Read xamtanga ማርቈስት ወንጌል 10 Bible Online

ማርቈስት ወንጌል 10 - xamtanga bible

ማርቈስት ወንጌል 10

¹እየሱስም ጝጊስ ጕ ይዅዳ ኻግሪል፣ ዮርዳኖስት እጂ ፅበው ጅልወይዝጐም ፊሩ፤ ኽዝቭድም እንደ ገነ ጝጋቢል ኣኽቭሹ፤ ጘጝም እንዝ ሚቅ ፃቫⶖ ዊነጘ ክንሱ።

²ፈሪሳኒስም ላው ላውድ ፊትንጠጘ በንጛንስቅ ጝጐ ኣልትጝ፦ «እጅር ጝውነት ዳቕርጠ ፊቅድሸኵመ?» ይጝ ዋቕር።

³እየሱስም፦ «ሙሴ እን ዊገይዝቍዝ ክታት ወረጘ የው ኣዙ» ዩ።

⁴ጛይም፦ «ሙሴመ ጝርድቕሪዙ ወረቂት ይው ዳቕራንስ ፊቅድኩ» ይⶖ።

⁵እየሱስም፦ «ሙሴ እኒን ኽግድየንት ፃፈውድ ክታዘንድ ደንዳን ኣቓንስቅ የጝ።

⁶ዊገድ ግን እደረ በውገ ፍጥርቲስ ግልወዝመ እውነስ ፃቭ ፋጥሩ።

⁷ኣቓንስቅም እጅር ጚር ጝኘት በረኵ፤ ጝእውነ ጅቅም ጣምርሸኵ።

⁸ጝታቪልም ላው ኣካል ኣጘኵ፤ ጝዝለ ጛይ ላው ኣካል ጛይጚ ሊጘም ኣየቍ።

⁹እንዝ ማጥን እደረ ላው ፃቨውድየንት ኣውማውም ቲዛው» ዩ።

¹⁰ጝኒል ጥውጛንድም ጝክንደጥድ እን ዊገድየንት ጕይጝ እንደ ገነ ዋቕር።

¹¹እየሱስም፦ «ኣውማው ጝእውነት ዳቕር ላየ እውነት ድወው እጅርድቅ ጝእውነት ዲጊል ሻርሙጠኵ።

¹²ጚይም ጝርጕርየት ዳቕርድር ላየ ግልወ ድውረውዝየ ሻርሙጥች የነት የጝ» ዩ።

¹³እቅም እየሱስ ኽፃናታንድዛት ጝናኒዝ ዳቓንስ ማጥን ጝጐ ነስⶖ፤ ጝክንደጥድ ግን ጛት ጋስፅⶖ።

¹⁴እየሱስም እኒንት ቓላንድ ቈጣሽ፦ «ኽፃናታንድዛት ይጐ ተርጝነ በጥን ኪልክልትርነ፤ ምላሰንድም እደረት ምጝግስትየን እንየቊዝ ጚ።

¹⁵እማንዝ የኵን፤ እደረት ምጝግስትየንት ኽፃኒዝጘ ለምራውድቅ እጝቅ ስሪስቅ ጝርግል ጥዋውም» ዩ።

¹⁶ኽፃናታድዛትም ኣቅቩ፤ ጝናንድም ጝታዲጊል እቍር በርኩ።

¹⁷እየሱስም ዊነው ስፍረይስ ጕ ጕደነድየንት ኪርማንድ፣ ላው እጅር ጝጐ ውጥያⶖ ተሩ፤ ጝበዊልም ግርቨቭሽ፦ «ቀሰው ክንሰተወ! ዘላልምዙ ርዅየ ዊርሳንስ ወረጘ ፃቭጨ ጥውሽኵ» ዩ።

¹⁸እየሱስም፦ «ወረጘ ይት ቀሰው ይራ? ላው እደረትለ ቀሰውም እጀው።

¹⁹ትዛዛንድዛት ኣርቕረኵ፤ ቁተ፤ ሻርሙጥተ፤ ስተ፤ ኻሽትዝ ሚዝርድተ፤ ኻጝስተ፤ ኪር ክኘት ኪብርዝ» የው ዊሱ።

²⁰እጅርድም፦ «ክንሰተወ! እንዛትመ እጝቅትቅ መልውሲጘቀ ኪርም ሊሚጥኩን» ዩ።

²¹እየሱስም እጅርድየንት ቓል ቀኑ፦ «እደስለስ ላው ዊገ እዳቐኵ፤ ፊትር ፃይረው ኻፍትድቅ ቂ፤ ጊንዝቭድም ድኺዝ ይይ፤ ሲመይስ ንቕፀው ኻፍት ችጝትር፤ ጝዝግረ ለው ይት ቲክን» ዩ።

²²እጅርድም እኒንት ወሻንድ ጭቕጘ ኻዝኑ፤ ንቕፀው ኻፍትም ፃየው ዊናንስቅ ቲክዛ ጝጝን ዋጥሩ።

²³እየሱስም ዋጥር የው ቓል ጝክንደጥድዛት፦ «ኻፍታማኒዝ እደረት ምጝግስትየንትል ጥወነው ውርጘ ቺግርዘው የጝፈ!» ዩ።

²⁴ጝክንደጥድም ጝዊገይዝ ጊርምሽⶖ፤ እየሱስ ግን እንደ ገነ ዊስ፦ «ይቝርወ! እደረት ምጝግስትየንትል ጥወነው ውርጘ ቺግርዘው የጝፈ።

²⁵ኻፍታም እጅር እደረት ምጝግስትየንትል ጥወነዊስ ግምለ ሚርቨዙ እልዝ ጭልቓን ቀለኵ» ዩ።

²⁶ጝክንደጥድም በውገትዊስ ሽ ጭቕጘ ጊርምሸነውዝ፦ «እደስለ ኣው የጝ ቓድጠ ቸለድ?» ይⶖ።

²⁷እየሱስም ጛት ቓላ፦ «እርግጥ እን ዊገድ እጅርዝ ቸልሻውም፤ እደረስ ግን ቀላል የጝ፤ እደረስ ቸልሻው ዊገም እጀው» ዩ።

²⁸ቢጥሮስም፦ «እንወ! ይን እጝቅትቅ በርን ክት ቲክኑን» ዩ።

²⁹እየሱስም፦ «እማንዝ የኵን፤ ይቍዝመ ወንጌልዝቍዝ የው ጝጝንድየንት ዊንም ጝፅንድዛት ዊንም ጝኘት ዊንም ጚርት ዊንም ጝቝርት ዊንም ጝቺዝጝድየንት በረውድቅ፣

³⁰ነን እን ዚምኒዝ ስድት ጅቅ፣ ጝጝንጥድ፣ ጝፅንት፣ ጝኵየንጣንድ፣ ጝቝርት፣ ጝቻፅጝድ እፅቭ ድርቭ ለምርጡ፤ ተረው ኣልሚዝም ዘላልምዙ ርዅየ ዊርስጡ።

³¹ዊገድ ግን ንቕፀቍ ነን በውጥ ኣቐቍ እገጥ ኣጥቍ፤ ነን እገጥ ኣቐቍም በውጥ ኣጥቍ» ዩ።

³²እየሩሳልየም ትጐ ፊርጥጘ ጒደነይል ፅብጛⶖ፣ እየሱስ ጝታበው በዊል ፊራⶖ ዊኑ፤ ጝክንደጥድም እንዝ ጊርምሽⶖ፣ ላጥ ጝት ቲክነቍድ ቈሽ ጐውትጝ ዊንⶖ፤ እንደ ገነም ፅጭ ሊጘድዛት ኽዝቪስ ቲዝ ወረጘ ጝግል ችጝጠ ኣቀጘ እንት የው ድቁ፦

³³«እንወ! እየሩሳልየም ፍንቅ፤ እጅር ኵር ካኽነጣነ ኻልቅጢዝመ ወሪትት ኽግ ክንሰጢዝ ዲቍሽት ይውሽትጡ፤ ጛይም ክርጘዙ ፍርድ ፊርድጥቍ፤ ኣኽዛቫኒዝም ዲቍስጝ ይውጥቍ።

³⁴ኣኽዛቫንድም ኣፊዝጥቍ፤ ጝዲጊልም ትፍ ይጥቍ፤ ድድብጥቍ፤ ጝዝ ግረም ቍውጥቍ፤ ጘጝ ግን ሻቘ ግርቅዝ ግረ ክርጘይስ ጕጡ» ዩ።

³⁵ዘቭዲወስት ቝር ያይቈቭስመ ይዃንስስ እየሱስ ትጐ ኣልትጝ፦ «ክንሰተወ! ጨውነውድየንት እጝቅትቅ ፃቭተ በነኵን» ይ።

³⁶ጘጝም፦ «ወረጘ ፃቭጨ በንርና?» ዩ።

³⁷ጛይም፦ «ክምጝግስቲዙ ክቭሪዝ ይናጊስ ላውድ ክለዊዝ ላውድ ክፃግቪዝ ጐይናንስ ፊቅጅ» ይⶖ።

³⁸እየሱስም፦ «ጨውርነውድየንት ኣርቓይርነቅም፤ ያን ዝቀው ሚከረይዙ ፅወድየንት ዚትርነ፣ ያን ጣምቅጨው ጥምቅትድ ጣምቅሽትርነ ቸልትርንቅመ?» ዩ።

³⁹ጛይም፦ «የይ ቸልንቅ» ይⶖ፤ እየሱስም፦ «ያን ዝቀው ፅወድየንት ዚትርንቅ፤ ያን ጣምቅጨው ጥምቅትድም ጣምቅሽትርንቅ።

⁴⁰ዊገድ ግን ይለወይዝመ ይፃግቪዝ ጐየነውድ እደረ ኣስለቊዝ ይውሽተውጚ ያን ይወው ዊገም ኣየው» ዩ።

⁴¹ላጥ ፅቃ ክንደጥድም እን ዊገድየንት ወሽጛንድ ያይቈቭስመ ይዃንስስታል ኻልክሽ።

⁴²እየሱስም እጝቅትቅ ጝጐ ኣኽቭ፦ «ኣኽዛቫነ ኻልቅጥ ይሽተቍድ ጝታኽዝቭድ ኻይልዝ ቅመቍ ኣጘጘ፣ ጝታሽማንድም ጛግል ስልጣን ፃየቍ ኣጘጘ ኣርቕርነኵ።

⁴³ክታጭስ ግን እነየው ኣጠ ጥውሻውም፤ ክታማኽሊስ ኣውማው ኽየው ኣጠ በነውድቅ ክታኣገልጋይ ኣነ።

⁴⁴ንየቱ ኣጠ በነውድም እጝቅት በረ ኣነ።

⁴⁵እጅር ዅርም ተረውድ ኣግልግልጠ፣ ጝርዅየድየንትም ንቕፀቊዝ ጝታቺ ዲቊስ ይውጠጚ ጝት ኣግልግልጛንስም ኣየው» ዩ።

⁴⁶እየሱስስመ ጝክንደጢዝም እያሪኰ ኻትመይል ተርⶖ፤ ንቕፀው ኽዝቭ ጅቅም ኣቕጝ እያሪኰስ ፍጛንድ፣ ጠሚወስት ዅር ኻርቨ በርጠሚወስ ጒደን ደዪል ጐይ ጨዋⶖ ዊኑ።

⁴⁷ጘጝም ጝዝ ዲቈውድ ናዝሪቱ እየሱስ ኣቐጘ ወሻንድ፦ «ዳዊትት ዅር እየሱስወ! ኣለቀይ ይቅር ይ» ያⶖ ቓፅጠ ኪርሙ።

⁴⁸ንቕፀቍ እቅም፦ «እፈ ዝም ይ!» ይጝ ጋስፁ፤ ጘጝ ግን፦ «ዳዊትት ዅርወ! ኣለቀይ ይቅር ይ!» ያⶖ ቐናዝ ቓፁ።

⁴⁹እየሱስም ችብር የው፦ «ጭጝጥን» ዩ፤ ጛይም ኻርቨድየንት፦ «ኣይዝዀች ጕ፤ እየሱስ ጭጘኵ!» ይⶖ።

⁵⁰ጘጝም ጝኣልቨድ ማል ብድግ የው ጕ እየሱስ ትጐ ፊሩ።

⁵¹እየሱስም፦ «ወረጘ ፃቫንስ የጝ በንረውድ?» ዩ፤ ኻርቨድም፦ «ክንሰተወ! ቓልጨ በነኵና» ዩ።

⁵²እየሱስም፦ «ፊጥ፤ ክእምንትድ ቓዝኩ» ዩ፤ በውዝም ጝልጣንድ ቓድⶖ፤ ጒደነይስም እየሱስት ቲክን ፊሩ።