Read xamtanga ሉቃስት ወንጌል 20 Bible Online

ሉቃስት ወንጌል 20 - xamtanga bible

ሉቃስት ወንጌል 20

¹ላው ግርየ እየሱስ መቅደሲስ ኽዝቭድ ክንሳ ወንጌልም ሲቭካ ዊኑ፤ ኣይንድም ካኽነጣነ ኻልቅጢዝመ ወሪትት ኽግ ክንሰጢዝ፣ሽመቅልድም ኣቕጝ ጝጐ ተር።

²ጝትም፦ «እስቲ ድቍ፤ እንዛት ፃቭረውድ ውር ስልጣንዝ የጝ? እንዛት ፃቭተ ማጥንስ ክጭስ ስልጣን ነየውድ ኣው የጝ?» ይጝ ዋቕር።

³እየሱስም ዊስ፦ «ያንም ክታት ላው ዊገ ዋቕርጨር ፈርጥን እስቲ ዊስጥን!

⁴ይዃንስት ጥምቅትድ እደረቲስመ ዊንስ እጅሪስ ዊኑ?» ዩ።

⁵ጛይም ጛስ ጛይ እንት ይጝ ማኽርኽሽ፦ «እደረቲስ የጝ ይናን፦ ‹እደስለ ውረ ጝት ለምሪርነቅ?› ይጠ የጝ።

⁶እጅሪስ የጝ ይናን ቈሽ ኽዝቭድ ይናት ቕርጘዝ ድድብጠ የጝ፤ ምላሰንድም ኽዝቭድ እጝቅቅ ይዃንስ ነቭይ ኣቐጘ ኣምንኩ።»

⁷ኣቓንስቅም፦ «ይን ኣዊስ ኣቐጘ ኣርቓይነቅም» ይጝ ዊስ።

⁸እየሱስም፦ «እደስለስ ያንም እንዛት ፃቨውድ ውር ስልጣንዝ ኣቐጘ ክታጭስ ድቈቅም» ዩ።

⁹እየሱስም እንዝ ግረ ኽዝቪዝ እኒን ተከድ ዊግተነው ኪርሙ፦ «ላው እጅር ወይንዙ ኣታክልት ቲክሉ፤ ጝትም ኣርጭዝ ክራይስ ላየ ኻግርል ፊር ዋጥሪጝቀ ኽየው ግርየ ዲቍሱ።

¹⁰ወይኒዙ ፍረነ ግርየድ ችጛንድም ኣታክልቲዝ ወነድ ፍረይስ ጝፊንተድ ለምርጠ በን ጝኣርሸድ እፃቑ፤ እዛይ ኣርጭድ ግን እፃሸው ኣርሸድየንት ድድብጝ ባደው ናን በርስ።

¹¹ወነድም ዊስ ላየ ኣርሸ እፃቑ፤ ጛይ ግን ጝትም ድድብጝ ኣዋርዝጝ ባደው ናን በርስ።

¹²እንደ ገነ ቈሽ ሸወትረ ኣርሸ እፃቑ፤ ጛይ ግን ጝትም ድድብጝ ልኻንዝጝ በርጝ ቢዘ ፊስጝ ማል።

¹³ኣታክልቲዝ ወነድም፦ ‹ነስየ ውር ፃቫን ቺዝጡ ኣጢ! እስቲ ቈሽ ይቀነው ይዅርድየንት እፃጫ! ምናልቫች ጝት እኳ ኣይቭተቍ ኣጝሽ› ዩ።

¹⁴እዛይ ኣርጭድ ግን ጝዅርድየንት ቓልጛንድ ጛስ ጛይ፦ ‹እኒንመ ወራሽድ የጝ፤ ላቝጥን ቁነ፤ ጝርስትድም ይናቕምስ ኣጡ› ይጛ ማኽርሽ።

¹⁵ጝትም ኣታክልቲዝ ቢዘይል ፊስጝ ቍዉ፤ «ነስየ ኣታክልቲዝ ወነድ እዛይ ኣርጭድዛት ወረጘ ፃቭጡ ተከኵ?

¹⁶ጝቕም ተር እዛይ ኣርጭድ ቍውጡ፤ ወይኒዙ ኣታክልትድም ላጥ ኣርጭዝ ይውጡ» ዩ። ኽዝቭድም እኒንት ወሻንድ፦ «እነየውድስ ነሲነ!» ይ።

¹⁷እየሱስ ግን ኽዝቪዝጐ ቓላ እንት ዩ፦ «እደስለ፦ ‹ግምበኝጥድ ነቅጘው ቕርጘድ ማይዘኒዝ ኣውር ኣቑ› ይሽት ፃፍሸዊዙ ትርጕምድ ወረጘ የጝ?

¹⁸ጘጝ ቕርጘይል ሊቨውድቅ ኪልድሽ ብትንትን ይጡ፤ ቕርጘድየን ጝቕም ጝዲጊል ሊቨው እጅርድ ግን ጫፍልቕሽጡ።»

¹⁹ወሪትት ኽግ ክንሰጢዝመ ካኽነጣነ ኻልቅጢዝም እኒን ተከድየንት ዊግተውድ ጝታማጥን ኣቐጘ ኣርቕጛንስቅ ኣይንድ በውዝ ፃይጥጘ በንጝ ዊን፤ ዊገድ ግን ኽዝቭድ ጐውት።

²⁰እየሱስትም ፃይጥጘ ሚቸው ግርየ ደምዝጛ ዊን፤ ጭሰጭሰው ደጘይል ችጝሰው ቃል ጝቕምቲስ ችጝጥጘ በንጛ ዊን፤ እንዝ ማጥን ፃድቃን ተክጝ ጘጝ ዊግተው ዊገይዝ ፃውረቍ ሰላያን ጝጐ እፃቕ።

²¹ሰላያንድም እየሱስትል ኣልትጝ፦ «ክንሰተወ! ክት እማንት ዊግተስመ ክንስተስ ኣርቕነኵን፤ እደረት ጒደነድ እማንዝ ክንስረኵጚ ኣውማውስቅ ኣድልዋርም።

²²እስቲ ድቍ፤ ቂሳርስ ግቭር ኪፍለነው ጥውሸኵመ ጥውሻው?» ይጝ ዋቕር።

²³እየሱስ ግን ጝታተኰልድ ኣርቕ እንት ዩ፦

²⁴«እስቲ ላው ቍርሽ ቓሊስጥን፤ እድ ቍርሺል ፅበው ፅፈሺዝመ ሚልኪዝ ኣውቱ የጝ?» ዩ፤ ጛይም፦ «ቂሳርቱዋ» ይጝ ዊስ።

²⁵ጘጝም፦ «እደስለስ ቂሳትርትውድ ቂሳርስ፣ እደረትውድ ቈሽ እደረስ ይውጥን» ዩ።

²⁶ጛይም ኽዝቪዝ በዊል ዊግተቍ ዊቂዝ ፃውረነው ቸሊየቍም፤ ጘጝ ዊሰው ዊገይዝም ጊርምሽጛ ዝም ይ።

²⁷ክርጘይስ ጐነድ ኻድየቍ ሰዱቃኒስም ላው ላውድ እየሱስትል ኣልትጝ እንት ይጝ ዋቕር፦

²⁸«ክንሰተወ! ሙሴ፦ ‹ላው እጅር እውነት ድው ዅር እዅሪጝቀ ክርሽ ክረዊዝ ጝዝንድ እቸን እውነየንት ድው ክረዊዝ ዚረ ቲኪነ› የው ይናጭስ ጝኽጊዝ ፃፍኩ።

²⁹እደስለ ላጝጠ ዚን ዊን፤ እጝቂስቅ ኽየውድ እውነት ድው ዅር እዅሪጝቀ ክሩ።

³⁰ጝሳቱ ጝዝንድም እቸን እውነየንት ድው እዅሪጝቀ ክሩ።

³¹ሸወትረድም ጘጝት፤ እደይጛ ላጝጠድቅ እቸን እውነየንት ድውጝ እጝቅቅ ዅር እዅሪጝቀ ክር።

³²እጝቂስቅ እግርገይል ቈሽ እውነየን ክርች።

³³ነስየ ላጝጠድቅ ድውጛንስቅ እኝቸን እውነየን ክርጘይስ ጐነይዝ ኰር ኣዊዝ እውነ የጝ ኣረውድ?» ይ።

³⁴እየሱስም፦ «እን ኣልሚዝ እቅድ ድውጘኵ፤ ገባሽጘኵ።

³⁵ተረው ኣልሚዝመ ክርጘይስ ጐነይዝ ችጘነውዝ በቃቐቍ እቅድ ግን ድዋቍም ገባሻቍም።

³⁶መላካታኒዝጘ ኣጛንስቅም ጝዝግረ ክራቍም፤ ክርጘይስ ጕጛንስቅም እደረት ቝር ጛይ።

³⁷ክርጘይስ ጐነዝቍዝ ኣቓንድም ሙሴም ቍጥቋጠይዙ ልየይዝቍዝ ዊግተው ታሪኪዝ፦ ‹ኣቭርኻምት ኣምላክ ይሳቅት ኣምላክ ያይቈቭት ኣምላክ› የው ጭጝኩ።

³⁸ኣቓንስቅም እጝቅቅ እደረስ ፅበቍ ኣጛንስቅ እደረ ፅበቍዝ ኣምላክ የጝጚ ክረቍዝ ኣምላክም ኣየው» ዩ።

³⁹ወሪትት ኽግ ክንሰጢስም ላው ላውድ፦ «ክንሰተወ! ቀሰው ፃቭር ዊግትሩ» ይ።

⁴⁰እንዝ ግረ ላው እጅር እኳ ጝት ዋቕርጠ ዲፍሪየውም።

⁴¹እንዝ ግረ እየሱስ እቅ፦ «ክርስቶስ ዳዊትት ዅር የጝ ይጘውድ ኣወይጝ የጝ?

⁴²ዳዊት ጝቕም መዝሙር መፃፊዝ፦ ‹ኣደረ ይኣደረት፣ <ክፃለታንድዛት ክልኲዝ ደደነ ፃቭጪስቅ፣ የለዊል ጐይ> ዩ።› የው እጀውቃ።

⁴³

⁴⁴እደስለ ዳዊት ጝቕም ኣደረ የው ጭጘውዝየ ኣወይ የጝ ክርስቶስ ዳዊትት ዅር ኣቐውድ?» የው ዋቕሩ።

⁴⁵ኽዝቭድቅ ወሻ እየሱስ ጝክንደጢዝ እንት ዩ፦

⁴⁶«ዘፈፍ የው ቅምስ ሲርጝ ጅልወነው ቀነቍ፣ ኣርየ ብጣይስም ሲለም ይሽተነው፣ ምኵራቪስም ኪብረነ ወምበር፣ ድግስ ጝኒስም ኪብረው ስፍረል ጐይጥጘ በነቍ ወሪትት ኽግ ክንሰጢስ ጣጝቅቅጭጥን።

⁴⁷ጛይ ልጀጊርዳኒዝ ጝንጥድ ቢዝብዝጘኵ፤ እጅርዝ እትልጥጘ ማጥንም ጝታፀለውትድ ሊጊስጘኵ፤ ኣቓንስቅም ጛይ ወሰው ፍርድ ችጝጥቍ።