Read xamtanga ማቲወስት ወንጌል 7 Bible Online

ማቲወስት ወንጌል 7 - xamtanga bible

ማቲወስት ወንጌል 7

¹«ክታግልም ፊርድሻይየጘ ክትንም ኣውማውትልቅ ፊርድትርነ።

²ላጢል ፊርድርነው ፍርዲዝጘ ክታግልም ፊርድሽጡ፤ ሚክትርነው ሚክረነይዝም ክታጭስ ቈሽ ሚክርሽጡ።

³ክእሊል ፅበው ግንድድየንት ቓሊጝቀ ኣወሽተ ክዝኒዝ እሊል ፅበው ንገቨድየንት ቓልዳ?

⁴ቈሽስ ክእሊል ግንድ ፅባ ወረጘ የጝ ክዝንት፦ ‹ክእሊል ፅበው ንገቨድ ፊስጨር ለው› ይረውድ?

⁵እፈ ተክዘረ ክተ! በዊል ክእሊል ፅበው ግንድድ ፊሽ፤ ጝዝግረ ክዝንት እሊል ፅበው ንገቨድ ፊስተ ማጥን ዊር ሽር ቓልትር።

⁶«ዋጥርጝ ክታቕምት ዃይጘጘ ቀድስሽተውድየንት ግፅጚዝ ይውትርነ፤ ጝታልኲዝ ደዳይጘጘም ክታእቍድየንት ጅቪዝ በዊል ማልትርነ።»

⁷«ጨውጥን! ነይሽትጡ፤ ደምዝጥን! ችጝትርንቅ፤ ቢለድ ኳኳ ሽጥን! ቢትጡ።

⁸ጨወውቅ ለምረኵ፤ ደምዘውም ችጘኵ፤ ቢለ ኳኳ ሸውዝም ቢተኵ።

⁹ክታማኽሊስ ጝዅርድ ኻበሸ ጨዋን ቕርጘ ይወው ኣይር እኩመ?

¹⁰ዊንስ ኻዘ ጨዋን ሲቭረ ይወው ዊንጡመ?

¹¹እደስለ ክትን ጭቕ ኣቕርን ፅብርና ክታቝርስ ቀሰው ይውት ይወነው ኣርቕርነውዝየ ሲመይ ፅበው ክታይርድሰ ጝት ጨወቊዝ ኣወሽ ቀሰው ይውትድ ኒቒስ ይዋው?

¹²ነስየ እቅ ክታጭስ ፃቭጥጘ በንርነውድየንትቅ ክትንም ጘጝት ፃቭጥን፤ ወሪትቱ ኽጊዝመ ነቭያታኒዝም ይጘውድ እኒንት የጝ።»

¹³«ኣፅረይ ሚረየንስ ጥውጥን፤ ድዘሪዝጐ ፊሰው ጒደነድ ኽየው፣ ሚረድም ፈራቐው የጝ፤ ጝግል ጥወቍ እቅድም ንቕፀቍ ጛይ።

¹⁴ርዅየይል ድውሰው ሚረድ ኣፀው፣ ጒደነድም ሲው የው የጝ፤ ጝግል ጥወቍ እቅድም ዊትቍ ጭቝ ጛይ።»

¹⁵«ጝታጊዝው ኣቒድ ናጥቀቍ ተኵልጥ ኣቕጝ ፅብጛ ቢቅ ተክጝ ክታማኽሊል ጥወቍ ኻሽወጥ ነቭያታኒስ ጣጝቅቅጭጥን።

¹⁶ጛትም ጝታሰቪዝ ኣርቕትርንቅ፤ ኣሚዙ ቍጥቋጠይስ ወይንዙ ፍረ፣ ኣቀቅመይስስ በለስዙ ፍረ ሊቅምሽጡመ?

¹⁷እኒዝጘም ቀሰው ዘፍድቅ ቀሰው ፍረ ፍርዘኵ፤ ጭቓ ዘፍድ ግን ጭቓ ፍረ ፍርዘኵ።

¹⁸ቀሰው ዘፍ ጭቓ ፍረ ፍርዝጠ ቸላውም፤ ጭቓ ዘፍም ቀሰው ፍረ ፍርዝጠ ቸላውም።

¹⁹ቀሰው ፍረ ፍርዛው ዘፍድቅ ቀቭሽት ልየይል ማልሽትጡ።

²⁰ኣቓንስቅም ኻሽወጥ ነቭያታንድዛት ጝታሰቪዝ ኣርቕትርንቅ።

²¹«ሲመይ ፅበው ይርት ፍቃድድየንት ፋፅመውድ የጝ ምጝግስተሰማያት ጥወውድጚ ይት፦ ‹ኣደረወ! ኣደረወ!› የውድቅ ምጝግስተሰማያት ጥዋውም።

²²ኣይንት ግርየይዝ ንቕፀቍ እቅ ይት፦ ‹ኣደረወ! ኣደረወ! ውረ ክሽⶔዝ ትንቪት ዊግቲነቅመ? ክሽⶔዝስ ጋኒናን ፊሲነቅመ? ክሽⶔዝስ ንቕፀቍ ታምራን ፃቪነቅመ?› ይጥቍ።

²³ያንም ኣይንድ፦ ‹እፈ ጭቕ እቅ ክታትርነ! ክታት ስሪስቅ ኣርቒቀርም፤ ይበዊስ እለ ፊጥን!› ይጭር።»

²⁴«ነስየ እኒን ይቃልድየንት ወሽ ፋፅመው እጅርድቅ ጝጝንድየንት ፃፀይል ሚስርት ተሰው ብልኽ እጅር ተከኵ።

²⁵ኻይሉ ስወ ሊቩ፤ ኵረም ኵርዱ፤ ፊግየም ፊጊሩ፤ እድየን ጝንድየንትም ትክቩ፤ ኣነጚ ጝንድየን ፃፀይል ሚስርትሽ ተሲታንስቅ ሊቪየውም።

²⁶እኒን ይቃልድየንት ወሽ ፋፅማው እጅርድ ቈሽ ጝጝንድየንት ሽነል ሚስርት ተሰው እጅር ተከኵ።

²⁷ኻይሉ ስወ ሊቩ፤ ኵረም ኵርዱ፤ ፊግየም ፊጊሩ፤ እድየን ጝንድየንትም ትክቩ፤ ጝንድየንም በውዝ ሊቩ፤ ጝሊቭንድም ኣየት ኣቑ።»

²⁸«እየሱስም እኒንት ክንስ ኻታንድ ኽዝቭድ ጝክንስኒዝ ዲንቅሹ።

²⁹ምላንሰንድም ጝታወሪትት ኽግ ክንሰጢዝጘ ኣዪጝቀ ስልጣን ጕርየዝጘ ፃቭ ክንሳ ዊናንስቅ የጝ።»