Read xamtanga ማቲወስት ወንጌል 8 Bible Online

ማቲወስት ወንጌል 8 - xamtanga bible

ማቲወስት ወንጌል 8

¹እየሱስም ኣበይስ ጊማንድ ንቕፀው ኽዝቭ ጝት ቲክኑ።

²ኣይንድ ላው ለምፃም[9] እጅር እየሱስትል ኣልት ጝበዊል ግርቨቭሽ፦ «ኣደረወ! ክት ፊቅድረውዝየ ይት ቓዝተ ቸልደኵ» ዩ።

³እየሱስም ጝናንድ ዘርጋቕ ዳቕ በር፦ «ፊቅጠኵን ቓጭ!» ዩ። ኣይንድም እጅርድ በውዝ ጝለምፂስ ቓዱ።

⁴እየሱስም እጅርድየንት፦ «እኒን ዊገድየንት ኣውማውስቅ ድቍረር ጣጝቅቅጭ፤ ዊገድ ግን ፊትር ክለምፂስ ቓድረጘ ክቕምት ካኽንዝ ቓሊሽ፤ እቂዝቅ ሚዝር ኣቓንስም ሙሴ ኣዘው ሚቨድ ኣልሽ» ዩ።

⁵እየሱስም ቅፍርናዀም ኻትመይል ጥዋንድ ላው ላዝ ኻልቀ እጅር ጝጐ ኣልት፦

⁶«ኣደረወ! ይኣገልጋይድ ድውይ ኣቕ ጭቕጘ ተሰቃይሻ ጝኒል ኽርይኩ» ዩ።

⁷እየሱስም፦ «ያን ተጥ ቓዝጭር» ዩ።

⁸ላዝ ኻልቀድ ግን፦ «ኣደረወ! ክት ይጝን ኣቒል ጥውራንስ ያን በቃቐርም ኣይቀር፤ ዊገድ ግን ላይ ቃልት ጭቝ ዊግጭ፤ ይኣገልጋይድም ቓድጡ።

⁹ያን ይቕምም ላጥዝ ኣዚጠር የጝ፤ ይጭስ ኣዚተቍ ይሳትቍ ዊተድርም እኵ፤ ጛጊስ ላውድ፦ ‹ፊጥ› ያንድ ፊረኵ፤ ‹ለው› ያንድ ቈሽ ተረኵ፤ ይኣገልጋይድም ያን፦ ‹እኒንት ሰራጭ› ያንድ ሰራሸኵ» ዩ።

¹⁰እየሱስም ጝዊሰይዝ ዲንቅሽ ጝት ቲክንጛ ዊነቍ እቂዝ፦ «እማንዝ የኵን፤ እስራየላኒስ እኳ እነየው ኽየው እምንት ችጚቀርም።

¹¹እማንዝ የኵን፤ ንቕፀቍ እቅ ምስራቂስ ምራቪስም ተርጥቍ፤ ምጝግስተሰማያትስም ኣቭርኻም ጅቅ፣ ይሳቅ ጅቅ፣ ያይቈቭ ጅቅ፣ ላብጠ መድል ጐይጥቍ።

¹²እኒን ምጝግስትድ ዊርስጥጘ ጥውሸቍ ዊነቍድ ግን ቢዘይዙ ጥመይል ማልሽትጥቍ፤ ጝግልም ሊዝዝመ እርቍጣን ገጫዘው ሚከረዝ ኣጡ» ዩ።

¹³እየሱስም ላዝ ኻልቀድየንት፦ «ፊጥ፤ ክእምንቲዝጘ ኣነ» ዩ። ጝኣገልጋይድየንም ኣይንድ ቓዱ።

¹⁴እየሱስም ቢጥሮስት ጝን ፊራንድ ቢጥሮስት ጣስን ብርዘው ፅውዘ ፅዊትር ኽርይር ዊንች።

¹⁵ጘጝም ጝርናንድየንት ዳቑ፤ ጝርፅውዘድም በውዝ ሊቁ፤ ጚይም ጕር ጛት ኣቭንውዝተ ኪርምች።

¹⁶ጘጝ ኵኑዊዝም ጋኒናንዝ ፃይሸቍ ንቕፀቍ እቅ ጝጐ ነስ፤ እየሱስም ጋኒናንድዛት ጝቃሊዝ ዊግተነውዝ ፊሱ፤ ፅውዝጅንጥድዛትም እጝቅትቅ ቓዙ።

¹⁷እንዝም ነቭይ ይሳያስ «ጘጝ ይናደውየድየንት ለምሩ፤ ይናፅውዘድየንትም መውሩ» የው ዊግተው ትንቪትድ ፋፅምሹ።

¹⁸እየሱስም ንቕፀቍ እቅ ጝጐ ኣኽቭሽጝ ቓላንድ ባኽሪዝ እጂል ከርጛንስ ኣዙ።

¹⁹ኣይንድም ላው ወሪትት ኽግ ክንሰተ እየሱስ ትጐ ኣልት፦ «ክንሰተወ! ክት ፊትረዊዝጐቅ ቲክንጭር» ዩ።

²⁰እየሱስም፦ «ቘፅልድ ቢ ፃየቍ ጛይ፤ ሲመይዝ ቢረቍ ዚልቅድም ጕጂ ፃየቍ ጛይ፤ እጅር ዅር ግን ጝቕምት ኣልሰነ ስፍረ እጀውም» የው ዊሱ።

²¹ጝክንደተ ኣቐው ላየ እጅር ቈሽ፦ «ኣደረወ! በዊል ፊጥ ይርት ዲቭ ተጨር ፊቅጭ» ዩ።

²²እየሱስም፦ «ክረቍድ ጝታክረቍድዛት ዲቭጝነ፤ ክት ኣራንድ ይት ቲክን» ዩ።

²³እንዝ ግረ እየሱስ ታጝኰይል ጥዉ፤ ጝክንደጥድም ጝት ቲክንጝ ጥውጝ ፊር።

²⁴ኣይንድም ኽየው ማቨል ባኽሪል ጕ ታጝኰድየንት ስርጢስቅ ኻውኩ፤ እየሱስ ግን ኽርይ ዊኑ።

²⁵ጝክንደጥድም ጝጐ ኣልትጝ ጒስነ፦ «እፈ ኣደረወ! ድዝኑና፤ እኒስ ቓዝ» ይ።

²⁶ጘጝም፦ «እፈ እምንት ጒድልድርነቅ ክታትርነ! ውርቃጥ እንቝጠ ጐውትርና?» ዩ። እንዝ ግረ ጕ ፊግየይዝመ ባኽሪዝ ጋስፁ፤ ኽየው ፀጥተም ኣቑ።

²⁷እቅድም፦ «ፊግየዝመ ባኽርዝ እኳ ጝጭስ ኣዚተቍ ኣወየው እጅርፈ?» ይጛ ጊርምሽ።

²⁸እየሱስም ባኽርድየንት ከር ገርገሲኑን የነው ኻግሪል ችጛንድ ጋኒናንዝ ፃይሸቍ ሊጘ እቅ መቃቭሪስ ፍጝ ጝት ዲምቅሽ፤ ጛይም ጭቕጘ ኻይልቍ ጭቕ ኣጛንስቅ ኣውማው እጅርቅ ጘጝ ጒደነይዝ ዲቍጠ ቸላውም ዊኑ።

²⁹ጛይም፦ «እደረት ዅርወ! ይናጅቅ ውርት ውላ ፃይረር? ግርየድ ችጚጝቀመ ይናት ኣሰቃይዝተ ተትሩ?» ይጛ ቓፅ።

³⁰ጛጊስ ዊቱ እክልድ የው ችጝሸው ስፍረይልም ንቕፀው ኣሰመዙ መጝገ ውላቕ ዊኑ።

³¹ጋኒናንድም እየሱስት፦ «እንዛይ እቂስ ፊስረር ኣረውዝየ ኣለቀይ እድየን ኣሰመ መጝገይል ጥውነር ፊቅጭ» ይጝ ጨው።

³²እየሱስም፦ «ፊጥን!» ዩ፤ ጋኒናንድም እቂስ ፍጝ ጘጝ ኣሰመ መጝገይል ፊርጝ ጥው፤ ኣሰመድም እጝቅቅ ውጥያ በዘይዝ ቍልቍለ ተጣድፍሻ ባኽሪል ጥው ክሩ።

³³ኣሰመ መጝገይዝ ምቕድም ሰይጝ ኻትመይዝጐ ጥውጝ ዊገድየንት፣ ጋኒናንዝ ፃይሸቍ እቂዝ ኣቐውድየንትም እጝቅትቅ ጂጝዝ።

³⁴እንዝ ግረ ኻትመይዙ ኽዝቭድቅ እየሱስት ቓልጠ ጝጐ ተሩ፤ ጝት ቓልጛንድም ጝታኻግርድየንት ሊቅ ፊራንስ ጨው።