Read xamtanga ሉቃስት ወንጌል 22 Bible Online

ሉቃስት ወንጌል 22 - xamtanga bible

ሉቃስት ወንጌል 22

¹ፈዝየ የነው ቅጣ ዀነው በሊዝ ግርየድ ችጝ ዊኑ።

²ካኽነጣነ ኻልቅጢዝመ ወሪትት ኽግ ክንሰጢዝም ኽዝቭድ ጐውትጛንስቅ፣ እየሱስት ስውርዝ ቍወነው መለ ደምዝጝጛ ዊን።

³ኣይንድም ፅጭ ሊጘይጅቅ እጊት ዊነው ኣስቈረውትቱ ይዅዳትል ሲጣን ጥዉ።

⁴ጘጝም ካኽነጣነ ኻልቅጢዝመ መቅደስ ጝንድ ኻየቊዝ ኻልቅጢዝጐ ፊር፣ እየሱስት ኣወሽ ዲቍስ ይውጠጘድ ጛጅቅ ዊግሹ።

⁵ጛይም እን ዊገይዝ ዲስ ይጝ፣ ቍርሻን ይውጥጘ ወለይሽ።

⁶ይዅዳም ውሊዝ ቲስመም ኽዝቭ ዊናው ግርየዝ ዲቍስ ይውጠ ሚቸው ግርየ ደምዘነው ኪርሙ።

⁷እንዝ ግረ ፈዝየት ቢገድ ዝውሸው ቅጣ ዀነው በልድ ችጙ።

⁸እየሱስም፦ «ፈዝየት ድረይድ ዅነ ማጥን ፊትርን ኣስልጥን» የው ቢጥሮስመ ይዃንስስ እፃቑ።

⁹ጛይም፦ «ኣውል የጝ ኣስልነ በንረውድ?» ይጝ ዋቕር።

¹⁰እየሱስም፦ «እት ኻትመይል ጥውርናንድ ጭን ኣቝ መውረው እጅር ችጝትርንቅ፤ ጘጝ እጅርድ ጥወው ጝኒል ኣሽ ቲክንድርን ጥውጥን።

¹¹ጝኒዝ ወነድየንትም፦ ‹ክንሰተድ <ይክንደጢጅቅ ፈዝየት ድረይድ ዅጨ ማጥን ኣብኒዝ ጝንድ ኣውል የጝ?> የኵ› ይጥን።

¹²ጘጝም ኽየው ዲቭሪል ወፃሽ ኣስልሸው ፈራቐው ወልወል ቓሊስጡ፤ ጝግል ኣስልጥን» ዩ።

¹³ጛይም ፊርጛንድ እየሱስ ድቈጘ እጝቅትቅ ችጝ፤ ፈዝየት ድረይድም ጝግል ኣስል።

¹⁴ፈዝየት ድረይድ ዀነው ሰትድ ችጛንድም ፅጭ ሊጘ ኻወርየታኒጅቅ መዲል ጐዩ።

¹⁵ጛጭስም፦ «ይሚከረይዝ በውገ እኒን ፈዝየት ድረይድ ክታጅቅ ኣቕ ዀነው ጭቕጘ በና ዊኑን።

¹⁶እን ዊገይዝ ትርጕምድ እደረት ምጝግስቲዝ ኻትሽጢስቅ እን ፈዝየት ድረይድ ሊጘት ዀቅም የኵን» ዩ።

¹⁷እንዝ ግረ ፅወድየንት ለምር ሚዝየንዝ በር፦ «ኣስጥን ክትን እጝቅቅ ላብጠ እኒስ ዚጥን።

¹⁸ነንስ ኪርም እደረት ምጝግስትየን ተርቲስቅ እን ወይኒዝ ፍረይዙ ድቘይስ ዝቀቅም የኵን» ዩ።

¹⁹ኽቭስትድም ጒ ሚዝየንዙ፤ ጛጭስም ኪል ይው በር፦ «እኒን ክታቺ ይውሽተው ይስየድ የጝ፤ ይት ኻስቭርናንስ ማጥን እኒንት ፃቭጥን» ዩ።

²⁰እኒዝጘ ቈሽ ድረይድ ዅጘት ግረ ፅወድ ጒ በር፦ «እኒን ፅወድ ክታቺ ቅብረው የብሪዝ ሚስርትሸው ኣይር ኪዳን የጝ።

²¹«ዊገድ ግን ይት ዲቍስ ይወው እጅሪዝ ናንሸን ይጅቅ መዲል ጚ።

²²እጅር ዅርስ በውግስ ዊስንሸጘ ክረነውድ እዳቓውም፤ ዊገድ ግን ጝት ዲቍስ ይወው እጅሪዝ ወየው» ዩ።

²³ጝክንደጥድም ጛስ ጛይ፦ «ይናማኽሊስ እነየው ዊገ ሰራሸውድ ኣው የጝ?» ይሽተ ይሽተነው ኪርም።

²⁴ቈሽም ጛይ፦ «ይናእጝቂስቅ ንየቱ ኣቐውድ ኣው የጝ?» ይሽተይሽትጛ ጛስ ጛይ ተከራክርሽጥጘ ኪርም።

²⁵እየሱስ ግን እንት ዩ፦ «እን ኣልሚዝ ንጕሳንድ ጝታኽዝቭድ ኻይልዝ ቅምጘኵ፤ ጝታኻልቅጥድም፦ ‹ቀሰው ፃቨቍ› ይሽትጝ ጭጝሽጘኵ።

²⁶ክትን ግን ጝታጘ ኣትርነ፤ ኽሽስ ክታማኽሊስ ኽየውድ እጥኒዝጘ፣ ቅመውድም ቅምሸዊዝጘ ኣነ።

²⁷ኣየውጚ! መዲል ጐይ ዀዊስመ ችብር ኣግልግለዊስ ኣውየን የጝ ኽየውድ? መዲል ጐይ ዀውድ ኣየውመ? ያን ግን ክታማኽሊል ችብር ኣግልግለዊዝጘ የጝ።

²⁸ክትንም ይሚከረይዝቅ ይጊስ ቲቲጝቀ ይጅቅ ፀናቕርንኵርኑ።

²⁹ኣቓንስቅም ይር ይት ይመጘ፣ ያን ቈሽ ይምጝስቲዝ ክታት ይምጭር።

³⁰ይምጝስቲዝ ኰርም ይመዲል ጐይርን ዅትርንቅ፤ ዚትርንቅ፤ ዙፋናንልም ጐይርን ፅጭ ሊጘ እስራየልት ዊግናኒል ፊርድትርንቅ።»

³¹እንዝ ግረ እየሱስ ቢጥሮስት፦ «ስሙን! ስሙን! እንወ! ሲጣን ክታት ዚሩ ጣቅሰናንትጘ ጣቅስጠ በን ጨዉ።

³²ያን ግን ክእምንትድ ድዛይየጘ ክማጥን ፃልዩን፤ ክትም ኣኑሽር ይጐ ዋጥርዳንድ ዊስር ክፅንት ፀናዝ» ዩ።

³³ስሙንም እየሱስት፦ «ኣደረወ! እፅወም ኣነ ክርጘድቅ ክጅቅ ለምጨ ኣስልጨር የጝ» ዩ።

³⁴እየሱስም፦ «ቢጥሮስ! ንጭ ጂርወ ዋቒጝቀ ይት ሸውን ኻዲትር» ዩ።

³⁵እንዝ ግረም ጝክንደጥድዛት፦ «ቡርሰዝመ ኽረጢት ፃዪጝቀ፣ ፃብጣንም ፃብሪጝቀ እፃቓንድ ክታጊስ ሚንትርነ ግቱመ» ዩ፤ ጛይም፦ «ውርም ግቲየው» ይ።

³⁶እየሱስም፦ «ነን ግን ቡርሰም ኣነ ኸረጢት ፃየውድቅ ፃይነ፤ ሰይፍ እጀውድም ጝኣልቨድ ቂ ሰይፍ ጅቭነ።

³⁷‹ኣመፅኝጢጅቅ እጊቱ› የው መፃፍ ይማጥን ዊግተውድቅ ችጝጠ ጥውሸኵ የኵን፤ የይ! ይማጥን ፃፍሸውድቅ ችጘው ግርየድ ነን ችጝኩ» ዩ።

³⁸ጛይም፦ «ኣደረወ እንወ! እንል ሊጘ ሰይፍጥ እኵ» ይ፤ ጘጝም ዊስ፦ «ኣጥጘች» ዩ።

³⁹እንዝ ግረ እየሱስ ጝጊስ ፍ፣ ጝክንደጘ ደቭረ ዘይት ኣበይል ፊሩ፤ ጝክንደጥድም ጝት ቲክንጝ ፊር።

⁴⁰ጝግል ችጘጘም፦ «ፊተነል ጥዋይርነጘ ፃልይጥን» ዩ።

⁴¹ጛጊስም ቕርጘ ዊርውርን ችጝዘነ ብጣይዝ ቝጠ እክልድ የው ግርቨቭሽ እንት ያ ፃልየነው ኪርሙ።

⁴²«ኣየወ! ክት ዊድረር ኣርሽስ እን ሚከረይዝወ ፅወይንት ይጊስ እድጐ ዲቍሽ፤ ዊገድ ግን ይፍቃድድ ኣይጝቀ ክፍቃድድ ኣነ» ዩ።

⁴³ኣይንድ መላክ ሲመይስ ተር በርታዙ።

⁴⁴እየሱስም ጐውት ጭቕጘ ጨጝቅሻንስቅ ኻይልዝ ፃልያ ዊኑ። ጝስዛድም ብሪዙ ጥርብርብተይዝጘ ቅብራ ዊኑ።

⁴⁵ጛይም ጭቕጘ ኻዝነነዊስ ጐው ፅገውሽጛንስቅ ኽርይጝ ዊን።

⁴⁶ጘጝም፦ «ውር ማጥን የጝ ኽርይርነውድፈ? ኽሽስ ፊተነል ጥዋይርነጘ ጕርን ፃልይጥን» ዩ።

⁴⁷ጘጝ ገነ ዊግታ ሲጝቀም፣ ንቕፀቍ እቅ ተር፤ ፅጭ ሊጘይጅቅ ዊነው ይዅዳም ጛት ቃዋ ተሩ፤ እምቝጠም እየሱስትጐ ኣልት ዩ።

⁴⁸እየሱስ ግን፦ «ይዅዳወ! እምቕራመ እጅር ዅርት ዲቍስር ይውተ?» ዩ።

⁴⁹እየሱስ ጅቅ ዊነቍ እቅድም ኣቐው ዊገድቅ ቓልጛንድ፦ «ኣደረወ! ሰይፍዝ ጣዝነ ኣቕሻ» ይ።

⁵⁰ጛጊስም ላውድ ጕ ካኽነጣነ ኻልቀይዝ በረድየንት ጣዝ ለወ ቀርዝድ ቀቭ ማሉ።

⁵¹እየሱስ ግን፦ «በጭ! እንስ ጥውሻውም» ዩ። እድ እጅሪዙ ቀርዝድየንትም ዳቕ ቓዙ።

⁵²እንዝ ግረ ጝት ፃይጥጘ ተረቍ ካኽነጣነ ኻልቅጥድ፣ መቅደስድ ኻየቊዝ ኣዘጢዝመ ሽመቅሊዝ፦ «ሽፍተ ፃይትርነጘመ ሰይፍዝመ ዱለዝ ፃይርን ተትርኑ?

⁵³ግሪ ጨቨቅ ክታጅቅ መቅደሲል ፅባ ክታናንጣንድ ጕዪይርነቅም ዊንድርኑ፤ ነን ግን ክታግርየ የጝ፤ ቈሽም ጥመዝ ስልጣኒዙ ግርየ የጝ» ዩ።

⁵⁴እንዝ ግረ እየሱስት ፃይጝ ፊር፤ ካኽነጣነ ኻልቀይዝ ኻፅሪልም ፊስ፤ ቢጥሮስም እክልድ የው ቲክና ዊኑ።

⁵⁵እቅድም ካኽነጣነ ኻልቀይዝ ኻፅር ማኽሊል ልየ ኻውሽጝ ላብጠ ጐይጝ ፅብጛ ቢጥሮስም ጝታማኽሊል ጐዩ።

⁵⁶ቢጥሮስም ልየይዝ ጋቢል ብርኻኒዝጐቱ ጐይ ፅባ ላይ ጊርድ ጝት ትክ ይር ቓልድር በትር፦ «እኒንም ቃል እየሱስ ጅቅ ዊኑ» ይች።

⁵⁷ቢጥሮስ ግን፦ «እፈ እውነ ክተ! ያን ጝት ኣርቐቅም» የው ኻድዩ።

⁵⁸ዊቱ ዊን የው ቈሽ ላየ እጅር ቢጥሮስት ቓል፦ «ክትም ጛጊስ ላውድ የጝ» ዩ፤ ጘጝም፦ «እፈ እጅር ክተ! ያን ጝት ኣርቐቅም» ዩ።

⁵⁹ላው ሰት ኣጠ ዊን የው ቈሽ፣ ላየ እጅር ቢጥሮስት፦ «እን እጅርድ ገሊለቱ የጝ፤ እርግጥም እየሱስ ጅቅ ዊኑ» የው ጭቕጘ ደድስ ዊግቱ።

⁶⁰ቢጥሮስም፦ «እፈ እጅር ክተ! እኒን ክት ይረው እጅርድየንት ያን ኣርቐቅም» ዩ፤ ኣይንድም ገነ ዊግታ ሲጝቀ ጂርወ ዋቑ።

⁶¹ኣደረም ዋጥር የው ቢጥሮስት ቓሉ፤ ቢጥሮስም፦ «ንጭ ጂርወ ዋቒጝቀ ይት ሸውን ኻዲትር» የው ኣደረ ዊግተው ቃልድ ትዝ ዩ።

⁶²ቢጥሮስም ቢዘይል ፍ ኽርር የው ሊዙ።

⁶³ኣይንድም እየሱስት ፃየቍ እቅድ ተዘቫቭትሽጛ ድድብጛ ዊን።

⁶⁴ጝእልጣንድም ሺፍንጝ ጝጋፅድ ጥፊዝ ጣዝጛ፦ «ነቭይ ኣረውዝየ ክት ጣዘውድ ኣው የጝ? እስቲ ድቋ?» ይጛ ዋቕርጛ ዊን።

⁶⁵ላጥ ንቕፀቍ ዛንዝቍ ዊቅም ዊግትጛ ዊን።

⁶⁶ቅሻንድም ኽዝቪዝ ሽመቅልድ፣ ካኽነጣነ ኻልቅጥድ፣ ወሪትት ኽግ ክንሰጥድም ላብጠ ኣኽቭሽ። እየሱስትም ጝታሸጐዊል ኣልስጝ፦

⁶⁷«እስቲ ድቍ! ክት ክርስቶስመ?» ይጝ ዋቕር፤ እየሱስም፦ «ድቍሽም ኣምናይርነቅም።

⁶⁸ክታት ዋቕራንም ዊሳይርነቅም።

⁶⁹ዊገድ ግን ነንስ ኪርም እጅር ዅር ኻይሉ እደረት ለዊል ጐይጡ» ዩ።

⁷⁰ኣይንድም ጛይ እጝቅቅ፦ «እደስለ ክት እደረት ዅርመ?» ይጝ ዋቕር፤ ጘጝም፦ «የይ፤ ክትን ይርናንትጘ የጝ» ዩ።

⁷¹ጛይም፦ «ነስየ ውርት ሚዝር ደሚስጠፈ! ይናቕም በገዘ ጝምቸይዝ ዊግታንድቀ ወሽንጅነቅ» ይ።