Read xamtanga ሉቃስት ወንጌል 3 Bible Online

ሉቃስት ወንጌል 3 - xamtanga bible

ሉቃስት ወንጌል 3

¹ቂሳር ጢቫሪወስ ኒግሰው ፅጭ ኣኰትረ ምቲዝ፦ በንጥየንቱ ቢላጠውስም ይዅዳት፣ ኺረውድስም ገሊለት፣ ጝዝን ፊልበውስም ኢጡርያስስመ ጥራኰኒደውስስ፣ ሊሳኒወስም ሳቪላኒስት ቅምጛ ሲጝቀ፣

²ኻነስመ ቀያፈስም ካኽነጣነ ኻልቅጥ ኣቕጝ ፅብጛ፣ እደረት ቃልድ በራኸይል ፅበው ዘካርያስት ዅር ይዃንስ ትጐ ተሩ።

³ይዃንስም ዮርዳኖስት ዊርቨይዝ ጋቢል ፅበቍ ኻግራኒልቅ ጅልዋ፦ «ክታኽጥያቲስ ይቅር ይሽትንርነ ማጥን ንስኻ ጥውርና ጣምቅጭጥን» ያ ክንሳ ዊኑ።

⁴እንም ኣቐውድ፣ ነቭይ ይሳያስ፦ «እንወ በራኸይል ኣቕ፦ ‹ኣደረት ጒደነድየንት ኣስልጥን፤ ጥርግየድየንትም ጭቅሽጥን።

⁵ጭልዋድም እቻነ፣ ኣበይዝመ ኵምብልተይዝም ዝጥቅ ይነ፤ ጠማም ጒደነድም ጭቅ የው፣ ሰስረው ጒደነድም ሊጨው ኣነ።

⁶እቀ ዚረድቅ እደረት ቓዝትድ ቓልነ› የው ቓፀው እጅርዙ ድመ ተርጡ» የው ፃፍ ዊናንስቅ የጝ።

⁷ይዃንስም ጣምቅሽጥጘ ጝጐ ተረቍ እቅድዛት እንት ያ ዊኑ፦ «እፈ ሲቭረይዝ ቝር ክታትርነ! ተረው እደረት ቍጣይስ ኣምልጥትርነ ማጥን ክታት ኣው ማኽሩ?

⁸ነስየ ንስኻ ጥውርነጘ ኣራሰው ሰቭ ሰራጭጥንጚ ክታእዘኒዝ፦ ‹ይናኣይር ኣቭርኻም እኩ› ይርና ማክኽሽትርነ፤ እደረ እንዛይ ቕርጚስ ኣቭርኻምስ ዅል ይወነው ቸልጠጘድ ድቈኵን።

⁹ነስየ ዘፍድየንት ጝስሪስ ቀቭ ማልጠ ባፅ ኣስልሽኩ፤ ኣቓንስቅም ቀሰው ፍር ፍርዛው ዘፍድቅ ቀቭሽት ልየል ማልሽትጡ።»

¹⁰ኽዝቭድም፦ «እደስለ ወረጘ ሰራሽነ» ያ ይዃንስት ዋቕራ ዊኑ።

¹¹ጘጝም፦ «ሊጘ ኣልብ ፃየውድ ላውድ እጀዊዝ ይውነ፤ ዀነው ፃየውድም እጀዊዝ ኣድልነ» ያ ዊኑ።

¹²ቀረጥ ቀቨቍም ጣምቅሽጥጘ ጝጐ ተርጝ፦ «ክንሰተወ! ይንሰ ወረጘ ሰራሽና?» ይ።

¹³ጘጝም፦ «ኣዚትርነዊስ ንየ ቈሽርን ኪፍልስትርነ» ዩ።

¹⁴ዊተድርድም ቈሽ፦ «ይንሰ ወረጘ ሰራሽና?» ይጝ ዋቕር፤ ጘጝም፦ «ቃብረ ጊንዝቭ ግፍዝ ቀምትርነ፤ እጅርም ኻሽትዝ ኪስትርነ፤ ክታምኻየድ ክታቕምስ ኣቐኵ» ዩ።

¹⁵ኽዝቭድም ክርስቶስት ተረነድ በንዝ ሊሚዳ ዊኑ፤ ይዃንስት ቓላንድም ጝእዘኒዝ፦ «እኒን ክርስቶስመ ኣጢ?» ያ ኻስቫ ዊኑ።

¹⁶ይዃንስም እጝቅዝቅ እንት የው ዊግቱ፦ «ያንስ ኣቝዝ የጝ ጣምቀውድ፤ ዊገድ ግን ይጊስ ዲቈው ላየ ተርጡ፤ ያንም ጝፃብጣንድ እኳ ፊስጨ በቃቐር ኣይቀም፤ ጘጝም ክታት መንፈስ ቅዱስዝመ ልየዝ ጣምቅጡ።

¹⁷ጝዊርነድ ዊር ሽጠ፣ ጝዚርወድም ጝቅፋነይል ድውጠ ማጥን መሽን ጝናኒል እኩ፤ ገለቨድየንት ግን ስተነ እጀው ልየዝ ቃጥልጡ።»

¹⁸ቈሽም ላየ ንቕፀቍ ምኽራንዝ ማኽራ ወንጌል ሲቭካ ዊኑ።

¹⁹ገሊለት ቅመው ኺረውድስት ግን ጝዝን ፊልበውስት እውነ ኺረውድያደት ድዋንስቅ፣ ላየ ኻቨረ ዊገም ሰራሻ ዊናንስቅ ቃርሹ።

²⁰ኺረውድስ ግን እንዝ ዲጊል ላየ ጭቕትም ቈሽ፣ ይዃንስት ወኽኒ ጝንል ድዉ።

²¹ኽዝቭድቅ ጣምቅሸት ግረ እየሱስ ቈሽ ጣምቅሹ፤ ፃልያ ሲጝቀም ሲመይ ቢቱ።

²²መንፈስ ቅዱስም እርግቨት ተክ ኣካልዝ ጝግል ጊሙ፤ ሲመይስም፦ «ያን ቀነው ይዅርድ ክት የጝ፤ ክቍዝ ዲስ የኵን» የው ድመ ተሩ።

²³እየሱስም ክንስጠ ኪርማንድ ጝእድሚድ ሰውርጝን ምት ኣጠ ኣቕ ዊኑ፤ ኽዝቪዝም እየሱስ ዮሴፍት ዅር ተካ ዊኑ፤ ዮሴፍም የሊት ዅር፤

²⁴የሊ ማቲት ዅር፣ ማቲ ለዊት ዅር፣ ለዊ ሚልኪት ዅር፣ ሚልኪ የውነት ዅር፣ የውነ ዮሴፍት ዅር፤

²⁵ዮሴፍ ማታትዩት ዅር፣ ማታትዩ ኣሙፅት ዅር፣ ኣሙፅ ናዀምት ዅር፣ ናዀም የስሊምት ዅር፣ የስሊም ናጊት ዅር፤

²⁶ናጊ ማኣትት ዅር፣ ማኣት ማታትዩት ዅር፣ ማታትዩ ስምየት ዅር፣ ስምየ ዮሴፍት ዅር፣ ዮሴፍ የውደት ዅር፤

²⁷የውደ የውናንት ዅር፣ የውናን ርየስት ዅር፣ ርየስ ዘሩቫቪልት ዅር፣ ዘሩቫቪል ሰላትያልት ዅር፣ ሰላትያል ነሪት ዅር፤

²⁸ነሪ ሚልኪት ዅር፣ ሚልኪ ኻዲት ዅር፣ ኻዲ ቈሳምት ዅር፣ ቈሳም የልሙዳምት ዅር፣ የልሙዳም የርት ዅር፤

²⁹የር የውሲት ኵር፣ የውሲ የሊዛርት ዅር የሊዛር የውራምት ዅር፣ የውራም ማጣትት ዅር፣ ማጣት ለዊት ዅር፤

³⁰ለዊ ስሙንት ዅር፣ ስሙን ይዅዳት ዅር ይዅዳ ዮሴፍት ዅር ዮሴፍ የውናንት ዅር፣ የውናን የልያቂምት ዅር፤

³¹የልያቂም መልየት ዅር፣ መልየ ማይናንት ዅር፣ ማይናን ማጣትት ዅር፣ ማጣት ናታንት ዅር፣ ናታን ዳዊትት ዅር፤

³²ዳዊት እስየይት ዅር፣ እስየይ እየቪድት ዅር፣ እየቪድ በዊዝት ዅር፣ በዊዝ ሳልመንት ዅር፣ ሳልመን ናሰውንት ዅር፤

³³ናሰውን ኣሚናዳቭት ዅር፣ ኣሚናዳቭ ራምት ዅር፣ ራም ኣርኒት ዅር፣ ኣርኒ የስረምት ዅር፣ የስረም ፋሪስት ዅር፣ ፋሪስ ይዅዳት ዅር፣ ይዅዳ ያይቈቭት ዅር፤

³⁴ያይቈቭ ይሳቅት ዅር፣ ይሳቅ ኣቭርኻምት ዅር ኣቭርኻም ታረት ዅር፣ ታረ ናኰርት ዅር፤

³⁵ናኰር ሰሩግት ዅር፣ ሰሩግ ረኡት ዅር፣ ረኡ ፋሊቅ ዅር፣ ፋሊቅ ኣቭየርት ዅር፣ ኣቭየር ሳላት ዅር፤

³⁶ሳላ ቃይንምት ዅር፣ ቃይንም ኣርፋክሳድት ዅር፣ ኣርፋክሳድ ስየምት ዅር፣ ስየም ነዅት ዅር፣ ነዅ ላሚኽት ዅር፤

³⁷ላሚኽ ማቱሳለት ዅር፣ ማቱሳለ ኺነኵት ዅር፣ ኺነኵ ያርየድት ዅር ያርየድ መላልየልት ዅር፣ መላልየል ቃይናንት ዅር፤

³⁸ቃይናን ኺነውስት ዅር፣ ኺነውስ ሰይትት ዅር፣ ሰይት ኣዳምት ዅር ኣዳም እደረት ዅር የጝ።