Read xamtanga ሉቃስት ወንጌል 24 Bible Online

ሉቃስት ወንጌል 24 - xamtanga bible

ሉቃስት ወንጌል 24

¹እንዝ ግረ እቍንድ እድ ኣስልጘው ሽቱድ ፃይጝ ኽየሲንቭት ግረቨዝ ጕጝ መቃቭሪል ፊር።

²መቃቭሪዝ ሚረድ ዲቭጝ በርጘው ቕርጘድም እድጐ ጊልብርሽ ዊኑ።

³መቃቭሪል ጃቝ ይጝ ቓልጛንድ ግን ኣደረት እርሸድ ችጚየቍም።

⁴እቍንድም እንዝ ግራ ጥውጝ ፅብጛ ብርቕርቕ የው ኣልቨ ሲረቍ ሊጘ እቅ ድጝግት ተርጝ ጝታጋቢል ችብር።

⁵«ፅበውድየንት ውር ማጥን የጝ ክረቊጅቅ ደምዝርነውድ?

⁶ጘጝ ክርጘይስ ጕኩ፤ እንልም እጀው፤ ገሊለ ፅባ ክታጭስ ድቈው ዊገድ ኣጅጥን።

⁷ኣይንድ፦ ‹እጅር ዅር ኽጥያትኝጥዝ ናኒል ዲቍሽት ይውሽትጠ፣ ሲቅልሽጠ፣ ጝዝግረም ሸወትረ ግርየይዝ ክርጘይስ ጕጠ፣ ጥውሸኵ› የው ዊግት ዊኑ» ይ።

⁸እቍንድም ኣይንድ እየሱስ ዊግተውድ ኣጅ።

⁹መቃቭሪስም ዋጥርጝ ፅጭ ለው ኻወርየታኒዝመ ጛጅቅ ዊነቍ ላጢዝቅ ድቍ።

¹⁰እኒንት ኻወርየታኒዝ ድቈቍ እቍንድም መግደላዊት ማርያም፣ ይዃነ፣ ያይቈቭትኘ ማርያም፣ ጛጅቅ ዊነቍ ላጥ እቍንም፣ ጛይ።

¹¹እዛይ ግን እቍንድ ድቍጘው ዊገድ ጛጭስ ኽትፍትፍተ ተክ እትላንስቅ ኣምኒየቍም።

¹²ቢጥሮስ ግን ጕ መቃቭሪል ውጥያ ፊሩ፤ ጝግል ችጘጘም ፍጥ የው ኣቒድ ቓላንድ እርሸድ ጊንዝሽተው ኻር ኣልቨድ ጭቝ ቓሉ፤ ጘጝም ኣቐው ዊገይዝ ጊርምሻ ዋጥሩ።

¹³ኣይንት ግርየይዝ እየሱስት ክንደጢስ ሊጘድ ይማኹስ ትጐ ፊርጛ ዊን፤ ይማኹስ እየሩሳልየምስ ፅጭ ለው ኪለው ሚትር ኣጠ እክልድ ይር ችጝሽረይ ኪው ጚ።

¹⁴ጛይም እን ኣቐው ዊገይዙ ገቨድቅ ጕይጛ ዋርድጛ ዊን።

¹⁵እኒንትም ዊግትጛ ሚርምርሽጛ ሲጝቀ እየሱስ ጝቕም ጛጅቅ ላው ኣቕ ፃጛ ዊኑ።

¹⁶ጛይ ግን ጝታእልጣኒዝ ቓልጛ፣ ጝት ኣርቒየቍም ዊን።

¹⁷እየሱስም፦ «ፃጝርና ክታስ ክታይ ዊግትርነው እን ዊገድ ወረጘ የጝ?» የው ዋቕሩ፤ ጛይም ኻዝንጛ ቀጥ ይጝ ችብር።

¹⁸ጛጊስም ቀለየበ ይሽተው ላውድ እየሱስት፦ «እንዛይ ግርቂዝ እየሩሳልየምስ ኣቐው ዊገድ ኣርቓይረውድ ክት ክለ እን ኻግሪስ ኣቭንመ?» ዩ።

¹⁹እየሱስም፦ «ወረጘፈ?» ዩ፤ ጛይም፦ «ናዝሪትቱ እየሱስትል ኣቐው ዊገይዝቍዛ! ጘጝ እደረስመ ኽዝቪዝቅ በዊል ቃልዝመ ተግቫርዝቅ በርታቐው ነቭይ ዊኑ።

²⁰ጝትም ካኽነጣነ ኻልቅጢዝመ ይናደጝጢዝ፣ ክርጝፍርድዝ ዲቍስጝ ይውጝ በርጝ ሲቅል።

²¹ይን ግን እስራየልት ኻርነይ ፊሰውድ ጘጝ ኣጡ ይን ቲስፈ ፃቭን ዊኑን፤ ኣነጚ እን ዊገድ ኣቐት ንጭ ሸወትረ ግርየ የጝ።

²²ይናጅቅ ዊነቍ እቍኒስ ቈሽ ላው ላውድ ጊርምስጝኩ፤ ጛይ ንጭ ግረቨዝ መቃቭሪል ፊርጝ ዊን።

²³እየሱስት እርሸድ ግን ችጚየቍም፤ ኣነጚ፦ ‹መላካን ቓልኑን፤ ጛይም፦ «እየሱስ ፅበው የጝ» ይጝ ይናጭስ ድቍ› ይጛ ተርጝ ጂጝዝ።

²⁴ይናማኽሊስም ላው ላውድ ፊርጝ እቍንድ ዊግትጘጘ ኣቕ ችጝ፤ እየሱስት ግን ቓሊየቍም» ይጛ እየሱስስ ድቍ።

²⁵እየሱስም፦ «እፈ ኣስክሳይርነቅ፣ ክታእዘንድም ነቭያታንድ ዊግትጘውድቅ ኣምነነዊስ ደየው እቅ ክታትርነ!

²⁶ክርስቶስ እኒን ሚከረድቅ ለምርጠ፣ ጝዝ ግረ ቈሽ ጝክቭሪል ጥውጠ ጥውሸው ኣየውመ?» ዩ።

²⁷ጝዝ ግረ ሙሴስመ ነቭያታኒስ ኪርም ቅዱሳን መፃፋኒዝ ጝቍዝ ፃፍሸውድየንትቅ ጣቅሳ ኣስርድዙ።

²⁸እደይጛ ጝታፊርጘው ኪዊል ጣቅርጛንድ፣ እየሱስ ጛት ዲቍ ፊረው ተኩ።

²⁹ጛይ ግን፦ «ኰረድ ጥውጠ ጕኩ፤ ድልም ኣጠ የጝ፤ እደስለ ይናጅቅ ጭጚ» ይጝ ኪው ሽጝ ጨው፤ ጘጝም ጝታጅቅ ጭጠ ጥዉ።

³⁰እንዝ ግረ ጝታጅቅ መዲል ጐይ ፅባ ሚድ ጒ በርክ በር ኪል ይዉ።

³¹ኣይንድ ጝታእልጣንድ ቢት፤ ጘጝ እየሱስ ኣቐጘም ኣርቕ፤ እየሱስ ግን በውዝ ጝታበዊስ ሲውርሹ።

³²ጛይም ጛስ ጛይ፦ «ጒደነይዝ ፃጝናንድ ድቋ፣ ቅዱሳን መፃፋኒስም ጣቅሳ ቲርጕማንድ ይናእዘንድ ልየ ቃጥልሻ ዊኒየውቀ» ይሽተይሽት።

³³ጝዝለም ጕጝ እየሩሳልየም ዋጥርጝ ፊር፤ ፅጭ ለው ኻወርየታንድም ጝታፃምጢጅቅ ኣኽቭሽጝ፦

³⁴«ኣደረ እየሱስ እማንም ክርጘይስ ጕኩ፤ ስሙንስም እትልኩ» ይጛ ዊን።

³⁵ሊጘ ክንደጥድም ጛት ችጘው ዊገይዝመ ኣደረ እየሱስ ሚድ ኪል ይዋንድ ኣወሽጝ ጝት ኣርቕጘጘ እጝቅትቅ ድቍ።

³⁶ጛይም እኒንት ዊግትጛ ሲጝቀ፣ እየሱስ ጝቕም ጛታማኽሊል ችብር፦ «ዲግተ ክታጅቅ ኣነ» ዩ።

³⁷ጛይ ግን መንፈስ ቓልጘው ተካንስቅ፣ ዳጝግፅጝ ጐውትዝ ስርሽ።

³⁸እየሱስም፦ «ውር ቃጥ የጝ ዳጝግፅርነውድ? ውር ቃጥስ የጝ ክታእዘኒዝ ተጠራጥርሽርነውድ?

³⁹ይናንጣኒዝመ ይልኵጣኒዝ ቓልድርን ያን ይቕም ኣቐጘ ኣርቕጥን፤ ይጊስ ቓልድርናንትጘ መንፈስ ስየዝመ ጛፅዝ እጀውም» ዩ።

⁴⁰እንት የው በር ጝናንጣኒዝመ ጝልኵጣኒዝ ቓሊሱ።

⁴¹ጛይም ጭቕጘ ዲስ ይጛንስቅ ዲንቅሽጛ ገነ ኣምነነ ብጝ ዊን፤ እየሱስም፦ «እንል ውረውረ ዀነው ፃይርንኵርኑመ?» ዩ።

⁴²ጛይም ጂሽተው ኻዘይስ ዊቱ ቀቭሽተው ይው።

⁴³ጘጝም ለምር ጝታበዊል ኣቕ ኹ።

⁴⁴እንዝ ግረ፦ «ክታጅቅ ፅባ ‹ሙሴት ኽግዝ፣ ነቭያታንዝመ መዝሙራን መፃፋንዝ ይማጥን ፃፍሸውድቅ ፋፅምሽጠ ጥውሸኵ› የር ድቈው ይቃልድየን እኒን የጝ» ዩ።

⁴⁵ኣይንድም ቅዱሳን መፃፋንድ ኣስክስጥጘ ማጥን ጝታኣምረውድ ብዙ።

⁴⁶እንት የውም ድቁ፦ « ‹ክርስቶስ ሚከረ ለምርጡ፤ ሸወትረ ግርየይዝም ክርጘይስ ጕጡ።

⁴⁷ቈሽም እየሩሳልየምስ ኪርም ኻግራኒልቅ ጝሽዝ ንስኻዝመ ኽጥያቲስ ይቅር ይሽተነውዝ ኽዝቪዝቅ ድቍሽትጡ› ይሽት ፃፍሽኩ።

⁴⁸ክትንም እን ዊገይዝቅ ሚዝረጫን የጝ።

⁴⁹ያንም ይር ነየው ቲስፈድ ክታጭስ በርስጭር፤ ክትን ግን ንየይስ ኻይል ለምርትርኒስቅ እየሩሳልየም ዊንጥን።»

⁵⁰እንዝ ግረ እየሱስ ጝክንደጥድ እየሩሳልየምስ ፊስ ቢታንየ ኣሽ ፃይ ፊሩ፤ ጝጊስም ጝናንጣንድ ዘርጋቕ በርኩ።

⁵¹ጛት በርካም ጛጊስ ቲት ሲመይ ትጐ ፉ።

⁵²ጛይም ጝጭስ ሲግድጝ ኽየው ዲስተዝ እየሩሳልየም ዋጥር።

⁵³ዊትርቅ መቅደሲስ ቲቲጝቀ እደረት ሚዝየንዝጛ ዊን።