Read xamtanga ሉቃስት ወንጌል 16 Bible Online

ሉቃስት ወንጌል 16 - xamtanga bible

ሉቃስት ወንጌል 16

¹እንዝ ግረ እየሱስ ጝክንደጢዝ እንት ዩ፦ «ጝጝንድ ጭሰጭሰው መጋቪ ፃየው ላው ኻፍታም እጅር ዊኑ፤ ጘጝ እጅሪዝ፣ እቅ ፊርጝ፦ ‹እኒን ክመጋቪድየን ክኻቭትድ ቢክንዘኵ› ይጝ ድቍ።

²ጘጝም ጝመጋቪድየንት ጭጝ፦ ‹እን ወጨው ዊገድ ወረጘ የጝ? ነስየ ይመጋቪ ኣተ ቸላርም፤ ኣቓንስቅም ነኳን ኣሽ ጭሰጭስራንድ ሰራሽረው ይንቭረቲዝ ኺሳቭድ ኣልሽ› ዩ።

³እድ መጋቪድም ጝእዘኒዝ እንት የው ኻልዩ፦ ‹ነስየ ይኣደረድ ይሰቪስ ፊስጠ የጝ፤ እደስለ ውር ፃቫን ቺዝጡ? ጒዝ ዃይቀጘ ኻይል እጀርም፤ ጨዋይቀጘ ቈሽ ኣይቭጠኵን።

⁴ነስየ ይሰቪስ ፋንድ ይወደጃን ኣቕጝ ጝታጝንጢል ለምርጥጘ ማጥን ፃቨውድ ይቕም ኣርቕጭር› ዩ።

⁵ጝኣደረይዝ ቢን ጕይጥድዛትም ላውዝ ላው ፃቭ እጝቅትቅ ጭጙ፤ በውረድየንትም፦ ‹ይኣደረዝ ኪፍልደቍ ክቢንድ ዋቐ ጛይ?› የው ዋቕሩ።

⁶ጘጝም፦ ‹ላ ጭንጥ ዘይታ› የው ዊሱ፤ መጋቪድም፦ ‹ለው ቃሲ ኣስ ክመዝገቭድ፦ «ኣኵርጝን ጭንጥ ዘይት» ይር ጐይር ፃፍ› ዩ።

⁷ላየድየንት ቈሽ ጭጝ ክቍድሰ ዋቐ ጛይ? የው ዋቕሩ፤ ጘጝም፦ ‹ላ ክቭቅ ዚርዋ› ዩ፤ መጋቪድም፦ ‹ለው ቃሲ ኣስ ክመዝገቭድ፦ «ሰውጥርጝን ክቭቅ ዚሩ» ይር ፃፍ› ዩ።

⁸ኻፍታምድም እድ ኣጭቨርቫሪ መጋቪዝ ብልኽትድ ቓል ዲንቅሹ፤ እማንዝ የኵን፤ እደረት ቝሪስ ሽ እን ኣልሚዝ ቝርድ ጝታኽዝቪጅቅ ኣወይን ፅበነው መለዝ ብልኻን ጛይ።

⁹ያንም እን ኣልሚዝ ጊንዝቭድ ኣቢታንድ ዘላልምትቍ ጝንጢል ክታት ለምርጥጘ ማጥን ጝዝ ወደጃን ፍርዝጥን የኵን።

¹⁰ዊትቍዝ ኣምንሽተው እጅር ንቕፀቍዝም ኣምንሽትጡ፤ ዊትቍዝ ኣምንሽታውድ ግን ንቕፀቍዝም ኣምንሽታውም

¹¹እደስለ እን ኣልሚዙ ጊንዝቪዝ ኣምንሽቲርነውዝየ እማንተው ኻፍትድ ኣው የጝ ክታት ኣምን ነየውድ?

¹²ቀብራው ኻፍቲዝ ኣምንሽቲርነውዝየ ክታውድ ኣው ነይጡ?

¹³ላው ኣገልጋይ ሊጘ ኣደርጥዝ ሊንስ ቀምሸነው ቸላውም፤ ላውድ ቀን ሊጘትረድ ሽክተኵ፤ ዊንም ላውድ ኪብርዝ ሊጘትረድ ነቀኵ፤ እኒዝጘም ክትንም እደረስመ ጊንዝቭዝ ሊጘይዝቅ ቅምሸነው ቸላይርነቅም።»

¹⁴ጊንዝቭ ቀነቍ ፈሪሳንም እን ዊገድቅ ወሽጛንድ እየሱስት ኣሽፉ።

¹⁵እየሱስ ግን፦ «ክትን እቀ በዊል ክታቕምት ፃድቃን ተክዝርነኵ፤ እደረ ግን ክታጊዝውድ ኣርቐኵ፤ ምላሰንድም እጅርዝ ኪብረውድቅ እደረስ ነቅሸው የጝ።

¹⁶«ወሪትት ኽግዝመ ነቭያታነ መፃፋኒዝ ጣምቀተ ይዃንስ ተርጢስቅ ኣሽ ድቍሽትጛ ዊንጝኵ፤ ጝዝ ግረ ድቍሽተውድ ቈሽ እደረት ምጝግስትዙ ኣቭዝርተ ቃልድ የጝ፤ እጅር እጝቅ እደረት ምጝግስየንትል ኽየው ልቕረዝ ጥወኵ።

¹⁷ኽጊስ ላይ ነቍጠ እኳ ሊቭራንቲስ ሽ ሲመይሰመ ዝቨስ ዲቍጛን ቀለኵ።

¹⁸«ጝውነት ዳቕር ላየ እውነት ድወውድቅ ሸርሙጠ የጝ፤ ቈሽም ጝርግልወይስ ዳቕርሽረየንት ድወውድቅ ሸርሙጠ የጝ» ዩ።

¹⁹እየሱስም ቈሽ እንት ዩ፦ «ጝታወየድ ጭቕጘ ኪብረቍ ሸግጥ ኣልብ ሲረው፣ ግሪ ጨቨቅም ዲስ ያ ሚችጘዝ ፅበው ላው ኻፍታም እጅር ዊኑ።

²⁰ቈሽም ጝሰውነትድቅ ልኻንዝ ዊርሽተው ኣላዛር ይሽተው ድኻ እጅር እድ ኻፍታም እጅሪዝ ጝን ሚረይል ኽሪ ዊኑ።

²¹እን ድኻ እጅርድ ኻፍታሚዙ መዲስ ቲርፍ ሊቨው ፍርፋሪስ ዅጠ በና ዊኑ፤ ግፅጝም ተርጝ ጝልኻንድ ላፅጛ ዊን።

²²ላው ግርየ እድ ድኻ እጅርድ ክሩ፤ መላካንም ፊስጝ ኣቭርኻምት ጋቢል ጐይስ፤ እድየን ኻፍታምድም ክሩነ ዲቭሽቱ።

²³ሲወል ኣቕም ተሰቃይሻ ጭቅ የው ኣቭርኻምስመ ኣቭርኻምት ጋቢል ቈሽ ኣላዛር ጐይ እክሊስ ቓሉ።

²⁴ጝድመድም ኣጕስ ሸው፦ ‹ኣየ ኣቭርኻምወ! ኣለቀይ ሳቝጭ! እኒን ኻውየው ልየይዝ ተሰቃይጫ ኣቓንስቅ ጝዘፍርነይዝ ጫፍድ ኣቝዝ ናኽር ነስ ይላቕድ ቝስጠ ማጥን ኣላዛርትቀ ይጐ እፃቓር› ዩ።

²⁵ኣቭርኻም ግን፦ ‹ይዅር ቈደይ! ክት ዝቨት ዲጊል ፅብራንት ኰር ቀሰውድቅ ችጝር ዲስ ይራ ፅብረጘ ኣላዛር ቈሽ ጭቓ ሚከረ ለምራ ዊነጘ ትዝ ይ። ኣቓንስቅም ጘጝ እንል ዲስ ያ ሚችጘዝ ፅባንድ፣ ክት ኣራንድ ጝግል ተሰቃይሽራ ፅብትር።

²⁶እኒስቅ ላየም ቈሽ ይናስመ ክታስ ማኽሊል ኽየው ከዝጝ እኩ፤ ኣቓንስቅም ይናጊስም ኣነ ክታጊስ ከረነው ቸለውም እጀው› ዩ።

²⁷ጘጝም፦ ‹ኣየወ! እደስለስ ኣለቀይ ኣላዛርት ይርት ጝኒል እፃቕ!

²⁸ኣኰ ይፅን እኵ፤ ጛይም እን ስቃይ ስፍረይል ተራይጘጘ ፊር ጣጝቅቅስነ› ዩ።

²⁹ኣቭርኻም ግን፦ ‹ክፅንስ ሙሴት መፃፋኒዝመ ነቭያታነ መፃፋኒዝ እኵ፤ ጛት ወሽጝነ› ዩ።

³⁰ጘጝም ዊስ፦ ‹ኣየ ኣቭርኻምወ! ኣየውም፤ ላው እጅር ክርጘይስ ጕ ፊር ድቋን የጝ ኣኑሽጝ ንስኻ ጥውጘውድ› ዩ።

³¹ኣቭርኻምም፦ ‹ሙሴት መፃፋኒዝመ ነቭያታነ መፃፋኒዝ ይጘውድየንት ወሺጘውዝየ፣ ላው እጅር ክርጘይስ ጕ ድቍሽም ኣምናቍም› ዩ።»