Read xamtanga ሉቃስት ወንጌል 14 Bible Online

ሉቃስት ወንጌል 14 - xamtanga bible

ሉቃስት ወንጌል 14

¹እየሱስም ላው ቅዳምሲንቭት ግርየዝ ፈሪሳነ ኻልቅጢስ ላዊዙ ጝኒል ሚ ዅጠ ጥዉ፤ ጝግል ዊነቍድም ፃቨውድቅ ቓልጥጘ ትክ ይጝ ጝት ጝት ቓልጛ ዊን።

²ኣይንድም ጝጊዝውድ ጝሰውነትድቅም ኣቕረው ፅውዝጅነ እጅር እየሱስት በዊል ዊኑ።

³እየሱስም ወሪትት ኽግ ኣርቐቲዝመ ፈሪሳኒዝ፦ «ቅዳምሲንቭት ግርየዝ ፅውዝጅነ ቓዘነው ወሪትት ኽግድ ፊቅደኵመ ፍቅዳው?» የው ዋቕሩ።

⁴ጛይ ግን ውርቅ ዊሲጝቀ ዝም ይ፤ ጘጝም ፅውዝጅነ እጅርድየንት ጝናኒዝ ፃይ ቓዝ ሲነቭትሱ።

⁵ጛትም፦ «እስቲ ክታጊስ ጝዅርድ ዊንም ጝቢረድ ቅዳምሲንቭት ግርየዝ ቢል ጥዋን በውዝ ውጢ ፊሳው እጅርድ ኣው የጝ?» የው ዋቕሩ።

⁶ጛይ ግን ውረውረ ዊሰነው ዊገም ችጚየቍ።

⁷እየሱስም ጝግል ጭጝሸቍ ኣብንድ ንየ ኪብረው ጐይተይል ጐይጥጘ ቀድምድምሽጛንድ ቓል፣ ጛጭስ ተከዝ እንት የው ዊግቱ።

⁸«ላው እጅር ክት ቅየንል ጭጝሽ፣ ቀድምድምሽር ንየ ኪብረው ጐይተይል ጐይተ፤ ምናልቫች ክጊስ ኪብረው ላየ እጅር ጭጝሽ ዊንሽ፣

⁹ክታቪሉትቅ ጭጘው እጅርድ ተር፦ ‹እኒን ጐይተድየንት እን እጅሪዝ ሊቅ› ይጠ የጝ፤ ክትም ኣይንድ ኣይቭትራ ሳ ዝጥቅ ይር ጐይትር።

¹⁰ዊገድ ግን ጭጝሽር ፊትራንድ ሳ ዝጥቅ የው ጐይተይል ጐይ፤ ክት ጭጘው እጅርድም ተር፦ ‹ያን ቀነውወ! ጕ ንየ ኪብረው ጐይተይል ጐይ› ይጡ፤ ክትም ኣይንድ ክጅቅ ጐየቍ እቂዝቅ በዊል ኪብርትር።

¹¹ምላሰንድድም ጝቕምት ንየስ ንየስ ሸውድቅ ዝጥቅ ይጡ፤ ጝቕምት ዝጥቅ ሸውድቅ ግን ንየስ ንየስ ይጡ።»

¹²እድ ጭጘው እጅርድየንት ቈሽ እንት ዩ፦ «ምዘትም ኣነ ድረይ ኣስልዳንድ ጛይም ጝታልቭነ ዊስጥጘ ጝታቲረዝ ጭጛይጘጘ፣ ክወደጃንድ ዊንም ክፅንድ ዊንም ክዚምዳንድ ዊንም ኻፍታመን ክግፅድ ጭጝተ።

¹³ዊገድ ግን ድግስ ኣስልዳንድ ድኽድ፣ ቈማጣንድ፣ ኻካዛንድ ኻርብድ፣ ጭጝ።

¹⁴እኒንት ፃቭርሽ በርክሽረር ኣትር፤ ጛይ ክልቭነድ ዊሰነው ኣቅም እጀቍ ኣጛንስቅ፣ ፃድቃኒዙ ክርጘይስ ጐነይዝ ኰር እደረ ክልቭነድ ዊስጡ።»

¹⁵መዲል ጐይጝ ዊነቊስም ላውድ እየሱስ ዊግተው ዊገድ ወሽ፦ «እደረት ምጝግስቲዝ ኰር መዲል ኣልት ዀው እጅር ውርጘ ቀቫሸዋ» ዩ።

¹⁶እየሱስም፦ «ላው እጅር ኽየው ድግስ ኣስል ንቕፀቍ እቅ ጭጙ።

¹⁷ድረይ ዀነ ሰትድ ችጛንድም፦ ‹እጝቅቅ ኣስልሽኩ ላቝጥን ጡጥን› የው ድቍጠ ማጥን ጝኣገልጋይድየንት እድ ጭጝሸቍ እቂል እፃቑ።

¹⁸እድ ጭጝሸቍድ ግን እዳጥጘ በንጝ፣ ጝታይታምላሰነ ፋጥርጥጘ ክርም፤ በውረድ፦ ‹ገነ ነን ቺዝጝ ጅቫንስቅ ጝት ቓልጨ ፊጨ የጝ፤ ኣለቀይ ቂይምሽረር› ዩ።

¹⁹ላውድ ቈሽ፦ ‹ኣኰ ፅምር ቢል ጅቫንስቅ ጛት ፊትነር የጝ፤ ሚቻውም፤ ኣለቀይ ቂይምሽረር› ዩ።

²⁰ላውድ ቈሽ፦ ‹ገነ ነን እውነት ድው ኣስን ኣቓንስቅ ተጨ ቸለቅም› ዩ።

²¹እፃሸው ኣገልጋይድም ጝጝን ዋጥር እን ዊገድቅ ወነይዝ ድቁ፤ ወነድም ኻልክሽ፦ ‹ለው ቃሲ! ኻትመይዝቍ ፈራቐቍ ጒደንጢዝመ ኣፀቍ ዲቈዲቈነቍ ጒደንጢዝቅ ፊጥ! ድኽድ፣ ቈማጣንድ፣ ኻርብድ፣ ኻካዛንድቅ ነስር እንል ዲ› ዩ።

²²ኣገልጋይድም ዋጥር ተር፦ ‹ኣደረወ! ክት ኣዝረውድቅ ፋፅምኩን፤ ጐይተድ ግን ገነ እቻቒየውም› ዩ።

²³ወነድም ጝኣገልጋይድ፦ ‹ይጝንድ እቻጠ ማጥን ጒደንጢልም ኣነ ኻፅሊልቅ ፊትር ችጝረቍድቅ ቓናዝር ጭጝ።

²⁴እዛይ በውገ ጭጝሸቍ እቂስ ላው እኳ ይድግስድ ጣማውም የኵን› ዩ።»

²⁵ንቕፀው ኽዝቭም እየሱስ ጅቅ ላብጠ ፃጛ ዊኑ፤ ጘጝም ኽዝቪዝጐ ዋጥር እንት የው ዊግቱ።

²⁶«ኣውማው ይጐ ተረው እጅር ፅብሽ ጚርስመ ጝኘስ፣ ጝውነስመ ጝቝርስ፣ ጝፅንስመ ጝቕምት ርዅየድቅ እኳ እዳቒጝቀ ይጊስ ዲቍስ ቀነው ኣቐውዝየ ይክንደተ ኣጠ ቸላውም።

²⁷ጝሚከረ ሚስቅልድየንት መውር ይግርገይል ቲክናው ኣውማው እጅርድቅ ይክንደተ ኣጠ ቸላውም።

²⁸«ክታጊስ ላው እጅር ዲቭር ጝን ተስጠ በናን ተሰነዊስ በውገ፦ ‹ጊንዝቫንድ ኣጥቍመ ኣቓቍ?› የው ኻስቫው እጅርድ ኣው የጝ?

²⁹ሚስርትድ ሚስርተት ግረ ፋፅመነ ብሽ ግን ቓለቍድቅ እቘርጥቍ።

³⁰‹እን እጅርድ ተስጠ ኪርም ፋፅመነ ቡ› ይጛ ቂልድጥቍ።

³¹«ዊንስ ቈሽ ላው ንጕስ ላየ ንጕስ ጅቅ ኣጭነ ጋጥምጠ በናን፣ ለርን ሽኽ ዊተድር ፃይ ተረው ንጕስድየንት ፅቃ ሽኽ ዊተድርዝ ማኽተነው ቸለው ኣቕሽ ጋጥመነዊስ በውገ ጐይ ማኽራውድ ኣው የጝ?

³²ጝኣቅሚዝ ንየ ኣቕሽ ግን ጝፃለትድ ገነ እክል ፅባ እቅ እፃቕ በውግስ እርቅ ዋቕረኵ።

³³እኒዝጘ ቈሽ ክታጊስ ጝፃየውድየንትቅ በራው ኣውማው እጅር ፅብሽ ይክንደተ ኣጠ ቸላውም።

³⁴«ጭውጥረ ቀሰው የጝ፤ ኣነጚ ጭውጥረ ጝጣምነድ ባን ጝጣምነድ ኣወሽን የጝ ጣምሰነው ቸልሸውድ?

³⁵እነየው ጭውጥረድ ዘቭዝም ኣነ ዛረዝ ጣቅማው ኣቓንስቅ እለ ቢዘ የጝ ማልጘውድ፤ ነስየ ወሸው ቀርዝ ፃየውድቅ ወሽነ።»