Read xamtanga ማርቈስት ወንጌል 13 Bible Online

ማርቈስት ወንጌል 13 - xamtanga bible

ማርቈስት ወንጌል 13

¹እየሱስ መቅደስ ጝኒስ ፋንድ ጝክንደጢስ ላውድ፦ «ክንሰተወ! ቕርጝድ ኣወየቍ ኣጘጘ፣ ኽንፀድም ኣወየው ሸገ ኣቐጘ ቓል» ዩ።

²እየሱስም ዊስ፦ «እንዛይ ኽየቍ ኽንፅጥድ ቓልድረኵመ? ላው ቕርጘድ ላዊል ኣቐጘ እዳቓውም፤ እጝቅቅ ፋይተው የጝ» ዩ።

³እየሱስም መቅደስ ጝኒዝ በውዝበው ደቭረ ዘይት ኣበይል ጐይ ፅባⶖ ቢጥሮስ፣ ያይቈቭ፣ ይዃንስ፣ እንድርያስ ጝጐ ተርጝ፦

⁴«እኒን ኣውን ኣቐው ኣቐጘ ድቍ፤ እንቅ ፋፅምሽጠ ኣልተጘ ቓሊሰው ምልክትድ ወረጘ የጝ?» ይጝ ዋቕር።

⁵እየሱስም እንት ዩ፦ «ኣውማውቅ ቀሳየጘ ጣጝቅቅጭጥን።

⁶ንቕፀቍ እቅ፦ ‹ያን ክርስቶስ የጝ› ይጛⶖ ይሽዝ ተርጥቍ፤ ንቕፀቍድዛትም ቀስጥቍ።

⁷ኣጭነዝመ ኣጭነዙ ጂጘዝ ወሽርናንድ ዳንግፅትርነ፤ እንቅ ኣጠ ግድ የጝ፤ ኻትሸነድ ግን ገነ የጝ።

⁸ኽዝቭ ኽዝቪል፣ ምጝግስት ምጝግስቲል ጕጡ፤ ንቕፀቍ ስፍሊልም ዝቨዙ ኒንቀሸነዝመ ግድርዝ ኣጡ፤ እንዛይ እጝቅ ቅምትዙ ጭጝቅት ኪርመን ጛይ።

⁹«ክታቕምስ ጣጝቅቅጭጥን፤ እቅም ክታት ፍርድ ሸጐውል ዲቍስጝ ይውጥቍ፤ ምኵራቭ ጨቨቅም ክታት ጊርፍጥቍ፤ ይሚዝረጫንም ኣትርነ ማጥን ይቍዝ ቅመቊዝመ ነጕሳኒዝ በዊል ችብርትርንቅ።

¹⁰በውርስ ግን ወንጌል ኣልሚዙ ኽዝቪዝቅ ሲቭክሽጠ ጥውሸኵ።

¹¹ፃይሽርን ፍርድል ኣልትርናንድ ኣይንድ ክታጭስ ነይሽተውድየንት ዊግትጥንጚ፦ ‹ወረጘ ዊግጭር ኣጢ?› ይርን በውርስርን ጨጝቅሽትርነ፤ ዊግተውድ መንፈስ ቅዱስጚ ክትንም ኣይርነቅ።

¹²እጅር ጝዝንት፣ ኣይርም ጝዅርት ክርጘል ዲቍስ ይውጡ፤ ዅል ጝታኣቅሊል ኣምፅጥቍ፤ ቁጥቍም።

¹³ይቍዝም እቀ በዊልቅ ሽክሽርነቅ ኣትርንቅ፤ ዊገድ ግን ኻትሸነይል ኣሽ ፀናቐውድ ጘጝ ቓድጡ።

¹⁴«ድዘርዙ ርኵስነድ ጝጭስ ጥውሻው ስፍረይል ችብር ቓልድርናንድ እኒንት ኣንቫቪድ ኣስክስነ፤ ኣይንድ ይዅዳ ኻግሪል ፅበቍድ ጅልወይዝጐ ሰይጝነ።

¹⁵ኽድም ዲግል ዊነውድም ጊሚነ፤ ጝንቭርትድም ፊስጠ ጝኒል ጥዊነ።

¹⁶ቺዝጝል ዊነውድም ጝኣልቨድየንት ፊስጠ ዋጥሪነ።

¹⁷እንዛይ ግርቂዝ ጊዙረቍዝመ ኒቭሰቍ መሉጅንጥዝ ወየው!

¹⁸እንቅ ጫረዝ ኣቓየጘ ፃልይጥን።

¹⁹ኣይንድ እደረ በውገ ፍጥርትድ ፋጥረው ግርየይስ ኪርም ነኳን ኣሽ እትሊየው፣ ነስየ ተረው ዚምኒዝም እትላው ኽየው ሚከረ ኣጡ።

²⁰ኣደረ ጛይ ግርቅድዛት እጅጝዚየው ኣቓን ኣውማውቅ ቓዳውም ዊኑ፤ ዊገድ ግን ማርፅሽተቍ እቂዝ ማጥን የው ግርቅድዛት እጅጝዝጡ።

²¹ኣይንድ ኣውማውቅ፦ ‹እንወ ክርስቶስ እንል የጝ!› ዊንም፦ ‹እንወ እቲል የጝ!› ይሽ ኣምንትርነ።

²²ኻሰትኝጥ ክርስተውሳንዝመ ኻሰተኝጥ ነቭያታንዝ ተርጥቍ፤ ዲንቅሰቍ ምልክታንዝመ ታምራንዝ ፃቭጛⶖ ቸልጛንስ ማርፅሸተቍድዛት እኳ ቀስጥቍ።

²³እንዝ ማጥን ጣጝቅቅጭጥን፤ ግርየድ ችጚጝቀ እጝቅትቅ ድቍኩን።

²⁴«ኣይንድ እን ሚከረይዝ ግረ፦ ‹ኰረየን ጥምትቲ፤ ኣርቨየንም ጝርብርኻንድ ይዋይም።

²⁵ፅግልውጥድም ሲመይስ ኣርግፍሽጥቍ፤ ሲመይ ፅበቍ ኻይላንድም ተናውጥሽጥቍ።›

²⁶ኣይንድ እጅር ዅር ኽየው ኻይልዝመ ግርመዝ ድምነዝ ፃቭ ተራንድ ቓልሽትጡ።

²⁷ጘጝም ጝመላካንድ እፃቕ ኣልሚዝቍ ሲዘ ማእዘናኒስ ዝቨት ደርቸይስ ኪርም ሲመይት ደርቸይል ኣሽ ጝማርፅሽተቍድዛት ኣኽቭጡ።

²⁸«ተከድየንትም በለስ ዘፍሸንቲስ ክንድጥን፤ ጝርጫፋንድ ጭጭቭጛንድ፣ ጝርኻፅድም ሊልምድጛንድ ኣይንድ እየ ችጘጘ ኣርቕትርንቅ።

²⁹እኒዝጘም ክትን እንቅ እጝቅ ኣቐጘ ቓልድርናንድ እጅር ኵር ተረው ግርየድ ኣልተጘ፣ ሚረይልም ኣቐጘ ኣርቕጥን።

³⁰እማንዝ የኵን፤ እንዛይ ዊቅድ ፋፅምሽጥጚስቅ እን ዅለድ ዲቋውም።

³¹ሲመይስመ ዝቨስ ዲቍጥቍ፤ ይቃልድ ግን ስሪስቅ ዲቋውም።»

³²«እቸን ግርየየንስመ ሰትሸንስ ግን ኣይር ኣቕሽጚ ሲመይ ፅበቍ መላካንድም ኣጝሽ ዅርም ኣቕሽ ኣውማውቅ ኣርቓውም።

³³እንዝ ማጥን ግርየድ ኣውን ኣቐጘ ኣርቓይርነቅም፤ ኣቓንስቅም ጣጝቅቅጭጥን፤ ቲጊይጥን፤ ፃሊጥንም።[9]

³⁴እንም ጝንድየንት በር እክል ኻግርል ፊረው እጅርድ ተከኵ፤ ጘጝም ጛኣገልጋያንድዛት እጝቅትቅ ጝታይተሰቭል ውላዙ፤ ዘቨኘድም ነቃቕ ሊሚዳንስ ኣዙ።

³⁵ነስየ ጝኒዝ ወነድ ድልሚዝ፣ ኻረ ግቨሪዝ፣ ጂሩ ዋኒዝ ዊንም ቢየድ ፋንድ ተርጠጘ ኣርቓይርነቅም፤ ኣቓንስቅም ቲግይርን ሊሚድጥን።

³⁶ድጝግት ተራንድ ኽርይርን ችጛየጘ ቲጊጥን።

³⁷ክታጭስ ድቈውድየንት ላጢዝም እጝቅዝቅ፦ ‹ቲግይርን ሊሚድጥን› የር ድቈኵን።»