Read xamtanga ሉቃስት ወንጌል 17 Bible Online

ሉቃስት ወንጌል 17 - xamtanga bible

ሉቃስት ወንጌል 17

¹እየሱስም ጝክንደጢዝ እንት ዩ፦ «እቅድ ፅጋስ ኽጥያትል ድውሰው ገቨ ተሪጝቀ እዳቓውም፤ ዊገድ ግን እድየን ፅጋሰው ገቨድ ነሰው እጅሪዝ ወየው!

²ላው እጅር እንዛይ መልቊስ ላውድ ፅጋስ ኽጥያትል ድውሳንቲስ፣ ኽየው እጕ ቕርጘ ጝቕልመይል እፁሸጘ ባኽሪል ጥዋን ጝጭስ ቺዝጠ ዊኑ።

³ኣቓንስቅም ክታቕምስ ጣጝቅቅጭጥን፤ ክዝንድ ክት ቢድልሽ ዛሽጭ፤ ጝበደሊዝ ኣኑሽሽ ሳቝጭ።

⁴ግርየዝ ላጝጠን ቢድል እኳ ግርየዝ ላጝጠን፦ ‹ሳቝጭ› ይሽ ሳቝጭ።»

⁵ኻወርየታንድም ኣደረት፦ «ኣለቀይ ይናጭስ እምንት ቈሽ» ይ።

⁶ኣደረም፦ «ስናፍጭ ፍረት ኵተ እምንትት ፃይርነቅ ኣቕርናን እን ጥሉሰድ፦ ‹እኒስ ኒቅልሽር ባኽር ማኽሊል ቲክልጭ› ይርናን ክታጭስ ኣዚትጡ» ዩ።

⁷እንዝ ግረ ቈሽ እንት ዩ፦ «ክታማኽሊስ ኣርሸ ዊንም ምቓ ቃፅረው እጅር ዊናን እድ ኣርሸድ ኵኑ ጝሰቪስ ዋጥራንድ፦ ‹ለው ቃሲ መዲል ኣልጭ› የው እጅር እኩመ?

⁸ኽሽስ፦ ‹ፈር መድድ ኣልሽ! ያን ዅጪስ ዝቅጪስቅ ከምትር ዀሽ! እንዝ ግረ ቈሽ ክት ዃይ› የው ኣየውመ?

⁹እደስለ እድ ኣርሸድ ኣዚተውድየንትቅ ፋፅማን ጝኣደረድ ሚዝየንዝጡመ ይርን ኵርኑ?

¹⁰እኒዝጘ ቈሽ ክትንም ኣዚትርነውድቅ ፋፅምርን በትርን፦ ‹ሰራሽነ ጥውሸውድ ፋፅኑንጚ፤ ይን ጣቅማይነቅ ኣገልጋያን የጝ› ይጥን።»

¹¹እንዝ ግረ እየሱስ እየሩሳልየም ፊራንድ ሰማርየስመ ገሊለት ድምበሪዝ ፃቭ ዲቁ።

¹²ላይ ኪውትል ጥወጘም ፅቃ ለምፃማን ጝጐ ተርጝ እክልድጝ ችብር።

¹³ጝታድመድም ኣጒስ ሽጝ፦ «እየሱስ ኣደረወ! ኣለቀይ ይናጭስ ኣርኽርኽ» ይ።

¹⁴ጘጝም ጛት ቓል፦ «ፊጥን ክታሰውነትድ ካኽነጣኒዝ ቓሊስጥን» ዩ።

¹⁵ጛጊስም ላውድ ጝለምፂስ ቓደጘ ቓላንድ ጝድመድ ኣጕስ ሸው እደረት ሚዝየንዛ ዋጥር ተሩ።

¹⁶እየሱስትም ሚዝየንዛ ጝልኲል ደፋሽ ሲግዱ፤ እን እጅርድም ሳምራነው እጅር ዊኑ።

¹⁷እየሱስም፦ «ለምፂስ ቓደቍድ ፅቃ እቅ ኣየቍቃ? እደስለ ፃይጨድ ኣውል እኵ?

¹⁸እን ቀብራ ኻግሩ እጅሪዝለ እደረት ሚዝየንዝጠ ዋጥር ተረው እጅር እጀውም የነት የጝ» ዩ።

¹⁹እንዝ ግረ እጅርድየንት፦ «ፈር ክእምንትድ ቓዝኩ ጕ ፊጥ» ዩ።

²⁰ላው ግርየም ፈሪሳንድ፦ «እደረት ምጝግስትየን ተትረውድ ኣውን የጝ? ይጝ እየሱስት ዋቕር፤ ጘጝም፦ «እደረት ምጝግስትየን ተትረውድ ቓልሽተው ምልክትዝም ኣየው።

²¹ቈሽም፦ ‹እንወ! እንል ጚ› ዊንም፦ ‹እድል ጚ› ይሽታይም፤ እንወ! እደረት ምጝግስትየን ክታማኽሊል የጝ ፅብረውድ» ዩ።

²²ጝክንደጢዝም እንት ዩ፦ «እጅር ዅር ይናጅቅ ኣቐቝ ግርቂስ ላየንት እኳ ውረ ቓልናንፈ! ይርነው ግርየ ተርጡ፤ ኣነጚ ቓላይርነውቅም።

²³እቅ፦ ‹እንወ! እንል የጝ፤ ዊንም እድል የጝ› ይጥቍ፤ ኣቕሽም ጛይ ይጘውድየንት ኣምንድርነቅ፤ ቲክንድርነቅም።

²⁴መቭረቅ ሲመይስ ምርቃንድ እለ ደዪስ ኪርም እለ ደዪል ኣሽ እትላንትጘ፣ እጅር ዅር ተራንትኰርም ልክ እኒዝጘ ኣጡ።

²⁵ዊገድ ግን እንቅ ኣቐነዊስ በውገ እጅር ዅር ኽየው ሚከረ ለምርጠ፣ እን ዚምኒዝ ዅለይዝም ነቅሽ ሽክሽጠ ጥውሸኵ።

²⁶ነዅት ዚምኒዝ ኣቐዊዝጘ እጅር ዅር ተራንድም ልክ እኒዝጘ ኣጡ።

²⁷ነዅ ሚርክቪል ጥዋንት ግርየይል ኣሽ እቅ ዅጛ፣ ዝይጛ፣ ገባሽጛ ዊን፤ ኣይንድ ድሰው ኣቝ ተር እጝቅትቅ ድሱ።

²⁸እንደ ገነ ቈሽ ለውጥት ዚምኒዝ ኣቐዊዝጘ ኣጡ፤ ኣይንድ እቅ ዅጛ፣ ዝይጛ፣ ቅይጛ፣ ጅቭጛ፣ ኣታክልት ቲክልጛ፣ ጝን ተስጛ ዊን።

²⁹ዊገድ ግን ለውጥ ሰደውምቲስ ፈው ግርየይዝ ልየዝመ ዲንዝ ሲመይስ ሊቭ እጝቅትቅ ድሱ።

³⁰እጅር ዅር ተራንትኰርም እኒዝጘ ኣጡ።

³¹ኣይንት ግርየይዝ ኽድም ዲጊል ዊነው እጅር ኽድም ኣቒል ፅበቍ ጝጐዝድ ጒጠ ሳ ጊሚነ፤ ቺዝጝል ግርየውም ጝጝኒል ዋጥሪነ።

³²ለውጥት እውነት ትዝ ይጥን!

³³ጝርዅየሸንት ቲርፍዝጠ በነውድቅ ድስጡ፤ ጝርዅየሸንት ዲቍስ ይወውድቅ ቲርፍዝጡ።

³⁴ኣይንት ኻርሸንስ ሊጘ እቅ ላው ኣረትል ኽሪጥቍ፤ ጛጊስ ላውድ ፊስሽትጡ፤ ሊጘትረድ እዳጡ የኵን።

³⁵ሊጘ እቍን ላው ኣቕጝ ዛጥቍ፤ ጛጊስ ላይሸን ፊስሽትቲ፤ ሊጘትረየን እዳቲ።

³⁶ሊጘ እቅ ላው ቺዝጝል ላብጠ ዊንጥቍ፤ ጛጊስ ላውድ ፊስሽትጡ ሊጘትረድ እዳጡ።»

³⁷ጝክንደጥድም፦ «ኣደረወ ኣውላ?» ይጝ ዋቕር፤ ጘጝም ጥምብ ፅበው ስፍረይል ኣሞጥ ኣኽቭሽጘኵ ዩ።