Read xamtanga ሉቃስት ወንጌል 21 Bible Online

ሉቃስት ወንጌል 21 - xamtanga bible

ሉቃስት ወንጌል 21

¹እየሱስም ጭቅ የው ቓላንድ፣ ኻፍታማን እቅ ጝታሚቨድ መቅደሲዙ ሚቨ ማለነ ሳፁኒል ድውጛንድ ቓሉ።

²ላይ ድኻ ልጀጊርድም ሊጘ ሳንቲማን ሳፁኒል ድውራንድ ቓሉ።

³ኣይንድም፦ «እማንዝ የኵን፤ እጝቂስቅ እኝቸን ድኻ ልጀጊርድሸን ኒቒስር ይውች።

⁴እንዛይቅ ይውጘውድ ጝታኻፍቲስ ቲርፈውድየንት የጝ፤ ጚ ግን ድኻ ኣቕር ፅብራ ውርቅ እዳዚጝቀ ጝርፃይረውድ እጝቅትቅ ይውርኵች» የው ዊግቱ።

⁵ጝክንደጢስም ላው ላውድ፦ «እን መቅደስ ጝንድ ኣወሽ ዲስ ሸኵፈ! ሸግጥ ቕርጝዝመ እቅ እደረስ ይውጘቍ ገይፅዝ ገይፅኩ» ይጛ ዊግሽጛ ዊን።

⁶እየሱስ ግን፦ «እን ቓልድርነውድቅ ፋይሪጝቀ ቕርጘይዝ ዲጊል ቕርጘ ኲንሸጘ እዳቓው ግርየ ተርጡ» ዩ።

⁷ጛይም፦ «ክንሰተወ! እንቅ ኣቐው ግርየድ ኣውን የጝ? እንቅ ኣቐው ግርየድ ጣቅረጘ ኣርቕሰው ምልክትድስ ወረጘ የጝ?» ይጝ ዋቕር።

⁸እየሱስም እንት የው ዊሱ፦ «ቀትርነቅ ጣጝቅቅጭጥን፤ ንቕፀቍ እቅ፦ ‹ያን ክርስቶስ የጝ፤ እንወ! ዚምንድ ችጝኩ› ይጛ ይሽዝ ተርጥቍ፤ ክትን ግን ጛት ቲክንትርነ።

⁹ኣጭነዝመ ዅውክትዝ ወሽርናንድ ዳጝግፅትርነ፤ በውግዝ እንቅ ኣጠ ጥውሸው የጝ፤ ኣነጚ ኻትሸነድ በውዝም ኣቓው።»

¹⁰ቈሽም እንት ዩ፦ «ኽዝቭ ኽዝቭል፣ ምጝግስትም ምጝግስትል ጕጡ።

¹¹ዝቨትልም ኽየው ንውፅንውፅተ፣ እጝቅ ስፍረይልም ግድርዝመ ሽወዝ ኣጡ፤ ሚንትርነ ጐውሰውዝመ ሲመይስም ኽየው ምልክትዝ እትልጡ።

¹²ዊገድ ግን እኒንቅ ኣቐነዊስ በውገ እቅ ክታት ፃይጥቍ፤ ሲድስጥቍ፤ ምኵራቪልቅ፣ ወኽኒ ጝኒልቅ፣ ዲቍስጝ ይውጥቍ፤ ይሽዝቍዝም ንጕሳኒል፣ ቅመቊልም ፊስጥቍ።

¹³እንም ይሽዝ ሚዝርድትርነ ማጥን ቀሰው ኣጋል ኣጡ።

¹⁴ኣቓንስቅም፦ ‹ወረጘ ይን ዊስንቅ ኣጢ?› ይርን ጨጝቅሻይርነጘ እኒንት ልብ ይጥን።

¹⁵ክታፃለታኒስ ኣውማውቅ ተቃውምሸነውም ኣነ ተቋቍምሸነውቅ ቸላይጘው ቃልዝመ ጥቨቭዝ ነቅጭር።

¹⁶ክታኣቅልድ፣ ክታዚምዳንድ፣ ክታፃምጥድቅ እኳ እዳቒጝቀ ክታት ዲቍስጝ ይውጥቍ፤ ክታጊስም ላው ላውድ ቁጥቍ።

¹⁷ይሽዝ ማጥንም እጅርዝቅ ሽክሽርነቅ ኣትርንቅ።

¹⁸ዊገድ ግን ክታኣውር ፅቭቀይስ ላይሸን እኳ ድዛይም።

¹⁹ፀናቕን ችብረነውዝም ክታኒፍስየንት ቓዝትርንቅ።

²⁰«እየሩሳልየም ጠውርሰራዊትዝ ኪብሽረጘ ቓልድርናንድ ጝርድዘነ ግርየድ ጣቅረጘ ኣርቕጥን።

²¹ኣይንድ ይዅዳ ኻግሪል ፅበቍድ ኣብቒዝጐ ሰይጝነ፤ ኻትመየንትል ፅበቍድም ጝርጊስ ፍጝነ፤ ገጠሪዝቍድም ኻትመየንትል ጥዊጝነ።

²²ምላሰንድም እንዝ ማጥን ፃፍሸውድቅ ፋፅምሽጠ ማጥን እኒን ቢቅልደነው ቕፃርዙ ግርየ የጝ።

²³ኣይንትቍ ግርቂዝ ጊዙረቍዝመ ኒቭሰቍ መሉጅንጥዝ ወየው! ዝቨትል ኽየው ሚከረ ኣጡ፤ እን ኽዝቪልም ቍጠ ተርጡ።

²⁴ጛጊስም ሰይፍዙ ስለትዝ ክርጥቍ፤ ላው ላውድ ቈሽ ኣኽዛቫኒል መራሽጝ ፊርጥቍ፤ ኣኽዛቫኒዝ ዚምንድ ኻትሽጢስቅ እየሩሳልየም ኣኽዛቫንዝ ደድሽረይ ኣቲ።»

²⁵«እንዝ ግረ ኰረይስ፣ ኣርቨይስ፣ ፅግልውጢቅም ምልክታን እትልጥቍ፤ ባኽሪዝመ መጐዲዙ ድመይዝቍዝም፣ ዝቨትል ፅበው ኽዝቭድቅ ጨጝቅሻ ኻውክሽጡ።

²⁶እቅም እን ኣልሚል ተረው ኣቕንድየንት ሊሚደነውዝ ዝላጥቍ፤ ምላሰንድም ሲመይት ኻይላንድቅ ናውፅውፅሽትጥቍ።

²⁷ኣይንድም እጅር ዅርት ኽየው ኻይልዝመ ክቭርዝ ኣቕ ድምነዝ ተራንድ ቓልጥቍ።

²⁸ክትንም እንቅ ኣቐነው ኪርማንድ ክታቓደነ ግርየድ ጣቅራንስቅ ጭቅ ይርን ንየ ቓልጥን።»

²⁹ቈሽም ተከ እንት የው ዊግቱ፦ «በለስስመ ላየ ዘፍድቅ ኣስክስርን ቓልጥን።

³⁰ጝታኻፀድ ጭጭቫንድ፣ እየድ ችጘጘ ክታቕም ኣርቕትርንቅ።

³¹እኒዝጘ ቈሽ ክትንም እንዛይቅ ኣቐነው ኪርምጛንድ፣ እደረት ምጝግስትት ተረነ ግርየድ ችጘጘ ኣርቕጥን።

³²እማንዝ የኵን፤ እንቅ ኣጢስቅ እን ዅለድ ዲቋውም።

³³ሲመይስመ ዝቨስ ዲቍጥቍ፤ ይቃልድ ግን ፍፅም ዲቋም።»

³⁴«ጭቕጘ ዝየና እራቐነውዝመ ጨነዝ ማጥን ጨጝቅሸነውዝ ክታኣይምረውድ ዲንዝዛየጘ ጣጝቅቅጭጥን። ኣለዝየ እድ ግርየድ ፅውረይዝጘ ድጝግት ችጝጡ።

³⁵እድ ግርየድም ዝቨትል ፅበቍ እቅድቅ ድጝግትዝ ፃውርጡ።

³⁶ነስየ እን ተረው ጭቓ ዊገይስቅ ጭልቕትርነ ማጥን፣ ቈሽም እጅር ዅርት በዊል ኣይቭቲጝቀ ችብርትርነ ማጥን፣ ዊትርቅ ፃልይርና ነቃጥን» ዩ።

³⁷እየሱስም ግሪ ጨቨቅ መቅደሲል ክንሳ ዊኑ፤ ኻር ግን ደቭረ ዘይት ኣበይል ፍ ጫ ዊኑ።

³⁸ኽዝቭድቅ ጝት ወሽጠ ግረቨዝ ጕ መቅደሲል ጝጐ ተራ ዊኑ።