Read xamtanga ሉቃስት ወንጌል 7 Bible Online

ሉቃስት ወንጌል 7 - xamtanga bible

ሉቃስት ወንጌል 7

¹እየሱስ እኒንትቅ ኽዝቪዝ ዊግት ኻተት ግረ ቅፍርናዀም ትጐ ፊሩ።

²ጝግልም ላው ላዝ ኻልቀ ዊኑ፤ ጝቀነው ኣገልጋይድም ጭቕጘ ፅዊት ክርጠ ጕ ዊኑ።

³እየሱስት ጂጘድ ወሻንድም፦ «ኣለቀይጥን ተር ይኣገልጋይድየንት ቓዝጠ ማጥን ፊትርን ጨውጥን» የው ኣይዅዳነ ሽመቅልድዛት እየሱስትጐ እፃቑ።

⁴ጛይም እየሱስትጐ ተርጝ፦ «ጝጭስ እኒንት ፃቭተ ጥውሸኵ።

⁵ጘጝ ይናኽዝቭድ ቀነው እጅር የጝ፤ ይናምኵራቭድየንትም ተሰውድ ጘጝ የጝ» ይጛ ኪው ሽጝ ጨው።

⁶እየሱስም፦ «ቀሰው» የው ጛጅቅ ፊሩ፤ ጝጝኒዝጐ ችጝጠ ጓንድም ላዝ ኻልቀድ ጝወደጃንድ ጭጝ፦ «ኣደረወ! ክት ይጝን ፅራነይዝ ሳይል ጥወነውዝ ያን ጥውጨር እጅርም ኣይቀር ዝላተ።

⁷ያን ይቕምም ክጐ ተረነውዝ በቃቐርም ኣይቀር፤ ኣቓንስቅም ጝግል ኣቕር ክቃሊዝ ኣዝረውዝየ ይኣገልጋይድ ቓድጡ።

⁸ያን ይቕምም ይንየቱ ኻልቀ ፃቀር የጝ፤ ይጭስ ኣዚተቍ ይሳትቍ ዊተድር ቈሽ እኵ፤ ላውድ፦ ‹ፊጥ› ያንድ ፊረኵ፤ ላየድ ቈሽ፦ ‹ለው› ያንድ ተረኵ፤ ይኣገልጋይድም፦ ‹እኒንት ፃቭ› ያንድ ኣዚተጘ ፃቨኵ፤ ይርን ድቍጥን» የው እፃቑ።

⁹እየሱስም እኒንት ወሻንድ ዲንቅሹ፤ ብሩ የውም ጝት ቲክና ዊነው ኽዝቪዝ፦ «እነየው ኽየው እምንት እስራየላኒስ እኳ ችጚቀርም የኵን» ዩ።

¹⁰እፃሸቍድም ላዝ ኻልቀይዙ ጝኒል ዋጥርጛንድ ጝኣገልጋይድ ቓደጘ ችጝ።

¹¹እንዝ ግረ እየሱስ ጛምርሲዝ ናይን ይሽትረይ ላይ ኻትመትጐ ፊሩ፤ ጝክንደጢዝመ ንቕፀው ኽዝቭዝም ላው ኣቕጝ ፊር።

¹²ኻትመየንትል ጥወጘም እቅ እርሸ መውር ኻትመየንቲስ ፍጛ ዊን፤ ክረውድም ጝኘስ ላው ጭቝ ዅር ዊኑ፤ ጝኘየንም ልጀጊርድ ዊንች፤ ኻትመይዙ ንቕፀው ኽዝቭም ጝርጅቅ ዊኑ።

¹³ኣደረም ጝርት ቓላንድ ጝርስ ኣርኽርኽ፦ «ኣይዝዀች ሊዝተ» ዩ።

¹⁴ኣልት የውም ቃነ ቀሪዘድ ዳቑ፤ መውርጝ ዊነቍ እቅድም ቀጥ ይጝ ችብር፤ እየሱስም፦ «እፈ ጕለሸ ክተ! ጕ የኵን» ዩ።

¹⁵ክረውድም ጕን የው ጐይ ዊግተነው ኪርሙ፤ እየሱስም ጝኘስ፦ «ኣስ ክዅርት» የው ይዉ።

¹⁶ኽዝቭድም እጝቅቅ ጐውትዝ ስርሽ፦ «ይናማኽሊስ ኽየው ነቭይ ጕኩ፤ እደረም ጝኽዝቭድ ገቭስኩ» ያ እደረት ሚዝየንዙ።

¹⁷እየሱስት ጂጘድም ይዅዳ ኻግሪዝመ ላጥ ጝጅለወይዝቍ ኻግራኒዝቅ ወሽይቱ።

¹⁸ይዃንስት ክንደጥድም እንዛትቅ ይዃንስስ ድቍ፤ ጘጝም ጛጊስ ሊጘድ ጭጝ፦

¹⁹«ተርጡ ይን ሊሚደነርድ ክትመ? ዊንስ ላየ ሊሚድነ?» የው ኣደረ ትጐ እፃቑ።

²⁰እቅድም እየሱስትል ተርጝ፦ «ጣምቀተ ይዃንስ፦ ‹ተርጡ ይን ሊሚደነርድ ክትመ? ዊንስ ላየ ሊሚድነ?› የው ክጐ እፃቑ» ይጝ ድቍ።

²¹እየሱስም ኣይንድ ንቕፀቍ እቅ ጝታፅውዘይስመ ርኩሳን መንፈሳኒስ ቓዙ፤ ንቕፀቍ ኻርብድም ጝታእልጣንድ ብዙ።

²²እድ እፃሸቍድዛትም፦ «ፊትርን ቓልድርነዊዝመ ወሽርነዊስዝቅ ጣምቀተ ይዃንስስ ድቍጥን፤ ኻርብድ ቓልጘኵ፣ ኻካዛንድ ቓድጝ ጝታልኵዝ ፃጝጘኵ፣ ለምፃማንድ ቓድጘኵ፣ ዲቋራንድ ወሽጘኵ፣ ክረቍድም ጕጘኵ፣ ድኺዝም ወንጌል ሲቭክሸኵ።

²³ይት ተጠራጥርሻው እጅርድቅ ቀቫሸው ይጝ» ዩ።

²⁴ይዃንስቲስ እፃሸቍድ ፊርጘት ግረ እየሱስ ይኳንስት ማጥን ኽዝቪዝ እንት ያ ዊግትጠ ኪርሙ፦ «በራኸይል ፍርነውድ ውር ቓልትርነ የጝ? ፊግየ ዊዝውዘው ኣቲነድመ?

²⁵እደስለ ውር ቓልትርነ የጝ ፍርነውድ? ሸግጥ ኣልብ ሲረው እጅር ቓልትርነመ? ሸግጥ ኣልብ ሲረቍዝመ ሽልምልምሽጛⶔ ፅበቍዝ ንጕሳኒዝ ጝኒል እኵ።

²⁶ቈሽስ ውር ቓልትርነ ተትርኑ? ነቭይ ቓልትርነመ? የይ! ቓልትርነ ተትርነውድ ነቭዪስም ዲቈውድ የጝ።

²⁷‹እንወ ክበው በዊል ፃጛ ክጒደነድ ኣስለው ይእፃሸረድ በርስጭር› ይሽት ፃፍሸውድም ጝማጥን የጝ።

²⁸እቍኒስ እዅርሸቊስቅ ይዃንስት ዲቈውም እጀው፤ እደረት ምጝግስቲስ ግን እጝቂስቅ እጥንድ ጝጊስ ዲቍጡ የኵን» ዩ።

²⁹ቀረጥ ቀቨቍድ እኳ እዳቒጝቀ ወሸው ኽዝቭድቅ ይዃንስት ናኒዝ ጣምቅሽ እደረት ጒደነድ ጭቅየው ኣቐጘ ልብቱ።

³⁰ፈሪሳኒዝመ ወሪትት ኽግ ክንሰጢዝ ግን ይዃንስትዝ ጣምቅሻይነቅም ይጝ እደረት ምኽርድ ተቃውምሽ።

³¹እየሱስም እንት ዩ፦ «ነስየ እን ዚምኒዝ እቅድ ውርዝ ተክዝጭር? ወረጘስ ተክጘኵ?

³²ኣርይ ስፍረል ጐይጝ ጛስ ጛይ ጭጘጭጝሽጛ፦ ‹ኣቲነ ዋስኑን፤ ክትን ግን ዚቪርነቅም፤ ሊዝ ሊስኑን ክትን ግን ሊዚርነቅም› ይጛ ዋርደቍ እፈርድ ተክጘኵ።

³³ምላሰንድም ጣምቀተ ይዃንስ ኣረ ዂጝቀ ወይንዙ ሚዝም ዝዪጝቀ ተራን፦ ‹ጋኒንዝ ፃይሽኩ› ይርኑ።

³⁴እጅር ዅር ቈሽ ዃ ዝያ ተራን፦ ‹ዀይረ! ዝየተ ኽጥያትኝጥዝመ ቀረጥ ቀቨቍዝቅ ወደጅ› ይርኑ።

³⁵ዊገድ ግን ጥቨቭት እማንትነይድ እጝቅ ጝርቝሪዝ ኣመካይነትዝ ደደደድሹ።»

³⁶እንዝ ግረ ፈሪሳኒስ ላውድ እየሱስት ጝጝኒል ኣብኑወ ጭጙ፤ ጘጝም፦ «ቀሰው» የው ፊር ምዘት ዅጠ መዲል ጐዩ።

³⁷ኣይንድም ጘጝ ኻትመይል ፅብረይ ላይ ኽጥያትኘ እውነ እየሱስ ፈሪሳነውዝ ጝኒል ምዘት ዅጠ ጐየጘ ወሽራንድ፣ ሽቱ እቻቐው ኣልቫስጥረውስት ብልቃጥ ፃይር ተርች።

³⁸እየሱስት እግርገይልም ችብትር ሊዝራ ጝርእርዝ ጝልኵድ ናኽርድራ ጝርኣውር ፅቭቀይዝ ኻዝች፤ ጝልኵድየንትም እምቝራ ሽቱዊዝ እቓሰነው ኪርምች።

³⁹እየሱስት ጝጝኒል ጭጘው ፈሪሳነውድ ግን እኒንት ቓላንድ፦ «እን እጅርድ ነቭይ ኣቓንሰ እኝቸን ጝት ዳቕረይ እውነየን ኣው ኣረጘ፣ ቈሽም ኣወይረይ ኽጥያትኘ ኣረጘ ኣርቕጠቀ ዊኒየው» የው ጝእዘኒዝ ኻስቩ።

⁴⁰እየሱስም፦ «ስሙንወ! ያን ክጭስ ድቈው ዊገ እኩ» ዩ፤ ጘጝም፦ «ክንሰተወ ቀሰው ድቋ» ዩ።

⁴¹«ላው እዱሰተ እጅርዝ ሊጘ ቢን ጕይጥ እቅ ዊን፤ ላውድ ኣኰ ላ ቍርሻን ሊጘትረድ ቈሽ ኣኵርጝን ቍርሻን እዱርጝ ዊን።

⁴²እንዝ ግረ ጝታቪልቅ ኪፍለነው ብጛንስቅ እድ እዱሰው እጅርድ ጝታቢንድ ሳቝሩ፤ ነስየ እንዛይ ቢን ጕጢስ እድየን ጊንዝቪዝ ጕርየድየንት ጭቕጘ ፃቭ ቀንጡድ ኣውየን ተከኵ?» የው ዋቕሩ።

⁴³ስሙንም፦ «ንቕፀቍ ቢኒስ ሳቝርሸውድ የጝ ተከኵ» የው ዊሱ፤ እየሱስም፦ «እማን የጝ ይረውድ» ዩ።

⁴⁴እውነየንትጐም ዋጥር የው ስሙንት እንት ዩ፦ «እኝቸን እውነየንት ቓልደኵመ? ያን ክጝኒል ጥዉን፤ ክት ግን ይልኲዝ ኣቝ እኳ ነዪረርም፤ ጚ ግን ይልኵድ ጝርእርዝ ናኽርዳ ጝር ኣውር ፅቭቀይዝ ኻዝች።

⁴⁵ክት ይት እምቚረርም፤ ጚ ግን ያን ጥወት ኪርምር ነኳን ኣሽ ይልኵድ እምቘነውድ ቀቪረይም።

⁴⁶ክት ይኣውርድ ዘይትዝ ቓሲረርም፤ ጚ ግን ይልኵድ ሽቱዝ እቓስች።

⁴⁷ምላሰንድም ኽየው ጝርኽጥያትድ ይቅር ይሽታንስቅ ጚ ይት ጭቕጘ ቀንች፤ ዊቱ ኽጥያትድ ይቅር ይሽተው እጅር ግን ዊቱዝ የጝ ቀነውድ።»

⁴⁸እየሱስም እውነየንት፦ «ክኽጥያትድ ይቅርይሽትኩ» ዩ።

⁴⁹ጝጅቅ መዲል ጐይጝ ዊነቍድም፦ «እኒን እጅርድ ኽጥያት እኳ ይቅር የውድ ጘጝ ኣው ኣቕ የጝ?» ይጛ ጝታእዘኒዝ ኻስቨነው ኪርም።

⁵⁰እየሱስም እውነየንት፦ «ክእምንትድ ቓዝኩ፤ ዲግተዝ ፊጥ» ዩ።