈሽም በውገትቍ እቂዝ፦ ‹ኻሽትዝ ፃርተ፤ ኣደረት በዊል ፃርደውድየንትም ሊምጭ› ይሽተጘ ወሽርንኵርኑ።

³⁴ያን ግን ስሪስቅ ፃርትርነ የኵን፤ ሲመይዝም ኣሽ ፃርትርነ፤ ምላሰንድም ሲመይ እደረት ዙፋን የጝ።

³⁵ዝቨስም ኣሽ ፃርትርነ፤ ምላሰንድም ዝቨ እደረት ልኲዝ ደደነ ጚ። እየሩሳልየምስም ኣሽ ፃርትርነ፤ ምላሰንድም እየሩሳልየም ኽየው ንጕሲዝ ኻትመ ጚ።

³⁶ክታቕምትዝም ኣሽ ፃርትርነ፤ ምላሰንድም ክታፅቭቂስ ላይሸንት እኳ ፃረይት ዊንም ጝጭርት ፃቨነው ቸላይርነቅም።

³⁷እንዝ ማጥን ዊግትርናንድቅ ክታቃልድ፦ ‹የይ› ኣቕሽ፦ ‹የይ› ኣነ፤ ‹ኣየውም› ኣቕሽ፦ ‹ኣየውም› ኣነ፤ እንዝለቱ ዊገድ ግን ሲጣኒዙ የጝ።

³⁸« ‹እልዝ ፊንተ እል፣ እርቍዝ ፊንተ እርቍ ፍነ› ይሽተጘ ወሽርንኵርኑ።

³⁹ያን ግን ክታጭስ የኵን፤ ጭቓ ፃቨው እጅርድየንት ተቃውምሽትርነ፤ ዊገድ ግን ክለወ ጥቋድየንት ጥፊዝ ጣዘዊዝ ፃግቭ ጥቋድየንት ቈሽ ጅልውዝር ይይ።

⁴⁰ላው እጅር ክት ኪስሽ፣ ክኪተድም ፊስጠ በንሽ፣ ክኵተድየንትም ቈሽ ፊስጠር በጭ።

⁴¹ላው እጅር፦ ‹ለው ዊቱ ጒደነ ይጅቅ ፊጥ› የው ኣስግድድዝሽ፣ ክት ቈሽ ላየ ጘጝ የዊዝ ቝጠ ቈሽር ፊጥ።

⁴²ክት ጨወዊዝቅ ይይ፤ ክጊስ እድውርጠ በነዊዝም ክጋፅድ ጨቅተ።

⁴³« ‹ክፃምረድየንት ቀን፣ ክፃለት ሽክጭ› ይሽተጘ ወሽርንኵርኑ።

⁴⁴ያን ግን ክታፃለታንድ ቀንጥን፤ ክታት እፀቍድዛት ጊቭትጥን፤ ክታት ሽክተቊዝ ቀሰው ፃቭጥን፤ ክታት ሲድሰቊዝ ፃልይጥን የኵን።

⁴⁵እኒንት ፃቭርነውዝየ ሲመይ ፅበው ክታይርስ ጝቝር ኣትርንቅ፤ ጘጝ ጭቒዝም ቀሰቊዝም ጝኰረድየንት ፊሰኵ፤ ፃድቃኒዝመ ኽጥያትኝጢዝም እስወድየንት ይወኵ።

⁴⁶ክታት ቀነቍድዛት ጭቝ ቀንድርነቅ ኣርነውዝየ ውርት ወየ ችጝትርንቅ? ቀረጥ ቀቨቍድስ[6] እኒንት ፃቭጘኵ ኣየውቀ?

⁴⁷ክታፅኒዝ ጭቝ ዲግተ ይውርነቅ ኣርነውዝየ ላጢስ ወረጘዝ የጝ ቺዝርነውድ? ኣኽዛቫንድስ እኒንት ፃቭጘኵ ኣየውቀ?

⁴⁸እንዝ ማጥን ሲመይቱ ክታይርድ ፍፅም ኣቐጘ ክትንም ፍፅማን ኣጥን።»