Read xamtanga ማርቈስት ወንጌል 3 Bible Online

ማርቈስት ወንጌል 3 - xamtanga bible

ማርቈስት ወንጌል 3

¹እየሱስም እንደ ገነ ምኵራቪል ጥዉ፤ ጝግልም ጝናንድ ሲለው እጅር ዊኑ።

²ጛጊስም ላው ላውድ ምላሰንዝ ኪስጥጘ በንጝ፦ «እስቲ ቅዳምሲንቭት ግርየዝ ቓዘው ኣቕሽ ቓልነ» ይጝ ጝት ጝት ቓልጛ ዊን።

³እየሱስም ጝናንድ ሲለው እጅርድየንት፦ «ኣኽቭሸው ኽዝቭዝ በዊል ጕር ችብጭ» ዩ።

⁴እየሱስም፦ «ቅዳምሲንቭት ግርየዝ ፊቅድሸውድ ቀሰው ፃቨነውመ ዊንስ ጭቓ ፃቨነው? ርዅየ ቓዘነውመ ዊንስ ድሰነው?» ዩ፤ ጛይ ግን ዝም ይⶔ።

⁵ጘጝም ጝታዘንድ ዲንድነው ኣቓንስቅ ኻዝን፣ ጝት ኪብጝ ችብረቊድዛት ቍጠዝ ቓሉ፤ እጅርድየንትም፦ «ክናንድ ዘርጋቕ» ዩ፤ እጅርድም ዘርጋቑ፤ ኣይንድም ጝናንድ ቓዱ።

⁶ፈሪሳንድም ኣወሽጝ ጝት ድስጥጘ ኺረውድስት ዊግኒጅቅ ማኽርኽርሸነው ኪርም።

⁷እየሱስም ጝክንደጢጅቅ ባኽሪዝጐ ፊሩ፤ ገሊለስ ተረው ንቕፀው ኽዝቭም ጝት ቲክኑ።

⁸ሰራሸው ዊገድቅ ወሽጛንድ ንቕፀው ኽዝቭ ይዅዳስ፣ እየሩሳልየምስ፣ የደውምያስስ፣ ዮርዳኖስት እጂ ፅበቍ ኻግራኒስ፣ ቈሽም ጢረውስስመ ሲዱነታጐይስ ተሩ።

⁹ኣኽቭሸው ኽዝቭድም ጝት ኣፂሳየጘ፣ ጝክንደጥድዛት፦ «መልወ ታኰት ኣስልጥን» የው ኣዙ።

¹⁰ንቕፀቍ እቅ ቓዛንስቅ ፅውዘዝ ተሰቃይሽተቊድቅ ዳቕጥጘ ቀድምድምሽጛⶔ ዊን።

¹¹ርኵሳን መንፈሳንድም ጝት ቓልጘው ጨቨቅ ጝበዊል ሊቭጛⶔ፦ «ክት እደረት ዅር የጝ!» ይጛ ቓፅጛⶔ ዊንⶔ።

¹²እየሱስ ግን ጝጝ ኣው ኣቐጘ ጋልፃይጘጘ ቐናዝ ጣጝቅቅሱ።

¹³እየሱስም ኣበል ፍ ጘጝ በነቍ እቅድዛት ጝጐ፦ «ላቝጥን» የው ጭጙ፤ ጛይም ጝጐ ተርⶖ።

¹⁴ጝጅቅ ኣጛንስ፣ ሲቭክጛንስም እፃጠ፣ ጛጊስ ፅጭ ሊጘ ይሙ፤ ጛትም፦ «ኻወርየታን» የው ጭጙ።

¹⁵ጋኒናንድዛት ፊስጛንስም ስልጣን ይዉ።

¹⁶ይምሸቊ ፅጭ ሊጘድም፦ ጘጝ ቢጥሮስ የው ሽ ፊሰው ስሙን፣

¹⁷በኣኒርገስ ዊንም ነጐድጓድዝ ቝር የው ጭጘቍ ዘቭዲወስት ቝር ያይቈቭስመ ጝዝን ይዃንስስ፤

¹⁸እንድርያስ፣ ፊልበውስ፣ በርተለሚወስ፣ ማቲወስ፣ ተውማስ፣ እልፊወስት ዅር ያይቈቭ፣ ታዲወስ፣ ቀንየተ ስሙን፣

¹⁹እየሱስት ዲቊስ ይወው ኣስቈረቱ ይዅዳ ጛይ።

²⁰ጝዝግረም እየሱስ ላው ጝንል ጥዉ፤ ጝስመ ጝክንደጢዝ ሚ ዀነ ብጥጚስቅ ንቕፀው ኽዝቭ እንደ ገነ ኣኽቭሹ።

²¹ጝዚምዳንድም እን ዊገድ ወሽጛንድ፦ «ጝኣይምረውድ ቀርኩ» ይጝ ጝት ፊስጥጘ ተርⶔ።

²²እየሩሳልየምስ ተረቍ ወሪትት ኽግ ክንሰጥድም፦ «ብየልዘቩልዝ ፃይሽኩ፤ ጋኒናንድ ፊሰውድም ጋኒናነ ኻልቀዝ የጝ» ይⶖ።

²³እየሱስም ጛት ጭጝ፦ «ሲጣን ሲጣንድየንት ፊስጠ ቸልጡመ?

²⁴ጝስመ ጝስ ቲተቲተው ምጝግስት ፀናጠ ቸላውም።

²⁵በተሰቭም ጝስመ ጝስ ቲተቲተውዝየ ፀናቕ ፅብጠ ቸላውም።

²⁶እኒዝጘም ሲጣን ጝቕም ቲተቲተው፣ ጝቕምትም ተፃርርሸው ኣቐውዝየ ድዘኵጚ ፀናቕ ችብርጠ ቸላውም።

²⁷እኒዝጘም ላው እጅር በውርስ ኻይሉ እጅርድ እፅቊጝቀ ኻይሉ እጅሪዝ ጝኒል ጥው ንቭርትድ ዚርፍጠ ቸላውም፤ ዚርፈነው ቸለውድም ኻይሉ እጅርድየንት እፅቋንድ ጭቝ የጝ።

²⁸እማንቱ የኵን! እቀ ኽጥያትዝመ ዛሽጘው ዛንዝድቅ ይቅር ይሽትጡ።

²⁹ዊገድ ግን መንፈስ ቅዱስትል ዛንዙ ቃል ዊግተው እጅርድቅ እጝቅ ዘላልምዙ ኽጥያት ቢን ጕርየ ኣቐኵጚ ዘላልም ይቅር ይሽታውም» ዩ።

³⁰እኒንትም የውድ፦ «ርኵስ መንፈስዝ ፃይሽኩ» ይጛንስቅ የጝ።

³¹እንዝ ግረ ጝኘስመ ጝፅንስ ተርⶖ፤ ቢዘይል ኣቕጝም እጅር እፃቕጝ ጭጝስⶖ።

³²ጝጋቢል ጐይጝ ዊነቍ እቅድም፦ «እንወ! ክኘስመ ክፅንስ ቢዘይል ክት ደምዝጘኵ» ይ።

³³እየሱስም፦ «ይኘየን ኣውጚ? ይፅንድስ ኣውታይ ጛይ?» ዩ።

³⁴ጝጅልወይል ጐየቍ እቅድዛትም ቓላⶖ፦ «ይኘየንም ይፅንድም እንዛይ ጛይ።

³⁵እደረት ፍቃድድ ፋፅመውድቅ እጝቅ ጘጝ ይዝን፣ ይስን፣ ይኘም የጝ» ዩ።