Read xamtanga ሉቃስት ወንጌል 23 Bible Online

ሉቃስት ወንጌል 23 - xamtanga bible

ሉቃስት ወንጌል 23

¹ጝግል ዊነቍድም ምሉዝ ጕጝ፣ እየሱስት ቢላጠውስትል ፃይጝ ፊስ።

²ቢላጠውስስም፦ «እን እጅርድ ይናኽዝቭድ ቀሳ፣ ንጕስ ቂሳርስም ግቭር ኪፍልሻይየጘ ኪልክላ፣ ቈሽም፦ ‹ያን ክርስቶስ ንጕስ የጝ› ያ ክንሳንድ ችጝን ፃይኑን» ይጛ ኪስጥጘ ኪርም።

³ቢላጠውስም እየሱስት፦ «ክት ኣይዅዳነ ንጕስመ?» የው ዋቕሩ፤ እየሱስም፦ «ክት ክቕም ይረጘ የጝ» የው ዊሱ።

⁴ቢላጠውስም ካኽነጣነ ኻልቅጢዝመ ኽዝቪዝ፦ «ያን እን እጅሪስ ላው ወንጀልም ችጚቀር» ዩ።

⁵ጛይ ግን፦ «እን እጅርድ ገሊለስ ኪርም እንል ኣሽ ይዅዳት ኽዝቭድቅ እዳቒጝቀ እጝቅትቅ ክንሳ ኽዝቭድ ኽምዘል ጕይሰኵ» ይጛ ኪው ሽጝ ኪስ።

⁶ቢላጠውስም ገሊለ ይጛንድ ወሽ፦ «እን እጅርድ ገሊለቱመ?» የው ዋቕሩ።

⁷ጝዝለም እየሱስ ተረውድ ኺረውድስ ቅመው ኻግሪስ ኣቐጘ ኣርቓንስቅ፣ ኺረውድስትል በርሱ፤ ኣይንድ ቈሽ ኺረውድስ እየሩሳልየም ኻትመይል ዊኑ።

⁸ኺረውድስም እየሱስት ቓላንድ ጭቕጘ ዲስ ዩ፤ ምላሰንድም እየሱስት ጂጘድ ጝዝ በውገ ወሽ ዊናንስቅ፣ እክሰው ግርየ ቓልጠ በና ዊኑ፣ ጝበዊል ኣቕም ታምራን ሰራሻንድ ቓልጠ በና ዊኑ።

⁹ኣይንድም እየሱስት ንቕፀቍ ዊቅ ዋቕሩ፤ እየሱስ ግን ላይ ዊገትም ዊሲየው።

¹⁰ካኽነጣነ ኻልቅጢዝመ ወሪትት ኽግ ክንሰጢዝም ጝግል ችብርጝ ኪው ሽጝ ኪስጛ ዊን።

¹¹ኺረውድስም ጝዊተድሪጅቅ ኣቕ ነቅጘዝ ቂልዱ፤ ገይፀው ኣልቨም ሲስ ቢላጠውስ ትጐ ዊስ በርሱ።

¹²ኺረውድስስመ ቢላጠውስስም ኣይንቲስ ኪርምጝ ጛስ ጛይ ቀነቀንሽ፤ ጝዝ በውገ ግን ጐርኝጥ ዊን።

¹³ቢላጠውስም ካኽነጣነ ኻልቅጥድ፣ ቅመትድ፣ ኽዝቭድም ሊንስ ኣኽቩ።

¹⁴እንት የውም ዊግቱ፦ «ክትን፦ ‹እን እጅርድ ኽዝቭድ ኽምዘል ጕይሰኵ› ይርን ይጐ ነስርኑ፣ ያንም ክታበዊል ፃቭ ሚርምሩን፤ ኣነጚ እን እጅሪስ ክትን ኣልስርነው ክሲስ ላው ወኝጀልም ችጚቀር።

¹⁵ኺረውድስም ውረውረ ወኝጀልቅ ባንስቅ ይናጐ ዊስ በርስኩ፤ እን እጅርድ ክርጘል ችጝዘው ውርም ኣይንት ወኝጀል ሰራሺየውም።

¹⁶ኣቓንስቅም ጊርፍንዝ ቐፃቕ በርስጨ የጝ» ዩ።

¹⁷እነይ ዊግተውድም ፈዝየት በሊዝ ላው እፁሸው እጅር እክስጠ ጥውሸው ዊናንስቅ የጝ።

¹⁸ኽዝቭድም ሊንስ፦ «እን እጅርድ እድጐ እክልሽ፤ በርቫንት እክሽ!» ያ ቓፁ።

¹⁹በርቫን ይሽተው እጅርድ ኻትመይል ኽምዘ ጕይሳንስቅ፣ ኒቭስም ቍዋንስቅ እፁሽ ዊነው የጝ።

²⁰ቢላጠውስም እየሱስት እክስጠ በን፣ ኽዝቭድ ሊጘት ዋቕሩ።

²¹ጛይ ግን፦ «ሲቅል! ሲቅል!» ይጛ ቓፅ።

²²ቢላጠውስም፦ «ውረይፈ? እን እጅርድ ሰራሸው ዊገድ ወረጘ የጝ? ያን ጝት ክርጘል ችጝዘው ወኝጀልም ችጚቀር፤ ኣቓንስቅም ቐፃቕ እክስጨ የጝ» የው ሸወት ዊግቱ።

²³ጛይ ግን ጝታድመድ ኣጕስ ሽጝ፦ «ሲቅል» ይጛ ቓፅ፤ ጝታድመድም ቢላጠውስት ኻለይድ ላውጥሱ።

²⁴ቢላጠውስም ጛይ ዋቕርጘውድ ኣጠ ማጥን ውሳኒ ዲቍሱ።

²⁵እድየን ኽውክት ጕይሳንስቅ ኒቭስም ቍዋንስቅ፣ እፁሽ ዊነው እጅርድየንት ጛይ ዋቕርጘጘ እክሱ፤ እየሱስት ግን ጛይ በንጘጘ ሲቅልሽጠ ማጥን ዲቍስ ይዉ።

²⁶እየሱስት ፃይጝ ፊርጛንድም ስሙን ይሽተው ቀሪነቱ እጅር ገጠሪስ ተራንድ ችጝጝ፣ ሲቅልጥጘ ኣስልጘው ሚስቅልድየንት መውስጝ እየሱስት እግርገይል ቲክንዝ።

²⁷ንቕፀቍ እቅዝመ ጝታእዘንድ ድቝልጛ ሊዘቍ እቍንም እግርገ እግርገይል ቲክንጛ ዊን።

²⁸እየሱስ ግን ጝታጐ ብሩ የው፦ «እፈ እየሩሳልየምት እቍን ክታትርነ! ክታቕምስመ ክታቝርዝ ማጥን ሊዝጥንጚ ይቍዝስ ሊዝትርነ።

²⁹እንወ! ‹ማኽንጣን እቍን፣ እዅሪየቍ ማፅንታን፣ ኒቭሲየቍ እቍጣንም ውርጘ ቀቫሸቍ ጛይ› ይርነው ግርየ ተርጡ።

³⁰ኣይንድ ኣብቕድዛት፦ ‹ይናዲጊል ሊቭጥን› ኵምብልጥድዛትም፦ ‹ጭቭስጥን› ይጥጘ ኪርምጥቍ።

³¹ነስየ ቝጥን ቃነይዝ እኳ እንት ሽጘውዝየ ይዘው ቃነይዝ ኣቓን ኣወሽጥጘ ዊን?» ዩ።

³²ላጥ ሊጘ ወኝጀልኝጥም ጝጅቅ ቁጥጘ ፃይጝ ፊር።

³³ቀራንየው ይሽተው ስፍረይል ችጛንድም እየሱስት ጝግል ሲቅል፤ እዛይ ወኝጀልኝጥድዛትም ላውድ እየሱስት ለዊዝጐቱ ሊጘትረድ ቈሽ ጝፃግቪዝጐቱ ፃቭጝ ሲቅል።

³⁴እየሱስም፦ «ኣየወ! እኒንትቅ ፃቭጘውድ ኣርቓቍ ኣጛንስቅ የጝ፤ ይቅር ይ!» ዩ፤ ጛይም ጝኣልቨድ እፀ ማልጝ ኣድልሽ።

³⁵ኽዝቭድም ጝግል ችብር ቓላ ዊኑ፤ ኣይዅዳነ ኻልቅጥድም፦ «ላጥ እቅ ቓዙ፤ እደስለ ጘጝ እደረ ማርፀው ክርስቶስድ ኣቐውዝየ እስቲ ጝቕምት ቓዝነ» ይጛ ቂልድጛ ዊን።

³⁶ዊተድርድም ቂልድጛ ዊን፤ ጝጐም ኣልትጝ፣ ዃምጥጠው ወይንዙ ሚዝ ይው።

³⁷ጝትም፦ «ክት ኣይዅዳነ ንጕስ ኣረውዝየ እስቲ ክቕምት ቓዝ!» ይጛ ዊን።

³⁸እየሱስት ኣውሪዝ ንየ ሚስቅሊልም፦ «እኒን ኣይዅዳነ ንጕስ የጝ» ይሽት ፃፍሸው ፅፈሽ እቝርጝ ዊን።

³⁹ጝጅቅ ሲቅልሸቍ ወኝጀልኝጢስም ላውድ፦ «ክትሰ ክርስቶስ ኣይረርቀ? እደስለ ክቕምትም ይናትም ቓዛርመ!» የው ዛሹ።

⁴⁰ሊጘትረድ ግን፦ «እፈ ክት ጝጘ ፍርድ ለምትራጐስ እኳመ እደረት ጐውታራ!

⁴¹ይን ቐፃሽናንስ ሰራሽነው ሰቪዝ ልክ ኣቓንስቅ ፍርድድ እማንተው የጝ፤ እን እጅርድ ግን ውረውረ ጭቕት ሰራሺየው» የው ቃርሹ።

⁴²እየሱስትም፦ «ኣደረወ ክምጝግስቲዝ ተትራንት ኰር ይት ኻስቫ» የው ቓፁ።

⁴³እየሱስም፦ «እማንዝ የኵን፤ ንጭ ገነት ጥውር ይጅቅ ፅብትር» የው ዊሱ።

⁴⁴ኣይንድም ጊዝያትድ ዋልጠ ሰት ኣቕ ዊኑ፤ ፃይጨ ሳይል ኣሽም ዝቨይልቅ ጥመ ኣቑ።

⁴⁵ኰረይዝ ብርኻንድቅ ድዙ፤ መቅደሲዙ ገርደነድም ሊጘትል ቀድሹ።

⁴⁶እየሱስም ጝድመድ ኣጕስ ሸው፦ «ኣየወ! ይኒፍስሸየንት ክናኒል ነቀኵን» የው ቓፁ፤ እኒንት የት ግረ ጝፈውጥድ ፍ።

⁴⁷ጝግል ዊነው ላዝ ኻቀድም ኣቐው ዊግድቅ ቓላንድ፦ «እን እጅርድ እማንም ፃድቅ ዊኑ» የው እደረት ኪብርዙ።

⁴⁸እኒንት ቓልጠ ጘጝ ስፍረይል ኣኽቭሽ ዊነው ኽዝቭድም እን ኣቐው ዊገድየንትቅ ቓላንድ ጭቕጘ ኻዝናንስቅ ጝእዘንድ ድቝላ ጝጝን ጝጝን ዋጥር ፊሩ።

⁴⁹ኣነጚ እየሱስት ጣቀትዝ ኣርቐቍ ዊነቍ እቅዝመ ገሊለስ ኪርምጝ ጝት ቲክንጝ ተረቍ እቍንዝ እጝቅቅ እን ዊግድ ቓልጛ እክልድጝ ችብርጝ ዊን።

⁵⁰እንዝ ግረ ላው ዮሴፍ ይሽተው ኣይዅዳነ ሸጐዊዝ ማኽረተ ኣቐው ቀሰው ፃድቅ እጅር ዊኑ።

⁵¹እን እጅርድ ጝታምኽሪልም ኣነ ጛይ ሰራሽጘው ሰቪልቅ ጥዊየውም ዊኑ፤ ጝኻግርድም ኣርማትያስ ይሽትረይ ላይ ኣይዅዳነ ኻትመትል ዊኑ፤ እደረት ምጝግስትት ተረነ ግርየድም ሊሚዳ ዊኑ።

⁵²ጘጝም ቢላጠውስትል ፊር፦ «እየሱስት እርሸድ ኣለቀይ ነቅ» የው ጨዉ።

⁵³እርሸድየንትም ጊምዝ ፃረው ኻር ኣልቨዝ ጊንዙ፤ ላው እጅርቅ ዲቪሽቲየው ፃፀድ ፊልፍልን ተስኑ ኣይር መቃቭርልም ዲቩ።

⁵⁴እኒንት ፃቨውድም ቅዳምሲንቭትስ ኣስልሸነ ዊነው ኣርቭ ግርየዝ የጝ፤ ቅዳምሲንቭትም ጥውጠ ጕ ዊኑ።

⁵⁵ገሊለስ ኪርምጝ ጝት ቲክንጝ ተረቍ እቍንድም ዮሴፍ ጅቅ ፊርጝ መቃቭርድ ቓል፤ እርሸድም ኣወሽጝ እቝርጘጘ ቓል።

⁵⁶ጝዝለም ዋጥርጝ ሽቱዝመ እቓሰነው ዘይትዝ ኣስል፤ ወሪትት ኽግድ ኣዘጘም ቅዳምሲንቭትት ፈውጝ ግርይ።