Read xamtanga ማርቈስት ወንጌል 5 Bible Online

ማርቈስት ወንጌል 5 - xamtanga bible

ማርቈስት ወንጌል 5

¹ባኽርድየንትም ከርጝ ገርገሲኑን የነው ኻግሪዝጐ ተርⶖ።

²እየሱስም ታኰይስ ጊመጘ ርኵስ መንፈስዝ ፃይሸው እጅር መቃቭር ስፍረይስ ፍ ዲምቅሽጠ ጝጐ ተሩ።

³እኒን እጅርድ መቃቭር ስፍረይል ዊኑ ፅበውድ፤ ኣውማውቅ ጝት ሰንስለትዝ እኳ እፅቍጠ ቸላውም ዊኑ።

⁴እክሰው ግርየም ልኵ እፅቈነ ብረትዝመ ሰንሰለትዝ እፅቍሻ ዊኑ፤ ዊገድ ግን ጝናኒዙ ሰንሰለትድ ቅዛⶖ፣ ጝሊኲዙ ብረትድየንትም ቅጥዝጥዝ ሸው ማላ ዊኑ፤ ጝት ፃይ ችብስጠ ቸለው ኣውማውም ዊኒየው።

⁵መቃቭራንዝመ ኣብቕዝ ማኽሊል ኻር ጊርቅ ጅልዋ፣ ቓፃⶖ፣ ጝሰወነትድየንትም ቕርጘዝ ቀቨቀቫ ዊኑ።

⁶እጅርድየንም እየሱስት እክልስ ቓለጘ ጝጐ ውጢ ጝበዊል ግርቨቭሽ ሲግዱ።

⁷ኽየው ድመዝም ቓፅ፦ «ልውል እደረት ዅር እየሱስወ! ክት ይጅቅ ውር ውላ ፃይረር? ይት ኣሰቃይዛይረጘ እደረስ ፃይስኩን» ዩ።

⁸እኒንት የውድም እየሱስ፦ «ርኵስ መንፈስ ክተ! እን እጅሪስ ፍ!» የው ኣዝ ዊናንስቅ የጝ።

⁹እየሱስም፦ «ክሽⶖድ ኣው የጝ?» የው ዋቕሩ፤ እጅርድም፦ «ንቕፀቍ ኣናንስቅ ይሽድ ለጊወን[2] የጝ» ዩ።

¹⁰ኻግሪስም ጅግዛየጘ ጭቕጘ ጨዉ።

¹¹ጘጝ ብጣይል ችጝሸቍ ኵምብልትጢል መጝገ ኣሰመ ውላቕ ዊኑ።

¹²ርኵሳን መንፈሳንድም እየሱስት፦ «ኣለቀይ ኣሰምጢል ፊርን ጥውነ ፊቅጅ» ይጝ ጨውⶖ።

¹³ጘጝም ፊቅዱ፤ ርኵሳን መንፈሳንድም እጅሪስ ፍጝ ኣሰምጢል ጥውⶖ፤ ሊጘ ሽኽ ኣቐቝ ኣሰምጥድም ቀልቅለይዙ ጫፊስ በጕርጝ በጕርጝ ባኽሪል ጥውጛ ስርሽ።

¹⁴ምቕድም ሰይጝ ፊርጝ፤ ጂጘድየንት ኻትመይልም ገጠሪልም ጂጝዝ፤ ኽዝቭድም ኣቐው ዊገድየንት ቓልጠ ጝፅበው ጝፅበው ስፍረይስቅ ፉ።

¹⁵እየሱስ ትጐ ተርጛንድም ርኵሳን መንፈሳኒዝ ፃይሽ ዊነው እጅርድ ኣልቨ ሲር፣ ጝኣይምረውድ ዋጥር፣ ዳኽነ ጐይ ቓልጛንድ ዳጝግፅ።

¹⁶እኒንት ቓለቍ እቅድም ርኵስ መንፈሲዝ ፃይሽ ዊነው እጅሪዝመ ኣሰምጢል ፃቭሽተው ዊገድየንት እጝቅዝቅ ድቍⶖ።

¹⁷እንዝ ግረም እቅድ እየሱስት ጝታኻግርድየንት ሊቅ ፊራንስ ማጥን ጨውጥጘ ኪርምⶖ።

¹⁸እየሱስ ታኰይል ጥውጠ ጓንድም ርኵሳን መንፈሳኒዝ ፃይሽ ዊነው እጅርድ፦ «ኣለቀይ ክጅቅ ተጨ» የው ጨዉ።

¹⁹እየሱስ ግን ፊቅድየውም፤ ዊገድ ግን፦ «ክጝን ፊጥ፤ ኣደረ ኣወየው ቀሰው ዊገ ፃቨጘዝመ ክጭስ ቓሊሰው ስቝርቲዝቍዝ ክዚምዳኒዝ ድቍ» ዩ።

²⁰እጅርድም ፊሩ፤ እየሱስ ፃቨው ዊገድየንትም ፅቃ ኻትምጥ ይሽተው ኻግሪልቅ ኣውጁ፤ ወሸቍድም እጝቅ ዲንቅሽⶖ።

²¹እየሱስም እንደ ገነ ታኰይዝ እጂ ከራንድ ንቕፀው ኽዝቭ ጝጐ ኣኽቭሹ፤ ባኽር ደዪልም ፅባⶖ፦

²²ምኵራቭ ኻልቅጢስ ላው እያይረውስ ይሽተው እጅር ጝጐ ተሩ፤ እየሱስትም ቓላንድ ጝልኲል ሊቭ፦

²³«ይቝረ መልወየን ክርተ ጕርኩች፤ ቓድር ርዅየዝ ፅብራንስ ማጥን ኣለቀይ ተትር ክናንድ ጝርዲጊል እቝር» የው ጨዉ።

²⁴እየሱስም ላብጠ ፊሩ፤ ንቕፀው ኽዝቭም ትክቭክቭሻ ጝት ቲክኑ።

²⁵ጝግልም ፅጭ ሊጘ ምት ምሉ ጝርብረድ ቅብርጛ ዊንደይ ላይ እውነ ዊንች።

²⁶ንቕፀቍ ጥላ ኣርቐቊል ጅልውራⶖ ጝርጊንዝቭድቅ ጨርስራንም እኳ ፅውዘድ ግን ወሱጚ ቺዝየውም።

²⁷እየሱስት ጂጘድ ወሽራንድም ጝእግርገይዝ እቀ ማኽሊዝ ፃቭር ተትር ጝኣልቨድየንት ዳቕች።

²⁸እኒንት ፃቭረውድም፦ «ጛልቨይዝ ጫፍድ እኳ ዳቓን ቓጭር» ይር ኣምንዳንስቅ የጝ።

²⁹ኣይንድም ቅብራⶖ ዊነው ጝርብረድ በውዝ ችብሩ፤ ጝርስቃይስ ቓድረጘም ጝርሰውነቲዝ ኣርቕች።

³⁰እየሱስም ኻይል ጝጊስ ፈጘ ኣርቕ፣ ኽዝቪዝጐ ዋጥር የው፦ «ኣው የጝ ያልቨድ ዳቐውድ?» ዩ።

³¹ጝክንደጥድም፦ «ኽዝቭድ ኣፂት ትክቨትክቭሻ ቓልዳⶖመ፦ ‹ይት ኣው የጝ ዳቐውድ› ይራ?» ይⶖ።

³²እየሱስ ግን እኒንት ፃቨውድ ኣው ኣቐጘ ቓልጠ እግርገ ዋጥር ዩ።

³³እውነየንም ጝርጭስ ኣቐው ዊገድየንት ኣርቕራንስቅ ጐውትር ቈጥቈጥ ይራⶖ ተትር ጝበዊል ደፋሽች፤ ኣቐው እማንተው ዊገድየንትም ድቍች።

³⁴እየሱስም፦ «ይቝረወ! ከእምንትድ ቓዝኩ፤ ዲግተዝ ፊጥ፤ ክስቃይቲስም ፈው» ዩ።

³⁵እየሱስም ዊግታⶖ ሲጝቀ ምኵራቭ ኻልቀ እያይረውስት ጝኒስ እቅ እፃሽጝ ተርጝ፦ «ክቝረ ክትርኵች፤ እደስለ ውር ፃቭተ ክንሰተድየንት ዝላዝራ?» ይⶖ።

³⁶እየሱስ ግን እቅድ ዊግትጘው ዊገድየንት ቸለል የው ምኵራቪዙ ኻልቀድየንት፦ «ኣምን ጭቝጚ ጐውተ» ዩ።

³⁷እየሱስም ቢጥሮስስመ ያይቈቭስ፣ ያይቈቭት ዝን ይዃንስስታዝለ ላየ ኣውማውቅ ጝት ቲክንጠ ፊቅድየውም።

³⁸ምኵራቭ ኻልቀይዝ ጝኒል ችጘጘም እየሱስ እቅድ ቓፅጛⶖ ዋይ ዋይ ይጛⶖ ሊዝጛንድ ቓሉ።

³⁹ጝኒልም ጥው፦ «እን ቓፀይዝመ ሊዚዝ ወረጘ የጝ? እፈረየን ኽርይርኵችጚ ክሪረይም» ዩ።

⁴⁰እቅድ ግን እቘርⶖ፤ ጘጝ ግን እቅድዛት እጝቅትቅ ጝኒስ ፊሰት ግረ፣ እፈረየንቲርስመ ጝርኘስ፣ ጝክንደጥድዛትም ቲክንዝ እፈረየን ፅብረዊል ጥዉ።

⁴¹ጝዝእለም እፈረየንት ናንድ ፃይ፦ «ጣሊተ ቍሚ» ዩ፤ ትርⶖምድም፦ «እፈረ ክተ ጕ» የነት የጝ።

⁴²እፈረየንም በውዝ ጕር ችብርች፤ እነኒረም ዋጥርጥርች፤ ጝርእድሚድም ፅጭ ሊጘ ምት ዊኑ፤ እቅድም ኣቐው ዊገይዝ ጭቕጘ ዲንቅሽⶖ።

⁴³እየሱስም ኣቐው ዊገድ ኣውማውቅ ኣርቓየጘ ቐናዝ ጣጝቅቅሱ፤ ጝርስም ዀነው ይውጛንስ ማጥን ኣዙ።