Read xamtanga ማቲወስት ወንጌል 9 Bible Online

ማቲወስት ወንጌል 9 - xamtanga bible

ማቲወስት ወንጌል 9

¹እንዝ ግረ እየሱስ ታኰዝ ፃቭ ባኽርድየንት ከር ጝቕምት ኻትመይል ፊሩ።

²ጝጊስም እቅ ላው ድውይ እጅር ቃነ ቀሪዘዝ መውርጝ ጝጐ ፃይጝ ተር። እየሱስም ጝታእምንትድ ቓል ድውይድየንት፦ «እፈረ ክተ! ኣይዝዀች ክኽጥያትድ ይቅር ይሽትኩ» ዩ።

³ኣይንድ ላው ላው ወሪትት ኽግ ክንሰጥ፦ «እን እጅርድ እደረት ዛሸኰይ» ይጛ ጝታእዘኒዝ ኻስቭ።

⁴እየሱስም ጝታእዘኒዝ ኻስቭጘውድየንት ኣርቕ፦ «ውር ቃጥ የጝ ክታእዘኒዝ እነየው ጭቓ ዊገ ኻስቭርነውድ?

⁵ኣየውጚ! ‹ክኽጥያትድ ይቅር ይሽትኩ› የናንቲስመ ‹ጕር ፃጝ› የናንቲስ ኣውየን ቀልጡ?

⁶ዊገድ ግን እጅር ዅር እን ዝቨይስ ኽጥያት ይቅር ይጠ ስልጣን ፃየው ኣቐጘ ኣርቕጥን» የው ድውይ እጅርድየንት፦ «ጕ! ክኣረትድ መውትር ክጝን ፊጥ» ዩ።

⁷ጘጝም ጕ ጝጝን ፊሩ።

⁸ኽዝቭድም እኒንት ቓላንድ ጊርምሹ፤ እጅርዝ እነየው ስልጣን ይወው እደረትም ሚዝየንዙ።

⁹እየሱስም ጝጊስ ጕ ፊራንድ ማቲወስ የነው ቀረጥ ቀቨው እጅር ቀረጥ ቃርጠነ ስፍረይል ጐይ ቓል፦ «ለው ይት ቲክን» ዩ፤ ጘጝም ጕ ጝት ቲክኑ።

¹⁰እየሱስ ማቲወስት ጝን መድል ጐይ ፅባ፣ ንቕፀቍ ቀረጥ ቀቨቍዝመ ኽጥያትኝጥዝ ተርጝ ጝስመ ጝክንደጢዝ ጅቅ ዅጥጘ ላብጠ መድል ጐይ።

¹¹ፈሪሳንድም እኒንት ቓልጛንድ ጝክንደጥድዛት፦ «ክታክንሰተድ ቀረጥ ቀቨቊዝመ ኽጥያትኝጢዝ ጅቅ ላብጠ ኸኵሳ?» ይ።

¹²እየሱስም እኒንት ወሻንድ፦ «ኻይክም በንዘውድ ፅውዝጅንጥዝጚ ትኽንቍዝም ኣየው።

¹³ፊትርን፦ ‹ምስዋይት ኣዪጝቀ ስቝርት የጝ ቀነውድ› ይሽት ፃፍሸውድየንት ወረጘ የነት ኣቐጘ ኣርቕጥን። ምላሰንድም ኽጥያትኝጥድዛትጚ ፃድቃንድዛት ጭጝጨም ተጢቀር» ዩ።

¹⁴ኣይንድ ይዃንስት ክንደጥድ እየሱስ ትጐ ተርጝ፦ «ይናስመ ፈሪሳኒዝ ዊትርቅ ፃምነኵን፤ ክክንደጥድ ግን ፃማይጘውድ ወረጘ የጝ?» ይጝ ዋቕር።

¹⁵ጘጝም፦ «ኣስንድ ጛጅቅ ፅባ መጭድ ኻዝንጥጘ ጥውሸኵመ? ዊገድ ግን ኣስንድየንት ጛጊስ ቲዝጝ ፊስጘው ግርየ ተርጡ፤ ኣይንድ ፃምጥቍ።

¹⁶ኻፍለ ኣልቨል ኣይር ምልግቨ ሚልግቨው እጅርም እጀው፤ ሚልግቭሽ ግን ኣይር ምልግቨድ ኻፍለድየንት ወሰገቨ ቀደኵ፤ ቀዳድም ፈራቐኵ።

¹⁷እኒዝጘም ኣርጐው መርዝ ቝጥን ወይንዙ ሚዘ እቝረውም እጀው፤ እቝርሽ ግን መርድ ብጥቕ የኵ፤ ወይኒዙ ሚዘድም ቅብረኵ፤ መርድም ኣርወ እጀው ሊቭ እዳቐኵ። ዊገድ ግን ቝጥን ወይንዙ ሚዘድ ኣይር መርዝ እቝረነው ጥውሸኵ፤ እንዝም ጝታቪልጝቅ ቸለቸልሽጝ ዊንጘኵ» ዩ።

¹⁸እየሱስ እኒንት ዊግታ ሲጝቀ ላው ሽም እጅር ተር ጝበዊል ጝግምባሪዝ ሊቭ፦ «ይቝረ ክትርኵች፤ ተትር ክናኒዝ ዳቕ፤ ጚይም ቓድቲ» ዩ።

¹⁹እየሱስም ጕ እጅሪጅቅ ፊሩ፤ ጝክንደጥድም ጝት ቲክንጝ ፊር።

²⁰ጝጊስም ፅጭ ሊጘ ምት ምሉ ብር ቅብርጛ ተሰቃይሽራ ፅብረይ ላይ እውነ ጝእግርገይዝ ተትር ጝኣልቨይዙ ጫፍድየንት ዳቕች።

²¹ጝርእዘኒዝ፦ «ጝኣልቨይዙ ጫፍድ እኳ ዳቓን ቓድጭር» ይር ኻስቭር ዊንች።

²²እየሱስም ዋጥር የው ጝርት ቓል፦ «ኣይዝዀች ይቝረ! ክእምንትድ ቓዝኩ» ዩ። እውነየንም ኣይኒስ ኪርምር ቓድች።

²³እየሱስም ሽም እጅሪዙ ጝኒል ችጛንድ ኽዝንዙ ቱትለ ጣዘቍዝመ ፍውጛ ሊዘቍ እቅዝ ቓል፦

²⁴«እግልጥን! እፈረየን ኽርይርኵችጚ ክሪረይም!» ዩ። ጛይም እኒንት ወሽጛንድ ኣሹፍጛ እቘር።

²⁵እቅድም ፍጘት ግረ ኣቒ ጝኒል ጥው ጝርናንድ ፃዩ፤ እፈረየንም ጕች።

²⁶እን ዊገይዙ ጂጘድም ጛይ ኻግራኒልቅ ጂጚቱ።

²⁷እየሱስም ጝጊስ ጕ ፊራንድ ሊጘ ኻርብ፦ «ዳዊትት ዅርወ! ኣለቀይ ሳቝጭ!» ይጛ ቓፅጛ ጝት ቲክን።

²⁸ጘጝም ጝን ኣቒል ጥዋንድ ጛይም ጝት ቲክንጝ ጥው፤ ጘጝም፦ «ያን ክታእልጣንድ ቓዝጨ ቸለር ኣቐጘ ኣምንድርነኵመ?» የው ዋቕሩ። ጛይም፦ «ኣደረወ! የይ ኣምነኵን» ይ።

²⁹ጘጝም ኣይንድ ጝታእልጣንድዛት ጝናኒዝ ዳቕ በር፦ «ፈርጥን ክታእምንቲዝጘ ኣነ» ዩ።

³⁰ጝታኣልጣንድም ኣይንድ ቓድ፤ እየሱስም፦ «እን ዊገድየንት ኣውማውቅ ኣርቒነ!» የው ጣጝቅቅሱ።

³¹ጛይ ግን ፊርጝ ጘጝ ኻግሪልቅ እየሱስት ዊገድ ጂጝዝ።

³²ጛይ ፍጛንድም ላጥ እቅ ላው ጋኒንዝ ፃይሸው ድደ እጅር እየሱስ ትጐ ነስ።

³³ጋኒንድም እጅሪስ ፋንድ እጅርድየን ዊግተነው ኪርሙ፤ ኽዝቭድም ጊርምሸነውዝ፦ «እነየው ዊገ እስራየል ኻግሪስ ቓሊሽትም ኣርቓው» ይ።

³⁴ፈሪሳንድ ግን፦ «ጋኒናንድዛት ፊሰውድ ጋኒናነ ኻልቀይዝ የጝ» ይ።

³⁵እየሱስም ጝታምኵራቫኒል ክንሳ፣ እደረት ምጝጝስቲዙ ወንጌልድየንትም ሲቭካ፣ ኽዝቭድም ጝታፅውዘይስ ጝታቕጅወይስም ቓዛ ኻትምጢል ኪቋኒልቅም ጅልዋ ዊኑ።

³⁶ኽዝቭድም ምቓ እጀቍ ቢቂዝጘ ጨጝቅሽ፣ ከቨተም እጀው ኣቕ ቓል ኻዝኑ።

³⁷ጝክንደጥድዛትም፦ «ማፅወድ ኽየው የጝ፤ ሰራሸጥድ ኣጛንድ ዊትቍ ጛይ።

³⁸ነስየ ማፅወይዝ ወነድየንት ጝማፅወይዝ ሰራሸጥ እፃቓንስ ማጥን ጨውጥን» ዩ።