Read xamtanga ማርቈስት ወንጌል 2 Bible Online

ማርቈስት ወንጌል 2 - xamtanga bible

ማርቈስት ወንጌል 2

¹ዊትቍ ግርቅዝ ግረም እየሱስ ቅፍርናዀም ዋጥር ተሩ፤ ኽዝቭድም እየሱስ ጝግል ጝኒል ፅበጘ ወሹ።

²ኣቓንስቅም ጝንድም ቢዘድም እቻቕ ስፍረ ብሽትጢስቅ ንቕፀው ኽዝቭ ኣኽቭሹ፤ ጘጝም እደረት ቃልድየንት ሲቭኩ።

³እቅም ላው ድውይ እጅር ሲዘ እቅዝ መውስጝ ጝጐ ነሰⶖ።

⁴ኽዝቭድ ጭቕጘ ንቕፅ ድውይድየንት እየሱስ ትጐ ኣልሰነ ብጛንስቅ ኽድምድየንት እየሱስት ጭቅተይዝ ባቝዝጝ ድውይድየንት ኣረቲጅቅ ጊምዝⶖ።

⁵እየሱስም ጝታእምንትድ ኣርቕ ድውይድየንት፦ «እፈረ ክተ! ክኽጥያትድ ይቅር ይሽትኩ» ዩ።

⁶ኣይንድም ጝግል ጐይጝ ዊነቊ ላው ላው ወሪትት ኽግ ክንሰጥድ ጝታዘኒዝ፦

⁷«እን እጅርድ ወረጘ የጝ እነየው ዛንዙ ዊገ ዊግተውድ? ላው እደረትለ ኽጥያት ይቅር ይጠ ቸለውድ ኣው የጝ?» ይⶖ።

⁸እየሱስም በውዝ ጝታእዘኒዙ ኻሰቭድድየንት ጝመንፈሲዝ ተረድሽ፦ «ውር ቃጥ የጝ ክታእዘኒዝ እንት ይርን ኻስቭርነውድ?

⁹ድውይድየንት፦ ‹ክኽጥያትድ ይቅር ይሽትኩ› የነውድመ ዊንስ፦ ‹ጒር ክኣረትድ መውትር ፊጥ› የነውድ ኣውየን ቀለኵ?

¹⁰ዊገድ ግን እጅር ዅር ዝቨይስ ኽጥያትድየንት ይቅር ይጠ ስልጣን ፃየው ኣቐጘ ኣርቕትርነ ማጥን የጝ» የው ድውይድየንት፦

¹¹«ጕር ከኣረትድየንት መውትር ክጝን ፊጥ የኵን» ዩ።

¹²እጅርድም ጕ እጝቅቅ ቓልጛⶖ ጝኣረትድየንት መውር ፊሩ፤ ጘጝ ስፍረይል ዊነቍድም እን ዊገይዝ ዲንቅሽጝ፦ «እነየው ዊገ ቓልንም ኣርቓይነቅ» ይጛⶔ እደረስ ሚዝየነ ኣልስⶖ።

¹³እየሱስም እንደ ገነ ባኽሪዙ ደርቸይል ፉ፤ ንቕፀው ኽዝቭም ጝጐ ተሩ፤ ጘጝም ክንሱ።

¹⁴ጝዝ ዲቋንድም እልፊወስት ዅር ለዊት ቀረጥ ቀቨነ ስፍረይል ጐይ ቓሉነ፦ «ለው ይት ቲክን» ዩ፤ ጘጝም ጕ ጝት ቲክኑ።

¹⁵እየሱስም ለዊት ጝኒል መድል ጐይ ፅባ፣ ንቕፀቍ ቀረጥ ቀቨቍዝመ ኽጥያትኝጥዝ ጝስመ ጝክንደጢዝዛጅቅ ዅጛ ዊን፤ ጝት ቲክነቍድም ንቕፀቍ ዊንⶖ።

¹⁶ፈሪሳኒዝ ዊግን ኣቐቝ ወሪትት ኽግ ክንሰጥድም ቀረጥ ቀቨቊዝመ ኽጥያትኝጢዝዛጅቅ ኣቕ ዃንድ ቓልጝ፣ ጝክንደጥድዛት፦ «ውር ቃጥ የጝ ቀረጥ ቀቨቊዝመ ኽጥያትኝጢዝዛጅቅ ዀውድ?» ይጝ ዋቕርⶔ።

¹⁷እየሱስም ዊግትጘውድየንት ወሽ፦ «ኻይክም በንዘውድ ፅውዝጅንጥዝጚ ትኽንቊዝም ኣየው፤ ያንም ኽጥያትኝጥድጚ ፃድቃንድ ጭጝጨም ተጢቀር» ዩ።

¹⁸ይዃንስት ክንደጢዝመ ፈሪሳኒዝ ፃምጛⶔ ዊንⶖ፤ ላው ላው እቅም ተርጝ እየሱስት፦ «ይዃንስት ክንደጢዝመ ፈሪሳነ ክንደጢዝ ፃምጛ፣ ወረጘ የነት የጝ ክክንደጥድ ፃማይጘውድ?» ይⶔ።

¹⁹እየሱስም፦ «ኣስንድ ጛጅቅ ፅባⶔ መጭድ ፃምጥጘ ጥውሽጡመ? ኣየውም፤ ኣስንድ ጛጅቅ ኣቕ ፃምጥጘ ጥውሻውም።

²⁰ዊገድ ግን ኣስንድ ጛጊስ ቲተው ግርየ ተርጡ፤ ኣይንድም ፃምጥቍ።

²¹ኻፍለ ኣልቨይል ኣይር ምልግቨ ሚልግቨው ኣውማውም እጀው፤ እኒን ፃቭሽትሽ ግን ኣይር ምልግቨድ ኻፍለድየንት ቀድጡ፤ ቀዳድድም ወሰው ኣጡ።

²²ቈሽም ኣይር ወይኒዙ ሚዘ ኣርጐው መርል እቝረው ኣውማውም እጀው፤ እኒን ፃቭሽትሽ ግን ወይኒዙ ሚዘድ መርድየንት ብጥቕ ሽጡ፤ ወይኒዙ ሚዘድም ቅብርጡ፤ መርድም ጨቅሽጡ፤ እንዝ ማጥን ኣይር ወይኒዙ ሚዘይዝ ኣይር መር በንዘኵ» ዩ።

²³ቅዳምሲንቭት ግርየዝ እየሱስ ቺዝጝ ማኽሊዝ ፃቭ ዲቋንድ፣ ጝክንደጥድ ፃጝጛ ሽውር ቅዝጥጘ ኪርምⶔ።

²⁴ፈሪሳንድም፦ «ቓል! ክክንደጥድ ውርቃጥ የጝ ቅዳምሲንቭትት ኰር ፃቭጥነ ጥውሻው ዊገ ፃቭጘውድ?» ይጝ ዋቕርⶖ።

²⁵እየሱስም፦ «ዳዊት ጝጅቅ ዊነቍ እቂጅቅ ጭቕጘ ግድርዳንድ ፃቨው ዊገድ ኣንቭቪርነቅመ?

²⁶ካኽነጣነ ኻልቀ ኣቭየተርት ዚምኒዝ እደረት ጝኒል ጥው፣ ካኽነጣንድ ጭቍ ዅጥጘ ጥውሸው ቀድሽተው ኽቭስትድየንት ኹ፤ ጝጅቅ ዊነቍዝም ይዉ» ዩ።

²⁷ቈሽም፦ «ቅዳምሲንቭት እጅርዝ ማጥን ፋጥርሹጚ እጅርም ቅዳምሲንቭት ማጥን ፋጥርሺየው።

²⁸እንዝ ማጥን እጅር ዅር ቅዳምሲንቭትስም እኳ ኣደረ የጝ» ዩ።