Read xamtanga ሉቃስት ወንጌል 5 Bible Online

ሉቃስት ወንጌል 5 - xamtanga bible

ሉቃስት ወንጌል 5

¹ላው ግርየ እየሱስ ጀንሰሪጥ የነው ባኽሪዝ ደይል ችብር ፅባ ንቕፀው ኽዝቭ ጘጝ ክንሰው እደረት ቃልድ ወሽጠ ትክቨትክቭሻ ዊኑ።

²ጘጝም ባኽሪዝ ደዪል ችብረቍ ሊጘ ታኵጥ ቓሉ፤ ኻዘ ፃውረቍ እቅም ጛጊስ ጊምጝ ጝታመረቭድ እቓስጛ ዊን።

³እየሱስም ጛይ ታኵጢስ ላይ ስሙንትወየንትል ጥው፦ «ስሙን! እስቲ እኝቸን ታኰየንት ባኽሪዝጐ ትክቭሻ» የው ጨዉ። ጝዝ ግረም ታኰየንትል ኣቕ ኽዝቭድ ክንስጠ ኪርሙ።

⁴ጝክንሰነውድ ኻተት ግረም ስሙንት፦ «ታኰየንት ባኽር ማኽሊዝጐ ኣልስ ሽ፤ ኻዘ ፃይትርነ ማጥንም ክታመረቭድ ባኽሪል ማልጥን» ዩ።

⁵ስሙንም፦ «ክንሰተወ! ኻርድቅ ልቕርድና ጭን ውርም ፃዪነቅ፤ ዊገድ ግን ክት ይረውዝየ ቀሰው ማልጭር» ዩ።

⁶ኣይንድም መረቭድ ማል፤ ንቕፀው ኻዘም ፃይ፤ መረቭድም ቅጢረነው ኪርሙ።

⁷ላየ ታኰል ዊነቍ ጝታፃምጥድዛትም ተርጝ ከቭስጥጘ ማጥን ሚርየዝ ጭጝ፤ እድ ጝታፃምጥድም ተርጝ ሊጘ ታኵጥድቅ ኻዘዝ እቻዝ፤ ታኵጥድም ስርሽጥጘ ኪርም።

⁸ስሙን ቢጥሮስም እኒንት ቓላንድ እየሱስት ልኲል ሊቭ፦ «ኣደረወ ያን ኽጥያትኘ እጅር የጝ፤ ይጊስ እድጐ እክልጭ» ዩ።

⁹እንት የውድም ጝስመ ጝጅቅ ዊነቍዝ ፃይጘው እንቝጠ ኻዘይዝቍዝ ጊርምሽጝ ዊንጛንስቅ የጝ።

¹⁰ቈሽም ስሙንት ፃምጥ ዘቭዲወስት ቝር ያይቈቭስመ ይዃንስም ጊርምሽ፤ እየሱስም ስሙንት፦ «ጐውተ! ነስየ እቅ ይጭስ ፃውርደር ኣትር» ዩ።

¹¹ጛይም ታኵጥድ ዘቨይዝጐ ኣልስጝ በርጝ እጝቅትቅ ማልጝ ጝት ቲክንጝ ፊር።

¹²እየሱስም ላይ ኻትመትል ፅባ ላው ለምፅዝ[2] ዊርሽተው እጅር ጝግል ዊኑ፤ እየሱስትም ቓላንድ ጝልኲል ሊቭ፦ «ኣደረወ ክት ፊቅድረውዝየ ይት ቓዘነው ቸልትር» የው ጨዉ።

¹³እየሱስም፦ «ቀሰው ፊቅደኵን ቓጭ» ዩ፤ ኣይንድም በውዝ ጝለምፅድ ሊቁ።

¹⁴እየሱስም፦ «እኒንት ኣውማስቅ ድቍረር፤ ዊገድ ግን ፊትር ክቕምት ካኽኒዝ ቓሊሽ፤ ክለምፂስ ቓድረጘም እጅርዝ ሚዝር ኣጠ ማጥን ሙሴ ኣዘው ምስዋይትድ ኣልሽ» ዩ።

¹⁵ኣነጚ ጝጂጘድ ጭቕጘ ፋ ፊሩ፤ ኣቓንስቅም ጭቕጘ ንቕፀው ኽዝቭ ክንሳንድ ወሽጠ ጝፅውዘ ጝፅውዘይስም ቓድጠ በን ኣኽቭሻ ዊኑ።

¹⁶ጘጝ ግን በራኸይዝጐ እክልድ የው ፃልያ ዊኑ።

¹⁷ላው ግርየ እየሱስ ክንሳ ዊኑ፤ ገሊለስመ ይዅዳት ኪቋኒስቅ እየሩሳልየምስም ተረቍ ፈሪሳንዝመ ወሪትት ኽግዝ ክንሰጥዝ ጝግል ጐይጝ ዊን፤ ፅውዝጅንጥድ ቓዛንስ ማጥንም ኣደረት ኻይል ጝግል ኣቑ።

¹⁸ኣይንድም እቅ ላው ድውይ እጅር ኣረትዝ መውርጝ ነስ፤ እየሱስት በዊልም ኣልስጥጘ በንጝ ጘጝ ፅበው ጝኒል ድውጥጘ ሚኵር።

¹⁹ኣነጚ ኽዝቭድ ንቕፅ ኣቒ ድወነ ብጛንድ፣ ንየ ኽድም ዲጊል ፍጝ ኽድምድየንት ባቝዝጝ ፅውዝጅነድየንት ጝኣረቲጅቅ እየሱስት በዊል ጊምዝ።

²⁰እየሱስም ጝታእምንትድ ኣርቕ፦ «እጅር ክተ! ክኽጥያቲስ ይቅር ይሽትርኵሩ» ዩ።

²¹ወሪትት ኽግ ክንሰጢዝመ ፈሪሳኒዝም፦ «እኒን እደረትል ድፍርትዝ ዊግተውድ ጘጝ ኣው የጝፈ? ላው እደረትለ ኣው የጝ ኽጥያት ይቅር ይጠ ቸለውድ?» ይጛ ኻስቭጥጘ ኪርም።

²²እየሱስም ጛይ ኻስቭጘውድየንት ኣርቓንስቅ፦ «ውር ማጥን የጝ እኒንት ክታእዘኒዝ ኻስቭርነውድ?

²³‹ክኽጥያትድ ይቅር ይሽትኩ› የናንቲስመ፦ ‹ጕር ፊጥ› የናንቲስ ኣውየን የጝ ቀለውድ?

²⁴ዊገድ ግን እጅር ዅርስ ኽጥያት ዲምስሰነው ስልጣን ይውሽተጘ ኣርቕጥን» የው ለውሻሽ እጅርድየንት፦ «እጅር ክተ! ጕ! ክኣረትድ ምውትር ፊጥ» ዩ።

²⁵ኣይንድም ለውሻሽድየን እቂዝ በዊስ ጕ፣ ጝኽሪ ዊነው ኣረትድየንትም መውር እደረት ሚዝየንዛ ጝጝን ፊሩ።

²⁶ጝግል ዊነቍ እቅድም እጝቅቅ ጭቕጘ ጊርምሽጛ ጐውትዝ ስርጝ፦ «እፈ ንጭስ ኽየው ግርምት ቓልኑና» ይጛ እደረት ሚዝየንዝ።

²⁷እንዝ ግረ እየሱስ ጝጊስ ፍ ፊሩ፤ ለዊ ይሽተው ላው ቀረጥ ቅቨተ እጅርም ቀረጥ ቀቨነ ጐይተይል ጐይ ዊነጘ ቓል፦ «ለው ይት ቲክን» ዩ።

²⁸ጘጝም ጕ እጝቅትቅ በር እየሱስት ቲክኑ።

²⁹ለዊም ጝጝኒል እየሱስስ ኽየው ድግስ ኣስሉ፤ ንቕፀቍ ቀረጥ ቀቨቍዝመ ላጥ እቅዝም ጛጅቅ መዲል ጐይጝ ዊን።

³⁰ፈሪሳኒዝመ ጝታዊግን ኣቐቍ ወሪትት ኽግ ክንሰጢዝም፦ «ውር ማጥን የጝ ኽጥያትኝጢዝመ ቀረጥ ቀቨቊዝጅቅ ዅርነውድ ዚይርነውድ?» ይጛ ታኽንደነው ኪርም።

³¹እየሱስም እንት የው ዊሱ፦ «ፅውዝጅንጥዝጚ ትኽንቍዝ ኻይክም በንዛውም።

³²ያንም ተጠውድ ኽጥያትኝጥድዛት ንስኻ ጥውጥጘ ማጥን ጭጝጨጚ ፃድቃንድ ጭጝጨም ኣየው» ዩ።

³³ጛይም እየሱስት፦ «ይዃንስት ክንደጥድ ንቕፀቍ ግርቅ ፃምጘኵ፤ ፀለውትም ኒቒስጘኵ፤ ፈሪሳነ ክንደጥድም ጘጝት ፃቭጘኵ፤ ክክንደጥድ ግን ዊትርቅ ኵጘውድ ዚጘውድ ወር ማጥን የጝ?» ይጝ ዋቕር።

³⁴እየሱስም፦ «ኣስንድ ጛጅቅ ፅባ መጭድዛት ፃምሰነው ጥውሸኵመ?

³⁵ዊገድ ግን ኣስንድ ጛጊስ ቲተው ግርየ ተርጡ፤ ኣይንድ ፃምጥቍ» ዩ።

³⁶ጝዝ ግረም ቈሽ ላው ተከ እንት የው ዊግቱ፦ «ኣይር ኣልቨይስ ምልግቨ ቀድ ኻፍለ ኣልቨይል ሚልግቨው እጅርም እጀው፤ እንት ሸው እጅር ፅብሽ ግን ኣይር ኣልቨድየንትም ጊነ ቀደኵ፤ ኣይር ምልግቨድም ኻፍለይዝ ቲስመማውም።

³⁷ቈሽም ቝጥን ወይንዙ ሚዘ ኣቢተው መርል እቝረው እጅርም እጀው፤ እቝርሽ ግን ቝጥን ወይንዙ ሚዘድ መርድየንት ብጥቕ ሽጡ፤ ሚዘድም ቅብረኵ፤ መርድም ኣርወ እጀው እዳቐኵ።

³⁸ኣቓንስቅም ቝጥን ወይንዙ ሚዘድ ኣይር መርል ይመነው ጥውሸኵ።

³⁹ነስየ ብልቈው ወይንዙ ሚዝድ ዚየት ግረ ቝጥንድ በነው ኣውማውም እጀው፤ ምላሰንድም ብልቍ ሳብጠውድ ቺዘኵ» የኵነ።