Read xamtanga ይዃንስት ወንጌል 1 Bible Online

ይዃንስት ወንጌል 1 - xamtanga bible

ይዃንስት ወንጌል 1

¹1 ቃልድ በውገ ዊኑ፤ ቃልድም እደረ ጅቅ ዊኑ፤ ቃልድም እደረ ዊኑ።

²ጘጝም በውገ እደረ ጅቅ ዊኑ።

³እጝቅ ዊገድቅ ጝዝ ፋጥርሹ፤ ፋጥርሸው ዊገይስቅ ጝዝ ኣዪጝቀ ፋጥርሸው ውረውረም እጀው።

⁴ጘጝ ርዅየዙ ችጝሸነ ዊኑ፤ እኒን ርዅየድም እቅዝቅ ኣቐው ብርኻን ዊኑ።

⁵ብርኻንም ጥመይዝ ኣቭርኸኵ፤ ጥመድም ጝት ኻቒየውም።

⁶እደረቲስ እፃሸው ጝሽድ ይዃንስ የነው ላው እጅር ዊኑ።

⁷ጘጝም ጝሚዝርነይዝ እጅር እጝቅ ኣምናንስ ማጥን በርኻኒዝቍዝ ሚዝር ኣጠ ተሩ።

⁸ብርኻኒዝቍዝ ሚዝር ኣጠ ተሩጚ ጘጝ ጝቕም ብርኻንም ዊኒየው።

⁹እጝቅ እጅርዝቅ ኣቭኽርኸው እማንተው ብርኻንምድ ኣልሚል ተራ ዊኑ።

¹⁰ጘጝም ኣልሚል ዊኑ፤ ኣልምድም ፋጥርሸውድ ጝዝ ኣቓንም እኳ ኣልምድ ግን ጝት ኣርቒየውም።

¹¹ጝቕምትቍ ዊግኒዝጐ ተሩ፤ በገዘ ጝዊግንድ ግን ለምሪየቍም።

¹²ጝት ለምረቊዝ ጝሽዝም ኣምነቍዝቅ ግን እደረት ቝር ኣጛንስ ማጥን ስልጣን ይዉ።

¹³ጛይም እደረቲስ እዅርሽጚ እቀ ዚረይስ፣ ዊንም ስየዙ ፍቃዲስ፣ ዊንም ግልው በኒዝም እዅርሺየቍ።

¹⁴ቃልድም እጅር ኣቑ፤ ፃገዝመ እማንዝም እቻቕ ይናግል ጩ፤ ጚርስ ላው ጭቝ ኣቐው ዅር፣ ጚርቲስ ፃየው ክቭሪዝጘ ኣቐው ጝክቭርድየንት ቓልኑን።

¹⁵ይዃንስም፦ « ‹ይግረይል ተረውድየን ይበውገ ዊነው ኣቓንስቅ ይጊስ ዲቈኵ› የር ክታጭስ ድቈውድ እኒን የጝ» የው ቓፃ ጝማጥን ሚዝርዱ።

¹⁶ጝፃገይዙ እቻቕኒስ ይን እጝቅቅ ፃገዝ ዲጊል ፃገ ለምርንኵኑን።

¹⁷ኽግ ሙሴትጐትውዝ ነይሽቱ፤ ፃገዝመ እማንዝ ግን እየሱስ ክርስቶስትጐትውዝ ተሩ።

¹⁸መቸም እደረት ቓለው ላው እጅር እኳም እጀው፤ ዊገድ ግን ጚር ጅቅ ፅበው ላው ጭቝ ኣቐው ጝዅርድ ኣርቕሱ።

¹⁹ኣይዅዳንድ፦ «ክት ኣው የጝ?» ይጝ ጝት ዋቕርጛንስ ማጥን ካኽነጣኒዝመ ለዊዋኒዝ እየሩሳልየምስ ጝጐ እፃጛንድ ይዃንስ፦ «ያን ክርስቶስም ኣይቀር» የው ጋልፅ ሚዝርዱጚ ሚዝርደነዊስ እግርገም ዪየው።

²⁰

²¹ጛይም፦ «እደስለ ክት ኣው የጝ? ይልያስመ?» ይጝ ዋቕር። ጘጝም፦ «ኣይቀርም» ዩ። ጛይም፦ «እደስለ ተርጡ ይሽተው ነቭይድመ?» ይ፤ ጘጝም፦ «ኣይቀርም» የው ዊሱ።

²²ኻትሸነይዝም፦ «እደስለ ክት ኣው የጝ? ይናት እፃቐቊዝ ዊሰ ይውናንስ ማጥን ክቕምትቍዝ ወረጘ ይራ?» ይ።

²³ጘጝም፦ «ነቭይ ይሳያስ ዊግተጘ ያን፦ ‹ኣደረት ጒደነድ ጭቅ ሽጥን› ያ በራኸይስ ቓፀው እጅርዙ ድመ የጝ» ዩ።

²⁴እፃሸቍ ፈሪሳኒስም ላው ላውድ፦

²⁵«እደስለ ክት ክርስቶስ ኣይረውዝየ፣ ዊንም ይልያስ ኣይረውዝየ፣ ዊንም ተርጡ ይሽተው ነቭይድ ኣይረውዝየ ውር ቃጥ የጝ ጣምቅረውድ?» ይጝ ዋቕር።

²⁶ይዃንስም፦ «ያን ጣምቀውድ ኣቝዝ የጝ፤ ዊገድ ግን ክትን ኣርቓይርነው ክታማኽሊል ችብርኩ።

²⁷ጘጝ ይግረይል ተርጡ፤ ያን ጝፃቢዙ ፃልየድ እኳ እክሰነውዝ ጥውጨርም ኣይቀር» ዩ።

²⁸እን ዊገድቅ ኣቐውድ ይዃንስ ጣምቃ ዊነው ዮርዳኖስት እጂ ቢታንየስ በተራቨስ የጝ።

²⁹ይዃንስም ጛምርሲዝ እየሱስት ጝጐ ተራንድ ቓል፦ «እንወ ኣልሚዙ ኽጥያትድ እክልሰው እደረት ቢገድ!

³⁰« ‹ይእግረይል ተረውድ ይበውገ ዊነው ኣቓንስቅ ይጊስ ዲቈኵ› የር ክታጭስ ድቈውድ እኒን የጝ።

³¹ያን ይቕምም ጝት ኣርቐቅም ዊኑን፤ ኣቝዝ ጣምቃ ተጠውድም ጘጝ እስራየልት ኽዝቪዝ ጋልፅሽታንስ ማጥን የጝ» ዩ።

³²እንዝ ግረም ይዃንስ እነያ ሚዝርዱ፦ «መንፈስ ቅዱስ እርግቭት ተክ ሲመይስ ጊም ጝዲጊል ጐያንድ ቓሉን።

³³ያን ይቕምም ጝት ኣርቐቅም ዊኑን፤ ዊገድ ግን ኣቚዝ ጣምቃንስ ማጥን ይት እፃቐውድየን፦ ‹መንፈስ ቅዱስ ጊም ጝዲጊል ጐያንድ ቓልደው እጅርድ፣ ጘጝ የጝ መንፈስ ቅዱስዝ ጣምቀውድ› የው ይጭስ ድቁ።

³⁴ያንም እኒንት ቓልኩን፤ ኣቓንስቅም ጘጝ እደረት ዅር ኣቐጘ ሚዝርጠኵን» ዩ።

³⁵ጛምርሲዝም ይዃንስ ጝሊጘ ክንደጢጅቅ እንደ ገነ ጝግል ችብር ዊኑ።

³⁶እየሱስም ጝግዝ ፃቭ ዲቋንድ ቓል፦ «እንወ እደረት ቢገድ!» ዩ።

³⁷ሊጘ ክንደጥድም ይዃንስ እኒንት ዊግታንድ ወሽጝ እየሱስት ቲክን።

³⁸እየሱስም ብሩ የው ጝት ቲክንጛንድ ቓል፦ «ወረጘ በንርኑ?» የው ዋቕሩ። ጛይም፦ «ረቢ[1] ፅብረውድ ኣውል የጝ?» ይጝ ዋቕር።

³⁹ጘጝም፦ «ላቝጥን ቓልጥን» ዩ። እንዝ ማጥን ፊርጝ ጘጝ ፅበውድየንት ቓል፤ ጘጝ ግርየድየንትም ጝጅቅ ግርይ፤ ሰትድም ፅቃ ሰት ኣጠ ኣቕ ዊኑ።

⁴⁰ይዃንስ ዊግተው ቃልድየንት ወሽጝ እየሱስት ቲክነቊስ ላውድ ስሙን ቢጥሮስትዝን እንድርያስ ዊኑ።

⁴¹እንድርያስም በውገ ጝዝን ስሙንትል ፊር፦ «መሲኽድ ችጝንኵኑን» ዩ። «መሲኽ» የነውድ፦ «ክርስቶስ» የነት የጝ።

⁴²እንዝ ግረ እንድርያስ ስሙንት እየሱስ ትጐ ነሱ፤ እየሱስም ስሙንት ትኵር ሸው ቓል፦ «ክት የውነት ዅር ስሙን የጝ፤ ነስየ፦ «ከይፈ» ይሽትር ጭጝሽትር» ዩ፤ ከይፈ የነውድ፦ «ቢጥሮስ»[2] የነት የጝ።

⁴³እየሱስም ጛምርሲዝ ገሊለ ትጐ ፊርጠ በኑ፤ ፊልበውስትም ችጝ፦ «ለው ይት ቲክን!» ዩ።

⁴⁴ፊልበውስም እንድርያስስመ ቢጥሮስስታጘ በተሰይደ ኻትመይዙ ዊኑ።

⁴⁵ፊልበውስም ናትናየልት ችጝ፦ «ሙሴ ኽግዙ መፃፍዝ፣ ነቭያታንድም ጝማጥን ፃፍጘው ዮሴፍት ዅር ናዝሪትቱ እየሱስት ችጝንኵኑን» ዩ።

⁴⁶ናትናየልም፦ «ናዝሪትስ ቀሰው ዊገ ፍጠ ቸልጡመ?» ዩ፤ ፊልበውስም፦ «ለው ተትር ቓል» ዩ።

⁴⁷እየሱስም ናትናየልት ጝጐ ተራንድ ቓል፦ «እንወ ተኰል እጀው እማንተው እስራየላነ እጅር» ዩ።

⁴⁸ናትናየልም፦ «ይት ኣወሽር ኣርቕሩ?» ዩ። እየሱስም፦ «ፊልበውስ ገነ ጭጚጝቀ በለስ ዘፊዙ ጅጢል ፅብራ ቓሉን» ዩ።

⁴⁹ናትናየልም፦ «ክንሰተወ! ክት እደረት ዅር የጝ! ክት እስራየልት ንጕስ የጝ!» ዩ።

⁵⁰እየሱስም፦ «ኣምንደውድ፦ ‹በለስ ዘፊዙ ጂጢስ ቓሉን› ዩዝመ? ገነ እኒስ ዲቈው ዊገ ቓልትር» ዩ።

⁵¹ጛጭስም ዊስ፦ «እማን እማን የኵን! ሲመይ ቢት፣ እደረት መላካንድም እጅር ዅርትል ጊምጛን ፍጛንድ ቓልትርንቅ» ዩ።