Read xamtanga ማርቈስት ወንጌል 16 Bible Online

ማርቈስት ወንጌል 16 - xamtanga bible

ማርቈስት ወንጌል 16

¹ቅዳምሲንቭት ዲቈት ግረ መግደላዊት ማርያም፣ ያይቈቭ ትኘ ማርያም፣ ሰለውምየም ኣቕጝ እየሱስት እርሸድየንት ቓስጥጘ ሽቱ ጅቭⶖ።

²ሸወጪዙ በወትረ ግርየይዝም ግረቨዝ ኻር ጕጝ ገነ ኰረየን ፍረጘ መቃቭሪዝጐ ፊርጛⶖ ሲጝቀ፦

³«ቕርጘድየንት መቃቭሪዙ ሚረይስ ኣው ጊልብርጡ ኣጢ?» ይጛⶖ ጛስ ጛይ ዊግትጛⶖ ዊንⶖ።

⁴እኒንትም ይጘውድ መቃቭርድ ዲቭሽተው ቕርጘድ ጭቕጘ ኽየው ዊናንስቅ የጝ፤ ጭቅ ይጝ ቓልጛንድ ግን፣ ቕርጘድ ጊልብርሽ ቓልⶖ።

⁵መቃቭሪዝጐ ጥውጘጘም ፃረው ኣልቨ ሲረው ውርጋጠ እጅር ጝታለወይዝጐቱ ጐይ ቓልጝ ዳጝግፅⶖ።

⁶ጘጝ ግን፦ «ኣይዝዀጥን ዳጝግፅትረነ፤ ክትን ደምዝርነውድ ሲቅልሸው ናዝሪትቱ እየሱስት ኣቐጘ ኣርቕኩን፤ ጘጝ ጕኩ፤ እንል እጀውም፤ ዲቭሽተው ስፍረድም ቓልጥን።

⁷ነን ግን ፊጥን፤ ጝክንደጢዝመ ቢጥሮስስ፦ ‹እንዝ ሚቅ እየሱስ ክታጭስ ድቈጘ ገሊለ ቃውስ ፊርጡ፤ ጝጊስም ቓልትርንቅ› ይርን ድቍጥን» ዩ።

⁸እቍንድም ጐውትዝ ቈጥቈጥ ይጛⶖ መቃቭር ስፍረይስ ፍጝ ውጥይⶖ፤ ጭቕጘ ጐውትጝ ዊንጛንስቅም ኣውማውስቅ ውርቅ ዊግቲየቍም።

⁹[ሸወጪዙ በወትረ ግርየይዝ ግረቨዝ ክርጘይስ ጐት ግረ፣ እየሱስ ላጝጠ ጋኒናን ጝርጊስ ፊሰቍ ማርያም መግደላዊትስ በዊል እትሉ።

¹⁰ጚይም ፊትር ጝጅቅ ዊነቍድ ኻዝንጛ ሊዝጛⶖ ችጝር፦ «ጘጝ ርዅየዝ እኩ፤ ያንም ይልጣኒዝ ቓልኩን» ይር ድቍች፤ ጛይ ግን ጝርት እምኒየቍም።

¹²እንዝ ግረም ክንደጢስ ሊጘድ ገጠሪዝጐ ፊርጋⶖ ጛጭስ ላየ ሚልክዝ እትሉ።

¹³ጛይም ዋጥርጝ እኒንት ላጥ ጝክንደጢዝ ድቍⶖ፤ ኣነጚ ጛትም ኣምኒየቍም።

¹⁴ጝዝ ግረም ፅጭ ለውድ መድል ጐይጝ ፅብጛⶖ ጛጭስ ጋልፅሽቱ፤ ክርጘይስ ጐት ግረ ቓለቍ እቅድ ድቍጘውድየንት ኣምነቅ ይጛንስቅም ጝታእምንት በነይዝመ ጝታእዘኒዙ ጥጝክርነይዝቍዝ ኒቕፉ።

¹⁵እንትም ዩ፦ «ኣልሚልቅ ፊጥን፤ ወንጌልድየንትም ፍጥርቲዝቅ ሲቭክጥን።

¹⁶ኣምነውድ፣ ጣምቅሸውድም ቓድጡ፤ ኣምናውድ ግን ፊርድሽጡ።

¹⁷ይት ኣምነቍዝቅ እንዛይ ምልክታንድ ቲክንጥቍ፦ ይሽⶔዝ ጋኒናን ፊስጥቍ፤ ኣይር ቋቈዝም ዊግትጥቍ።

¹⁸ሳብልድ ጝታናኒዝ ፃይጥቍ፤ ቍወው መርዝም ዝይጝሽ ጛት ጒድያውም፤ ጝታናንድም ፅውዝጅኒል እቝርጥቍ፤ ፅውዝጅንድም ቓድጥቍ።»

¹⁹ኣደረ እየሱስ እኒንት ዊግተት ግረ ሲመይ ኣርጉ፤ እደረት ለዊይልም ጐዩ።

²⁰ጝክንደጥድም ስፍረ ጨቨቅ ፊርጛⶖ ሲቭክⶖ፤ ኣደረም ጛጅቅ ኣቕ ሰራሻ ጝታክንድጚጅቅ ፃቭጘቍ ምልክታኒዝ ቃልድየንት ፀናዛ ዊኑ።][11]