Read xamtanga ማቲወስት ወንጌል 6 Bible Online

ማቲወስት ወንጌል 6 - xamtanga bible

ማቲወስት ወንጌል 6

¹«እቅ ክታት ቓልጛንስ ይርን ክታቀሰው ሰቭድየንት እቀ በዊል ፃቫይርነጘ ጣጝቅቅጭጥን፤ ኣለዝየ ሲመይ ፅበው ክታይርቲስ ወየ ችጛይርነቅም።

²እጅርዝ በዊል ኪብርጥጘ በንጝ ጝታምፅዋትድ ምኵራቭዝመ ጒደነዝ ጨቨቅ ቱትለ ዋስጛ ፃቨቍ ተክዘጥ እቂዝጘ ክትንም ክታምፅዋትድ እቅ ቓልጛንስ ይርን ፃቭትርነ፤ እማንዝ የኵን፤ ጛይ ጝታወየድ ምሉዝ ለምርጝኵ።

³ክት ኣራንድ ማፅውትራንድ ክለወ ናንድ ፃቨውድየንት ክፃግቭ ናንድ ኣርቒነ።

⁴ክምፅዋትድ ስውርዝ ኣነ፤ ስውርዝ ፃቭኑድየንት ቓለው ኪርም ክወየድ ግልፅዝ ኪፍልጡ።»

⁵«ፃልይርናንድ ተክዘጥ እቂዝጘ ኣትርነ፤ ጛይ እቅ ቓልጛንስ ይጝ ምኵራቭዝመ ጒደነዝ ጨቨቅ ችብርጝ ፃልየነው ቀንጘኵ፤ እማንዝ የኵን፤ ጛይ ጝታወየድ ምሉዝ ለምርጝኵ።

⁶ክት ኣራንድ ፃልይራንድ ክጝን ክፍሊል ጥውር ክቢለድ ዲቭር ስውርዝ ፅበው ኪርትል ፃልይ፤ ስውርዝ ፃቭኑድየንት ቓለው ኪርም ክወየድ ግልፅዝ ኪፍልጡ።

⁷«ፃልይርናንድ ኣኽዛቫኒዝጘ ጊነትቍ ቃላን ደግምግምርና ሊልፍትርነ፤ ጛጭስ ኒቒስን ዲግመነውዝ እደረ ወሽጡ ተከኵ።

⁸እንዝ ማጥን ጛት ተክትርነ፤ ምላሰንድም ክታይር ክትን ጨዊጝቀ ክታጭስ በንዘውድየንት ኣርቐኵ።

⁹ነስየ ፃልይርናንድ እንት ይጥን፦ ‹ሲመይ ፅብረር ይናኣይርወ! ክሽድ ኪብርነ።

¹⁰ክምጝግስትየን ተትርነ፤ ከፈቃድሸን ሲመይስ ኣረጘ፣ እኒዝጘም ዝቨትል ኣርነ።

¹¹እልቱ ይናሚድየንት ንጭ ነቅ።

¹²ይን ይናት ቢድለቍድዛት ይቅር ይናንትጘ፣ ክትም ይናበደልድየንት ይቅር ይ።

¹³ይናት ጭቓ ዊገይስቅ ቓዝጚ ፊተነል ድውተ፤ ምጝግስት፣ ኻይልም፣ ክቭርም፣ ዘላልም ኩ የጝ፤ ኣሚን።›[7]

¹⁴«ክትን ክታት ቢድለቍድዛት ይቅር ይርንሽ ሲመይ ፅበው ክታይርም ክታት ይቅር ይጡ።

¹⁵ክትን እቀ በደልድየንት ይቅር ዪይርንሽ ግን፣ ሲመይ ፅበው ክታይርም ክታበደልድየንት ይቅር ያውም።»

¹⁶«ፃምርናንድ ተክዘጥ እቅ ጝታፃመነውድየንት እቅ ቓልጛንስ ማጥን ጝታጋፅድ ጨቅጛንትጘ ክትንም ክታጋፅድ ፃምልውዝትርነ። እማንዝ የኵን፤ ጛይ ጝታወየድ ምሉዝ ለምርጝኵ።

¹⁷ክት ኣራንድ ፃምራንድ ክጋፅድ እቓጭ፤ ክኣውርድየንትም ቅቫት እቓጭ።

¹⁸እንዝም ክፃምድ ስውርዝ ፅበው ኪርስ ጭቝ ኣርቕሽተው፣ ላየ ኣውማው እጅርዝ ግን ሲውርሸው ኣጡ፤ ስውርዝ ፃቭኑድየንት ቓለው ኪርም ክወየድየንት ግልፅዝ ኪፍልጡ።»

¹⁹«ናዘ ዀው፣ ማርትዝ ጨቅሸው፣ ቓፅጝም ኪልጝ ስው እን ዝቨይል ክታቕምስ ኻፍት ኣኽቭትርነ።

²⁰ኽሽስ ናዘ ዃው፣ ማርትዝም ጨቅሻው፣ ቓፅጝም ኪልጝ ስይጘው ሲመይል ኻፍት ኣኽቭጥን።

²¹ክኻፍትድ ፅበዊል ክእዘንድም ጝግል ኣጡ።

²²«እል ሰውነትዙ መብራት የጝ፤ ክእልድ ትኽኑ ኣቐውዝየ ክሰውነትድቅ ብሩኽ ኣቐኵ።

²³ክእልድ ፅውዝጅነ ኣቐውዝየ ግን ክሰውነትድቅ ምሉዝ ጥመዝ ስርሸው የጝ ኣቐውድ። ነስየ ክግል ፅበው ብርኻንድ ጥመ ኣቐውዝየ፣ ጥመድሰ ኣወየው ወሰው ኣጡ?

²⁴«ላው እጅር ሊጘ ኣደርጥዝ ቅምሽጠ ቸላውም፤ ላውድ ቀን ሊጘትረድ ሽክተኵ፤ ዊንም ላውድ ኪብርዝ ሊጘትረድ ነቀኵ፤ እደረስም ጊንዝቭዝም ሊንስ ቅምሽትርነ ቸላይርነቅም።»

²⁵«እንዝ ማጥን፦ ‹ውር ዅንቅ? ውር ዝይንቅ? ውርስ ሲርንቅ?› የነውዝ ጨጝቅሽትርነ የኵን፤ ዅረይስ ርዅየ፣ ኣልቨይስም ሰውነት ዲቋውመ?

²⁶እስቲ ሲመይቱ ቢረቍ ዚልቅድዛት ቓልጥና፤ ፊዛቍም፤ ኣይራቍም፤ ቅፋነልም ድዋቍም፤ ኣነጚ ሲመይ ፅበው ክታይርድ ጛት ሚግቨኵ፤ እደስለ ዚልቂስመ ክትን ጭቕጘ ዲቍርነቅ ኣይርነቃ?

²⁷ኣየውጚ! ክታማኽሊስ ጨጝቅሽ ጝሊግዚል ላው ቈሪ[8] ቈሽጠ ቸለውድ ኣው የጝ?

²⁸«ሲረነው ኣልቨዝ ማጥንስ ውርቃጥ ጨጝቅሽርና? እስቲ በራኸይዝቍ ኣቨቭድዛት ቓልጥና? ሰራሸነውዝ ልቕርዳቍም፣ ምቃቍምም።

²⁹ኣነጚ ንጕስ ሰለሙን እኳ እድቝጠ ጝክቭሪስቅ ጛጊስ ላይሸንትጘ ሲረየውም የኵን።

³⁰እፈ እምንት ጒድልድርነቅ ክታትርነ! እደረ ንጭ እትል ኣምር ልየል ሊቨው በራኸይዙ ፃቀድየንት እነሽ ሲሰው ኣቐውዝየ ክታትሰ ኣወሽ ሲሳው?

³¹እንዝ ማጥን፦ ‹ውር ዅንቅ? ውር ዝይንቅ? ውርስ ሲርንቅ? የነውዝ ጨጝቅሽትርነ› የኵን።

³²ኣኽዛቫንድም እንዛት ችጝጥጘ በነነውዝ ጨጝቅሽጘኵ፤ ክትን ግን ሲመይ ፅበው ክታይርድ እንቅ ክታጭስ በንዘው ኣቐጘ ኣርቐኵ።

³³ክትን ኣቕርናንድ እጝቂስቅ በዊል እደረት ምጝግስቲዝመ ፅድቂዝ በንጥን፤ ላየ ላየድቅ ክታጭስ ቈሺትጡ።

³⁴እንዝ ማጥን ኣምርስ ኻስቨነውዝ ጨጝቅሽትርነ፤ ኣምርቱ ጭጝቅትድ ኣምርስ ኣጡ፤ እጝቅ ግርየድ ጝቕምቱ ችግር ፃየው የጝ።»