Read xamtanga ማርቈስት ወንጌል 14 Bible Online

ማርቈስት ወንጌል 14 - xamtanga bible

ማርቈስት ወንጌል 14

¹ፈዝየይዝመ ቅጣ ዀነው በሊዝ ኪብርጠ ሊጘ ግርቅ እዳጛንድ፣ ካኽነጣነ ኻልቅጢዝመ ወሪትት ኽግ ክንሰጢዝ እየሱስት ፃይጝ ቍውጥጘ መለ ደምዝጛⶖ ዊንⶖ።

²ኣነጚ፦ «ኽዝቭድ ኣመፅ ጕያየጘ ኣምርበሊዝ ኣቒነ» ይጛⶖ ዊን።

³እየሱስም ቢታንየስ ለምፃም ስሙን የነው እጅሪዝ ጝኒል መድል ጐይ ፅባⶖ ላይ እውነ ንፅዅ ናርደውስዝ ኣስልኑ ጝወየድ ጭቕጘ ኪብረው ሽቱ እቻቐው ኣልቫስጥረውስ ብልቃጥ ፃይር ተርች፤ ብልቃጥድየንትም ኪልድር ሽቱድየንት ጝኣውሪል ቅብስች።

⁴ጝግል ዊነቊስም ላው ላውድ ኻልክሽጝ ጛስ ጛይ፦ «እኒን ሽቱድ ወረጘ የነት የጝ ቢክነውድ?

⁵ሻቘ ላ ዲናርዝ ንየዝ ቅይሽ፣ ጊንዝቭድ ድኽዝ ይውሽትጠ ዊኑ» ይ፤ እውነየንትም ኒቕፍⶖ።

⁶እየሱስ ግን፦ «ውር ቃጥ ጝርት ቺግርዝርና? በጥን፤ ጚ ይግስ ቀሰው ዊገ ፃቭርኵች።

⁷ድኽድ ዊትርቅ ክታጅቅ ጛይ፤ በንርነው ግርየይዝቅ ከቭትርነ ቸልድርነኵ፤ ያን ግን ዊትርቅ ክታጅቅ ፅበቅም።

⁸ጚ ቸልደውድየንት ፃቭርኵች፤ ይመቃቭሪዝ ኣቓንስ ማጥን ይሰወነትድ በውርስር ሽቱዝ ቓስርኵች።

⁹እማንዝ የኵን፤ እን ወንጌልድ ኣልሚልቅ ሲቭክሻንድ ኣውማው ስፍረይልቅ ጝርኻስቭሸነ ኣቕ ድቍሽትጡ» ዩ።

¹⁰እንዝ ግረ ፅጭ ሊጘይስ ላውድ ኣስቈረውትቱ ይዅዳ፣ እየሱስት ዲቍስ ይውጠ ካኽነጣነ ኻልቅጢል ፊሩ።

¹¹ጛይም እኒንት ወሽጛንድ ዲስ ይⶖ፤ ጊንዝቭም ይውጥጘ ቃል ጥውⶖ፤ እንዝ ማጥን ጝት ዲቍስ ይውጠ ሚቸው ግርየ ሊሚዳⶖ ዊኑ።

¹²ፈዝየይዝመ ቢገ ዝውሽተው ቅጣ ዀነው በሊዙ በወትረ ግርየይዝ ጝክንደጥድ እየሱስ ትጐ ኣልትጝ፦ «ፈዝየት በሊዙ ድረይድየንት ኣውል ኣስልነ በንረኵ?» ይⶖ።

¹³ጘጝም ጝክንደጢስ ሊጘድዛት፦ «ኻትመይዝጐ ፊጥን፤ ጝጊስም ጭን ኣቝ መውረው እጅር ችጝትርንቅ፤ ጝትም ቲክንጥን።

¹⁴እጅርድ ጥወው ጝኒልም ፊትርን ጝኒዝ ወነድየንት፦ ‹ክንሰተድ፦ <ይክንደጢጅቅ ፈዝየት በሊዙ ድረይድየንት ንስ ማጥን ኣቭን ፈወነ ጝንድ ኣውየን የጝ?> የኵ› ይጥን።

¹⁵ጘጝም ዲቭሪል ኣስልሽ ወፃሸው ፈራቐው ኣዳራሽ ቓሊስጡ፤ ጝግልም ኣስልጥን» የው እፃቑ።

¹⁶ክንደጥድም ጝጊስ ፍጝ ኻትመየንትጐ ፊርጛንድ፣ እጝቅ ዊገድቅ ልክ እየሱስ የጘ ኣስልሽ ችጝ፤ ጝግልም ፈዝየ በሊዙ ድረይድ ኣስልⶖ።

¹⁷ኵናንድም እየሱስ ፅጭ ሊጘይጅቅ ኣቕ ተሩ።

¹⁸መድል ፅብጛⶖም፦ «እማንዝ የኵን፤ ክታማኽሊስ ላውድ ይት ዲቍስ ይውጡ፤ ጘጝም ነን ይጅቅ ድረይ ዀውድ የጝ» ዩ።

¹⁹ጛይም እን ዊገይዝ ኻዝንጝ ቲረቲረዝ፦ «ያንመ ኣጭር ኣጢ? ያንመ ኣጭር ኣጢ?» ይጛⶖ ዋቕርጥጘ ኪርምⶖ።

²⁰እየሱስም፦ «ፅጭ ሊጘይስ ላውድ ጝናንድየንት ይጅቅ ዝብዲል በርሰውድ የጝ።

²¹እጅር ዅርስ በውርስ ጝማጥን ፃፍሽጘ ክርጡ፤ ዊገድ ግን እጅር ዅርት ዲቍስ ይወው እድየን እጅሪዝ ወየው፤ እድ እጅርድ እዅርሺጝቀ እዳቕ ዊናን ቺዝጠ ዊኑ» ዩ።

²²ዅጛⶖ ሲጝቀም ሚድ ጕይ በርኩ፤ ኪልም ጝክንደጢዝ፦ «ኣስጥን እኒን ይስየድ የጝ» የው ይዉ።

²³ፅወድየንትም ጒ እደረት ሚዝየንዝ ይዉ፤ እጝቅቅም ዝይⶖ።

²⁴ቈሽም፦ «እኒን ንቕፀቊዝ ማጥን ቅብረው ኣይር ኪዳኒዙ ይብርድ የጝ።

²⁵እማንዝ የኵን፤ እደረት ምጝግስቲዝ ኣይር ወይኒዙ ፍረይስ ዝቅጪስቅ እቸን ግርየንትል ኣሽ ሊጘት እኒንት ዝቀቅም» ዩ።

²⁶እንዝ ግረም መዝሙር ዚምርጝ ደቭረ ዘይት ኣበይዝጐ ፍⶖ።

²⁷እየሱስም ጝክንደጢዝ፦ « ‹ምቓድየንት ጣዝጭር፤ ቢቅድም ቢትንሽጥቍ› ይሽት ፃፍሽጘ፤ ክትን እጝቅ ፅጋርትርንቅ፤ ይትም ማልድርን ሰይትርንቅ።

²⁸ዊገድ ግን ያን ክርጘይስ ጐት ግረ ገሊለ ትጐ ክታት ቃውስ ፊጭር» ዩ።

²⁹ኣይንድም ቢጥሮስ፦ «እጝቅቅ ፅጋርጝሽ እኳ ያን ግን ፅጋጠቅም!» ዩ።

³⁰እየሱስም፦ «እማንዝ የኵን፤ እኝቸን ኻርሸንስ ጅርወ ሊⶓን[10] ዋቒጘቀ ይት ሸውን ኻዲትር» ዩ።

³¹ቢጥሮስ ግን፦ «ክረነው እኳ በንዛን ክጅቅ ክጭርጚ ክት ኻድየቅም» ያⶖ ቐናዝ ዊግቱ፤ ላጥድም ጘጝት ዊግት።

³²እንዝ ግረ እየሱስስመ ጝክንደጢዝ ጀተሲማኒ ይሽተው ስፍረይዝጐ ፊርⶖ፤ ጘጝም ጝክንደጥድዛት፦ «ያን ፃሊጪስቅ እንል ዊንጥን» ዩ።

³³ቢጥሮስት፣ ያይቈቭት፣ ይዃንስትም ፃይ ፊሩ፤ ጭቕጘም ኻዝንጠ፣ ጨጝቅሽጠም ኪርሙ።

³⁴ቈሽም፦ «ይኒቭስሸን ክርጘል ኣሽ ጭቕጘ ኻዝንች፤ እንል ኣጥን፤ ነቃቕርንም ሊሚጥን» ዩ።

³⁵ዊትወት ዲቍ የውም ዝቨይል ሊቭ ቸልሸው ኣቕሽ፣ ጚ ሰትሸን ጝጊስ ዲቍራንስ ማጥን ፃልዩ።

³⁶እየሱስም፦ «ኣየወ! እጝቅትቅ ቸልደኵ፤ እኒን ሚከረዙ ፅወድየንት ይጊስ እክልሽ፤ ዊገድ ግን ክት ዊድረውድጚ ያን ዊደውድ ኣቒነ» ዩ።

³⁷ዋጥር ተራንድም ጝክንደጥድዛይ ኽርይጝ ዊን፤ ቢጥሮስትም፦ «ስሙንወ! ኽርይርመኵሩ? ላው ሰት እኳመ ነቃቕር ሊሚደነው ብሩ?

³⁸ፊተነይል ጥዋይርነጘ ቲግይርን ፃልይጥን፤ መንፈስ ኣስልሸው የጝ፤ ስየ ግን ዝላቐረ የጝ» ዩ።

³⁹እንደ ገነም በዊል ፃልየውድየንት ቈሽ ፃልዩ።

⁴⁰ሊጘት ዋጥር ተራንድም ጝታእልጣንድ ዝመውዝ ዝላቕጝ ዊንጛንስቅ ኽርይጝ ዊን፤ ጝጭስ ዊስጘው ዊገድየንትም ኣርቓቍም ዊንⶖ።

⁴¹ሸወትም ተር፦ «ነንምመ ገነ ኽርይርን፣ ፈውርንም እኵርኑ? ነስየስ ኣጥጘች፤ ሰትሸን ችጝርኵች፤ እንወ! እጅር ዅር ኽጥያትኝጢዙ ናኒዝ ዲቍሽት ይወሽትጡ።

⁴²ጕጥን ፊርነ፤ ይት ዲቍስ ይወውድ ተርኵ» ዩ።

⁴³ጘጝም ዊግታውⶖ ሲጝቀ ፅጭ ሊጘይስ ላውድ ይዅዳ ተሩ፤ ጝጅቅም ሰይፍዝመ ዱለዝ ፃየቍ፣ ካኽነጣነ ኻልቅጢስ፣ ወሪትት ኽግ ከንሰጢስ፣ ሽመቅሊስ እፃሸቍ ንቕፀቍ እቅ ዊን።

⁴⁴ይዅዳም፦ «ክትን ደምዝርነው እጅርድ ያን እምቘድ የጝ፤ ጝት ፃይጥን፤ ጣጝቅቅሽርንም ፊስጥን» የው በውርስ ምልክት ይው ዊኑ።

⁴⁵ጝግል ችጘጘም በውዝ እየሱስትጐ ኣልት፦ «ክንስተወ!» የው እምቑ።

⁴⁶እቅድም እየሱስት ፃይጝ እፅቍⶖ።

⁴⁷ጝጋቢል ችብርጝ ዊነቊስም ላውድ ጝሰይፍድየንት ምዝ ኻክናጣነ ኻልቀዝ ኣገልጋይዙ ቀርዝድየንት ቅዝ ማሉ።

⁴⁸እየሱስም፦ «ወምበዲ ፃየቍዝጘመ ይት ፃይትርነ ሰይፍዝመ ዱለዝ ፃይርን ተትሩ?

⁴⁹ግሪ ጨቨቅ መቅደስ ጝኒል ክንሳ ክታጅቅ ዊናንድ ፃዪርነቅም፤ ዊገድ ግን ቅዱሳን መፃፋንድ ይጘውድ ፋፅምሻንስ ማጥን እኒን ኣቑ» ዩ።

⁵⁰ኣይንድም እጝቅቅ ጝት ማልጝ ሰይⶖ።

⁵¹ኵተ ጭቝ ሲረው ላው ውርጋጠም እየሱስት ቲክናⶖ ዊኑ፤ እቅድም እን ውርጋጠድ ፃይጛንድ፣

⁵²ጝግልድምድየንት ማል መጥማጥ ሰዩ።

⁵³እየሱስትም ካኽነጣነ ኻልቀይዝጐ ፊስⶖ፤ ጝግልም ካኽነጣነ ኻልቅጥድ፣ ሽመቅልድ፣ ወሪትት ኽግ ክንሰጥድ እጝቅ ኣኽቭሽ።

⁵⁴ቢጥሮስም እክልድ የው ቲክናⶖ ካኽነጣነ ኻልቀዝ ኻፅሪል ኣሽ ፊሩ፤ ጝግልም ጐይ ኣገልጋያኒጅቅ ልየ ቃውራ ዊኑ።

⁵⁵ካኽነጣነ ኻልቅጢዝመ ሽጐዊዝቍ ኣቫላንድም ምሉዝ እየሱስት ቍዉስጥጘ ሚዝር ደምዝጛⶖ ዊን፤ ዊገድ ግን ኣውማውትም ችጚየቍ።

⁵⁶ንቕፀቍ እቅ ኻሽትዝ ሚዝርድጝሽም፣ ጝታቃልድ ግን ላው ኣጠ ቸሊየውም።

⁵⁷ላው ላውድም ጕጝ፦ «እኒን እጅርድ፦ ‹እኒን እቀ ናንዝ ተሲተው መቅደስ ጝንድየንት ፋዝ፣ ሻቘ ግርቅዝ እቀ ናንዝ ተሲቲየው ላየ መቅደስ ጝን ተስጭር› ያንድ ወሽንኵኑን» ይጝ ኻሽትዝ ሚዝርድ።

⁵⁸

⁵⁹እንም ኣቕ እኳ ጝታሚዝርነይድ ላው ኣቒየውም።

⁶⁰ካኽነጣነ ኻልቀድም ጕ ጝታበዊል ችብር፦ «እንዛይ እቅድ ክት ኪስጘውድ ወረጘ የጝ? ውር ቃጥስ ዊሰ ይዋር?» የው እየሱስት ዋቕሩ።

⁶¹እየሱስ ግን ዝም ዩ፤ ውረውረቅ ዊስየውም፤ ካኽነጣነ ኻልቀድም እንደ ገነ፦ «ብሩክ እደረት ዅር ክርስቶስ ክትመ?» የው ዋቕሩ።

⁶²እየሱስም፦ «የይ ያን የጝ፤ እጅር ዅር ኻይሉ እደረት ለዊል ጐያንድ፣ ሲመይዙ ድምነዝም ተራንድ ቓልትርንቅ» ዩ።

⁶³ካኽነጣነ ኻልቀድም ጝቕምት ኣልቨድየንት ቀድ፦ «እንዝለ ውርት ሚዝር በንዝጣ?

⁶⁴ጝዛንድ ወሽርንኵርኑ፤ እድስለ ወረጘ ይርና?» ዩ፤ ጛይም፦ «ክርጠ ጥውሸኵ» ይጝ ላው ቃልዝ ፊርድⶖ።

⁶⁵ኣይንድም ላው ላውድ ጝታብፅቕንድ ጝዲጊል ትፍ ይጥጘ ኪርምⶖ፤ ጝልጣንድም ሺፍንጝ ቡጢዝ ጣዝጛⶖ፦ «ክት ጣዘውድ ኣው ኣቐጘ እስቲ ኣርቓ!» ይጛ ዊን፤ ኣገልጋያንድም ጥፊዝ ጣዝጛ ፊስⶖ።

⁶⁶ቢጥሮስ ሳ ኻፅር ኣቒል ጐይ ፅባ ካኽነጣነ ኻልቀይዝ ጊርዳኒስ ላይሸን ተትር፣

⁶⁷ቢጥሮስ ልየ ቃውራⶖ ሲጝቀ ጝት ትክ ይር ቓልችነ፦ «ክትም ናዝሪትቱ እየሱስ ጅቅ ዊንዱ» ይች።

⁶⁸ቢጥሮስ ግን፦ «ያን ክት ይረውድየንት ኣርቐቅም፤ ዊግትረው ዊገድም ይጭስ ጥዋውም» የው ኻድዩ፤ እኒንትም የው ሚረይዝጐ ፉ፤ ኣይንድም ጂርወ ዋቑ።

⁶⁹ጊርድሸንም ጝት ቓልዳንድ ጝግል ችብረቊዝ፦ «እን እጅርድ ጛጊስ ላውድ የጝ» ይር እንደ ገነ ዊግትች።

⁷⁰ቢጥሮስ ግን እንደ ገነ ኻድዩ፤ ዊትው ዊንጘጘም ጝግል ችብረቍ እቅድ ቢጥሮስት፦ «ክት ገሊለቱ እጅር ኣራንስቅ እርግጥ ጛጊስ ላውድ የጝ» ይⶖ።

⁷¹ቢጥሮስ ግን፦ «ክትን ይርነው እጅርድየንት ያን ኣርቐቅም» ያ ጝቕምት እፃⶖ ፃርጠ ኪርሙ።

⁷²በውዝም ጂርወ ሊጘት ዋቑ፤ ቢጥሮስም፦ «ጂርወ ሊን ዋቒጝቀ ሸውን ኻዲትር» የው እየሱስ ዊግተው ቃልድየንት ትዝ ዩ፤ ኣይንድም ኽርር የው ሊዙ።