Read xamtanga ሉቃስት ወንጌል 13 Bible Online

ሉቃስት ወንጌል 13 - xamtanga bible

ሉቃስት ወንጌል 13

¹ኣይንድም እቅ ተርጝ፦ «ገሊለትቍ እቅ ምስዋይት ኣልስጛ ሲጝቀ ቢላጠውስ ጛት ቍዉ፤ ጝታብርድም ጝታምስዋይቲጅቅ ዲቭልቁ» ይጝ እየሱስስ ጂጝዝ።

²ጘጝም እንት የው ዊሱ፦ «እደስለ እንዛይ ገሊለት እቅድ እንቝጠ ሚከረ ችጘውድ ላጥ ገሊለት እቂስቅ ኽጥያትኝጥ ኣጛንስቅመ ይርንኵኑ?

³ኣየቍም የኵን፤ ንስኻ ጥዊርነውዝየ ክትንም እጝቅቅ ጝታጘ ድዝርነቅ የጝ።

⁴ዊንስ ቈሽ ሰሊዀምት ግምብድ ጝታዲጊል ፋይር ክረቍ ፅጭ ሰውጠ እቅድ እየሩሳልየም ፅበቍ እቂስቅመ ጛይ ወሰቍ ኽጥያትኝጥ ይርንኵርኑ?

⁵ኣየቍም የኵን፤ ንስኻ ጥዊርነውዝየ ክትንም እጝቅቅ ጝታጘ ድዝርነቅ የጝ።»

⁶እንዝ ግረ ቈሽ እኒን ተከድ እንት የው ዊግቱ፦ «ላው እጅር ጝወይኒዙ ቺዝጚል በለስ ዘፍት ቲክል ዊኑ፤ ጘጝም እቸን በለስየንቲስ ፍር ችጝጭር የው ማርቕፅ ፊራን ውርም ችጚጝቀ እዳቑ።

⁷እንዝ ግረ ጝኣታክልቲዝ ሊምደተድየንት፦ ‹እንወ እኝቸን በለስየንቲስ ፍር ችጝጭር የር ሻቘ ምት ዋጥርጥራን ውርም ችጚቀር፤ ኣቓንስቅም ነስየ ቀቭር ማል፤ ውር ማጥን የጝ ዝቨድ ጨቅራ ፅብረውድ?› ዩ።

⁸ሊምደተድ ግን፦ ‹ኣደረወ እስቲ ጝርጅልወድ ኲትኵትጪስቅ፣ ዛረም ዚስጪስቅ ንጭት ኣምረየንት በጭ!

⁹ኣምር ኣሽ ፍርዝርሽ ቀሰው የጝ፤ ኣለዝየ ግን ቀቭትር›» ዩ።

¹⁰እየሱስም ቅዳምሲንቭት ግርየዝ ላው ምኵራቭል ክንሳ ዊኑ።

¹¹ጝግልም ፅጭ ሰውጠ ምት ምሉ ርኵስ መንፈስዝ ፃይሽረይ ፅውዝጅነ እውነ ዊንች፤ ጚይም ጝርይውድ ጐቫጥ ኣቓንስቅ ጭቅ ይን ቓለነው ቸላይም ዊንች።

¹²እየሱስም ጝርት ቓል በር ጭጝ፦ «እውነ ክተ ክፅውዘይስ ቓድርኵሩ» ዩ።

¹³ጝናንድም ጝርዲጊል እቝሩ፤ ኣይንድም ቀጥ ይር ችብርች፤ እደረትም ሚዝየንዝች።

¹⁴ምኵራቪዝ ኻልቀድ ግን እየሱስ ቅዳምሲንቭትዝ ቓዛንስቅ ኻልክሽ፦ «ሰቭ ሰራሽጥነ ጥውሸቍ ዋልጠ ግርቅ እኵ፤ ጛይ ግርቂዝ ተትርና ቓድጥንጚ፤ ቅዳምሲንቭትዝ ኣቓውም» የው ኽዝቪዝ ዊግቱ።

¹⁵እየሱስም ዊስ፦ «እፈ ተክዘጥ ክታትርነ! ክትንስ ክታቢረድ ዊንም ክታድዃረድ መድሪስ እክስርን ኣቝ ዚስትርነ ፊስርነቅ ኣይርነቅመ?

¹⁶እደስለ እኝቸን እውነየን ኣቭርኻምት ዚረ ኣቕር ፅብራ፣ ፅጭ ሰውጠ ምት ምሉ ሲጣንዝ እፁሽር ፅብረይሸን፣ ቅዳምሲንቭት ግርየዝ እኪተ ጥውሻውመ?» ዩ።

¹⁷እኒንት ዊግታንድም ጝት ተቃውምሽጛ ዊነቍድቅ ኣይቭት፤ ኽዝቭድ ግን ጘጝ ሰራሸው ዲንቅሰው ሰቪዝቍዝ ዲስ ዩ።።

¹⁸እንዝ ግረ እየሱስ፦ «እደረት ምጝግስትየን ውር ተክረይ ጚ? ውር ጅቅስ ተክዝጭር?

¹⁹እጅር ፊስ ጝቺዝጚል ፊዘይ ስናፍጭት ተከች፤ ጚይም ሊግዝር ዘፊዝጘ ኣቲ፤ ዚልቅድም ጝር ጫፊል ሲፍር» ዩ።

²⁰ቈሽም፦ «እደረት ምጝግስትት ውርዝ ተክዝጭር?

²¹ላይ እውነ እጝቅቅ ምጭትጠ ማጥን ሸውን እቭለ ግዘን ፊስር ሊውስረው ሚጨድ ተከች» ዩ።

²²እንዝ ግረ እየሱስ እየሩሳልየም ትጐ ፊራንድ ችጘው ኻጥመይዝመ ኪዊዝቅ ክንሳ ዲቁ።

²³ኣይንድም ላው እጅር ኣልት፦ «ኣደረወ! ቓደቍድ ዊትቍ እቅ ጭቝመ?» የው ዋቕሩ፤ እየሱስም እንት የው ዊሱ፦

²⁴«ኣፅረይ ሚረየንስ ጡትርነ ማጥን ልቕርጥን፤ እማንዝ የኵን! ንቕፀቍ እቅ ጡጥጘ በንጘኵ፤ ግን ቸላቍም።

²⁵ጝኒዝ ወነድ ጕ ሚረድ ቘልፈት ግረ ክትን ቢዘይል ችብትርን፦ ‹ኣደረወ! ኣደረወ! ኣለቀይ ብዝ› ይርና ቢለድ ኰኳዝትርነ ኪርምትርንቅ፤ ጘጝ ግን፦ ‹ክትን ኣውታይ ኣቕርነጘ ኣርቐቅም› የው ዊስጡ።

²⁶ክትንም፦ ‹ክጅቅ ዅን ዝይንኵኑን፣ ይናኣርወይልም ክንስርኵሩ› ይትርነ ኪርምትርንቅ።

²⁷ጘጝም እንደ ገነ፦ ‹ክትን ኣውታይ ኣቕርነጘ ኣርቐቅም፤ እፈ ጭቕ ክታትርነ! እድጐ እክልጥን› ይጡ።

²⁸ኣቭርኻምት፣ ይሳቅት፣ ያይቈቭት፣ ነቭያታንድዛትቅም እደረት ምጝግስቲል ቓልድርናንድ ክትን ግን ቢዘይል ሊቭርን እዳቕርናንድ ኣይንድ ክትን ሊዝርና ክታእርቍጣንድ ገጫዝትርንቅ።

²⁹ንቕፀቍ እቅ ምስራቂስ ምራቪስ ሰምየኒስም ደቩቪስም ተርጝ እደረት ምጝግስቲዝ መድል ጐይጥቍ።

³⁰ኣቓንስቅም እገጢስ በውጥ፣ በውጢስ ቈሽ እገጥ ኣቐቍ እቅ እኵ።»

³¹ኣይንድም ፈሪሳኒስ ላው ላውድ እየሱስ ትጐ ተርጝ፦ «ኺረውድስ ክት ቍውጡ ደምዘኵ፤ እኒስ ጕር ፊጥ» ይ።

³²እየሱስም እንት ዩ፦ «እቸን ቘፅለየንስ ፊትርን፦ ‹ንጭስመ ኣምርስ ጋኒናን ፊስጭር ፅውዝጅንጥድም ቓዝጭር፤ ሸወትረ ግርየይዝም ይኻስቨውድየንት ፋፅምጭር፤ የኵ› ይርን ድቍጥን።

³³ዊገድ ግን ንጭ፣ ኣምር፣ ኣምርት ግረ፣ እየሩሳልየም ፊጭር ምላሰንድም ነቭይ እየሩሳልየምትልጚ ላየ ብጣል ክርጠ ጥውሻውም።

³⁴«እየሩሳልየም! እየሩሳልየም! ነቭያታንድዛት ቁረር ክተ! ክጐ እፃሸቅድዛትም ቕርጘዝ ድድብረር ክተ! ጂርወ ጝርጨጭንድ ጝርኪፊዝ ኣቒል ኣኽቭራንትጘ ክቝርድዛት ኣኽቭጨ ዋቐን በን ዊኑን? ክትን ግን እምቢ ይርኑ።

³⁵ኣቓንስቅም ክታጝንድ በድመ ኣቕ እዳጡ፤ ነስየ፦ ‹ኣደረት ሽዝ ተረውድ በርክሸው የጝ› ይትርኒስቅ ይት ሊጘት ቓላይርነቅም የኵን።»