Read xamtanga ማርቈስት ወንጌል 8 Bible Online

ማርቈስት ወንጌል 8 - xamtanga bible

ማርቈስት ወንጌል 8

¹ኣይንድም እንደ ገነ ንቕፀው ኽዝቭ ኣኽቭሹ፤ ውረውረ ዀነውም ዊኒየው ኣቓንስቅ ጝክንደጥድዛት ጝጐ ጭጝ፦

²«እንዛይ እቅድ ይጅቅ ሻቘ ግርቅ ዊንጛንስቅ፣ ዀነውም እጀቍ ኣጛንስቅ ኻዝንስጘኵ።

³እነይጝ ግድርድጘጘ ጝታጝን በርሳን ላው ላውድ እክል ኻግሪስ ተርጛንስቅ ምናልቫች ጒደነይል ዝላቕጝ ሊቭጥቍ» ዩ።

⁴ጝክንደጥድም፦ «እን በራኸይስ እንቝጠ ኽዝቪዝቅ ኣቐው ሚ ኣዊስ ችጝና?» ይጝ ዊስⶖ።

⁵እየሱስም፦ «ዋቐ ምጭ ፃይርንኵርኑ?» የው ዋቕሩ፤ ጛይም፦ «ላጝጠ ምጫ» ይⶖ።

⁶ጘጝም ኽዝቭድ ዝቨይል ጐያንስ ኣዙ፤ ላጝጠ ምጭድዛትም ጒ እደረት ሚዝየንዝ በር ኪል እቂዝ ኣድልጛንስ ማጥን ጝክንደጢዝ ይዉ፤ ጛይም ኽዝቪዝ ኣድልⶖ።

⁷እኒዝጘም መልቍ ኻዝ ፃይጝ ዊንⶖ፤ ጘጝም ኻዝድዛት በርክ ኣድልጛንስ ኣዙ።

⁸ኽዝቭድም ዅ እፍቱ፤ እንዝ ግረም ጝክንደጥድ ቲርፈውድየንት ላጝጠ ሚስቫን እቻዝጝ ጕይⶖ።

⁹ዀቍድም ሲዘ ሽኽ ኣጥጘ እቅ ዊን፤ እየሱስም ኽዝቭድየንት ሲነቭሰት ግረ፣

¹⁰ጝክንደጢጅቅ ታኰዝ ተሳፍርሽ ዳልማኑተ የነው ስፍረይዝጐ ፊሩ።

¹¹ፈሪሳንድም እየሱስ ትጐ ተርጝ ተከራክርሽጥጘ ኪርምⶖ፤ ፊትንጠጘም በንጝ፦ «ሲመይስ ምልክት ቓሊሽ» ይጝ ዋቕር።

¹²ጘጝም ጝመንፈሲዝ ጭቕጘ ቃትት፦ «ወረጘ የጝ እን ዅለድ ምልክት በነውድ? እማንዝ የኵን፤ እን ዅለይዝ ውረውረ ምልክት ይውሽታውም» ዩ።

¹³ጝጊስም ጛት ጝግል በር እንደ ገነ ታኰዝ ተሳፍርሽ እጂ ከሩ።

¹⁴ጝክንደጥድም ሚ ፃየነው ሚርⶖ፤ ላው ሚዝለ ታኰይል ውረውረቅ ዊኒየውም።

¹⁵እየሱስም፦ «ጣጝቅቅጭጥን፤ ፈሪሳነ ምጨይስመ ኺረውድስት ምጨይስ ክታቕምት ሊሚድጥን» የው ኣዙ።

¹⁶ጛይም ጛስ ጛይ፦ «እንት የውድ ቃል ሚ እጅነቅ ኣናንስቅ የጝ» ይⶖ።

¹⁷እየሱስም ጝታኻሰቭድ ኣርቕ፦ «ወረጘ የጝ፦ ‹ሚ እጅነቅ ኣናንስቅ የጝ› ይርን ዊግትርነውድ? ነንም ገነ ኣስክሳይርነቅመ? ልብስ ያይርነቅመ? ዊንስ ክታዘንድመ ዲንድንኩ?

¹⁸እልጣን ፃይርን ፅብርና ቓላይርነቅመ? ቀርዝጣንስ ፃይርን ፅብርናⶖ ወሻይርነቅመ? ትዝስ ያይርነቅመ?

¹⁹ኣኰ ምጭድዛት ኣኰ ሽኽ እቂዝ ቈርሳንድ ዋቐ ሚስቫን ቲርፈው ጕይርኑ?» ዩ፤ ጛይም፦ «ፅጭ ሊጘ ሚስቫና» ይⶖ።

²⁰«ላጝጠ ምጭድዛትስ ሲዘ ሽኽዝ ቈርሳንድ ዋቐ ሚስቫን ቲርፈው ጕይርኑ?» ዩ፤ ጛይም፦ «ላጝጠ ሚስቫና» ይⶖ።

²¹ጘጝም፦ «እደስለ ነኳን ኣሽ ኣስክሳይርነቅም የነትመ?» ዩ።

²²በተሰይደ ትጐም ተር፤ ጝግል ችጘጘም እቅ ላው ኻርቨ እጅር እየሱስ ትጐ ነስጝ ጝናኒዝ ዳቓንስ ማጥን ጨው።

²³እየሱስም ኻርቨይዝ ናንድ ፃይ ኪዊስ ፊሱ፤ እጅሪዝ እልጣኒልም ትፍ የው ጝናንጣንድ እጅሪዝ እልጣኒል እቝር፦ «ወረጘ ቓልደኵ?» የው ዋቕሩ።

²⁴ኻርቨድም ጭቅ የው ቓል፦ «እቅድ ዘፋኒዝጘ ተጝቀሳቅሽትጛንድ ቓለኵና» ዩ።

²⁵እየሱስም እንደ ገነ ጝናንጣንድ እጅሪዝ እልጣኒል እቝሩ፤ ኣይንድም እጅሪዝ እልጣንድ ቢት፤ እጝቅትቅም ዊር ሸው ቓሉ።

²⁶ጝጊስም እየሱስ እጅርድየንት፦ «ኪዊዝጐ ጥውተ፤ [ኣውማውስም ድቍተ፤]» የው ድቍ ጝጝን ሲነቭሱ።

²⁷እየሱስም ጝክንደጢጅቅ ኣቕ ፊልበውስ ቂሳርየት ጅልወይል ፅበቍ ኪቊዝጐ ፊሩ፤ ጒደነይል ፅብጛⶖም ጝክንደጥድዛት፦ «እቅ ይት ኣው ይጛ?» የው ዋቕሩ።

²⁸ጛይም፦ «ጣምቀተ ይዃንስ የጝ የቍ እኵⶖ፤ ላጥድ ይልያስ የጝ ይጘኵ፤ ላጥድ ቈሽ ነቭያታኒስ ላውድ የጝ ይጘኳ» ይጝ ድቍⶖ።

²⁹ጘጝም፦ «ክትንሰ ይት ኣው ይርና?» የው ዋቕሩ፤ ቢጥሮስም፦ «ክት ክርስቶስ የጝ» ዩ።

³⁰እየሱስም ጝማጥን ኣውማውስቅ ድቋይጘጘ ጛት ጣጝቅቅሱ።

³¹ጝጊስም እጅር ዅር ኽየው ሚከረ ለምረጠጘ ሽመቅሊዝ፣ ካኽነጣነ ኻልቅጢዝ፣ ወሪትት ኽግ ክንሰጢዝም ነቅሽጠጘ፣ ቍውሽትጠጘ፣ ሻቘ ግርቅዝ ግረ ክርጘይስ ጐው ኣቐጘ ጝክንደጢዝ ክንስጠ ኪርሙ።

³²ጘጝም እኒንት ግልፅዝ ድቁ፤ ኣይንድም ቢጥሮስ እየሱስት ጝለ ፊስ ጋስፅጠ ኪርሙ።

³³እየሱስ ግን ዘወር የው ክንደጥድዛት ቓላⶖ ቢጥሮስት፦ «ሲይጣን ክተ! ይእግርገይስ ፊጥ! ክት እጅርዝ ኻሰቭድየንትጚ እደረት ኽሳቭድ ኻስቫርም» የው ጋስፁ።

³⁴እንዝ ግረም ኽዝቭድየንት ጝክንደጢጅቅ ጝጐ ጭጝ እንት ዩ፦ «ይት ቲክንጠ በነው ፅብሽ ጝቕምት ኻዲነ፤ ጝሚስቅልድም መውር ይት ቲክነ።

³⁵ጝኒቭስሸንት ቓዝጠ በነውድቅ ጝርት ድስጡ፤ ይቍዝመ ወንጌልዝቍዝ የው ጝኒቭስሸንት ድሰውድቅ ግን ጝርት ቓዝጡ።

³⁶እጅር ኣልሚዙ ኻፍትድቅ ችጛን ጝኒቭስሸንት ግን ቓዚየውዝየ ጝጭስ ውር ጣቅምጡ?

³⁷ዊንስ እጅር ጝኒቭስሸንት ማጥን ኪፍለው ወየድ ወረጘ የጝ?

³⁸እኒን ክኻዲ ኽጥያትኘም ኣቐው ዅለይዝ በዊል ይቍዝ፣ ይቃሊዝቍዝም ኣይቭተውድቅ፣ እጅር ዅር ጚርት ክቭሪዝ ቅዱሳን መላካኒጅቅ ኣቕ ተራንድ ጝቍዝ ኣይቭትጡ።»