Read xamtanga ሉቃስት ወንጌል 8 Bible Online

ሉቃስት ወንጌል 8 - xamtanga bible

ሉቃስት ወንጌል 8

¹እንዝ ግረም እየሱስ እደረት ምጝግስቲዙ ኣቭዝርተድ ኻትምጢዝመ ኪቋኒዝ ኣውጃ ጅልዉ፤ ፅጭ ሊጘ ኻወርየታንድም ጝጅቅ ላብጠ ዊን።

²ቈሽም እርኵሳን መንፈሳኒስመ ፅውዚስቅ ቓደቍ ላው ላው እቍን ጝት ቲክንጝ ዊን፤ እንዛይም ላጝጠ ጋኒናን ጝርጊስ ፈቍ መግደላዊት ይሽትረ ማርያም፣

³ንጕስ ኺረውድስት ጝኒዝ ኣዘተ ዊነው ኩዛት እውነ ይዃነ፣ ሰውስነስመ ላጥም ንቕፀቍዝ ዊን፤ እንዛይ እቍንድም እየሱስት ጝታጊንዝቪዝ ኣግልግልጛ ዊን።

⁴ንቕፀው ኽዝቭም ኻትምጢስቅ ተር ላው ኣቕ ኣኽቭሽ ፅባ እኒን ተክድ እንት ያ ዊግቱ፦

⁵«ላው ኣርሸ ጝዚረድ ፊዝጠ ፊሩ፤ ፊዛንድም ላው ላው ዚረድ ጒደን ደዪል ሊቩ፤ እግረም ልኵዝ ደሽሹ፤ ዚልቅም ሊቅም።

⁶ላው ላው ዚረድ ቈሽ ፃፀ ዝቨይል ሊቩ፤ ቢቍላንድ ግን ዝቨድ ቝጠ እጀው ኣቓንስቅ በውዝ ይዙ።

⁷ላው ላውድ ቈሽ ኣሚዝ ማኽሊል ሊቩ ኣሚድም ላብጠ ሊግዛንስቅ ኻንቕ እዳዙ።

⁸ላው ላው ዚረድ ቈሽ ቀሰው ዝቨይል ሊቭ ቢቍሉ፤ ቢቈለድም ሊግዝ ጭቕጘ ንቕፀው ፍር ፍርዙ።» እኒንት ዊግት በር ጝድመድ ኣጕስ ሸው፦ «ወሸው ቀርዝ ፃየውድቅ ወሽነ!» ዩ።

⁹ጝክንደጥድም፦ «እኒን ተከይዙ ትርጕምድ ወረጘ የጝ?» ይጝ ዋቕር።

¹⁰ጘጝም እንት ዩ፦ «ክታጭስ እደረት ምጝግስቲዙ ምስጢርድ ኣርቐነው ነይሽትኩ፤ ላጢዝ ግን ቓልጛ ልብ ያይጘጘ፣ ወሽጛም ኣስክሳይጘጘ ዊገድቅ ተከዝ ድቍሽተኵ።

¹¹ተከይዙ ትርጕምድ እንት የነት የጝ፤ ዚረድየን እደረት ቃልድ የጝ።

¹²ጒደን ደዪል ሊቨውድ እደረት ቃልድየንት ወሸቍ እቅ ጛይ፤ ዊገድ ግን ወሽጝ ቓዳይጘጘ ዳቪለውስ ተር ወሽጘው ቃልድ ጝታእዘኒስ ፊስ ፊሰኵ።

¹³ፃፀይል ሊቨውድ ቈሽ እደረት ቃልድየንት ዲስተዝ ወሽጝ ለምረቍ እቅ ጛይ፤ እንዛይ እቅድ እልትዝ ኣምንጘኵጚ ስር እጀቍ ኣጛንስቅ ፊተነ ተራንድ በውዝ ኻድየቍ ጛይ።

¹⁴ኣሚዝ ማኽሊል ሊቨውድም እደረት ቃልድ ወሸቍ እቅ ጛይ፤ እንዛይ እቅድ ጭጝ ግሪጛንድ እን ኣልምዙ ፅብጘድ ኻልየነውዝ፣ ፃጀዙ ምችጘዝመ እን ኣልሚዙ ዲስተዝ ኻንቕሽጝ ፍር እጀው እዳጘኵ።

¹⁵ቀሰው ዝቨይል ሊቨው ዚረድ ግን እደረት ቃልድ ቀሰው እዘንዝመ ገርኽትዝ ወሽጝ ፋፅመቍ እቅ ጛይ፤ እንዛይ እቅድ ቃሊዝ ፀናቕጝ ቀሰው ፍር ፍርዝጘኵ።»

¹⁶«መቭራት ኣቭርኽዝ ገን ኣቒል ዊንም ኣረት ሳይል እቝረው እጅርም እጀው፤ ጝኒል ጥወቍድቅ ቓልጥጘ ማጥን ንየስ ሸው መቅረዚል እቝረኵጚ።

¹⁷እኒዝጘም እትሊጝቀ ሲውርሽ እዳቐው፣ ኣረሲጝቀ ብርኻኒዝጐም ፊጝቀ ጭቭር እዳቐው ዊገም እጀው።

¹⁸ነስየ እደረት ቃልድ ኣወሽርን ወሽትርነጘድ ጣጝቅቅጭጥን፤ ፃየው እጅርዝ ቈሺተኵ፤ እጀው እጅሪስ ግን ጝፃየውድ እኳ ፊስሽተኵ።»

¹⁹እንዝ ግረ እየሱስት ኘስመ ጝፅንስ ጝጐ ተር፤ ኣነጚ ኽዝቭድ ጭቕጘ ንቕፀው ዊናንስቅ ጝት ችጘነ ብ።

²⁰ኣይንድም፦ «ክኘስመ ክፅንስ ክት ደምዝጛ ቢዘይል ችብርጝኵ» ይጝ ድቍ።

²¹እየሱስም፦ «ይኘስመ ይፅንስስ፣ እንዛይ እደረት ቃልድ ወሽጝ ፋፅመቍድ ጛይ» ዩ።

²²ላው ግርየ እየሱስ ጝክንደጢጅቅ ታኰይዝ ተሳፍርሽ፦ «እድጐ ባኽሪዝ እጂ ከርነ» ዩ፤ ጛይም ቀሰው ይጝ ፊርጥጘ ጕ።

²³ባኽርድ ቂዝፍጛ ፃጛ ሲጝቀም እየሱስ ዝመውር ኽርዩ፤ ኣይንድም ባኽሪል ማቨል ጉ፤ ኣቘድም ታኰይል ጥዋ እቻቑዝ ጭቕጘ ጨጝቅሽ።

²⁴እየሱስትጐም ኣልትጝ፦ «ኣደረወ! ኣደረወ! እፈ ኣቢትኑና!» ይጛ ጒስ፤ ጘጝም ጕ ፊግየይዝመ ማቨልዝ ጋስፁ፤ ፊግየይዝመ ማቨሊዝም ቀጥ ይ፤ ኣይንድም ኽየው ፀጥተ ኣቑ።

²⁵ጝክንደጥድዛትም፦ «ክታእምንትድ ኣውል እኩ» ዩ፤ ጛይም ጐውትዝመ ድንቅየዝ ስርሽጝ ጛስ ጛይ፦ «እኒን ፊግየዝመ ኣቘዝ ኣዘውድ ጛይም ኣዚትጘውድ እረ ጘጝ ኣው የጛ?» የነው ኪርም።

²⁶እንዝ ግረ ገሊለ ባኽሪዝ እጂል ፅበው ገርገሲነውን የነው ኻግሪል ታኰዝ ከር።

²⁷እየሱስም ታኰይስ ጊም ዝቨይል ከራንድ ጋኒናን ጭጘው ላው እጅር ኻትመይስ ፍ ጝጅቅ ዲምቅሹ፤ እን እጅርድ እክሰው ግርየዝ ኪርም ጝንል ጥዊጝቀ ኣልቨም ሲርጝቀ መጥማጥ መቃቭርል ፅበው ዊኑ።

²⁸እየሱስት ቓላንድም ጝበዊል ፍግም የው ሊቩ፤ ጭቕጘ ቓፃም፦ «ልውል እደረት ዅር እየሱስወ! ይጅቅ ውር ፃይረር? ኣለቀይ ይት ኣሰቃይዝተ?» ያ ጨዉ።

²⁹እን ርኲስ መንፈስድ እንት ያ ሊልፈውድ እን እጅሪስ ፍጠ ማጥን እየሱስ ኣዝ ዊናንስቅ የጝ፤ እርኵስ መንፈስድ ዊትርቅ ጓ ጕቝሳ ዊናንስቅ እን እጅርድ ሰንሰለትዝመ ልኰ ብረትዝ እፁሽ ሊሚድሻ ዊኑ፤ ኣቕሽም ሰንሰለትድ ቅዛ ልኰ ብረትድም ኪላ ዊኑ፤ ጋኒንድየንም ሸማ በራኸ ፊሳ ዊኑ።

³⁰እየሱስም፦ «ክሽድ ኣው የጝ?» የው ዋቕሩ፦ ጘጝም፦ «ይሽድ ለጊወን[3] የጝ» የው ዊሱ፤ እንት የው ዊሰውድም ንቕፀቍ ጋኒናን ሲፍርጝ ዊንጛንስቅ የጝ።

³¹ጋኒናንድም፦ «ኣለቀይ ይናት እንጠርጠውስ ጥውጥን ይር ኣዝተ» ይጝ ጨው።

³²ጘጝ ስፍረይዙ ኣበይዝ ሰውሪልም ንቕፀቍ ኣሰምጥ ውላቕጝ ዊን፤ ጋኒናንድም፦ «ኣለቀይ እዛይ ኣሰምጢል ጥውነ ማጥን ፊቅጅ» ይጝ ጨው፤ ጘጝም፦ «ጥውጥን» የው ፊቅዱ።

³³ጋኒናንድም እጅሪስ ፍጝ ኣሰምጢል ጥው፤ ኣሰምጥድም ውጢጛ ከዝጚዝ ቍልቍለ ባኽሪል ጥውጝ ስርሽ።

³⁴ኣሰምጢዝ ምቕድም እኒንት ቓልጛንድ ሰይ፤ ፊርጝም ኻትመይልም ገጠሪልም ጂጝዝ።

³⁵ኽዝቭድም ኣቐው ዊገድቅ ቓልጠ ጝፅበው ፅበዊስቅ ፍ እየሱስትጐ ተሩ፤ እድ ጋኒናንድ ፍጘው እጅርድም ኣልቨ ሲር ጝእዘኒል ዋጥር እየሱስት ልኲል ጐይ ቓልጛንድ ጐውት።

³⁶ጋኒናኒዝ ፃይሽ ዊነው እጅርድ ቓዳንድ ቓልጛ ዊነቍ እቅድም ኣወይ ቓደጘ ተረው ኽዝቪዝቅ ድቍ።

³⁷ገርገሲነውንት ኻግሪዙ ኽዝቭድም እጝቅቅ ጭቕጘ ጐውታንስቅ እየሱስት፦ «ኣለቀይ ይናኻግሪስ ፍር ፊጥ» የው ጨዉ። ጘጝም ታኰዝ ተሳፍርሽ ዋጥር ፊሩ።

³⁸ጋኒናን ፍጘው እጅርድም፦ «ኣለቀይ ክጅቅ ፅብጨ» የው እየሱስት ጨዉ።

³⁹እየሱስ ግን፦ «ኣየውም፤ ክጝን ፊትር እደረ ክጭስ ፃቨው ኽየው ዊገድቅ ድቍ» የው ሲነቭሱ፤ ጘጝም እየሱስ ጝጭስ ፃቨው ዊገድ ኻትመይዝቅ ድቋ ፊሩ።

⁴⁰ኽዝቭድም ጝት ሊሚዳ ዊናንስቅ እየሱስ ተራንድ ዲስተዝ ለምሩ።

⁴¹ኣይንድም እያይረውስ ይሽተው ላው ምኵራቭዝ ኻልቀ ተር እየሱስት ልኲል ሊቭ፦ «ኣለቀይ ለው ይጝን ጢ» የው ጨዉ።

⁴²ምላሰንድም ፅጭ ሊጘምትወ ጝቝረ እፈረ ፅዊትር ክርጘል ችጝር ዊንች። እየሱስም ቀሰው የው ጝጅቅ ፊራንድ ኽዝቭድ ትክቨትክቭሻ ጝት ጨጝቅዛ ዊኑ።

⁴³ፅጭ ሊጘ ምት ምሉም ብር ቅብርጛ ፅዊትር ፅብረይ ላይ እውነ ዊንች፤ ጚይም ጥልሽራ ጝርጊንዝቭድቅ ኣብዝች፤ ኣነጚ ጝርት ቓዘው ላውም ችጝሺየው።

⁴⁴እየሱስት እግርገይዝጐቱም ኣልትር ጝኣልቨይዝ ጫፍድ ዳቕች፤ ኣይንድም ቅብራ ዊነው ጝርብረድ በውዝ ችብሩ።

⁴⁵እየሱስም፦ «ኣው የጝ ይት ዳቐውድ?» ዩ፤ እጝቅቅም፦ «ይን ዳቒነቅም ይ» ቢጥሮስም፦ «ኣደረወ ኽዝድቭድቅ ክት ኪብ ጥቕዘጥቕዝሽታመ ይት ዳቐውድ ኣው የጝ ይራ» ዩ።

⁴⁶እየሱስ ግን፦ «ይጊስ ኻይል ፈጘ ኣርቕኩን፤ ኣቓንስቅም ላው እጅር ይት ዳቕኩ» ዩ።

⁴⁷እውነየንም ጭቭትረጘ እዳቐነ ብረጘ ኣርቕራንድ፣ ቀጥቀጥ ይራ እየሱስት በዊል ተትር ጝልኲል ሊቭች፤ ውር ማጥን ጝት ዳቕረጘ፣ ኣወይርም በውዝ ቓድረጘ፣ ኽዝቪዝቅ በዊል ዊግትች።

⁴⁸እየሱስም፦ «ይቝረወ! ክእምንትድ ቓዝኩ፤ ዲግተዝ ፊጥ» ዩ።

⁴⁹እየሱስም እኒንት ገነ ዊግታ ሲጝቀ ላው እጅር ምኵራቪዝ ኻልቀ እያይረውስት ጝኒስ ተር፦ «ክቝረ ክትርኩች፤ ነስየ ክንሰተድ ጊነ ዝላዝተ» ዩ።

⁵⁰እየሱስም እኒንት ወሻንድ እያይረውስት፦ «ኣይዝዀች ጐውተ! ኣምንጚ ክቝረስ ቓድቲ» ዩ።

⁵¹እያይረውስት ጝኒል ጥዋንድም ቢጥሮስት፣ ይዃንስት፣ ያይቈቭት፣ ቈሽም እፈረየንቲርስመ ጝርኘስ ጭቝጚ ላጥ እቅ ጝጅቅ ጥውጥጘ ፊቅዲየውም።

⁵²ጝግል ዊነው ኽዝቭድም ዋይ ዋይ ያ ሊዛ ዊኑ፤ እየሱስም፦ «ሊዝትርነ! እፈረየን ኽርይርኩችጚ ክሪረይም» ዩ።

⁵³ጛይ ግን ክትረጘ ኣርቕጛንስቅ ኣሹፍጛ እቘር።

⁵⁴እየሱስም እፈረየንት ናንድ ፃይ፦ «እፈረ ክተ ጕ» ዩ።

⁵⁵እፈረየንት ኒፍስሸንም ዋጥርች፤ በውዝም ጕር ችብርች፤ እየሱስም፦ «ፈርጥን ጝርዀነው ሚ ይውጥን» የው ኣዙ።

⁵⁶እፈረየንት ኣቅልድም ዲንቅሽ፤ እየሱስ ግን፦ «እኒን ዊገድ ላውዝቅ ድቍርነቅ» ዩ።