Read xamtanga ሉቃስት ወንጌል 10 Bible Online

ሉቃስት ወንጌል 10 - xamtanga bible

ሉቃስት ወንጌል 10

¹እንዝ ግረ እየሱስ ላጥ ላጝጥርጝን ሊጘ እቅ ማርፅ ይሙ፤ ጘጝ ፊረው ብጣይዝጐቅ ቀድምጝ ፊርጥጘ ማጥን ሊጘ ሊጘ ፃቭ እፃቑ።

²እንት የውም ዊግቱ፦ «ማፅወድ ኽየው የጝ፤ ሰራሸጥድ ግን ዊትቍ ጛይ፤ እንዝ ማጥን ማፅወይዝ ወነድ ጝማፅወይል ሰራሸጥ እፃጠ ማጥን ጨውጥን።

³ነስየ ፊጥን፤ ቢቂዝጘ ተኵልጢዝ ማኽሊል ክታት እፃጭር።

⁴ቡርሰም ኸረጢትም ፃብጣንም ፃይትርነ፤ ጒደነይስም ችጝርነው እጅሪዝቅ ዲግተ ይውትርነ።

⁵ላው ጝንል ጥውትርነ በንርናንድ በውግስርን፦ ‹ዲግተ እን ጝኒል ኣነ› ይጥን።

⁶ጘጝ ጝኒል ዲግተ ቀነው እጅር ፅብሽ ክታዲግተድ ጝጅቅ ኣጡ፤ ኣለዝየ ግን ክታዲግተድ ክታቕምትል ዋጥርጡ።

⁷ጛይ ኣልስጘውድቅ ዅርና ዝይርና ጘጝ ጝኒል ጐይጥን፤ ሰራሸው እጅርዝ ምኻየ ጥውሸው የጝ፤ ላው ጝኒስ ፍርን ላየ ጝንዝጐ ጅልውትርነ።

⁸ኣውማው ኻትመይልቅ ጥውርናንድ ክታት ለምርጝሽ ጛይ ኣልስጘውድቅ ዅጥን።

⁹ጚ ኻትመየንትቍ ፅውዝጅንጥድ ቓዝርና፦ ‹እደረት ምጝግስትየን ክታጐ ኣልትርኩች› ይጥን።

¹⁰«ዊገድ ግን ላይ ኻትመትል ጥውርናንድ ጛይ ክታት ለምሪጝሽ ኻትመየት ኣርወይል ፍርን እንት ይጥን፦

¹¹‹ይናልኲል ጣብቅሸው ክታኻትመይዙ ኣወረድ እኳ ኣርግፍንቅ፤ ዊገድ ግን ክትን ኣርቒርነቅምጚ እደረት ምጝግስትየን ክታጐ ኣልትር ዊንች› ይጥን።

¹²ፍርድ ግርየዝ ኰር ጚ ኻትመየንቲስ ሽ ሰደውምስ ቀልጡ የኵን።

¹³«ኰራዚንስ ወየው! በተሰይደስ ወየው! ክታግል ፃቭሸተቍ ታምራንድ ጢረውስስመ ሲዱነስታግል ፃቭሽት ዊናን፣ ገነ በውግ ጝግል ዊነቍ እቅድ ግምር ሲርጝ ፃብረልም ጐይጝ ንስኻ ጥውጥጘ ዊን።

¹⁴ዊገድ ግን ፍርድ ግርየዝ ኰር ክታጊስ ሽ ጢረውስስመ ሲዱነስ ቀልጡ።

¹⁵እፈ ቅፍርናዀም! ሲመይ ኣሽመ ንየስ ንየስ ይሩ? ቀሰው! ሲወል ኣሽ ጊምትር።»

¹⁶ቈሽም ጝክንደጢዝ፦ «ክታት ወሸውድ ይት ወሸኵ፤ ክታት ለምራውድ ግን ይት ለምራውም፤ ይት ለምራውድ ቈሽ ይት እፃቐውድየንት ለምራውም»ዩ።

¹⁷ላጝጥርጝን ሊጘድም እፃሽጝ ፊርጘዊስ ዲስተዝ ዋጥርጝ፦ «ኣደረወ ጋኒናን እኳ ክሽዝ ይናጭስ ኣዚት» ይ።

¹⁸ጘጝም እንት ዩ፦ «ሲጣንድ መቭረቂዝጘ ሲመይስ ሊቫንድ ቓሉን።

¹⁹ነስየ ሲቭረዝመ እጭወ ክርክጣነውዝድቅ ደድትርነ ማጥን፣ ፃለትዝ ኻይልድቅም ኻትርነ ማጥን ክታጭስ ስልጣን ነቅኩን፤ ክታት ቘይዘው ሚንትርነም እጀው።

²⁰ኣነጚ ክታሽድ ሲመይት መዝገቭዝ ፃፍሻንስቅ እንዝ ዲስ ይጥንጚ መንፈሳን ክታጭስ ኣዚትጙዝ ዲስ ይትርነ» ዩ።

²¹ኣይንድ እየሱስ መንፈስ ቅዱስዝ ጭቕጘ ዲስ የው እንት ዩ፦ «ሲመይስመ ዝቨስት ኣደረ ኣረር ኣየወ! እኒንት ጥቨቭኝጢስመ ኣርቐቍስ ሲውርድር ኽፃናታንዝ ጋልፅራንስቅ ሚዝየንዘኵን፤ የይ ኣየወ! እኒንት ፃቭተ ክፈቃድ ኣቕኩ።

²²ይር እጝትቅ ይጭስ ነይኩ፤ ቈሽም ዅርት ኣው ኣቐጘ ኣይርትለ ኣውማውቅ ኣርቓውም፤ ኣይርትም ኣው ኣቐጘ ዅርትለ ዅርም ጝጭስ ጋልፅጠ በነዊዝለ ኣውማውቅ ኣርቓውም።»

²³ጝክንደጢዝጐም ዋጥር ጝታለስ፦ «ክትን ቓልድርነውድየንት ቓለቍ እልጣን ቀቫሽቍ ጛይ።

²⁴እማንዝ የኵን፤ ንቕፀቍ ነቭያታንዝመ ንጕሳንዝ ክትን ቓልድርነውድየንት ቓልጥጘ በንጝ ዊን፤ ግን ቓሊየቍም፤ ክትን ወሽርነውድየንትም ወሽጥጘ በንጝ ዊን፤ ግን ወሺየቍም።»

²⁵ላው ግርየ ላው ወሪትት ኽግ ክንሰተ እጅር፣ እየሱስት ፊትንጠ በን ጕ ችብር፦ «ክንሰተወ! ዘላልምት ርዅየ ችጝጨ ማጥን ወረጘ የጝ ሰራጨ ጥውሸውድ?» ዩ።

²⁶እየሱስም፦ «ኽጊዝ ፃፍሸውድ ወረጘ የጝ? ኣወሽርስ ኣንቭቭረኵ?» ዩ።

²⁷ጘጝም፦ «ወሪትት ኽግድሰ፦ ‹ክኣምልክ ኣደረት ክእዘኒዝ፣ ክኒቭሲዝ፣ ክኻይሊዝመ ክኻሰቪዝቅ ምሉ በምሉዝ ቀን፤ ክፃምረድም ክቕምንትጘ ቀን› የኳ» ዩ።

²⁸እየሱስም፦ «ቀሰው ፃቭር የጝ ዊስረውድ! ክትም እንት ሽ፤ ዝላልምዙ ርዅየም ችጝትር» ዩ።

²⁹ወሪትት ኽግ ክንሰተድ ግን ጝቕምት ፃድቅ ፃቭጠ በን፦ «ኣው የጝ ይፃምረድ?» ዩ።

³⁰እየሱስም እንት የው ዊሱ፦ «ላው እጅር እየሩሳልየምስ ጕ እያሪኰ ትጐ ጊማንድ ሽፍጥ ችጝጝ ጝኣልቨድ ጊፍ፤ ቈሽም ድድብጝ ድድብጝ ክርጠ ጓንድ ማልጝ ፊር።

³¹ኣጋሊዝጘ ላው ካኽን ጘጝ ጒደነይዝ ጊማ ዊኑ፤ ጘጝም እድ ጣይተው እጅርድየት ቓል ሸው በር ውርቅ ፃቪጝቀ ዲቍ ፊሩ።

³²እኒዝጘም ላው ለዋዊ እጅር ተር ጘጝ ብጣይል ችጙ፤ ጘጝም ቓል በር እዲዝጘ ዲቍ ፊሩ።

³³ላው ሳምራነው እጅር ግን ጝዝ ዲቋንድ እድ ጣይተው እጅርድ ሊቨው ስፍረይል ችጙ፤ ጝት ቓላንድም ኻዝኑ።

³⁴ጝጐም ኣልት ዘይትዝመ ወይንዙ ሚዝዝ ጝልኻኒል ቅብስ በር ፃርቀዝ ጣጥም እፅቁ፤ ጝድዃረይልም ድቃስ ላው ኣብን ፈወነ ጝንል ፊስ ጝግል ፃቭ ኣሙዙ።

³⁵ጝኣምርሲዝም ሊጘ ዲናራን[4] ፊስ ጝኒዝ ወነይዝ ይው በር፦ ‹እን እጅርድየት ክኻደረ ዳኸነ ፃቭር ኣሙዝ፤ ላየ ቈሽር ኪፍልደው ጊንዝቭ ፅብሽም ዋጥራንድ ይቕም ኪፍልጭር› ዩ።

³⁶«ነስየ እንዛይ ሻቘ እቂስ እድ ጣይተው እጅሪዝ ፃምረ ኣቐውድ ኣውየን የጝ ተከኵ?» ዩ።

³⁷ወሪትት ኽግ ክንሰተድም፦ «እድየን ጝጭስ ኣርኽርኸው እጅርዳ» ዩ፤ እየሱስም፦ «ፈር ክትም ፊትር ጝጘ ፃቭ» ዩ።

³⁸እየሱስም ጝክንደጢጅቅ ኣቕ ፃጛ ላይ ኪውትል ጥዉ፤ ጝጊስም ማርተ የነይ ላይ እውነ ጝርጝኒል ለምርች።

³⁹ጝርስም ማርያም ይሽትረይ ጝርስን ዊንች፤ ማርያምም ኣደረት ልኲዝ ሳይል ጐይር ጝቃልድ ወሽራ ዊንች።

⁴⁰ማርተ ግን ጛጭስ ዀነው ኣስልዳጐስ ሰቭ ኒቒስራንስቅ ቢክንዳ ዊንች፤ ኣቓንስቅም እየሱስ ትጐ ተትር፦ «ኣደረወ ይስን ሰቭድቅ ይጭስ ይለ በትር ጐይራንድመ ዝም ይራ? ይት ከቭስተ ማጥንቀ ድቋር!» ይች።

⁴¹ኣደረ ግን፦ «ማርተ! ማርተ! ክት ንቕፀው ሰቭዝቍዝ ጨጝቅሽራ ቢክንደኵ።

⁴²ኣነጚ በንዘውድ ላው ጭቝ የጝ፤ ማርያምስ ዲቈው እድልድ ማርፅርኩች፤ እኒንት ጝርጊስ ቀም ፊሰውም እጀው» ዩ።