Read xamtanga ማርቈስት ወንጌል 6 Bible Online

ማርቈስት ወንጌል 6 - xamtanga bible

ማርቈስት ወንጌል 6

¹እንዝ ግረ እየሱስ ጝጊስ ጕ ጝኻግር ፊሩ፤ ጝክንደጥድም ጝት ቲክንⶖ።

²ቅዳምሲንቭት ችጛንድም ምኵራቪል ኣቕ ክንስጠ ኪርሙ፤ ወሸቍ ንቕፀቍ እቅድም ዲንቅሽ፤ ጛይም፦ «እኒን እጅርድ እንዛይ ዊቅድዛት ኣዊስ ችጙ? እኒን ጝጭስ ይውሽተው ጥቨቭድስ ወረጘ የጝ? እንዛይ ታምራንድዛትስ ፃቨውድ ኣወሸ የጝ?

³እኒን ቃነ ፃርቨተ ኣቐው ማርያምት ዅር ኣየውቀ? ያይቈቭ፣ የውሳ፣ ይዅዳ፣ ስሙንታዝን ኣየውቀ? ጝፅን እቍንድስ እንል ይናጅቅ ፅበቍድ ኣየቍቋ?» ይ፤ ጝቊዝም ፅጋርⶖ።

⁴እየሱስም፦ «ነቭይ ኪብራውድ በገዘ ጝኻግርስ፣ ጝዚምዳኒስ፣ ጝበተሰቪስም ጭቝ የጝ» ዩ።

⁵ጝጊስም ዊትቍ ፅውዝጅንጢል ጝናንድ እቝር ቓዙጚ ላጥ ታምራን ፃቭጠ ቸሊየውም።

⁶ኣምናቍ ኣጘጘም ቓል ጊርምሹ፤ ጝዝለም ኪው ጨቨቅ ጅልዋⶖ ክንስጠ ኪርሙ።

⁷ፅጭ ሊጘድዛትም ጭጝ ሊጘ ሊጘ ፃቫⶖ እፃቑ፤ ርኵሳን መንፈሳንድዛት ፊስጛንስም ስልጣን ይዉ።

⁸እንት የውም ኣዙ፦ «ክታጒደነይዝ ግብ ኣቕሽጚ ሊቈ ዊንም ሳንጠ ዊንም ክታከምሸነይል ጊንዝቭ ፃይትርነ።

⁹ፃብ ፃብጥን፤ ዊገድ ግን ሊጘትረ ኣልቨ ሲርትርነ።

¹⁰ኣውማው ጝንልቅ ጥውርናንድ ኻትመይስ ፍትርኒስቅ ጘጝ ጝኒል ጐይጥን።

¹¹ኣውማው ስፈረይስም እቅ ክታት ለምራቍ ዊንም ወሻቍ ኣጘውዝየ ጘጝ ስፍረይስ ፍርናንድ ጛጭስ ሚዝር ኣቓንስ ማጥን ክታልኵጣኒዙ ኣወረድየንት ጝግል ኣርግፍጥን።»

¹²ጛይም ጝጊስ ፍጝ እቅድቅ ንስኻ ጥውጥጘ ማጥን ሲቭክ።

¹³ንቕፀቍ ጋኒናንም እቂስ ፊስⶖ፤ ንቕፀቍ እቅም ዘይት ቓስጛⶖ ቓዝⶖ።

¹⁴እየሱስት ሽⶖድ ኣርቕሽታⶖ ፊራንስቅ፣ ንጕስ ኺረውድስ እኒንት ወሹ፤ ላው ላው እቅድም፦ «ጣምቀተ ይዃንስ ክርጘይስ ጕኩ፤ ዲንቅሰቍ ታምራን ጝግዝ ፃቭሽትጘውድም እንዝ ማጥን የጝ» ይ።

¹⁵ላጥድም፦ «ይልያስ የጝ» ይⶖ፤ ላጥድ ቈሽ፦ «ኽፅምትቍ ነቭያታኒስ ላዊዝጘ የጝ» ይጛ ዊን።

¹⁶ኺረውድስ ግን ዊገድየንት ወሻንድ፦ «እኒን ያን ጝቕልመድ ቀቭሰው ይዃንስ የጝ፤ እንወ! ክርጘይስ ጕኩ» ዩ።

¹⁷ኺረውድስ ጝዝን ፊልበውስት እውነ ኺረውድያደት ድዋንስቅ፣ ይዃንስት ጝርማጥን ፃይስ ወኽኒ ጝንል እፁስ ዊኑ።

¹⁸እንም ይዃንስ ኺረውድስት፦ «ክዝንት እውነት ድውተ ወሪትት ኽግድ ፊቅዳውም» ያ ዊናንስቅ የጝ።

¹⁹ኺረውድያደም እን ዊገይዝ ቅይምሽር ይዃንስት ቍውስተ በንራ ዊንች፤ ዊገድ ግን ቍውስተ ቸሊረይም።

²⁰ምላሰንድም ይዃንስ ፃድቅ ቅዱስም እጅር ኣቐጘ ኺረውድስ ኣርቓንስቅ ጐውት ሊሚዳ ዊኑ፤ ኺረውድስም ይዃንስ ዊግተውድየንት ወሻንድ ጭቕጘ ኻውክሻ ዊኑ፤ ኣነጚ ዲስተዝ ዊኑ ወሸውድ።

²¹እንዝ ግረም ኺረውድስ ጝእዅርሸው ግርየድ ኪብርዝጠ፣ ስልጣን ጒጢዝ፣ ጠውር ኣዘቲዝ፣ ላው ላው ኣርቕሽተቍ ገሊለትቍ እቂዝ ድግስ ኣስል ጭጙ፤ እንም ኺረውድያደስ ቀሰው ኣጋል ኣቑ።

²²ኣይንድም ኺረውድያደት ቝረ ድግሲል ጥውር ዚቨነውዝ ኺረውድስስመ ድግሲል ዊነቍ ኣብኒዝ ዲስ ሽች፤ ንጕስ ኺረውድስም እፈረየንት፦ «በንረውድቅ ዋቕር ነቅጭር» ዩ።

²³ቈሽም፦ «ይምጝግስቲስ ግቨርድ እኳ ዋቕርድሽ ነቀኵን» የው ቃል ጥዉ።

²⁴እፈረየንም ጝርኘትል ፊትር፦ «ወረጘ ጨውጫ?» ይች፤ ጝርኘም፦ «ጣምቀተ ይዃንስት ኣውርድ» ይች።

²⁵እፈረየንም በውዝ ንጕሲል ዋጥርድር፦ «ጣምቀተ ይዃንስት ኣውርድየንት ነን ሽኻንል ፃቭር ነቅ» ይች።

²⁶ንጕስድም እን ዊገይዝ ጭቕጘ ኻዝኑ፤ ጭጘቍ ኣብኒዝ በዊል ጥወው ቃልድየንት ግን ኣፅቭጠ በኒየውም።

²⁷እንዝ ማጥን ላው ዊተድረ በውዝ እፃቕ ይዃንስት ኣውርድ ቀቭ ነሳንስ ኣዙ፤ ዊተድረድም ወኽኒ ጝኒል ፊር ይዃንስት ኣውርድ ቀቩ።

²⁸ሽኻንልም ፃቭ እፈረየንስ ይዉ፤ እፈረየንም ጝርኘስ ፊስር ይውች።

²⁹ይዃንስት ክንደጥድም እኒንት ወሽጘጘ በውዝ ተርጝ እርሸድየንት ፊስጝ ዲቭⶖ።

³⁰ኻወርየታንድም እየሱስት ጋቢል ኣኽቭሽጝ ፃቭጘውድየንት ክንስጘውድየንትም እጝቅትቅ ጝጭስ ድቍⶖ።

³¹ንቕፀቍ እቅ ዋጥርጥርጛⶖ ዊንጛንስቅ ዅረ ዀነው ሰት እኳ ችጝየቍም፤ ኣቓንስቅም፦ «ላቝጥን ገለል የው ስፍረል ፊርነነ ጝግል ዊቱ ፈውጥን» ዩ።

³²እንዝ ማጥን ጝታለ ገለል የው ስፍረል ታኰዝ ፊርⶖ።

³³ኣነጚ ጛይ ፊርጛንድ ንቕፀቍ እቅ ቓልጝ ጛይ ኣጘጘ ኣርቕጛንስቅ ኻትምጢስቅ ፍጝ ጝታሊኲዝ ውጢጛⶖ ቃውስⶖ።

³⁴እየሱስም ታኰይስ ጊማንድ ንቕፀው ኽዝቭ ኣኽቭሽ ቓሉ፤ ምቓ እጀቍ ቢቂዝጘ ኣጘጘ ቓልም ጛጭስ ኻዝኑ፤ ንቕፀቍ ዊቅም ክንስጠ ኪርሙ።

³⁵ኣይንድ ግርየድ ኵናⶖ ፊራንስቅ ጝክንደጥድ ጝጐ ኣልትጝ፦ «እኒን ስፍረድ በራኸ የጝ፤ ግርየድም ኵንኩ።

³⁶እንዝ ማጥንም ኽዝቭድ ጣቀቲዝቍ ኪቊል ፊር ጝዅረ ጅቫንስ ማጥን ሲነቭሽ» ይ።

³⁷እየሱስ ግን ዊስ፦ «ክትን ዀነው ይውጥን» ዩ፤ ጛይም፦ «እደስለ ፊርን ዅጛንስ ማጥን ሊጘ ላ ዲናርዝ ሚ ጅቭን ይውነመ?» ይⶖ።

³⁸እየሱስም፦ «ዋቐ ምጭ ፃይርንኵርኑ? እስቲ ፊትርን ቓልጥን» ዩ፤ ጛይም ፊርጝ ቓልጝ፦ «ኣኰ ምጭዝመ ሊጘ ኻዝዝ እኵ» ይⶖ።

³⁹እንዝ ግረም ጝክንደጥድዛት ኽዝቭድየንት ቡድን ቡድንዝ ኣድልጝ ለምለም ፃቀይል ጐይስጛንስ ኣዙ።

⁴⁰ኽዝቭድም ላ ላዝመ ኣኵርጝን ኣኵርጝንዝ ኣቓ ቡድን ቡድንዝ ጐዩ።

⁴¹ጘጝም ኣኰ ምጪዝመ ሊጘ ኻዚዝ ፃይ ሲመይ ትጐ ቓለነውዝ በርኩ፤ ኽዝቪዝም ኣድልጛንስ ሚድየንት ቈርስ ጝክንደጢዝ ይዉ፤ ሊጘ ኻዝድዛትም እጝቅዝቅ ኣድሉ።

⁴²እጝቅቅም ዅጝ እፍትⶖ።

⁴³ጝክንደጥድም ቲርፈውድየንት ፅጭ ሊጘ ሚስቫን ምሉ ጕይ።

⁴⁴ዀቍ ግልቍድም ኣኰ ሽኽ ዊንⶖ።

⁴⁵በውዝም እየሱስ ኽዝቭድየንት ሲነቭሳⶖ ጝክንደጥድዛት ታኰዝ በተሰይደ ቃውስጝ ከርጛንስ ኣዙ።

⁴⁶ጝጊስም ጛት በር ፃልይጠ ኣበል ፉ።

⁴⁷ኵናንድም ታኰየን ባኽር ማኽሊል ዊንች፤ ጘጝም ጝለ ዝቨይል ዊኑ።

⁴⁸ጝክንደጥድም ጝታበዊል ጐው ፊግየድ ኻይልድ ዊናንስቅ ቀዝፈነውዝ ቺግርሽጝ ጋጥምጛ ቓሉ፤ ኻሪዙ ፃይጨ ሳድ ዲቈት ግረ ባኽርድ ደዳ ጝታጐ ተሩ፤ ጛትም ዲቍ ፊርጠ በን ዊኑ።

⁴⁹ዊገድ ግን ባኽርድየንት ደዳ ጝታጐ ተራንድ ቓልጝ ምታት ተካንስቅ ጐውትጝ ቓፅⶖ።

⁵⁰እጝቅም ጝት ቓልጛንድ ዳጝግፅⶖ፤ እየሱስ ግን በውዝ፦ «ኣይዝዀጥን! ያን የጝ ጐውትርነ!» ዩ።

⁵¹ጘጝም ታኰይል ፍ ጛጅቅ ላብጠ ኣቑ፤ ፊግየድም ችብሩ፤ ጛይም ጭቕጘ ዲንቅሽⶖ።

⁵²ምላሰንድም ሚዙ ታምርድየንት ኣስትውሊየቍም ዊን፤ ጝታዘንድም ዲንድን ዊኑ።

⁵³ባኽርድም ከርጝ ገንሰሪጥ ችጝ፤ ታኰድየንትም ዝቨይዝጐ ኣልስጝ እፅቍⶖ።

⁵⁴ጊምጘጘም ኽዝቭድ እየሱስት ኣርቑ።

⁵⁵ጅልወይልቅ ውጥየነውዝም ፅውዝጅንጥድዛት ኣረትዝ መውርጝ ጘጝ ችጝሸው ስፍረይዝጐቅ ነስ።

⁵⁶ጘጝ ችጘው ኪዊል ዊንም ኻትመይል ዊንም ገጠሪልቅ ፅውዝጅንድዛት ኣደቫቫይ ጨቨቅ ጐይስጛⶖ ጝኣልቨይዙ ጫፍድ እኳ ዳቕጥጘ ማጥን ጝት ጨውጛⶖ ዊንⶖ፤ ዳቐቍድም እጝቅቅ ቓድጛ ዊን።