Read xamtanga ሉቃስት ወንጌል 15 Bible Online

ሉቃስት ወንጌል 15 - xamtanga bible

ሉቃስት ወንጌል 15

¹ላው ግርየ ቀረጥ ቀቨቍዝመ ኽጥያትኝጥዝ እየሱስ ክንሳንድ ወሽጥጘ ጝጐ ኣኽቭሽጝ ተርጝ ዊን።

²ወሪትት ኽግ ክንሰጢዝመ ፈሪሳኒዝም፦ «እን እጅርድ ኽጥያትኝጥድዛት ለምረኵ፤ ጛጅቅም ዀኵ» ይጛ ኣጕርምርምጥጘ ኪርም።

³ጘጝም እኒን ተከድ ዊግቱ፦

⁴«ክታማኽሊስ ላ ቢቅ ፃየው እጅር ጛጊስ ላው ቢገ ድዛን ፃይጭርጝን ፃይጨድ ድሪል ማል እድየን ድዘው ቢገድየንት ችጝጢስቅ ደምዝጠ ፊረው ኣየውመ?

⁵ችጛንድም ጭቕጘ ዲስ የው ጝጅውሪዝ መውር ነሰኵ።

⁶ጝጝን ችጘጘም ጝወደጃኒዝመ ጝግፂዝ ላው ፃቭ ጭጝ፦ ‹ድዘው ይቢገድ ችጛንስቅ ዲስ የርኩን፤ ክትንም ዲስ ይጥን› የኵ።

⁷እኒዝጘም ንስኻ ጥወነው በንዛቍ ፃይጭርጝን ፃይጨ ፃድቃኒስ ሽ፣ ንስኻ ጥወው ላው ኽጥያትኘዝቍዝ ሲመይስ ዲስተ ኣቐኵ የኵን።»

⁸እንደ ገነም እንት ዩ፦ «ቍርሸዝቍ ፅቃ ሳንቲማን ፃይረይ እውነ ፅቃይስ ላይ ሳንቲም ድዝራን መቭራት ኣቭርኽዝር ጝርጝንድ ጂዝር ችጝቲስቅ ቐናዝር ደምዝረይ ኣይረይመ?

⁹ችጝራንድም ጝርወደጃኒዝመ ጝርግፂዝ ላው ፃቭር ጭጝር፦ ‹ድዝረይ ይሳንቲምሸየንት ችጛንስቅ ዲስ የርኩን፤ ክትንም ዲስ ይጥን› የች።

¹⁰እኒዝጘም ንስኻ ጥወው ላው ኽጥያትኘዝቍዝ እደረት መላካንድ ዲስ ይጘኵ።»

¹¹እንዝ ግረ ቈሽ እንት ዩ፦ «ሊጘ ዅል ፃየው ላው እጅር ዊኑ።

¹²ጛጊስ እጥንድየን ጚርት፦ ‹ኣየ! ክኻፍቲስ ይችጘው ይፊንተድየንት ኣድልድር ነቅ› ዩ፤ ኣይርድም ጝኻፍትድ ጝቝርስ ኣድል ይዉ።

¹³እንዝ ግረ እድ እጥን እፈረድ ዊቱ ሳብጥ የጘ ኣድልሽ ችጘው ጊንዝቭድቅ ጥቅል ፃይ እለ እክል ኻግር ፊሩ፤ ጝጊስም ጝጊንዝቭድቅ ጊነዝ ማግጣ ቢክንዙ።

¹⁴እጝቅትቅ ቢትን ኣብዘት እግረ እድ ኻግሪል ኽየው ኰር ጥዉ፤ ጘጝም ጭቕጘ ቺግርሹ።

¹⁵ኣቓንስቅም ጘጝ ኻግሪዝቊስ ላው እጅርል ፊር ኣልቱ፤ እድ እጅርድም ለምር ኣሰመ ምቓ ፃቩ።

¹⁶እፈረድም ጭቕጘ ግድርዳንስቅ ኣሰምጥድ ዅጘው ኻስረይስ ዅ ጝጊዝውድ እቻዝጠ በና ዊኑ፤ ኣነጚ ጝት እኳ ይወውም ችጚየው።

¹⁷እግረ ግን እዘን ቅም እንት ያ ኻስቭጠ ኪርሙ፦ ‹ይርት ጝኒል ዋቐ ኣርጭጥድቅ ጛይ ሚ እቭትጝ ቲርፍዘቍድፈ! ያን ግን እንል ግድርዝ ክጨ ጕኩን።

¹⁸ነስየስ ጕ ይርትል ፊጥ እንት ይጨ፦ ኣየወ! እደረትም ክትም ቢድልኩን።

¹⁹ነስየ ክዅር ይሽጨ ጥውጨቅም፤ ዊገድ ግን ክኣርጪስ ላዊዝጘ ፃቭር ቓል ይጨ› ዩ።

²⁰እንዝ ግረ ጕ ጚርትል ፊሩ፤ ጚርም ጝዅር ተራንድ ገነ እለይስ ከስ ቓላንድ ገነይስጝቀ ኣርኽርኹ፤ ጝጐም ውጥያ ፊር ጝዅርት ቕልመድ ጣጥም ፃይ እምቑ።

²¹እፈረድም፦ ‹ኣየወ! እደረትም ክትም ቢድልኩን፤ ነስየ ክዅር ይሽጨ ጥውጨቅም› ዩ።

²²ኣይርድ ግን ጝኣገልጋያንዛት ጭጝ፦ ‹ቃዚጥን ሸገ ኣልቨድ ነስርን ሲስጥን፤ ጝናኒል ቃጠ፣ ጝልኵጣኒልም ፃብጣን ዱጥን!

²³ሰወው ሲዘድ ነስርን ዝውጥን፤ ዅናም ዲስ ይነ።

²⁴እን ይዅርድ ክር ዊኑ፤ ነን ግን ቓድኩ፤ ድዝ ዊኑ፤ ነን ግን ችጝሽኩ› ዩ። ጛይም ዲስ ይጥጘ ኪርም።

²⁵ኣይንድ ጝሽ ኽየው እፈረድ ቺዝጝል ውላቕ ግሪ ዊኑ፤ ጝጝኒል ዋጥራንድም መሰጝቈዝመ ጅመዝዙ ድመዝ ወሹ።

²⁶ኣርጪስም ላውድየንት ጭጝ፦ ‹እን ወጨው ጅመድ ወረጘዙ የጝ?› የው ዋቕሩ።

²⁷ኣርሸድም፦ ‹ክዝን ተርኩ፤ ኪርም ጝት ዲግተዝመ ዳኽነዝ ችጛንስቅ ሰወው ሲዘ ዝውኩ› የው ድቁ።

²⁸ኣይንድ እድ ኽየው እፈረድ ኻልክሽ ጝኒል ጥወቅ ዩ፤ ኣይርድም ፍ ጡጠ ማጥን ጨዉ።

²⁹እፈረድ ግን ጚርት እንት የው ዊግቱ፦ ‹ያን እንቝጠ ዚምን በረይዝጘ ኣቕ ክጭስ ቅምጭኩን፤ ክት ኣዝረዊስቅ እግርገ የርም ኣርቐቅ፤ ክት ግን ይፃምጥጅቅ ዲስ ይጨ ማጥን ላው ወጠጢ እኳ ነይርም ኣርቓር።

³⁰እኒን ክዅርድ ኣቓንድ ክጊንዝቭድቅ ጝገልምጥ ጅቅ ዅ ኣብዝ ተራንድ ሰወው ሲዘድ ማልዱ› ዩ።

³¹ኣይርድም፦ ‹ይዅር ቈደይ! ክት ኣራንድ ዊትርቅ ይጅቅ የጝ ፅብረውድ፤ ይውድቅ ኩ የጝ።

³²እኒን ክዝንድ ግን ክር ዊኑ፤ ነን ግን ቓድኩ፤ ድዝ ዊኑ ነን ግን ችጝሽኩ፤ ኣቓንስቅም ጭቕጘ ዲስ ይነ ጥውሸኵ› ዩ።»