Read xamtanga ሉቃስት ወንጌል 12 Bible Online

ሉቃስት ወንጌል 12 - xamtanga bible

ሉቃስት ወንጌል 12

¹ኣይንድ ንቕፀው ሽኽዝ እጊተው ኽዝቭ ጝስመ ጝስ ደድሽጢስቅ ኣኽቭሽ ፅባ፣ እየሱስ በውግ ጝክንደጢዝ እንት የነው ኪርሙ፦ «ፈሪሳኒዙ ሚጨይስ ጣጝቅቅጭጥን፤ እንም ጝታተክዝኒስ ጣጝቅቅጭጥን የነት የጝ።

²ሺፍንሸው ጋልፅሺጝቀ እዳቓውም፤ ሲውርሸውም ኣረሲጝቀ እዳቓውም።

³ኣቓንስቅም ጥመዝ ዊግትርነውድቅ ብርኻንዝ ወይሽትጡ፤ ዲቭሽተው ጝንል ኣቕርን ቀርዝል ሽዅሽዅ ይርና ዊግትርነውድም ኽድም ዲጊል ይፋዝ ዊግሽጡ።

⁴ክትን ይወደጃኒዝ ግን እንት የኵን፤ ስየት ቍወነው ኣሽጚ ላየ ውርም ፃቭጥጘ ቸላቍድዛት ጐውትርነ።

⁵ዊገድ ግን ጐውተነውድ ኣውት ኣቐጘ ቓሊስጭር፤ ስየት ቍወት ግረ ገኻነመሳትል ማለነው ስልጣንዝ ጕርየድየንት የጝ፤ የይ! ጝት ጐውትጥን የኵን።

⁶ኣኰ መልቍ ዚልቅ ፅቃ ሳንቲምዝ ቂሸቍ ኣየቍመ? ኣነጚ ጛጊስ ላይሸንት እኳ እደረ ሚራውም።

⁷ክትንም ክታኣውር ፅቭቀድ እኳ እጊተው የጝ፤ እደስለስ ጐውትርነ፤ ንቕፀቍ መልቍ ዚልቂስ ክትን ዲቍርነቅ የጝ።»

⁸እየሱስም ቈሽ እንት ዩ፦ «ኣይቭቲጝቀ እቀ በዊል ይማጥን ሚዝርደዊይዝቅ ያን ቈሽ እደረት መላእክታኒዝ በዊል ጝማጥን ሚዝርድጭር የኵን።

⁹እቀ በዊል ይት ኻድየውድየንት ቈሽ ያንም እደረት መላእክታኒዝ በዊል ጝት ኻዲጭር።

¹⁰እጅር ዅርት ዛንዝ ዊግተው እጅር ፅብሽ ጝበደልድ ይቅር ይሽትጡ፤ መንፈስ ቅዱስት ዛሸው እጅር ፅብሽ ግን ጝበደልድ ይቅር ይሽታውም።

¹¹እቅ ክታት ምኵራቪል፣ መኳንንታኒልም ኣነ ደጝጢልቅ ፍርድል ኣልስጛንድ፦ ‹ውር ዊስንቅ? ኣወሽንስ ዊግትንቅ?› ይርን ጨጝቅሽትርነ።

¹²ኣይንድ ክትን ዊግትርነ ጥውሽውድቅ መንፈስ ቅዱስ ክታጭስ ድቍጡ።»

¹³ኽዝቪዝ ማኽሊስም ላው እጅር፦ «ክንሰተወ! ይናኣይርት እርስቲስ ይጭስም ኣድል ነይጠ ማጥን ይዝንስቀ ድቋር» ዩ።

¹⁴እየሱስም፦ «እጅር ክተ! እርስት ኣድልጨ ማጥን ክታዲጊል ይት ደጘ ፃቭ ይመውድ ኣው የጝ?» ዩ።

¹⁵ቈሽም እጝቅዝቅ እንት ዩ፦ «እጅርዙ ርዅየድ ኻፍትዙ ንቕፀዝ ሚስርትሸውም ኣየው፤ ኣቓንስቅም ጣጝቅቅጭጥን! ስግቭግቭ የነዊስም ክታቕምት ኣክኑጥን» ዩ።

¹⁶እንዝ ግረ ቈሽ እኒን ተከድ እንት የው ድቁ፦ «ጭቕጘ ኣረ ኣቐው ቺዝጝ ፃየው ላው ኻፍታም እጅር ዊኑ።

¹⁷እን እጅርድም፦ ‹ኣይር ኣረድ ድወነ ስፍረ እጀርም፤ ውር ፃቭጭር ኣጢ› ያ ጝእዘኒዝ ኻስቨነው ኪርሙ።

¹⁸እግረም፦ ‹እንት ሽጨ! ይፅበቍ ቅፋንጥድቅ ፋዝ ላጥ ፈራቐቍ ቅፋንጥ ተስጨ፤ ጝግልም ይምርቲዝመ ይንቭረቲዝቅ ኣኽቭ ዱጭር።

¹⁹ጝዝለም ይቕምት እንት ይጭር፤ ነስየ ኽየው ዚምንዝ ኣቐው ንቕፀው ኻቭት ፃይርኵሩ ፈውር ዃይ! ዝጭ! ዲስ ይ! ይጭር› ዩ።

²⁰እደረም፦ ‹እፈ ኻጝ እጅር ክተ! ክኒፍስሸየንት ንጭ ኻርዝ ክስየይስ ቲዝጝ ፊስጥጘ የጝ፤ እደስለ እን ኣኽቭረው ኻፍትድቅ ኣውስ ኣጠ የጝ› ዩ።

²¹ጝቕምስ ኻፍት ኣኽቫ እደረት በዊል ድኻ ኣቐው እጅርም ጝኻትሸነድ እኒዝጘ ኣጡ።»

²²እንዝ ግረ ጝክንደጢዝ እንት ዩ፦ «እንዝ ማጥን፦ ‹ውር ዅንቅ? ውርስ ሲርንቅ?› ይርና ክታስየትቍዝ ጨጝቅሽትርነ የኵን።

²³ምላሰንድም ዀነው ዅረይስ ርዅየ፣ ሲረነው ኣልቨይስም እጅርነይ ዲቈኵ።

²⁴ወፈጥድ ቓልጥን፤ ፊዛቍም፤ ኣይራቍም፤ ኣረ ኣኽቨነው ስፍረ ዊንም ቅፋነ እጀቍም፤ እደረ ግን ጛት ቀልቨኵ፤ እደስለ ዚልቂስመ ክትን ቺዛይርነቀ?

²⁵ኣየውጚ! ክታጊስ ጨጝቅሽ ጝእድሚል ላው ግርየ[5] ቈሸነው ቸለውድ ኣው የጝ?

²⁶እደስለ እኒን ዊቱድ እኳ ፃቨነው ቸሊርነውዝየ ውር ማጥን የጝ ላየዝ ጨጝቅሽርነውድ?

²⁷እስቲ ግኒንኣቨቨድ ኣወይ ሊግዘጘ ቓልጥን! ልቕርዳውም፤ ምቃውም፤ ኣነጚ ሰለሙን እኳ እድቝጠ ጝክቭሪስቅ ጝጊስ ላይሸንትጘ ሲሪየውም።

²⁸እደስለ እደረ ንጭ እትል ኣምር ልየይል ሊቨው በራኸይዙ ፃቀድየንት እነሽ ሲሰው ኣቐውዝየ እምንት ጒድልድርነቅ ክታትርነ! ክታጭሰ ኣወሽ ዲቈው ሲሳው?

²⁹«እንዝ ማጥን፦ ‹ውር ዅንቅ? ውርስ ዝይንቅ?› ይርና ኻስቨነውዝ ጨጝቅሽትርነ።

³⁰እኒዝቍዝሰ ኣልሚዝቍ ኣኽዛቫንድቅ ጨጝቅሽጘኵ ቃየው፤ ክታጭስ ግን እንቅ በንዝጠጘድ ሲመቱ ክታይርድ ኣርቐኵ።

³¹ኽሽስ እደረት ምጝግስትት በንጥን፤ እኒንትቅም ቈሽ ነይጡ።

³²«እፈ እጥን መጝገ ክተ! ጐውተ! እደረ ጝምጝግስትድ ነይጠ በንኩ።

³³ፃይርነውድቅ ቅይርን ድኽዝ ምፅዋት ይውጥን ኣቢታው ቡርሰዝ ፃቭርን ቓፅጘ ስዊል ናዘም ዃዊል ምጝግስተሰማያቲል ኣቢታው ኻቭት ኣኽቭጥን።

³⁴ክታኻቭትድ ፅበዊል ክታእዘንድም ፅብጡ።»

³⁵እንዝ ግረም እየሱስ እንት ዩ፦ «እጅጝዝ ከምትርን ኣስልሽርነቅ ኣጥን፤ ክታመቭራትድም ኣቭርኸው ኣነ።

³⁶ጝታኣደረድ ቅየኒስ ዋጥርጢስቅ ሊሚደቊዝመ ተረጘም ቢለድ ኰኳሻንድ በውዝ ብዝጥጘ ኣስልሸቍ እቂዝ ተክጥን።

³⁷ጝታኣደረድ ዋጥራንድ ነቃቕጝ ሊሚድጛ ችጝሸቍ እዛይ ኣገልጋያንድ ቀቫሸቍ ጛይ፤ እማንዝ የኵን፤ ጘጝም እጅጝዝ ከምር ጛት መዲል ጐይስ ኣግልግልጡ።

³⁸ኻረ ግቨሪዝ፣ ዊንም ጂርውዋኒዝ ተራንድ እነይጝ ነቃጛ ዊነቍ እዛይ ኣገልጋያንድ ቀቫሸቍ ጛይ።

³⁹ዊገድ ግን ላው ዊገ ኣርቕጥን፤ ጝን ጕርየ እጅር ቓፅጘ ዋቐ ሳዝ ተርጠት ኣርቓን፣ ጝጝንድ ሲርስራንድ ዝም የው ቓልጠም ዊኒየው።

⁴⁰ክትንም እጅር ዅርት ተረነ ግርየድ ክትን ኻልዪይርነው ግርየይዝ ኣቓንስቅ ኣስልሽርን ሊሚድጥን።»

⁴¹ቢጥሮስም፦ «እኒን ተከድ ይናጭስመ ዊንስ እጝቅዝቅ የጝ ድቍረውድ?» የው እየሱስት ዋቕሩ።

⁴²ኣደረም እንት ዩ፦ «ነስየ ጝታዀነውድ ጛጭስ በንዘው ሰቲዝቅ ይውጠ ማጥን ኣደረድ ጝበተሰቪል ይመው ኣምንሽተው ብልኽ መጋቪድ ኣው የጝ?

⁴³ጝኣደረድ ዋጥራንድ እነሽ ሰራሻ ችጝሸው ኣገልጋይድ ቀቫሸው የጝ።

⁴⁴እማንዝ የኵን፤ እድ ኣገልጋይድየንት ጝፃየው ኻፍቲልቅ ይምጡ።

⁴⁵ዊገድ ግን እድየን ኣገልጋይድ፦ ‹ይኣደረድ ተራውም ደይጡ› የው ጝእዘኒዝ ኻስቫን፣ ቈሽም ኣርጪዝመ ብንድጢዝ ድድባ ዅጠ፣ ዝይጠ፣ ራጠም ኪርማን፣

⁴⁶ጝኣደረድ ጘጝ ኻልዪየው ግርየየይዝመ ጣርጥሪየው ሰቲዝ ተርጡ፤ ጝትም ሊጘትል ቀቭ ማልጡ፤ ጝእድልድየንትም ኣምንሽታቊጅቅ ፃቭጡ።

⁴⁷«ጝኣደረይዝ ፍቃድድ ኣርቓ ፅባ ኣስልሻው፣ ጝፍቃድድም ፋፅማው ኣገልጋድቅ ኽየው ቕፃር ቐፃሽጡ።

⁴⁸ጝኣደረይዝ ፍቃድድ ኣርቒጝቀ ጝት ጊርፍሰው ሰቭድ ሰራሸው ኣገልጋይ ግን ዊቱ ጊርፍሽጡ፤ ንቕፀቍ ይውኑ እጅሪስ ንቕፀቍ ደምሽጡ፤ ኽየው ኽድር ለምረው እጅሪስም ኽየው ደምሽጡ።»

⁴⁹«ያን ተጠውድ ዝቨትል ልየ ማልጨ የጝ፤ ነን ቃዝየዝ ኻውያን ውርጘ ዲስ ይጨ ዊኑን!

⁵⁰ዊገድ ግን ያን ጣምቅጨው ጥምቅት እኩ፤ ጘጝ ፋፅምሽጢስቅም ጭቕጘ ጨጝቅጭኩን።

⁵¹ዝቨትል ዲግተ ነስጨም ኣየው ያን ተጠውድ፤ ኣየውም! እማንዝ የኵን፤ ያን ተጠውድ ቲዘ ቲዝጨ የጝ።

⁵²ነንስ ኪርም ላው ጝኒል ጛስ ጛይ ቲተቲተቍ ኣኰ በተሰቭ ዊንጥቍ፤ ሻቘድ ሊጘይጅቅ ሊጘድ ቈሽ ሻቘይጅቅ ጐርትጛ ቲተቲትጥቍ።

⁵³ኣይር ጝዅር ጅቅ ዅርም ጚር ጅቅ፣ ኵየን ጝርቝረ ጅቅ ዅረም ጝርኘ ጅቅ፣ ጣስን ጝርስሪ ጅቅ ስሪይም ጝርጣስን ጅቅ ጐርትጛ ቲተቲትጥቍ።

⁵⁴ቈሽም ኽዝቪዝ እንት ዩ፦ «ድምነ ምራቪዝጐቱ ጅልዋንድ ቓልድርናንድ ቃዝይርን፦ ‹ስወ ሊቭጠ የጝ› ይርነኵ፤ እርግጥም ሊቨኵ።

⁵⁵እኒዝጘም ደቩቪዝጐቱ ፊግየ ጣዛንድ፦ ‹ንጭ ግርየድ ብረው ኣጠ የጝ› ይርነኵ፤ እርግጥም ኣቐኵ።

⁵⁶እፈ ተክዘጥ ክታትርነ! ዝቨዝመ ሲመይዝቱ ሚልክድ ሚርምረነው ኣርቕርነኵ፤ እደስለ እኒን ዚምንድ ወረጘ የጝ ኣርቐነ ብርነውድ?

⁵⁷«ውረም እማንዝ ክታቕምስ ፊርዳይርነቅ?

⁵⁸ክቃርኘይጅቅ ደጘል ኣልተ ፊትራንድ ገነ ጒደነይል ፅብራ ክቃርኘይጅቅ ኣርቅሽተ ማጥን ልቕርጭ፤ ኣለዝየ ክቃርኘድ ጒዝ ደጘይል ፊስጡ፤ ደጘድም ቡሊስዝ ዲቍስ ይውጡ፤ ቡሊስድም ወኽኒ ጝኒል ድውጡ።

⁵⁹ጝዝለ ክቕፃርድ እጝቅትቅ ፋፅምቲስቅ ጝጊስ ፋርም የኵን።»