Read xamtanga ሉቃስት ወንጌል 4 Bible Online

ሉቃስት ወንጌል 4 - xamtanga bible

ሉቃስት ወንጌል 4

¹እየሱስም መንፈስ ቅዱስዝ እቻቕ ዮርዳኖስ ዊርቨይስ ዋጥሩ፤ በውዝም በራኸል ፊርጠ ማጥን መንፈስ ቅዱስ ሚርዩ።

²ጝጊስም ኣርቨ ግርቅ ዳቪለውስቲስ ፊትንሹ፤ ጛይ ግርቂዝም ውርም ዂየው፤ ግርቅድ ኣቢትጘጘም ግድርዱ።

³ዳቪለውስም፦ «ክት እደረት ዅር ኣረውዝየ እስቲ እን ቕርጘድ ኻበሸ ኣነ ይር ኣዝ» ዩ።

⁴እየሱስም፦ « ‹እጅር እደረት ቃልዝምጚ ሚዝ ጭቝ ፅባውም› ይሽት ፃፍሽኩ» የው ዊሱ።

⁵እንዝ ግረ ዳቪለውስ እየሱስት ኽየው ኣበል ፊስ ኣልሚዝ ምጝግስታንድቅ ሊንስ ቓሊስ በር፦

⁶«እንዛይ ምጝግስታኒዙ ስልጣኒዝመ ክቭሪዝቅ ይጭስ ነይሽትኩ፤ ያንም ይበነዊዝቅ ይወር ኣቓንስቅ ክጭስ ነቅጭር።

⁷እንዝ ማጥን ይጭስ ሲግድራን እኒንቅ ኩ ኣጡ» ዩ።

⁸እየሱስም፦ « ‹ክኣምላክ ኣደረስ ጭቝ ሲግጭ፤ ጝት ጭቝም ኣምልክ› ይሽት ፃፍሽኩ» የው ዊሱ።

⁹እንዝ ግረ እየሩሳልየም ፊስ መቅደሲዝ ጕልላቲል ችብስ፦ «ክት እደረት ዅር ኣረውዝየ እስቲ እኒስ ቍልቍለ ሊቭ!

¹⁰ምላሰንድም፦ ‹ክት ሊሚድጥጘ ማጥን ጝመላካንድ ኣዝጡ።

¹¹ክልኵጣንድም ቕርጘይዝ ፅጋራይጘጘ ጝታናንጣኒዝ ክት ጕይጝ ፃይጥቍ› ይሽት ፃፍሽኩ» ዩ።

¹²እየሱስም፦ « ‹ክኣምላክ ኣደረት ፊትንትንተ› ይሽት ፃፍሽኩ» የው ዊሱ።

¹³ዳቪለውስም ጝፊተነድ እጝቅትቅ ኻተት ግረ ላየ ሚቸው ግርየ ችጝጢስ ጝጊስ ቲት ፊሩ።

¹⁴እየሱስም መንፈስ ቅዱስት ኻይልዝ ገሊለ ትጐ ዋጥሩ፤ ጝጂጘድም ኻግሪልቅ ወይሽቱ።

¹⁵ጘጝም ጝታምኵራቫኒልቅ ክንሳ ዊኑ፤ ኽዝቭድም ጝክንስኒዝቍዝ ሚዝየንዛ ዊኑ።

¹⁶እንዝ ግረ እዅርሽ ሊግዘው ጝኻግር ናዝሪት ፊሩ፤ ጝክንደጘም ቅዳምሲንቭት ግርየዝ ምኵራቪል ጥዉ፤ ኣንቭንቭጠም ጕ ችብሩ።

¹⁷ነቭይ ይሳያስት መፃፍድም ይው፤ ጘጝም መፃፍድ ጋልፃንድ፦

¹⁸«እደረት መንፈስድ ይግል እኩ፤ ጘጝም ድኺዝ ወንጌል ሲቭክጨ ማጥን፣ መራሸቊዝ እኪተነው፣ ኻርቨቊዝም ቓለነው ቸልጛንስ ኣውጅጨ ማጥን፣ ጥቒተቊድዛትም ኻርነይ ፊስጨ ማጥን ይት ይምኩ።

¹⁹እደረ ጝኽዝቭድ ኻርነይ ፊሰይ ዚምንሸንትም ኣውጅጨ ማጥን ይት እፃቕኩ» ይሽት ፃፍሸውድየንት ችጙ።

²⁰እንዝ ግረ መፃፍድ ዲቭ እፈረይዝ ይው በር ጐዩ፤ ምኵራቪል ዊነቍድም ጝት ትክ ሽጝ ቓልጛ ዊን።

²¹ጘጝም፦ «እኒን ነን ወሽርነው መፅኻፊዙ ቃልድ ንጭ ፋፅምሹ» ዩ።

²²እጝቅቅም ጝቍዝ ቀሰውድ ዊግትጛ ዊን፤ ጝምቸይስ ፈው ፃገዝ እቻቐው ቃሊዝቍዝም ጊርምሽጛ፦ «እኒን ዮሴፍት ዅር ኣየውቀ?» ይጛ ዊን።

²³ጘጝም፦ « ‹ጥላ ጕርየ ክቕምንት ቓዝ› ይሽተው ተከድ ጣቅስትርነጘድ ጥርጥርም እጀር፤ ቈሽም፦ ‹ቅፍርናዀምቲስ ፃቭረውድቅ ወሽነጘ እንል በገዘ ክኻግሪልም ፃቭ› ይትርንቅ» ዩ።

²⁴እንደ ገነ ቈሽ እንት ዩ፦ «እማንዝ የኵን፤ ነቭይ በገዘ ጝኻግሪስ ኪብራውም።

²⁵እማንተውድ ድቍጨር ወጭጥን፦ ይልያስት ዚምኒዝ ሻቘ ምትዝመ ግቨርዝ ሲመይስ ስወ ኪልክልሻንስቅ ኻግርድቅ ግድርድ ዊናንት ኰር እስራየል ኻግሪል ንቕፀቍ ልጀጊርዳን ዊን።

²⁶ይልያስ ግን ጛጊስ ላይሸንትጐም እፃሺየው፤ ዊገድ ግን ሲዱነት ኻግሪል ስራብተ ይሽትረይ ኪውትል ፅብረይ ላይ ልጀጊርድትል የጝ እፃሸውድ።

²⁷ነቭይ የልሳት ዚምኒዝም እስራየል ኻግሪል ንቕፀቍ ለምፃማን ዊን፤ ዊገድ ግን ሰውርየቱ ንማንቲስለ ጛጊስ ላው እጅርም ቓዲየው» ዩ።

²⁸ምኵራቪል ዊነቍድም እጝቅቅ እኒንት ወሽጛንድ ጭቕጘ ቈጣሽ።

²⁹ጐይጝ ዊንጘዊስም ጕጝ ኻትመይስ ቢዘ ፊስ፤ ጝትም ቍልቍለ ማልጥጘ በንጝ ጝታኻትመየን ተሲትር ዊንደው ኣበይዝ ገመይል ፊስ።

³⁰ጘጝ ግን ጝታማኽሊዝ ቀድ ፊሩ።

³¹እንዝ ግረ እየሱስ ገሊለት ኣውራጀይዝወ ቅፍርናዀምትል ፊሩ፤ ጝጊስም ቅዳምሲንቭት ግርየዝ ኽዝቭድ ክንስጠ ኪርሙ።

³²ክንሳ ዊነውድም ስልጣን ጕርየይዝጘ ኣቓንስቅ ጝቃሊዝቍዝ ጊርምሻ ዊኑ።

³³ምኵራቪልም ጭቓ ጋኒን ጨው እጅር ዊኑ፤ ጘጝም ጝድመድ ኣጕስ ሸው ቓፁ።

³⁴«ወየው ናዝሪትቱ እየሱስወ! ክጅቅ ውር ውላ ፃይነቅ? ይናት ድስተመ ተትረውደ? ክት ኣው ኣረጘ ቃል ኣርቕኩን፤ ክት ቃል እደረት ቅዱስድ የጝ» ዩ።

³⁵እየሱስም፦ «ዝም ይር እን እጅሪስ ፍ» የው ጋስፁ። ጋኒንድም እጅርድየንት ኽዝቪዝ ማኽሊል ማል በር ውርም ጒድዪይጝቀ ሊቅ ፊሩ።

³⁶እቅድም እጝቅቅ ጊርምሽ፤ ጛስ ጛይም፦ «እን እጅርድ ኣወየው ትዛዝ የጝ ኣዘውድፈ? ስልጣንዝመ ኻይልዝ ጋኒናንድዛት ኣዘኵ፤ ጛይም ኣዚትጝ ፍጘኵ» ይ።

³⁷ጝጂጘድም ጛይ ኻግራኒልቅ ወይሽቱ።

³⁸እንዝ ግረ እየሱስ ምኵራቪስ ፍ ስሙንት ጝኒል ጥዉ፤ ስሙንት ጣስንም ኻይሉ ብረዝ ፅዊትር ዊንች፤ እየሱስትም ጝርት ቓዝጠ ማጥን ጭው።

³⁹ጘጝም ጝርጐ ኣልት የው ችብር ብረድየንት፦ «ሊቅ» የው ዊግቱ፤ ብረድም ጝርጊስ ሊቁ፤ ጚይም ጕር ኣቭንውዘነው ኪርምች።

⁴⁰ኰረድ ጥውጠ ጓንድም ጝሉ ጝሉ ፅውዘዝ ፃይሽቍ ፅውዝጅንጥ እቅድቅ ጝጐ ነስ፤ ጘጝም እጝቅትቅ ጝናኒዝ ዳቓ ቓዙ።

⁴¹ጋኒናንድም፦ «ክት እደረት ዅር የጝ!» ይጛ ቓፅጛ ንቕፀቍ እቂስ ፍ፤ ጘጝ ግን ጋስፁ፤ ጘጝ ክርስቶስ ኣቐጘ ኣርቕጝ ዊንጛንስቅ ዊግትጥጘ ማጥን ፊቅዲየውም።

⁴²ቅሻንድም እየሱስ እጅር እጀው ገለል የው ስፍረል ፊሩ፤ እቅድዛይም ደምዝጛ ዊን፤ ጝጐም ተርጝ ጛጊስ ቲት ፊራየጘ ኪልክልጥጘ በን።

⁴³ጘጝ ግን፦ «ላጥ ኻትምጢልም ፊጥ እደረት ምጝግስቲዙ ወንጌልድ ሲቭክጨ ጥውሸኵ፤ ምላሰንድም ያን እፃጨውድ እንዝ ማጥን የጝ» ዩ።

⁴⁴ኣቓንስቅም ገሊለት ምኵራቫኒልቅ ጅልዋ ክንሳ ዊኑ።