Read xamtanga ማርቈስት ወንጌል 15 Bible Online

ማርቈስት ወንጌል 15 - xamtanga bible

ማርቈስት ወንጌል 15

¹ቅሻንድም ካኽነጣነ ኻልቅጥድ ሽመቅሊጅቅ፣ ወሪትት ኽግ ክንሰጢጅቅ፣ ሸጐዊዝቍ ኣቫላኒጅቅ ማኽርሽጘት ግረ እየሱስት እፅቍጝ ፊስⶖ፤ ቢላጠውስስም ዲቍስጝ ይውⶖ።

²ቢላጠውስም፦ «ክት ኣይዅዳነ ንጕስመ?» የው ዋቕሩ፤ እየሱስም፦ «ክት ይረጘ የጝ» የው ዊሱ።

³ኻኽናጣነ ኻልቅጥድም ንቕፀቍ ዊቅዝ ኪስጛⶖ ዊን።

⁴ቢላጠውስም፦ «ዊሰ ይዋር ወረጘ የጝ? እንወ! ክት ንቕፀቍ ዊቅዝ ኪስጘኵ» የው እንደ ገነ ዋቕሩ።

⁵እየሱስ ግን ቢላጠውስ ጊርምሽጢስቅ ውረውረም ዊስየው።

⁶ቢላጠውስም ፈዝየ በሊዝ ኣምረ ኣምረዝ ኽዝቭድ ላው እፁሸው እጅር ጝት ዋቕርጘውድየንት እክሰነው ክንስ ዊኑ።

⁷ኣይንድ ኣመፅ ጕይስጝ ኒቭስ ቍወቍ ኣመፅኝጢጅቅ እፁውሸው በርቫን የነው ላው እጅር ዊኑ።

⁸ኽዝቭድም ቢላጠውስ ትጐ ኣልት ክንሸው ስቝርትድ ፃቫንስ ጨዉ።

⁹ጘጝም ካኽነጣነ ኻልቅጥድ እየሱስት ዲቍስጝ ይውጘውድ ቅንየዝ ኣቐጘ ኣርቕ ዊናንስቅ፦ «ኣይዅዳነ ንጕስድየንት እክስጨ በንርነኩመ?» የው ዋቕሩ።

¹⁰

¹¹ካኽነጣነ ኻልቅጥድ ግን፦ «እየሱስት ቃጥ በርቫን እኪትነ» የው ዋቕራንስ ማጥን ክዝቭድየንት ኣቭልቭል።

¹²ቢላጠውስም እንደ ገነ፦ «እደስለ እኒን ኣይዅዳነ ንጕስ ይርነውድየንት ውር ፃቭጨ በንርነኵ?» ዩ።

¹³ጛይም እንደ ገነ፦ «ሲቅል!» ይጛⶖ ቓፅⶖ።

¹⁴ቢላጠውስም፦ «ውረ ሰራሸው በደልድ ወረጘ የጝ?» ዩ፤ ጛይ ግን፦ «ሲቅል» ይጛⶖ ወሰገቨ ቓፅⶖ።

¹⁵ቢላጠውስም ኽዝቭድ ዲስ ያንስ የው በርቫንት እክሱ፤ እየሱስት ግን ጊርፍስ በር ሲቅልጛንስ ጛጭስ ዲቍስ ይዉ።

¹⁶ዊተድርድም እየሱስት፦ «ብራይተውሪወን» ይሽተው ቅመተይዙ ኻፅሪል ፊስⶖ፤ ላጥ ዊተድርዛትም እጝቅትቅ ላው ፃቭጝ ኣኽቭⶖ።

¹⁷ሰረው ኣልቨም ሲስⶖ፤ ኣሚዙ ኣክሊልም ጒንጕን ጝኣውሪል ደፋቕⶖ።

¹⁸ጝዝለም፦ «ኣይዅዳነ ንጕስወ! ዲግተ ክጭስ ኣነ!» ይጛⶖ ሲለም ይ።

¹⁹ጝኣውርድየንትም ግብዝ ጣዝⶖ፤ ጝታብፅቕንድም ጝዲጊል ትፍ ይ፤ ኣሹፍጛም ጝበዊል ግርቨቭሽጝ ሲግድⶖ።

²⁰ኣሹፍጘት ግረም ሰረው ኣልቨድየንት ጭውዝጝ፣ ጝቕምት ኣልቨድየንት ሲስⶖ፤ ሲቅልጥጘም ፃይጝ ፊርⶖ።

²¹ኣለክሳንድረውስስመ ሩፈውስስታይር ስሙን ይሽተው ቀሪነቱ እጅር ገጠሪስ ኻትመይዝጐ ተራንድ ችጝጝ ሚስቅልድየንት መውራንስ ኣስግድድዝⶖ።

²²እንዝ ግረም እየሱስት ጝትርጉምድ፦ «ኣውር በወ ስፍረ» ይሽተው ጐልጐልተ ትጐ ፊስⶖ።

²³ጝጊስም ከርቭየ ጅቅ ዲቭልቅሸው ወይንዙ ሚዝ ይውⶖ፤ ጘጝ ግን ዚዪየውም።

²⁴እንዝ ግረም እየሱስት ጝግል ሲቅልⶖ፤ ጝኣልቨድየንትም እፀ ማልጝ ኣድልድልሽⶖ።

²⁵ሲቅልጛንድም ግረቨዝ ሻቘ ሳ ዊኑ።

²⁶ጝኪስሽተው ዊገድየንት ቓሊሳንስ ማጥን፦ «እኒን ኣይዅዳነ ንጕስ የጝ» የው ፅፈሽ ፃፍሽ ዊኑ።

²⁷እየሱስ ጅቅም ሊጘ ወምበዲጥ ነስጝ ላውድየንት ጝፃግቪዝ ሊጘትረድየንት ቈሽ ጝለወይዝ ሲቅልⶖ።

²⁸እንዝም መፃፍ፦ «ኣመፅኝጢጅቅ እጊቱ» የው ዊግተው ትንቪቲዙ ቃልድ ፋፅምሹ።

²⁹ጒደነይዝ ዲቈቍድም ጝታውርድ ኒንቅጛⶖ፦ «ኣዪይ! መቅደስ ጝንድየንት ፋዝር ሻቘ ግርቅዝ ተስረርድ ክት ቃይረር?

³⁰እስቲ ነን ሚስቅሊስ ጊምር ክቕምት ቓዝ» ይጛ ዛሽ።

³¹እኒዝጘም ካኽነጣነ ኻልቅጢዝመ ወሪትት ኽግ ክንሰጢዝ ጛስ ጛይ፦ «ላጥድዛት ቓዙ፤ ጝቕምት ግን ቓዝጠ ቸላውም።

³²ጘጝ እማን እስራየላነ ንጕስ ክርስቶስ ኣቐውዝየ ይንም ቓልን ኣምንናንስ ማጥን እስቲ ነን ሚስቅሊስ ጊምነ!» ይጛ ኣሹፍጛⶖ ዊን፤ ጝጅቅ ሲቅልሸቍ ወምበዲጥድም ዛሽጛⶖ ዊን።

³³ዋልጠ ሳይስ ኪርም ፃይጨ ሳይል ኣሽ ዝቨይልቅ ጥመ ኣቑ።

³⁴እየሱስም ፃይጨ ሳይዝ፦ «የለዅየ የለዅየ ላማ ሰቨቅታኒ?» የው ኽየው ድመዝ ቓፁ፤ ጝትርጕምድም፦ «ይኣምላክወ! ይኣምላክወ! ውረ ይት በትሩ?» የነት የጝ።

³⁵ጝግል ችብርጝ ዊነቍ እቂስ ላው ላውድ እኒንት ወሽጛንድ፦ «እንወ! ይልያስት ጭጘኵ» ይⶖ።

³⁶ላው እጅርም ውጢ ፊር ምጥጠው ወይንዙ ሚዝ ሰፍነግዝ ናኽሩ፤ ዚግልም ፃቭ እየሱስ ዚያንስ ኣልሱ፤ ጝዝለም፦ «በጥን! እስቲ ይልያስ ተር ጊምዛንድ ቓልነር» ዩ።

³⁷እየሱስም ኽየው ድመዝ ቓፁ፤ ኣይንድም ጝፈውጥድ ፍ።

³⁸ኣይንድም መቅደስ ጝኒዙ ገርደነድ ንየ ጫፊስ ኪርም ሳ ጫፊል ኣሽ ሊጘትል ቀድሹ።

³⁹እየሱስት በዊል ችብር ዊነው ላዝ ኻልቀድም እየሱስ ቓፅ ጝፈውጥድ ፍጘጘ ቓል፦ «እን እጅርድ እማንም እደረት ዅር ዊኑ» ዩ።

⁴⁰ኣይንድም ላው ላው እቍን እክልድጝ ቓልጛⶖ ዊንⶖ፤ ጝታማኽሊስም መግደላዊት ማርያም፣ እጥን ያይቈቭስመ የውሳስታኘ ማርያም፣ ሰለውምየም ዊንⶖ።

⁴¹እንዛይ እቍንድ ገሊለስ ኪርምጝ ቲክንጝ ጝት ኣግልግልጛⶖ ዊነቍ ጛይ፤ ቈሽም ጝጅቅ ላብጠ እየሩሳልየም ተረቍ ላጥ ንቕፀቍ እቍንም ዊንⶖ።

⁴²ጊርቅድም ኵናⶖ ፊሩ፤ ቅዳምሲንቭትት ዋዚመ ኣስልሸነ ሰትም ኣቑ።

⁴³ኣይንድ ኣይዅዳኒዙ ሸጐዊዝ ኣቫል ዊነው ዮሴፍ የነው ኪብረው ኣርማትያስቱ እጅር ተሩ፤ ጘጝ እጅርድ እደረት ምጝግስትየንት ቲስፈዝ ኣርውደው ዊኑ፤ ጘጝም ድፍርትዝ ቢላጠውስትል ፊር እየሱስት እርሸድየንት ጨዉ።

⁴⁴ቢላጠውስም በውዝ ክረጘ ወሻንድ ዲንቅሹ፤ ላዝ ኻልቀድየንትም ጭጝ፦ «ክረመ ክሩ?» የው ዋቕሩ።

⁴⁵እየሱስት ክርጘድየንት ላዝ ኻልቀይስ ተረድሸተት ግረ እርሸድየንት ዮሴፍስ ይዉ።

⁴⁶ዮሴፍም ፃረው ኻር ኣልቨ ጅቩ፤ እርሸድየንትም ጘጝ ኣልቨይዝ ጊንዙ፤ ጝዝ ግረም ፃፀይስ ፃርቭሽ ኣስልሸው መቃቭርል እቝሩ፤ መቃቭሪዝ ሚረድየንትም ኽየው ቕርጘ ትጕለልዝ ዲቩ።

⁴⁷ማርያም መግደላዊትስመ የውሳትኘ ማርያምስም እየሱስት ኣውል ዲቭጘጘ ቓልጛ ዊንⶖ።