Read xamtanga ሉቃስት ወንጌል 9 Bible Online

ሉቃስት ወንጌል 9 - xamtanga bible

ሉቃስት ወንጌል 9

¹እየሱስም ፅጭ ሊጘ ኻወርየታንድ ሊንስ ጝጐ ጭጝ ጋኒናንድቅ ፊስጥጘ ማጥን፣ ፅውዝጅንጥድቅም ጝታፅውዘይስ ቓዝጥጘ ማጥን ኻይልዝመ ስልጣንዝ ይዉ።

²ቈሽም እደረት ምጝግስትት ሲቭክጥጘ ማጥን፣ ፅውዝጅንጥድም ቓዝጥጘ ማጥን እፃቑ።

³እንት የውም ድቁ፦ «ግብም፣ ኸረጢትም፣ ሊቈውም፣ ቍርሻንም፣ ቂይረነው ኣልቨም፣ ክታጕደነይዝ ውረውረቅ ፃይትርነ።

⁴ጥውርነይ ኻትመየት ሊቅርን ፍትርኒስቅ ኣፍለ ጥውርነው ጝኒል ጐይጥን።

⁵ጚ ኻትመየት እቅድ ክታት ለምጠቅ ይጝሽ ግን ጛጭስ ሚዝር ኣጠ ማጥን ክታልኲይዙ ኣወረድ ኣርግፍርን ጚ ኻትመየት ሊቅርን ፊጥን» ዩ።

⁶ኻወርየታንድም ጝጊስ ፍጝ ወንጌልድ ሲቭክጛ ፅውዝጅንጥድቅም ቓዝጛ ኪቋኒልቅ ጅልው።

⁷ገሊለት ቅማ ዊነው ኺረውድስ ግን እን ኣቐው ዊገድቅ ወሻንድ ጨጝቅሹ፤ ምላሰንድ ላው ላው እቅ፦ «ጣምቀተ ይዃንስ ክርጘይስ ጕኩ» ይጛ ጂጝዝጛ ዊን።

⁸ላጥድ ቈሽ፦ «ነቭይ ይልያስ ዋጥር ተርኩ» ይጛንድ፣ ግቨርድ ቈሽ፦ «ኽፅምትቍ ነቭያታኒስ ላውድ ክርጘይስ ጕኩ» ይጛ ዊን።

⁹ኺረውድስም፦ «ይዃንስትስ ያን ይቕም ጝቕልመድ ቀቭ ቁ ዊኑን፤ እደስለ እንቝጠ ጂጘ ጂጝዝጘው እን እጅርድ ኣው የጝ» ዩ፤ ጝትም ጝእልጣኒዝ ቓልጠ በና ዊኑ።

¹⁰ኻወርየታንድም እፃሽጘዊስ ዋጥርጝ ተርጝ ጛይ ፃቭጘውድቅ እየሱስስ ድቍ፤ ጘጝም በተሰይደ ኻትመይዝ ጋቢዙ በራኸይል ጝታለ ፃይ ፊሩ።

¹¹ኽዝቭድም እየሱስ ፊረው ስፍረድ ኣርቓንስቅ ቲክን ፊሩ፤ ጘጝም ለምር እደረት ምጝግስትት ማጥን ድቋ ዊኑ፤ ፅዊተቍድዛትቅም ጝታፅውዘይስ ቓዙ።

¹²ግርየድ ኵንጠ ጓንድም ፅጭ ሊጘ ኻወርየታንድዛይ ጝጐ ኣልትጝ፦ «ይን ፅብነው ስፍረድ በራኸ የጝ፤ ኽዝቭድ ጅልወይል ፅበቍ ኻትምጢልም ኣነ ገጠሪልቅ ፊር ጝዀነውዝመ ጨነው ኽርተዝ ደምዝጠ ማጥን ሲነቭሽ» ይ።

¹³እየሱስ ግን፦ «ክትን ጝታዀነው ይውጥን» ዩ፤ ጛይም፦ «ይናናኒል ፅበቍድ ኣኰ ምጭዝመ ሊጘ ኻዝዝ ጭቝ ጛይ፤ ፊርን ጅቪነውዝየ እንቝጠ ኽዝቪዝቅ ኣቓቍም» ይ።

¹⁴ኽዝቭድም ኣኰ ሽኽ ኣጠ ዊኑ፤ እየሱስም ጝክንደጢዝ፦ «ኣኵርጝን ኣኵርጝንድ ሚድቭርና ጐይስጥን» ዩ።

¹⁵ጛይም ኣዚትጘጘ ፃቭጝ ኽዝቭድ ጐይስ።

¹⁶እየሱስም ኣኰ ሚጪዝመ ሊጘ ኻዚዝ ፃይ ንየ ጭቅ የው ሲመይ ሲመይ ቓላ እደረት ሚዝየንዙ፤ ኪልም ኽዝቪዝ ኣድልጥጘ ማጥን ጝክንደጢዝ ይዉ።

¹⁷ኽዝቭድም እጝቅቅ ዅ እቭቱ፤ ኻወርየታንድም ኽዝቭድ ዅ ቲርፍዘውድየንት ፅጭ ሊጘ ሚስቫን እቻዝጝ ጕይ።

¹⁸ላው ግርየ እየሱስ ጝለ ፃልያ ዊኑ፤ ጝክንደጥድም ጝጋቢል ዊንጛንስቅ፦ «እቅ ይት ኣው ይጘኵ» የው ዋቕሩ።

¹⁹ጛይም፦ «ግቨርድ ጣምቀተ ይዃንስ፣ ግቨርድ ይልያስ፣ ግቨርድ ቈሽ ኽፅምትቍ ነቭያታኒስ ላውድ ክርጘይስ ጕኩ ይጘኳ» ይጝ ዊስ።

²⁰ጘጝም፦ «ክትንሰ ይት ኣው ይርና» ዩ፤ ቢጥሮስም፦ «ክት እደረቲስ እፃሽረር ክርስቶስ የጝ» የው ዊሱ።

²¹እየሱስም፦ «እን ዊገድ ኣውማውስቅ ድቍርነቅ» የው ጣጝቅቅሱ።

²²ቈሽም፦ «እጅር ዅር ኽየው ሚከረ ለምርጠ ጥውሸኵ፤ ሽመቅሊዝመ ካኽነጣነ ኻልቅጢዝ፣ ወሪትት ኽግ ክንሰጢዝም ነቅሽትጡ፣ ጝዝ ግረም ቍዉሽትጡ፣ ኣነጚ ሸወትረ ግርየይዝ ክርጘይስ ጕጡ» ዩ።

²³እንዝ ግረም እጝቅዝቅ እንት ዩ፦ «ይእግርገይል ቲክንጠ በነው እጅር ፅብሽ ጝቕምት ኻዲነ! ግሪ ጨቨቅም ጝሚስቅልድ መውር ይት ቲክነ!

²⁴ጝኒቭስሸንት ቓዝጠ በነውድቅ ድስጡ፤ ይማጥን ጝኒቭስየንት ድሰውድ ግን ቓዝጡ።

²⁵እጅር ኣልሚዙ ኻፍትድቅ ችጛን ጝኒቭስየንት ድሰውዝየ ዊንም ጒድልዘውዝየ ውር ጣቅምሽጡ?

²⁶ኣውማው እጅር ይቍዝመ ይቃሊዝ ኣይቭትሽ እጅር ዅር ቈሽ ጝክቭሪዝ፣ ጚርት ክቭሪዝመ ጝቅዱሳን መላእክታኒዙ ክቭሪዝ ተራንድ ጝቍዝ ኣይቭትጡ።

²⁷እማንዝ የኵን፤ ነን እንል ችብረቊስ እደረት ምጝግስትየን ተትራንድ ቓሊጝቀ ክራቍ ላው ላው እቅ እኵ።»

²⁸እየሱስ እንየት ዊግተት ሰውጠ ግርቅ ኣጛንድ ቢጥሮስት፣ ይዃንስት፣ ያይቈቭት፣ ቲክንዝ ፃልይጠ ላው ኣበል ፉ።

²⁹ፃልያ ሲጝቀም ጝጋፂዙ ሚልክድ ላውጥሹ፤ ጝኣልቨድም ፃር ብርቕርቕ የው ኣቑ።

³⁰ድጝግትም ሊጘ እቅ ተርጝ ጝጅቅ ዊግትጛ ዊን፤ እን እቅድም ሙሴስመ ይልያስስ ጛይ።

³¹ጛይም ኽየው ክቭርዝ እትልጝ እየሱስ እየሩሳልየምስ ለምረው ጝሚከረይዝመ ጝክርጘይዝቍዝ ዊግትጛ ዊን።

³²ኣይንድም ቢጥሮስመ ጝጅቅ ዊነቊዝ ዝመውዝ ፅጐውሽጝ ዊን፤ ጝታዝመዊስ ነቃጛንድ ግን እየሱስት ክቭሪዝመ ጝጅቅ ዊነቍ ሊጘ እቂዝ ቓል።

³³እዛይ ሊጘ እቅድም እየሱስቲስ ቲትጝ ፊርጥጘ ጕጛንድ ቢጥሮስ እየሱስት፦ «ኣደረወ! ይን እንል ጐይናን ይናጭስ ቀሰው የጝ፤ ኣቓንስቅም እንል ሻቘ ደፅ ተስነ፤ ላውድ ክጭስ፣ ላውድ ሙሴስ፣ ላውድ ቈሽ ይልያስስ ኣጥቍ» ዩ፤ ዊግተው ዊገድየንትም ኣርቓውም ዊኑ።

³⁴ቢጥሮስም እኒንት ዊግታ ሲጝቀ ድምነ ተር ጛት ገርዱ፤ ድምነይዝ ኣቒል ጥውጛንድም ጐውት።

³⁵ድምነይስም፦ «ያን ማርፀው ይዅርድ እኒን ይጝ፤ ጝት ወጭጥን» የው ድመ ተሩ።

³⁶ድመድ ወሽተት ግረ እየሱስ ጝለ ኣቕ ችጝሹ፤ ጝክንደጥድም እን ዊገድ ኣይንት ኰሪዝ ላውዝቅ ድቍጝቀ ጝታእዘኒዝ ፃይጝ ዝም ይ።

³⁷ጝኣምርሲዝም እየሱስስመ ሻቘ ክንደጢዝ ኣበይስ ጊምጛንድ፣ ንቕፀው ኽዝቭ ተር ዲምቅሹ።

³⁸ኽዝቪዝ ማኽሊስም ላው እጅር ጝድመድ ኣጕስ ሸው እንት ዩ፦ «ክንሰተወ! ይፃቀው ይዅርድ ላው ጘጝ ጭቝ የጝ፤ ኣለቀይ ቓዝተ ማጥን ጨወኵን።

³⁹ጝት ጋኒን ፃይ ጕቝሰኵ፤ ዝቨይልም ማል ገፍረድ ገፍርዛ ፍርግሰኵ፤ ጝሰውነትድቅ ልኻንዘት ግረ ዋቐ ሚከረዝ ሊቅ ፊረኵ።

⁴⁰ክክንደጥድዛትም፦ ‹ኣለቀይጥን ፊስጥን› የር ጨው ዊኑን፤ ጛይ ግን ቸለነ ብ» ዩ።

⁴¹እየሱስም፦ «እፈ እምንት እጅርነቅ ጠማማን ዅል ክታትርነ! ኣውን ኣሽ ክታጅቅ ፅብጭር? ኣውን ኣሽስ ክታት ቸልጭር? እስቲ ክዅርት እንጐ ነሽ» ዩ።

⁴²እፈረድም እየሱስትጐ ኣልታንድ ጋኒንድየን ዝቨይል ማል ፍርግሱ፤ እየሱስ ግን እርኵስ መንፈስድየንት ጋስፁ፤ እፈረድየንትም ቓዝ ጚርስ ይዉ።

⁴³ኽዝቭድቅም እደረት ኻይሊዙ ኽይትድ ቓል ጊርምሹ። እጝቅቅም እየሱስ ሰራሸው ሰቪዝቍዝ ጊርምሽጛ ሲጝቀ እየሱስ ጝክንደጢዝ፦

⁴⁴«እኒን ነን ያን ድቈው ዊገድ ወሽርን ክታእዘኒዝ ፃይጥን፤ እጅር ዅር እቀ ናንል ዲቍሽት ይውሽትጡ» ዩ።

⁴⁵ጛይ ግን እን ዊገድ ኣስክሲየቍም፤ ኣስክሳይጘጘ ጝታእዘኒስ ሲውርሽ ዊኑ፤ ዋቕራይጘጘ ቈሽ ጐውት።

⁴⁶እንዝ ግረ ጝክንደጥድ ጛስ ጛይ፦ «ይናማኽሊስ ኣው የጝ ንየቱ ኣቐውድ» የነው ክርክር ጕይጝ ዊን።

⁴⁷እየሱስ ግን ጝታእዘኒዙ ኻሰቭድ ኣርቓንስቅ ላው ኽፃን ጝጐ ነስ ጝጋቢል ችብስ እንት ዩ፦

⁴⁸«እኒን ኽፃንድየንት ይሽዝ ለምረው ኣውማው እጅር ፅብሽ ይት ለምሩ የነት የጝ፤ ይት ለምረውድ ቈሽ ይት እፃቐውድየንት ለምሩ የነት የጝ፤ ክታማኽሊስ ክታእጝቂስቅ እጥን ኣቐውድ ክታእጝቂስቅ ኽየው ኣጡ» ዩ።

⁴⁹ይዃንስም፦ «ኣደረወ! ላው እጅር ክሽዝ ጋኒናን ፊሳንድ ቓልኑን፤ ዊገድ ግን ጘጝ እጅርድ ይናጅቅ ቲክናው ኣቓንስቅ ኪልክልኑን» ዩ።

⁵⁰እየሱስም፦ «ክታት ተቃውምሻውድቅ ክታጅቅ የጝ፤ ኪልክልትርነ» ዩ።

⁵¹እየሱስም ጝሲመይ ፈነው ግርየድ ችጝጠ ጓንድ እየሩሳልየም ፍጠ ቋርጥ ጉ።

⁵²በውግስም ጝበዊል ፊረቍ እቅ እፃቑ፤ ጛይም እጝቅትቅ ኣስልጝ ዊንጥጘ ሰማርየት ኻግሪዝወ ላይ ኪውትል ጥው።

⁵³ጚ ኪውሸንትቍ እቅድ ግን ጝታግዝ ፃቭ እየሩሳልየም ፊርጠ በነጘ ኣርቕጛንስቅ ለምሪየቍም።

⁵⁴ጝክንደጥ ያይቈቭስመ ይዃንስም እኒንት ቓልጛንድ፦ «ክንሰተወ! ይልያስ ፃቨጘ ሲመይስ ልየ ሊቭ እን እቅድ ኣብዝጠ ማጥን ኣዝነ ፊቅድትርመ?» ይ።

⁵⁵እየሱስ ግን ጝታጐ ብሩ የው፦ «ክትን ኣወየው መንፈሲስ ኣቕርነጘ ኣርቓይርነቅም፤ እጅር ዅር ተረውድ እቀ ርዅየ ቓዝጠጚ ድስጠም ኣየው» የው ጋስፁ።

⁵⁶ጝጊስም ጕጝ ላየ ኪውል ፊር።

⁵⁷ጒደነይዝም ፃጛ ሲጝቀ ላው እጅር ተር፦ «ኣደረወ! ክት ፊትረዊልቅ ቲክንጨ በነኵን» ዩ።

⁵⁸እየሱስም፦ «ቘፅልድ ጝታቢ ፃየቍ ጛይ፤ ዚልቅድም ጝታጕጂ ፃየቍ ጛይ፤ እጅር ዅር ግን ጝቕልመድ ድወነ እኳ እጀውም» ዩ።

⁵⁹ላየ እጅርድየንት ግን፦ «ለው ቲክን» ዩ፤ ጘጝ ግን፦ «ኣደረወ! ኣለቀይ በዊል ፊጥ ይርት ዲቭ ተጨር ፊቅጅ» ዩ።

⁶⁰እየሱስም፦ «ጝታክረቍድ ዲቭጥጘ ማጥን ክረቍድዛት በጭ፤ ክት ግን እደረት ምጝግስትት ማጥን ሲቭክ» ዩ።

⁶¹ላው ላየ እጅር ቈሽ፦ «ኣደረወ! ያን ክት ቲክንጨ በነኵን፤ ዊገድ ግን በዊል ፊጥ ይበተሰቭድ ሲነቭጭ ተጨር ፊቅጅ» ዩ።

⁶²እየሱስ ግን፦ «እርቭነድ ጝናኒዝ ጫብጥ እግርገ እግርገ ቓለው እጅር እደረት ምጝግስትስ ጥውሻውም» ዩ።