Read xamtanga ሉቃስት ወንጌል 19 Bible Online

ሉቃስት ወንጌል 19 - xamtanga bible

ሉቃስት ወንጌል 19

¹እየሱስም እያሪኰ ኻትመይል ጥው በር ጝዝ ዲቍ ፊራ ዊኑ።

²ጝግልም ጝሽድ ዘኪወስ ይሽተው ላው ኻፍታም እጅር ዊኑ፤ ጘጝ እጅርድ ቀረጥ ቀቨቍዝ ኻልቀ ዊኑ።

³ጘጝም፦ «እየሱስ ኣውየን ኣጢ» ያ ጝት ቓልጠ በና ዊኑ፤ ዊገድ ግን ጝሊግዝድ እጅጝ ዊናንስቅ፣ ኽዝቭድም ጭቕጘ ንቕፀው ዊናንስቅ፣ ቓለነው ቸሊየውም።

⁴ኣይንድም እየሱስ ዲቈው ጒደነድ ጝጐቱ ዊናንስቅ፣ ኽዝቭድየንት ዲቍ በዊል ውጥያ ፊር ጝት ቓልጠ ማጥን ላው ጥሉሰ ዘፍል ፉ።

⁵እየሱስም ጝግል ችጛንድ ጝቕልመድ ንየ ጭቅ የው ዘኪወስት ቓል፦ «ዘኪወስ! ንጭ ክጝን ግርቅጨ ጥውሸኵ፤ ዘፊስ ጊም ቃዚ» ዩ።

⁶ዘኪወስም በውዝ ጊም እየሱስት ጝጝኒል ዲስተዝ ለምሩ።

⁷ጝግል ዊነቍ እቅድ ግን እኒንት ቓልጛንድ፦ «እን እጅርድ ኽጥያትኘ እጅርዝ ጝንል ኣቭንወ ጥዉወይ» ይጛ ኣጕርምርምጥጘ ኪርም።

⁸ዘኪወስ ግን ችብር ኣደረ እየሱስት፦ «ኣደረወ! ነስየ ይፃቀው ኻፍቲስቅ ግቨርድ ድኽዝ ይውጭር፤ ኻሽትዝ ቀመው ፅብሽም ሲዘ ኣፅቨ ፃቭ ዊስጭር» ዩ።

⁹እየሱስም፦ «ንጭ እን ጝኒል ቓድት ኣቑ፤ ምላሰንድም እን እጅርድ ቈሽ ኣቭርኻምት ዅር የጝነ።

¹⁰እጅር ዅርም ድዘውድ ደምዝጠ ቓዝጠም የጝ ተረውድ» ዩ።

¹¹እቅድ እኒንት ወሽጛ ሲጝቀ እየሱስ ላው ተከ ድቁ፤ ምላሰንድም ጘጝ እየሩሳልየም ችጝጠ ጓንስቅ፣ እቅ ቈሽ እደረት ምጝግስትየን ነን እልትዝ ኪርምሽቲ ይጝ ዊንጛንስቅ የጝ።

¹²ኣቓንስቅም እንት ዩ፦ «ላው ሽም እጅር ንግስነ ለምር ተርጠ እክል ኻግር ፊሩ።

¹³እንዝ ማጥን ጝኣገልጋያኒስ ፅቃድ ጭጝ ጝታይተእጝቅዝቅ ፅቃ ፅቃ ምናን ይው፦ ‹ዋጥር ተጪስቅ እንዛዝ ኒግጥን› ዩ።

¹⁴ጝኻግሪዝቍ እቅድ ግን ጝት ቀናቍ ዊንጛንስቅ፦ ‹እን እጅርድ ይናዲጊል ኒግስጠ በናይነቅም› ይጝ ጘጝ ፊረት እግረ እፃ በርስ።

¹⁵«እድ ሽምድየን ግን ንግስነድ ለምር ተረጘ ለምርጘቍ ጊንዝቫኒዝ ዋቐ ኣጠ ቲርፍዝጘጘ ኣርቕጠ በን ጝኣገልጋያንድዛት ጭጝሱ።

¹⁶በውረ ኣገልጋይድም ኣልት፦ ‹ኣደረወ! ነይረቍ ፅቃ ምናናኒዝ ኒግጥ እንወ ፅቃ ምናናን ቲርፍዝኩን› ዩ።

¹⁷ኣደረድም፦ ‹ኣምንሽትረር ኣገልጋይ ክተ! ቀሰው ፃቭርኵሩ፤ ዊትቍዝ ኣምንሽትራንስቅ ያን ቈሽ ፅቃ ኻትምጥል ይምኩን› ዩ።

¹⁸ሊጘትረ ኣገልጋይድም ኣልት፦ ‹ኣደረወ! ነይረቍ ምናናኒዝ ኒግጥ እንወ ኣኰ ምናናን ቲርፍዝኩን› ዩ።

¹⁹ኣደረድም፦ ‹ኣምንሽትረር ኣገልጋይ ክተ! ቀሰው ፃቭርኵሩ፤ ዊትቍዝ ኣምንሽትራንስቅ ያን ቈሽ ኣኰ ኻትምጥል ይምኩን› ዩ።

²⁰«ላየ ኣገልጋይድም ኣልት፦ ‹ኣደረወ! ክነይረቍ ክቍርሻንድ ፃርቀዝ ቓጭል እቝርኩን ኣስ።

²¹ምላሰንድም ክት እቝሪረውድ ፊስረር፣ ፊዚረውድም ኣይርደር ጨካኝ እጅር ኣራንስቅ ጐውጡን› ዩ።

²²ኣደረድም፦ ‹እፈ! ጭቓ ኣገልጋይ ክተ! ክቕም ዊግትረው ቃሊዝ ፊርድጭር፤ ያን እቝሪቀውድ ፊሰር፣ ፊዚቀውድ ኣይረር፣ ጨካኝ እጅር ኣቐጘ ኣርቕረውዝየ፦

²³ይጊንዝቫንድ ተጥ ጝታትርፋኒጅቅ ፊስጨ ማጥን ውረ ላጥ ኒግረቍዝ ይዊረር?› ዩ።

²⁴ኣደረድም ጝግል ችብርጝ ዊነቊድዛት፦ ‹ጝቍርሻንድ ጕይርን ፅቃ ቍርሻን ቲርፍዘዊዝ ይውጥን› ዩ።

²⁵ጛይም፦ ‹ኣደረወ! ጘጝ ቃል ፅቃ ቍርሻን ፃይኩ› ይ።

²⁶ኣደረድም፦ ‹ፃየዊዝ ይውሽትጡ፤ እጀዊዝ ግን እድ ፃይ ዊነውድ እኳ ፊስሽትጡ።

²⁷እዛይ ጝታዲጊል ኒግሳይቀጘ ሽክተውቍ ይፃለታንድ ግን እንል ይበዊል ነስርን ቁጥን› ዩ።»

²⁸እየሱስ እኒን ተከድ ዊግተት ግረ እየሩሳልየም ፋንድ ጝክንደጢዝ በው በዊል ፃጛ ዊኑ።

²⁹እየሱስም ደቭረ ዘይት ኣበይዝ ጋቢል ችጝሸቍ በተፋግየ ቢታንየ የነቍ ኪቋኒል ችጛንድ ጝክንደጢስ ሊጘድ እንት የው እፃቑ፦

³⁰«ክታበዊል ችጝሽረይ ኪውሸንትል ፊጥን፤ ጝርግል ችጝርናንድም ገነ ኣውማውቅ ድቃሪነው ድዃር እወል ችጝትርንቅ፤ ጝት እክስርን እንጐ ነስጥን።

³¹ኣውማው እጅር፦ ‹ውር ፃቭትርነ የጝ እክስርነውድ? የው ዋቕርሽ፦ ‹ኣደረ በናንስቅ የጝ› ይርን ዊስጥን።»

³²እፃሸቍድም ፊርጝ እጝቅትቅ ልክ እየሱስ ድቈጘ ችጝ።

³³እወልድ እክስጛንድም ወንድ፦ «ውር ፃቭትርነ የጝ እክስርነውድ?» ይጝ ዋቕር።

³⁴ጛይም፦ «ኣደረስ በንዛንስቅ የጝ» ይጝ ዊስ።

³⁵እወልድየንትም እየሱስትል ነስ። ጝታፃርቅጥድም እወሊዝ ዲጊል ጒዝጕዝጝ እየሱስት ድቃስ።

³⁶እየሱስም ፊራንድ እቅድ ጝበው በዊል ዲቍጛ ጝታኣልብድ ጒደነይል ወፃጛ ዊን።

³⁷እየሩሳልየም ኻትመይል ጥውጠ ጣቅራንድም ደቭረ ዘይት ኣበይዝ ቍልቍለድ ጊማ ዊኑ፤ ኣይንድ ጝት ቲክንጛ ዊነቍ እቅድቅ ጘጝ ፃቨቍ ታምራንድዛትቅ ቓልጛንስቅ ዲስተዝ ክርጛ፣ ጝታድመድ ኣጒስ ሽጝ እደረት ሚዝየንዝጛ ዊን።

³⁸«እደረት ሽዝ ተረው ንጕስ በርክሸው የጝ፤ ሲመይስ ዲግተ፣ ክብርም ኣርያም ፅበው እደረስ ኣነ» ይጛ ዊን።

³⁹ኽዝቪዝ ማኽሊል ዊነቍ ላው ላው ፈሪሳንድ ግን፦ «እፈ ክንሰተወ! ክክንደጥድዛት ዝም ሽ» ይ።

⁴⁰ጘጝም፦ «ጛይ ዝም ይጝሽም እኳ ቕርጝድ ቓፅጥቍ የኵን» ዩ።

⁴¹እየሱስም እየሩሳልየም ችጛንድ ኻትመየንት ቓል እንት ያ ሊዙ፦

⁴²«ክዲግተድየንት ነሰው ዊገድየንት ውረ ንጭ ክት ኣርቕር ዊንዳንፈ! ነን ግን ክእልጣኒስ ሲውርሽኩ።

⁴³ክፃለታንድ ኻፅር ኻፅርጝ ክጅልወድ ኪብጝ እንዝም እድዝም ክት ጨጝቅዝጘው ግርየ ተርጡ።

⁴⁴ክስመ ክኣቒል ፀበቍ ክቝሪዝም ብጢጅቅ ዲብልቅጥቍ፤ ክስፍረይስ ፋይሪጝቀ እዳቐው ቕርጘ ዊናውም፤ እንቅ ኣቐውድ እደረ ክት ገቭስጠ በነው ግርየድየንት ኣርቐነው ብራንስቅ የጝ።»

⁴⁵እንዝ ግረ እየሱስ መቅደስ ጝኒል ጥው ጝግል ኣቕጝ ኣርይድቍድዛት ጅግዝጠ ኪርሙ።

⁴⁶እንት የውም ዊግቱ፦ « ‹ይጝንድ ፀለውትዙ ጝን ኣጡ› ይሽት ፃፍሽኩ፤ ክትን ግን ቓፅጝዙ ጋ ፃቭርኑ» ዩ።

⁴⁷ግሪ ጨቨቅም መቅደሲል ክንሳ ዊኑ፤ ካኽነጣነ ኻልቅጢዝመ ወሪትት ኽግ ክንሰጢዝ፣ ላጥ ኽዝቪዝ ሽመቅልድም ኣቕጝ፣ ጝት ቁጥጘ ደምዝጛ ዊን።

⁴⁸ዊገድ ግን ኽዝቭድ እየሱስት ወሽጠ ጝእዘንድ ሲቅልሽ ዊናንስቅ ፃቨነው ገቨ ብ።