Read xamtanga ማርቈስት ወንጌል 1 Bible Online

ማርቈስት ወንጌል 1 - xamtanga bible

ማርቈስት ወንጌል 1

¹እኒን እደረት ዅር እየሱስ ክርስቶስት ወንጌሊዙ ኪርመነድ የጝ።

²እንም ነቭይ ይሳያስ፦ «እንወ፣ ክጕደነድ ኣስለው ይእፃሸረድ ክበዊል እፃጭር፤

³‹ኣደረት ጒደነድ ኣስልጥን፤ ጥርግየድየንትም ጭቅ ሽጥን› ያⶖ በራኸይስ ቓፀው እጅርዙ ድመ» የው ፃፈጘ የጝ።

⁴እንዝ ማጥን ጣምቀተ ይዃንስ፦ «ኽጥያቲዙ ይቅርተድ ችጝርናስ ማጥን ንስኻ ጥውርን ጣምቅጭጥን» የው ኣውጃ በራኸይዝ ተሩ።

⁵ይዅዳ ኻግርድቅ እጝቅ፣ እየሩሳልየም ኻትመይል ፅበውድቅ ጥቅለዝ ጝጐ ፊራⶖ፣ ጝኽጥያቲስም ነዚታⶖ፣ ዮርዳኖስ ዊርቨይል ይዃንስት ናኒዝ ጣምቅሻ ዊኑ።

⁶ይዃንስም ሲረውድ ግምል ፅቭቀዝ ተሲተው ኣልቨ፣ ጝከምረነድም ኣኽር ዊኑ፤ ጝዅረድም ኣብጠዝመ በራኸዙ ሳረዝ ዊኑ።

⁷ሲቭካንድም፦ «ፍጥ የር ጝፃቢዙ ፃልየድየንት እኳ እክስጨ ጥውጨቅ ይጊስ ጭቕጘ ዲቈው ይግረይል ተርጡ።

⁸ያን ክታት ኣቚዝ ጣምቀኵን፤ ጘጝ ግን ክታት መንፈስ ቅዱስዝ ጣምቅጡ» ያ ዊኑ።

⁹ኣይንድም እየሱስ ገሊለ ኻግሪል ችጝሽረይ ናዝሪት ኻትመየንቲስ ተር ዮርዳኖስ ዊርቨይል ይዃንስት ናኒዝ ጣምቅሹ።

¹⁰ይዃንስም በውዝ እየሱስ ኣቚስ ፈጘ ሲመይ ቢት መንፈስ ቅዱስ ርግቨት ተከዝ እየሱስትል ጊማንድ ቓሉ።

¹¹ኣይንድም፦ «ይቀነነር ይዅርድ ክት የጝ፤ ክቍዝ ዲስ የኵን» የው ድመ ሲመይስ ወይሽቱ።

¹²በውዝም መንፈስ ቅዱስ እየሱስት በራኸዝጐ ፊሱ።

¹³ሲጣኒዝም ፊትንሻ ኣርቨ ግርቅ በራኸይል ኣረዊታኒጅቅ ሳብጡ፤ መላካንድም ጝት ኣግልግል።

¹⁴ይዃንስም ፃይሽ ወኽኒ ጝንል ጥወት ግረ፣ እየሱስ እደረት ወንጌልድ ሲቭካⶖ ገሊለ ትጐ ተሩ።

¹⁵ሲቭካንድም፦ «ግርየድ ችጝኩ፤ እደረት ምጝግስትየንም ኣልትርኵች፤ ንስኻ ጥውጥን፤ ወንጌሊዝም ኣምንጥን» ያⶖ ዊኑ።

¹⁶እየሱስ ገሊለ ባኽሪዝ ጋቢዝ ዲቋንድ፣ ኻዘ ፃውረጥ ስሙንስመ ጝዝን እንድርያስስ ጝታመረቭድ ኣቚል ማልጛንድ ቓሉ።

¹⁷እየሱስም ጛት፦ «ላቝጥን ይት ቲክንጥን፤ ነስየ ይጭስ እቅ ፃውርድርነቅ ፃቭጭር» ዩ።

¹⁸ጛይም በውዝ ጝታመረቭድ በርጝ ጝት ቲክን።

¹⁹ዊቱ ዲቍ የጘም ዘቭዲወስት ቝር ያይቈቭስመ ይዃንስስ ታኰይል ኣቕጝ ጝታመረቭድ ኣስልጋⶖ ቓሉ።

²⁰ጘጝም በውዝ ጛት ጭጙ፤ ጛይም ጝታይር ዘቭዲወስት ጝሰራሸጢጅቅ ታኰይል በርጝ ጝት ቲክንጝ ፊርⶖ።

²¹ጝዝለም ቅፍርናዀም ትጐ ፊርⶖ፤ እየሱስም ቅዳምሲንቭት ግርየዝ ምኵራቭል ጥው ክንሰነው ኪርሙ።

²²ክንሰውድም ወሪትት ኽግ ክንስጢዝጘ ኣይጝቀ ኽየው ስልጣንዝ ዊናንስቅ ኽዝቭድ ጝክንስኒዝ ጊርምሹ።

²³ኣይንድም ጝታምኵራቭ ኣቒል ዊነው እርኵስ መንፈስዝ ፃይሸው እጅር፦

²⁴«ናዝሪትቱ እየሱስወ! ይን ክጅቅ ወረጘ ፃይነቅ? ይናት ድስተመ ተትሩ? ክት ኣው ኣረጘ ኣርቐኵን፤ ክት ቃል እደረት ቅዱስ የጝ!» የው ቓፁ።

²⁵እየሱስም ርኵስ መንፈስድየንት፦ «ዝም ይ! እጅሪስም ፍ!» የው ኣዙ።

²⁶እርኵስ መንፈስድየንም እጅርድየንት ማል ፍርግስ በር ጭቕጘ ቓፃⶖ እጅሪስ ፉ።

²⁷ኽዝቭድም እጝቅቅ ጊርምሸነውዝ፦ «እኒን ዊገድ ወረጘ የጝ? ስልጣን ፃየው ኣቭን ክንድጝ ኣጠት! እርኵሳን መንፈሳንድዛት እኳ ስልጣንዝ ኣዘኵ፤ ጛይም ኣዚትጘኵ» ያ ጝስመ ጝስ ዋቕረዋቕርሹ።

²⁸በውዝም ጝጂጘድ ገሊለት ጅልወይዝቍ ኻግራኒልቅ ወይሽቱ።

²⁹ምኵራቪስ ፈጘም ያይቈቭስመ ይዃንስስታጅቅ ኣቕ ስሙንስመ እንድርያስስታጝኒል ጥዉ።

³⁰ስሙንት ጣስንም ብርዘው ፅውዘዝ ፅዊትር ኽርይር ዊንች፤ ጛይም ጚ ፅዊተነውድ እየሱስስ ድቍⶖ።

³¹ጘጝም ጝርጐ ኣልት ጝርናንድ ፃይ ጒሱ፤ ብርዘው ፅውዘድም በውዝ ጝርጊስ ሊቁ፤ ጚይም ጕር ጛት ኣቭኑዝች።

³²ኰረየን ጥውረት ግረም፣ ድልሚዝ ጘጝ ጅልወይዙ ኽዝቭድ ፅውዝጅኒዝመ ጋኒናኒዝ ፃይሸቊዝዛት እጝቅትቅ እየሱስትጐ ነሱ።

³³ኻትመይዙ ኽዝቭድ እጝቅቅ ቢዘይል ኣኽቭሽ ዊኑ።

³⁴ጘጝም ቲተቲተው ፅውዘዝ ፅዊተቍ ንቕፀቍ እቅ ቓዙ፤ ንቕፀቍ ጋኒናንም ፊሱ፤ ዊገድ ግን ጋኒናንድ እየሱስት ኣው ኣቐጘ ኣርቕጝ ዊንጛንስቅ ውረውረቅ ዊግትጥጘ ፊቅድየውም።

³⁵ጛምርሲዝም ግረቨዝ ቅሸነይዝ ጕ ጝኒስ ፉ፤ ላው ገለል የው ስፍረልም ፊር ፃልያ ዊኑ።

³⁶ስሙንስመ ጝፃምጢዝም ጕጝ ጝት ደምዝጥጘ ኪርምⶖ።

³⁷ችጘጘም፦ «እጅር እጝቅ ክት ደምዘኵ» ይ።

³⁸እየሱስም፦ «ክንስጨ ማጥን እኒስ ጕን እት ጣቂል ፅበቍ ኪቋኒል ፊርነ፤ ምላሰንድም ያን ተጠውድ እንዝቍዝ የጝ» ዩ።

³⁹እንዝ ማጥን ጝታምኵራቫኒል ክንሳ ጋኒናንድም እቂስ ፊሳⶖ ገሊለት ምሉዝ ጅልዉው።

⁴⁰ላው ለምፃም[1] እጅርም እየሱስ ትጐ ተር ጝበዊል ግርቨቭሽ፦ «ፊቅድረውዝየ ይለምፂስ ቓዝተ ቸልደኵ» የው ጨዉ።

⁴¹እየሱስም ጝጭስ ጭቕጘ ኣርኽርኻንስቅ ጝናንድ ዘርጋቕ ላምጥጣ፦ «ፊቅድኩን ቓጭ» ዩ።

⁴²ኣይንድም በውዝ ጝለምፅድየን ጝጊስ ሊቁ፤ ጝፁዘይስም ቓዱ።

⁴³እየሱስም እጅርድየንት፦ «ጣጝቅቅጭ! እኒንት ኣውማውስቅ ድቍረር፤ ዊገድ ግን ጛጭስ ሚዝር ኣቓንስ ማጥን ፊትር ክቕምት ካኽንዝ ቓሊሽ፤ ክቓድቲዝ ማጥንም ሙሴ ኣዘው ምስዋይትድ ኣልሽ» የው ጣጝቅቅስ ሲነቭሱ።

⁴⁵እጅርድ ግን ፊረው ስፍረይልቅ ዊገድየንት ቐናዝ ዊግተነው ኪርሙ፤ ዊገድየንትም እጝቅዝቅ ጂጝዙ፤ እንዝ ምላሰንዝም እየሱስ ኻትምጢል እትላⶖ ጥውጠ ቸሊየውም፤ ዊገድ ግን ኻትመይዝ እድጐ ፅበው ሰውር ስፍረይል ፅቭጠ ኪርሙ፤ ኣቕሽም እቅ ስፍረ ጨቨቂስቅ ጝጐ ተረነው ቀቪየቊም።