Read xamtanga ሉቃስት ወንጌል 1 Bible Online

ሉቃስት ወንጌል 1 - xamtanga bible

ሉቃስት ወንጌል 1

¹ኪብርሸው ቲወፍለውስወ! ይናግል ኣቐው ዊገይዙ ታሪክድ እንዝ ሚቅ ንቕፀቍ እቅ ፃፍጥጘ ሚኵርጝኵ።

²እኒን ታሪክድ ይናጭስ ዲቍስጝ ነየቍድም በውገይስ ኪርም ጝታቕም ጝታእልጣኒዝ ቓለቍ ወንጌሊዝ ኣገልጋያን ዊነቍድ ጛይ።

³ያንም በውረይስ ኪርም እጝቅትቅ ሚርምረት ግረ ታሪክድ ቃውሰ ቲክነይዝ ፃፍ ነቃን ይጭስ ቀሰው ተክ እትሉ።

⁴እኒንት ፃቭጨ በነውድም ክት ክንድረው ክንድጝድ እማንተው ኣቐጘ ኣርቕተ ማጥን የር የጝ።

⁵ይዅዳት ንጕስ ኺረውድስት ዚምኒዝ ኣቭየት ሰሙኒል ሚድቭሸው ዘካርያስ ይሽተው ላው ካኽን ዊኑ፤ ጝውነየንም የልሳቭየጥ ይሽትረይ ኣረውንት ዊግኒዝወ ዊንች።

⁶ጝታቪሉጝም ኣደረት ትዛዝመ ኽግዝ ፅበቍ ነቐፈ እጀቍ እቅ ዊን፤ እደረት በዊልም ፃድቃን ዊን።

⁷ኣነጚ የልሳቭየጥ ማኽን ዊንዳንስቅ ዅር እጀቍም ዊን፤ ጝታቪሉጝቅም ጊንጝ ዊን።

⁸ዘካርያስም ጝምድቪዙ ቲረይዝ እደረት በዊል ክኽንትዝ ኣግልግላንድ፣

⁹ካኽነጣነ ስረቲዝጘ እደረት መቅደሲል ጥው እጣን ኣጥንጠ ማጥን ጝጭስ እፀ ችጙ።

¹⁰እጣን ኣጥነነው ሰትድ ችጛንድም ኽዝቭድቅ ቢዘይል ችብር ፃልያ ዊኑ።

¹¹ኣደረት መላክም እጣን ጥይሰነው መሰወየይዝ ለዊዝጐቱ ችብር ዘካርያስስ እትሉ።

¹²ዘካርያስም መላክድየንት ቓላንድ ዳጝግፅ ጐውትዝ ስርሹ።

¹³መላክድ ግን እንት ዩ፦ «ዘካርያስወ! ጐውተ ክፀለውትድ ወይሽትኩ፤ ክውነ የልሳቭየጥም ግልወ ዅር እዅርቲ፤ ጝሽድም፦ «ይኳንስ» ይር ጭጝትር።

¹⁴ክትም ጭቕጘ ዲስ ይትር፤ ጝእዅርሸነዊዝም ንቕፀቍ እቅ ዲስ ይጥቍ።

¹⁵ኣደረት በዊልም ኽየው ኣጡ፤ ወይንዙ ሚዝዝመ ላየ እራዘው ዝየነውድቅ ስሪስቅ ዝያውም፤ ገነ ጝኘት ማፅንቲል ፅባ መንፈስ ቅዱስዝ እቻጡ።

¹⁶እስራየልት ኽዝቪስም ንቕፀቍድ ጝታኣምላክ እደረ ትጐ ዊስጡ።

¹⁷ኣደረስ ጥውሸው ኽዝቭ ኣስልጠ ማጥን፣ ቈሽም ኣቅሊዙ እዘንድ ጝታቝርትጐ፣ ኣደረስ ኣዚታቍድም ፃድቃኒዙ ጥቨቪዝጐ ዊስጠ ማጥን ይልያስት መንፈስዝመ ኻይልዝ ኣደረት በዊል ፃጝጡ።»

¹⁸ዘካርያስ ግን፦ «ያን ሽሚር እጅር የጝ፤ ይውነም ጝርእድሚድ ትክቭሽኩ፤ እደስለ ክት ይረዊዙ ዊገድ ወረጘዝ የጝ ኣርቕጨ ቸለውድ?» ዩ።

¹⁹መላክድም፦ «ያን እደረት በዊል ችብጠር ገቭርየል የጝ፤ ክጅቅ ዊግትጨ፣ እኒን ኣቭዝርተድም ክጭስ ኣቭዝርስጨ ማጥን እደረቲስ እፃጭ ተጥኩን።

²⁰ክት ግን ጝጊዝየድ ችጛንድ ፋፅምሸው ይቃልድ ኣምኒረርም፤ ኣቓንስቅም እን ይቃልድ ፋፅምሽጢስቅ ድደ ኣትር፤ ዊግተነውም ቸላርም» ዩ።

²¹ኽዝቭድም ዘካርያስ መቅደስ ጝኒስ ደያንስቅ ጊርምሻ ሊሚዳ ዊኑ።

²²ጘጝም መቅደስ ጝኒስ ፋንድ ዊግተነ ባንስቅ ኽዝቭድ መቅደሲስ እትለ ቓለጘ ኣስክሱ፤ ጘጝም ምልክትዝ ዊግተነው ኪርሙ፤ እነይም ድደ ኣቕ ፅቡ።

²³ዘካርያስም ጝኣግልግለነዊዙ ሰሙንድ ኻትሻንድ ጝጝን ፊሩ።

²⁴እንዝ ግረም ጝውነ የልሳቭየጥ ጊዙርች፤ እንትም ይች፦ «እደረ ጝምኽርቲዝ ይት ዲብስ እኒን ቀሰው ዊገድ ፃቩ፤ እቀ ማኽሊስም ይነቐፈድ እድጐ እክልሱ» ይር ኣኰ ርፍ ኣጢስ ጭቭትር ጐይች።

²⁵

²⁶እንቅ ኣቐው ዋልጠትረ ርፊዝም መላክ ገቭርየል እደረቲስ ናዝሪት የነይ ገሊለት ኻትመትል እፃሹ።

²⁷እፃሸውድም ዳዊትት ዊግንዙ ዮሴፍ የነው እጅርል ወግሽትር ዊንደይ ጝርሽድ ማርያም የነይ ላይ ድጝግልትል የጝ።

²⁸መላክድም ጚ ፅብረዊል ጥው፦ «ፃገዝ እቻረርወ! ዲስ ይ! እደረ ክጅቅ የጝ፤ ክት እቍኒስቅ ቲትር በርክሽረር የጝ» ዩ።

²⁹ማርያምም ጝት ቓልዳንድ ጝዊገይዝ ዳጝግፅር፦ «እኒን ኣወየው ዲግተ የጝፈ!» ይራ ኻስቨነው ኪርምች።

³⁰መላክድም፦ «ማርያምወ! እደረቲስ ፃገ ችጝርኵሩ፤ ጐውተ።

³¹እንወ ጊዝውርትር፤ ግልወ ዅርም እዅርትር፤ ጝሽድም እየሱስ ይትር።

³²ጘጝም ኽየው ኣጡ፤ ልውል እደረት ዅርም ይሽትጡ፤ ኣደረ ኣምላክም ጚር ዳዊትት ዙፋንድየንት ይውጡ።

³³ያይቈቭት ዚረይልም ዘላልም ኒግስጡ፤ ጝምጝግስትድም ኻትሸነ እጀውም» ዩ።

³⁴ማርያምም መላክድየንት፦ «ያን ግልወ ኣርቐቅም፤ እደስለ እን ዊገድ ኣወይ የጝ ኣቐውድ?» ይች።

³⁵መላክድም፦ «መንፈስ ቅዱስ ክግል ተርጡ፤ ልውል እደረት ኻይልም ክት ገርድጡ፤ ኣቓንስቅም ክጊስ እዅርሸው ኽፃንድ ቅዱስ የጝ፤ እደረት ዅርም ይሽትጡ።

³⁶ክዚምድ የልሳቭየጥ እኳ ማኽን ይሽትራ ፅብር ነን ጝርጊንትዝ ግልወ ዅር ጊዙትርኵች፤ ጊዙትረትም ነን ዋልጠ ርፍ የጝ።

³⁷እደረስ ቸልሻው ዊገ እጀውም» ዩ።

³⁸ማርያምም፦ «እንወ! ያን ኣደረት ኣገልጋይ የጝ! ክቃሊዝጘ ይግስ ኣና!» ይች፤ ጝዝለም መላክድ ጝርጊስ ቲት ፊሩ።

³⁹ማርያምም ኣይንት ሳብጢዝ ቃዝየዝ ጕር ዲቀ ይዅዳ ኻግሪል ችጝሽረይ ላይ ኻትመትል ፊርች።

⁴⁰ዘካርያስት ጝኒልም ጥውር የልሳቭየጥስ ዲግተ ይውች።

⁴¹የልሳቭየጥም ማርያምት ድመድ ወሽራንድ ሽልድ ጝርማፅንቲል ፅበጘ በጕሩ፤ የልሳቭየጥትልም መንፈስ ቅዱስ እቻቑ።

⁴²ጝርድመድም ኣጕስ ሽር፦ «ክት እቍኒስቅ ቲትር በርክሽረር የጝ፤ ክማፅንቲዙ ዅርድም በርክሸው የጝ።

⁴³ይኣደረ ትኘ ይት ገቭስተ ተትረውድ ያን ኣው የጝ?

⁴⁴ክዲግተድ ገነ ወጫንድ ይማፅንቲዙ ሽልድ ዲስተዝ በጕሩ።

⁴⁵ኣደረ ዊግተው ቃልድ ፋፅምሽጠጘ ኣምንደር ክት ቀቫሽረር የጝ» ይች።

⁴⁶ማርያምም እንት ይች፦ «ይኒቭስሸን ኣደረት ኪብርዘች።

⁴⁷ይመንፈስሸንም ይቓዘተ ኣቐው ይኣምላክትውዝ ዲስ የች።

⁴⁸ያን ጝኣገልጋይሸንት ውርድየትድ ቓልኩነ፤ ነስየ ይት ነንስ ኪርም ዅለድቅ፦ ‹ቀቫሸረይ› ይጡ።

⁴⁹ኻይሉ ኣደረ ይጭስ ኽየው ዊገ ፃቭኩ፤ ጝሽድም ቅዱስ የጝ።

⁵⁰ጝስቝርትድም ጝት ጐውተቊዝ ዅላዅሊልቅ ኣሽ ፅብጡ።

⁵¹ጝኻይሉ ናኒዝ ኽየው ሰቭ ሰራሽኩ፤ ጝታኻሰቪዝ ኲረቍ ትቪትኝጥድዛት ቢትንኩ።

⁵²ቅመትድዛት ጝታዙፋኒስ ጊምዝኩ፤ ትኽትነ ፃየቍድዛት ግን ንየስ ንየስ ሸውኩ።

⁵³ግድርደቍድ ጝበርክቲዝ እቭስኩ፤ ኻፍታማንድ ግን ጝታባደው ናን በርስኩ።

⁵⁴ይናኣቅሊዝ ዊግተጘ ኣቭርኻምስመ ጝዚረይዝ ዘላልምዙ ጝስቝርትድየንት ትዝ ያ ጝኣገልጋይ እስራየልት እርዲ የውኩ።

⁵⁵

⁵⁶ማርያምም ሻቘ ርፍ ኣጠ የልሳቭየጥ ጅቅ ጐይር በትር ጝርጝን ዋጥርች።

⁵⁷የልሳቭየጥም ጝርእዅረነ ግርየድ ችጛንድ ግልወ ዅር እዅርች።

⁵⁸ጝርግፂዝመ ጝርዚምዳኒዝም ኣደረ ጝስቝርትድ ጝርስ ኒቒሰጘ ወሽጛንድ ጝርጅቅ ዲስ ይ።

⁵⁹ኽፃንድ እዅርሸው ሰውጠትረ ግርየይዝም ጊርዝጥጘ ኣኽቭሽ፤ ጝሽድም ጚርት ሽዝ ዘካርያስ ይጝ ፊስጥጘ በን።

⁶⁰ጝኘ ግን፦ «ኣየውም ይዃንስ ይሽትነ» ይች።

⁶¹ጛይም፦ «ክዚምዳኒስ እን ሽዝ ጭጝሸው ላው እጅርቅ እጀዊ ውረ» ይ።

⁶²ጚርትም፦ «ጝሽድ ኣው ይሽጠ በንረኵ» ይጝ ሚርየዝ ዋቕር።

⁶³ጘጝም ፃፈነው ብራነ ዋቕር፦ «ጝሽድ ይዃንስ የጝ» የው ፃፉ፤ እጝቅቅም እን ዊገይዝ ጊርምሽ።

⁶⁴ዘካርያስም ኣይንድ ጝኣንደቨትድ እኪት ዊግተነው ቸሉ፤ እደረትም ሚዝየንዝጠ ኪርሙ።

⁶⁵ጝታግፅድቅም ጐውትዝ ስርሽ፤ እን ዊገድም ዲቀ ይዅዳ ኻግሪልቅ ወይሽቱ።

⁶⁶ወሸው እጅርድቅ፦ «እን ኽፃንድ ወረጘ ኣጡ ኣጢ?» ያ ዊገድ ጝእዘኒዝ ፃያ ዊኑ፤ ኣደረት ናንሸንም ጝጅቅ ዊንች።

⁶⁷ኽፃኒዝ ዚር ዘካርያስም መንፈስ ቅዱስዝ እቻቕ እንት ያ ትንቪት ዊግትጠ ኪርሙ፦

⁶⁸«ጝኽዝቭድ ገቭስ ቓዛንስቅ እስራየልት ኣምላክ እደረ ሚዝየንሽትነ።

⁶⁹ኽፅምስ ኪርም ቅዱሳን ነቭያታኒዙ ምቸይዝ ዊግተጘ ጝኣገልጋይ ዳዊትት ዚረይስ ይናጭስ ኽየው ቓዘተ ጕስኩ።

⁷⁰

⁷¹ቓዝጠ በነውድም ይናፃለታኒስመ ይናት ሽክተቊዙ ናኒስቅ የጝ።

⁷²እኒንትቅ ፃቨውድም ይናቅሊዝ ስቝርት ፃቭጠጘ፣ እንዝ ሚቅ ዊግት ዊነው ቅዱስ ኪዳንድም ፋፅምጠጘድ ቓሊስጠ በን የጝ።

⁷³እኒን ቃል ኪዳንድየንትም ይናኣይር ኣቭርናኻምስ ፃርዝ ይው ዊኑ።

⁷⁴እንም ይናፃለታኒስ ኻርነይ ፍን ጐውቲጝቀ እደረት ኣግልግልነ ማጥን የጝ።

⁷⁵እኒዝጘም ይናዚምኒዝቅ እደረት በዊል ቅድስነዝመ ፅድቅዝ ፅብነ ማጥን የጝ።

⁷⁶ቈሽም ክት ኽፃን ክተ! ልውል እደረት ነቭይ ይሽትር፤ ጝጒደነድ ኣስልተ ማጥን ኣደረት በዊል ፃጝረር የጝነ።

⁷⁷ቈሽም ጝታኽጥያቲስ ይቅርተ ችጝጥጘ ማጥን ኽዝቪዝ ጝታቓደነይዙ ኣርቕትድ ይውትር።

⁷⁸ይናኣምላክ ሳቝረተ፣ ርዅርዅም ኣቓንስቅ ይናግል ቓድትዙ ኰረ ሲመይስ ኣቭርኽጠ ፃቭጡ።

⁷⁹ጝብርኻንድም ጥመዝመ ክርጘዙ ፃመይል ፅበቊዝ ኣቭርኽጡ፤ ይናልኵጣንድዛትም ዲግተዙ ጒደነይዝ ሚሪጡ።»

⁸⁰ኽፃንድም ሊግዙ፤ መንፈስ ቅዱስዝም ጣጝክሩ፤ እስራየልት ኽዝቪዝ እትልጢስቅም በራኸል ፅቡ።