Read xamtanga ሉቃስት ወንጌል 11 Bible Online

ሉቃስት ወንጌል 11 - xamtanga bible

ሉቃስት ወንጌል 11

¹ላው ግርየ እየሱስ ላው ስፍረል ኣቕ ፃልያ ዊኑ፤ ጝፀለውትድ ኻተጘም ጝክንደጢስ ላውድ፦ «ኣደረወ ይዃንስ ጝክንደጢዝ ፀለውት ክንሰጘ ክትም ፃልይነ ማጥን ክንሽ» ዩ።

²ጘጝም እንት ዩ፦ «ፃልይርናንድ እንት ይጥን፦ ‹ሲመይ ፅብረር ይናኣይርወ! ክሽድ ኪብርነ፤ ክምጝግስትየን ተትርነ፤ ክፈቃድሸን ሲመይስ ኣረጘ፣ እኒዝጘም ዝቨትል ኣርነ።

³እልቱ ይናሚድ ግሪ ጨቨቅ ነቅ።

⁴ይን ይናት ቢድለቍድዛት ይቅር ይናንትጘ፣ ክትም ይን ቢድልነውድየንት ይቅር ይ፤ ፊተነልም ድውተ፤ ይናት ጭቓይስቅ ቓዝጚ።›»

⁵ቈሽም እንት ዩ፦ «ክታጊስ ወደጅ ፃየው እጅር ዊናን ጘጝ እጅርድ ኻረ ግቨሪዝ ፊር፦ ‹ይወደጅወ! ኣለቀይ ሻቘ ምጭ ኣዲሽ።

⁶ላው ይፃምረ ጒደነ ዊን ይጐ ተራን ኣልሰነው ሚ ቡን› ያኒ፣

⁷እድ ጝወደጅድ ኣቒል ኣቕ፦ ‹እፈ ላኽ ሽተ፤ ቢለድ ቘልፍሽኩ፤ ይቝርም ይጅቅ ኣረቲል ኽርይጝኵ፤ ኣቓንስቅም ጕን ነየነው ቸለቅም› ይጡመ?

⁸እማንዝ የኵን፤ ጝወደጅነይዝቍዝ ጕ ይውጠ በኒዪሽ እኳ ጝት ኒዝንዛንስቅ ጕ ጘጝ በነውድቅ ይወኵ።

⁹«ያንም የኵን፤ ጨውጥን፤ ካታጭስም ነይሽትጡ፤ ደምዝጥን፤ ችጝትርንቅ፤ ቢለድም ኰኳዝጥን፤ ክታጭስም ቢትጡ።

¹⁰ጨወውድቅ ለምርጡ፤ ደምዘውም ችጝጡ፤ ቢለ ኰኳዘውዝም ቢትጡ።

¹¹ክታማኽሊስ ኣይር ኣቕ ጝዅርድ ኻበሸ ጨዋን ቕርጘ ይወው እኩመ? ኻዘ ጨዋንስ ሲቭረ ይወውድ ኣው የጝ?

¹²ዊንስ ቕሉነ ጨዋን እጭወ ክርክርጣነው ይውጡመ?

¹³እደስለ ክትን ጭቕ ኣቕርን ፅብርና ክታቝሪዝ ቀሰው ይወነው ኣርቕርነውዝየ ሲመይቱ ክታይርድ ጝት ጨወቊዝ መንፈስ ቅዱስት ኣወሽ ኒቒስ ይዋው?»

¹⁴እየሱስም ላው ግርየ ላው ድደ እጅሪስ ዊግሳው ጋኒን ፊሳ ዊኑ፤ ጋኒንድ ፈት ግረም እድየን ድደ እጅርድ ዊግተነው ኪርሙ፤ ኽዝቭድም ጭቕጘ ጊርምሹ።

¹⁵ላው ላውድ ግን፦ «ጋኒናንድ ፊሰውድ ብየልዘቩል የነው ጋኒናነ ኻልቀይዝ የጝ» ይ።

¹⁶ላጥ ቈሽ ፊትንጥጘ በንጝ ሲመይስ ላው ምልክት ቓሊስጠ ማጥን ጝት ዋቕር።

¹⁷ጘጝ ግን ጝታኻሰቭድ ኣርቕ እንት ዩ፦ «ላው ምጝግስት ጝስመ ጝስ ቲተቲተው ኣቐውዝየ ድዘው የጝ፤ እኒዝጘም ላው በተሰቭ ጝስመ ጝስ ቲተቲተውዝየ ሊቨው የጝ።

¹⁸ጋኒናን ጛስመ ጛስ ቲተቲትጘውዝየ ሲጣኒዝ ምጝግስትየን ኣወይር ፀናቲ? እኒንት የውድም ክትን ይት ብየልዘቩልዝ ጋኒናንድ ፊሰኵ ይርኑዝ የጝ።

¹⁹ቈሽስ ያን ጋኒናንድዛት ፊሰውድ ብየልዘቩልዝ ኣቐውዝየ ክታቝርድ ኣውትዝ የጝ ፊስጘውድ? ነስየ በገዘ ክታቝርድ ክታት ፊርድጥቍ።

²⁰ያን ጋኒናን ፊሰውድ እደረት ኻይልዝ ኣቐውዝየ ግን እደረት ምጝግስትየን ክታግል ኣልትረጘ ኣርቕጥን።

²¹«ላው ኻይሉ እጅር መሰሪ ከምር ጝጝንድ ሊሚደውዝየ ጝኻፍትድ ዚርፍሻውም።

²²ጝጊስ ዲቈው ኻይሉ እጅር ተር ጝት ኻቕሽ ግን ተማምንሽ ዊነው ጝመሰሪድየንት እክስ ፊሰኵ፤ ጝኻፍትድም መራቕ ላጥዝ ኣድልድለኵ።

²³ይጅቅ ኣቓውድቅ ይት ተቃውምሸኵ፤ ይጅቅ ኣኽቫውድም ቢትነኵ።»

²⁴«እርኵስ መንፈስ እጅሪስ ፋንድ ፈወነ ስፍረ ደምዝጠ ኣቝ እጀው በራኸዝ በራኸ ጅልወኵ፤ ደምዝ ደምዝ ባንድ ግን፦ ‹እንዝ ሚቅ ዊነው ይጝኒል ፊጨጚ› የኵ።

²⁵ዋጥር ተራንድም እድ ጝንድ ዊር የው ኣስልሽ ችጘኵ።

²⁶እንዝ ግረ ፊር ጝቐምቲስ ወሰቍ ላጝጠ ጭቕ ጋኒናን ፃይ ተረኵ፤ እድ ጝኒልም ጥውጝ ጐይጥቍ፤ እንዝ ግረ እድ እጅሪዙ ፅብጘድ በውገትዊስ እግርገትውድ ወሰው ኣቐኵ።»

²⁷እየሱስ እኒንት ዊግታ ሲጝቀ ኽዝቪዝ ማኽሊስ ላይ እውነ ጝርቃልድ ኣጕስ ሽር፦ «ክት መውትረይ ማፅንትሸንስመ ክት ኒቭረቍ እቍጣኒዝ ቀቫሸቍ ጛይ» ይች።

²⁸ጘጝ ግን፦ «ቀቫሸቍስ እደረት ቃልድ ወሽጝ ኣዚተቍድ ጛይ» ዩ።

²⁹ንቕፀው ኽዝቭም ጝጐ ኣኽቭሻንድ እየሱስ እንት ዩ፦ «እን ዅለድ ጭቓ የጝ፤ ምልክት ቓልጠ በነኵ፤ ዊገድ ግን ነቭይ የውናስት ምልክትድ ኣሽጚ ላየ ምልክት ይውሽታውም።

³⁰የውናስ ነነውየት ኽዝቪዝ ምልክት ኣቐጘ እጅር ዅርም እን ዅለይዝ ምልክት ኣጡ።

³¹ደቩቭት ንግስትየን ፍርድ ግርየዝ ኰር እን ዅለይጅቅ ጕር ጘጝ ዅለድ ፊርድቲ፤ ምላሰንድም ጚ ሰለሙንት ጥቨቭድ ወሽተ ዝቨዝ ደርቸይስ ጕር ተትርኵች፤ ዊገድ ግን እንወ! ሰለሙንቲስ ዲቈው እንል እኩ።

³²ነነውየት እቅድ ፍርድ ግርየዝ ኰር እን ዅለይጅቅ ጕጝ ጘጝ ዅለይል ፊርድጥቍ፤ ምላሰንድም ነነውየት እቅድ የውናስት ስቭክትድ ወሽጝ ንስኻ ጥውጝኵ፤ ዊገድ ግን እንወ! የውናስቲስ ዲቈው እንል እኩ።

³³«መቭራት ኣቭርኽዝ ስውር ስፍረል ዊንም ክቪ ኣቒል እቝረው እጅርም እጀው፤ ኣቒ ጥወቍ እቂዝቅ እትልጠ ማጥን ንየስ ሸው መቅረዚል እቝረኵ።

³⁴ክሰውነቲዝ መቭራትሸን ክእልሸን ጚ፤ ነስየ ክእልሸን ትኽኒ ኣርሽ ክሰውነትድቅ ብሩኽ ኣቐኵ፤ ክእልሸን ፅውዝጅነ ኣርሽ ግን ክሰውነትድቅ ጥምተው የጝ ኣቐውድ።

³⁵ኣቓንስቅም ክቕምትል ፅበው ብርኻንድ ጥምታየጘ ጣጝቅቅጭ።

³⁶ነስየ ክሰውነትድ ውርቅ ጥመ እጀው ብሩኽ ኣቐውዝየ ክዅለመነድቅ ድምቐው መቭራትድ ኣቭርቅርቃንትጘ ብሩኽ ኣጡ።»

³⁷እየሱስም እኒንት ዊግት ኻተጘ ላው ፈሪሳነው እጅር እየሱስት ምዘት ዀስጠ ጝጝኒል ኣቭንወ ጭጙ፤ ጘጝም ፊር ጝጅቅ መዲል ጐዩ።

³⁸ፈሪሳነውድም እየሱስ ምዘት ዀነዊዝ በውገ ጝናንጣንድ ቓሪየው ኣቓንስቅ ጊርምሹ።

³⁹ኣደረም እንት ዩ፦ «እፈ ፈሪሳን ክታትርነ! ወኝጨይዝመ ድስቲዝዙ ዲግድ ዊር ሽርን ቓስርነኵ፤ ክታጊዝውድ ግን ጭቕትዝመ ቀመነውዝ እቻቕኩ።

⁴⁰እፈ ኻጘፃን ክታትርነ! እደረ ዲግድ ፋጥረጘ ኣቒድስ ፋጥሪየውመ?

⁴¹ዊገድ ግን ኣቒል ፅበውድ ምፅዋት ፃቭርን ይውጥን፤ እንዝ ግረ ክታጭስ እጝቅቅ ንፅዅ ኣጡ።

⁴²«እፈ ፈሪሳን ክታትርነ ወየው! ኣዝሙዲስ፣ ጨናዳሚስመ ላጥ ቅመማኒስቅ ኣስራት ፊስርን ይውርነኵ፤ ኣነጚ እማን ፊርደነውዝመ እደረት ቀነነውዝ በትርንኵርኑ፤ እንዛት በሪጝቀ ዊኑ እዛት ፃቨነውድ።

⁴³እፈ ፈሪሳን ክታትርነ ወየው! ምኵራቪስ ኪብረው ጐይተል ጐየነው፣ ኣርየ ማኽሊስም እጅርቅ ክታት ሲለም ይጠ በንርነኵ።

⁴⁴እቅ ኣርቒጝቀ ጝዲጊል ፃጝጘው ምልክት እጀው መቃቭርድ ተክርነቅ ክታትርነ ወየው።»

⁴⁵ወሪትት ኽግ ክንሰጢስም ላውድ፦ «ክንሰተወ! እንት ይር ዊግርትራንድ ቃል ይናት ዛሸነት የጝ» ዩ።

⁴⁶እየሱስም እንት ዩ፦ «ወሪትት ኽግ ክንሰጥ ክታትርነ ክታግልም ወየውተ ተርጡ፤ ምላሰንድም እቅዝ መውርሻው ፅጐወው መውር መውስርነኵ፤ ክታቕም ግን ክታላይ ኽጨውለየስ እኳ ዳቓይርነቅም።

⁴⁷ክታኣቅልድ ቍውጘቍ ነቭያታኒዝ መቃቭርድ ተስርነቅ ክታግስ ወየው።

⁴⁸ነስየ ክትን ክታኣቅልድ ሰራሽጘው ሰቪዝ ቲስመምርነቅ ሚዝረጫን የጝ፤ ጛይ ነቭያታንድዛት ቍዉⶖ፤ ክትን ቈሽ ጝታመቃቭራንድ ተስርነኵ።

⁴⁹እንዝ ማጥን እደረት ጥቨቭሸን እንት የች፤ ‹ነቭያታንዝመ ኻወርየታንዝ ጝታጐ በርስጭር፤ ጛጊስም ላው ላውድ ቍውጥቍ፤ እዳቐቍድዛት ቈሽ ሲድስጥቍ።›

⁵⁰ኣቓንስቅም ንጭት ዅለድ ኣልም ፋጥርሸት ኪርም ቅብረው ነቭያታኒዙ ብሪዝቍዝቅ ዋቕርሸው የጝ።

⁵¹ኣቭየልት ብሪስ ኪርም መሰዊየይዝመ መቅደሲዝ ማኽሊል ቍውሽተው ዘካርያስትል ኣሽ ቅብረው ብረድቅ እን ዅለይስ ደምዝሽትጡ፤ የይ! እን ዅለድ እንዝቅ ዋቕርሸው የጝ።

⁵²ክትን ወሪትት ኽግ ክንሰጥ ክታትርነ ወየው! ኣርቕትዙ ቝልፍድ ፃይርንኵርኑ፤ ዊገድ ግን ክታቕምም ጥዋይርነቅም፤ ጡጥጘ በነቍድም ጊግቭርነኵ።»

⁵³እየሱስም ጝጊስ ፋንድ ፈሪሳኒዝመ ወሪትት ኽግ ክንሰጢዝ ጭቕጘ ተቃውምሽጛ ንቕፀቍ ዊቅም ዋቕርጛ ኣዋክቭጥጘ ኪርም።

⁵⁴እንት ሽጘውድም ጝምቸይስ ፈው ቃሊዝ ፃውርጥጘ በንጝ የጝ።