Read xamtanga ማርቈስት ወንጌል 11 Bible Online

ማርቈስት ወንጌል 11 - xamtanga bible

ማርቈስት ወንጌል 11

¹ጛይም እየሩሳልየምት ጣቂል ደቭረ ዘይት ኣበይዝ ጋቢል ችጝሸቍ በተፋግየ ትጐስመ ቢታንየ ትጐስ ችጛንድ እየሱስ ጝክንደጢስ ሊጘድዛት፦

²«ክታበዊል ችጝሸው ኪዊል ፊጥን፤ ጝግልም እጅር ድቃር ኣርቓው እወል እፅቍሽ ችጝትርንቅ፤ ጝትም እክስርን እንጐ ነስጥን።

³ኣውማው እጅር፦ ‹ወረጘ የጝ እኒንት ፃቭርነውድ?› የው ዋቕርሽ፦ ‹ኣደረ በናንስቅ የጝ፤ በውዝ ዊስ በርስጡ› ይርን ድቍጥን» የው እፃቑ።

⁴ጛይም ፊርⶖ፤ እወልድየንትም ጝን ሚረይዙ ጒደነይል እፅቍሽ ችጝጝ እክስⶖ።

⁵ጝግል ችብረቍ እቂስም ላው ላውድ፦ «ውርፃቭትርነ የጝ እወልድየንት እክስርነውድ?» ይⶖ።

⁶ጝክንደጥድም እየሱስ የውድየንት እቂዝ ድቍ፤ ጛይም ፊቅድⶖ።

⁷እወልድየንትም ጝጐ ነስጝ ጝታልቨድየንት ጝሲጊል ፃቭⶖ፤ እየሱስም ድቃሩ።

⁸ንቕፀቍ እቅም ጝታልቨድየንት ጒደነይል ወፃቕⶖ፤ ላጥድ ቈሽ በራኸይስ ለምለም ዘፍዙ ጫፍ ጫፍድየንት ጫንቕዝጛ ዝቨይል ጒዝጒዝⶖ።

⁹በዊል ቃውሰቍ እቂዝመ እግርግረይል ቲክነቍ እቂዝም ኽየው ድመዝ፦ «ዀሳይነ! ኣደረት ሽⶖዝ ተረውድ በርክሸው የጝ።

¹⁰ተትረይ ይናኣይር ዳዊትት ምጝግስትየን በርክሽረይ ጚ፤ ዀሳይነ[7] ኣርያምስ!» ይⶖ።

¹¹እየሱስም እየሩሳልየም ችጙ፤ ጝዝ ግረም መቅደስ ጝኒል ጥው ጅልወይል ፅበውድየንትቅ ቓሉ፤ ግርየድም ኵን ዊናንስቅ ፅጭ ሊጘይጅቅ ኣቕ ቢታንየ ፉ።

¹²ጝኣምርሲዝም ቢታኒየስ ፍጛንድ እየሱስ ግድርዱ።

¹³ኻፀ ፃይረይ በለስ ዘፍትም ከስ ቓል ምናልቫች ፍር ችጝሽረይ ኣርሸ የው ጝርጐ ፊሩ፤ ዊገድ ግን በለስዙ ወቅት ኣየው ኣቓንስቅ ኻፀዝለ ላየ ውረውረቅ ችጚየውም።

¹⁴ዘፍሸንትም፦ «ነንስ ኪርም ዘላልም ኣሽ ክጊስ ኣውማውቅ ፍር ዂነ» ዩ፤ ጝክንደጥድም እኒንት ዊግታንድ ወሽ።

¹⁵እየሩሳልየምም ዋጥር፤ መቅደስ ጝኒልም ጥው ጝግል ኣቕጝ ቅየቊዝመ ጅቨቊዝ ጅግዝጠ ኪርሙ፤ ቍርሻን ላውጠቊዙ ጠረቢዘይዝመ ርግቫን ቅየቊዙ ወምበሪዝ ጊልብርብሩ።

¹⁶ኣውማውድቅ ጐዝ መውር መቅደስ ጝኒዙ ኻፅር ኣቒል ዲቋየጘ ኪልክሉ።

¹⁷ክንሳንድም፦ « ‹ይጝንድ ኽዝቭዝቅ ፀለውትዙ ጝን ይሽተኵ!› ይሽት ፃፍሺየውመ? ክትን ግን ቓፅጘ ጭቭረነ ጋ ፃቭርኑ» ዩ።

¹⁸ካኽነጣነ ኻልቅጢዝመ ወሪትት ኽግ ክንሰጢዝም እኒንት ዊግታንድ ወሽ፤ ኽዝቭድም እጝቅ ጝክንስኒዝ ጊርምሻ ዊናንስቅ ጐውትⶖ፤ እንዝ ማጥን ጝት ኣወሽጝ ድስጥጘጘ መለ ደምዝነው ኪርም።

¹⁹ኵናንድም እየሱስስመ ጝክንደጢዝ ኻትመይስ ፍጝ ፊርⶖ።

²⁰ጝኣምርሲዝም ግረቨዝ ጒደነይዝ ዲቍጛንድ በለስሸን ጝርስሪስ ኪርምር ይዝር ቓልⶖ።

²¹ቢጥሮስም ዊገድ ትዝ የው እየሱስት፦ «ክንሰተወ! እንወ እፅረይ በለስ ዘፍሸን ይዝርኵች» ዩ።

²²እየሱስም ዊስ እንት ዩ፦ «እደረት ኣምንጥን።

²³እማንዝ የኵን፤ ኣውማው እጅር እን ኣበድየንት፦ ‹እኒስ ኒቅልሽር ባኽሪዝጐ ዊርውርጭ› ያን፣ እንም ኣጠጘ ጝዘኒዝ ተጠራጥርሺጝቀ ኣምናን ጝጭስ ኣጡ።

²⁴እንዝ ማጥን ፀለውትዝ ጨውርነውድየንትቅ ለምትርነጘ ፃቭርን ኣምንድርናን ጘጝ ክታጭስ ፃቭሽትጡ የኵን።

²⁵እኒዝጘም ፀለውትዝ ችብትርናንድ ሲመይቱ ክታይር ክታኽጥያትድየንት ይቅር ያንስ ማጥን ክትንም እጅርል ፃይርነውድየንት እጝቅትቅ ይቅር ይጥን።

²⁶ክትን ይቅር ያይርነቅ ኣርነውዝየ ግን ሲመይቱ ክታይርድ ክታኽጥያትድ ይቅር ያውም።»

²⁷እንደ ገነም እየሩሳልየም ተርⶖ፤ እየሱስም መቅደስ ጝኒዙ ኻፅር ኣቒል ጅልዋንድ፣ ካኽነጣነ ኻልቅጥድ፣ ወሪትት ኽግ ክንስጥድ፣ ሽመቅልድም ጝጐ ኣልትጝ፣

²⁸«እንዛይ ዊቅድዛት ፃቭረውድ ወረጘዙ ስልጣኒዝ ይጝ? እንዛት ፃቭተስ እን ስልጣንድ ክጭስ ነየውድ ኣው የጝ» ይⶖ።

²⁹እየሱስም፦ «እስቲ ያንም ላው ዋቕረ ዋቕርጨ፤ ክትንም ዊስጥን፤ ያንም እንዛይ ዊቅድዛት ወረጘዙ ስልጣንዝ ፃቨር ኣቐጘ ድቍጭር።

³⁰ይዃንስት ጥምቅትድ ተረውድ ሲመይስመ ዊንስ እጅሪስ ዊኑ? እስቲ ዊስጥን» ዩ።

³¹ጛይም ጛስ ጛይ፦ « ‹ሲመይስ የጝ› ይናን፦ ‹እደስለ ውረ ጝት ኣምኒርነቅ?› ይጡ፦

³²‹እጅሪስ የጝ› ይናንሳ?» እኒንት ያይጘጘ ኽዝቭድ እጝቅ ይዃንስት እማንተው ነቭይ ኣቐጘ ኣምናⶖ ዊናንስቅ ጐውትⶖ።

³³እንዝ ማጥን፦ «ኣርቓይነቅም» ይጝ ዊስⶖ፤ እየሱስም፦ «እደስለስ ያንም እንዛይ ዊቅድዛት ወረጘዙ ስልጣንዝ ፃቨር ኣቀጘ ድቈቅም» ዩ።