Read xamtanga ይዃንስት ወንጌል 10 Bible Online

ይዃንስት ወንጌል 10 - xamtanga bible

ይዃንስት ወንጌል 10

¹እየሱስም ቈሽ፦ «እማን እማን የኵን! ቢቂዝ መድሪል ሚረይዝ ኣዪጝቀ ላየዝ ጥወውድቅ ቓፅጘ፣ ወምበዲም የጝ።

²ሚረይዝ ጥወውድ ግን ቢቂዝ ምቓ የጝ።

³ጝጭስ ሚረይዙ ሊሚደተድ ብዘኵ፤ ቢቅድም ጝድምሽፅድ ወሽጘኵ፤ ጘጝም ጝቢቅድ ጝታይተሽዝ ጭጘኵ፤ ቃዋም ቢዘይል ፊሰኵ።

⁴ጝቕምት ቢቅድ ፊስ በር ጝታበው በዊል ፊረኵ፤ ጝቢቅድም ጝድመድ ኣርቐቍ ኣጛንስቅ ጝት ቲክንጘኵ።

⁵ላየይዙ ድመድ ግን ኣርቓቍ ኣጛንስቅ ሰይጘኵጚ ጝት ቲክናቍም።»

⁶እየሱስም እኒን ተከድ ድቁ፤ ጛይ ግን ጘጝ ዊግተውድየንት ኣስክሲየቍም።

⁷እንዝ ማጥን እየሱስ እንደ ገነ፦ «እማን እማን የኵን፤ ቢቂዙ ሚረድ ያን የጝ።

⁸ይበውገ ተረቍድቅ ቓፅጝ ወምበዲጥም ጛይ፤ ቢቅድ ግን ጛት ወሺየቍም።

⁹ሚረድ ያን የጝ፤ ይጐቱ ፃቭ ጥወውድቅ ቓድጡ፤ ጥውጡ፤ ፍጡ፤ ውላቐነ ስፍረም ችጝጡ።

¹⁰ቓፅጘድ ተረውድ ስጠ፣ ዝውጠ፣ ድስጠም ጭቝ የጝ፤ ያን ግን ተጠውድ ጛጭስ ርዅየ ኣቓንስ፣ ቲርፍርፈው ርዅየም ችጛንስ ማጥን የጝ።

¹¹«ቀሰው ምቓድ ያን የጝ፤ ቀሰው ምቓ ጝርዅየድ ጝቢቂዝ ቺ ዲቍስ ይወኵ።

¹²ቢቅድ ጝቍ ኣየቍ ቅፅሩ ምቓድ ግን ተኵለ ተራንድ ቓላንድ ቢቅድ ማል ሰየኵ፤ ተኵለድም ቢቅድ ናጥቀኵ፤ ቢትነኵም።

¹³ማል ሰየውድም ቢቅድ ጝቍ ኣየቍ ኣጛንስቅ ግድ እጀው ኣቓንስቅ የጝ።

¹⁴ቀሰው ምቓድ ያን የጝ፤ ኣይር ይት ኣርቓንትጘ ያንም ኣይርት ኣርቓንትጘ ይቕምት ቢቅድዛት ኣርቐኵን፤ ይቢቅድም ይት ኣርቕጘኵ፤ ይርዅየሸንትም ይቢቂዝ ቺ ዲቍስ ይወኵን።

¹⁶እኒን መድሪስ ኣየቍ ላጥ ቢቅም እኵ፤ ጛትም ነስጨ ጥውሸኵ፤ ጛይም ይድመድ ወሽጥቍ፤ ላው መጝገም ኣጥቍ፤ ምቓድም ላው ኣጡ።

¹⁷እንዝ ማጥን ይር ይት ቀነኵ፤ ምላሰንድም ይኒቭስሸንት ዲቍስ ይወኵን፤ ዲቍስ ይወት ግረ ቈሽ ዊስ ጒጭር።

¹⁸ይርዅየሸንት ይቕም ይፍቃድዝ ዲቍስ ይዊቀውዝየ ጝርት ይጊስ ፊሰው ኣውማውም እጀው፤ ይርዅየሸንት ዲቍስን ይወነውዝመ ዊስን ጕየነውዝዙ ስልጣን ፃቀር የጝ፤ እኒን ትዛዝድየንት ይርቲስ ለምጥኩን።»

¹⁹እኒን ዊገይዝቍዝም ኣይዅዳንድ እንደ ገነ ጛስ ጛይ ቲተቲት።

²⁰ጛጊስም እክሰቍ እቅድ፦ «ጋኒንዝ ፃይሸው ጕቑረ የጝ፤ ውር ፃቭትርነ ጝት ወሽርና?» ይ።

²¹ላጥድ ግን፦ «እኒን ጋኒንዝ ፃይሸው እጅርዙ ዊገም ኣየው፤ ጋኒንመ ኻርቨዙ እልጣን ብዘነው ቸለወ?» ይ።

²²እየሩሳልየምስም መቅደስ ጝኒዝ ታድስሸነይዙ በልድ ኪብርሸው ግርየድ ችጙ፤ ወቅትድም ጫረ ዊኑ።

²³እየሱስም መቅደስ ጝኒል ሰለሙንት ዋጥርጥረነ ጒደነይዝ ዋጥርጥራ ዊኑ።

²⁴ኣይዅዳንድም እየሱስት ኪብጝ፦ «ኣውን ኣሽ የጝ ይናእዘንድ ሲቅልድር ፅብረውድ? ክት ክርስቶስ ኣርሽ ጋልፅር ድቍ» ይ።

²⁵ጘጝም፦ «ያንሰ ድቍ ኣቈ ዊኑን! ክትን ግን ኣምናይርነቅም፤ ይርት ሽዝ ሰራጨው እኒን ታምርዙ ምልክትድ ይጭስ ሚዝርደኵ።

²⁶ክትን ግን ይቢቂስ ኣይርነቅ ኣቕርናንስቅ ይት ኣምናይርነቅም።

²⁷ይቢቅድ ይድመድ ወሽጘኵ፤ ያንም ጛት ኣርቐኵን፤ ጛይም ይት ቲክንጘኵ።

²⁸ያን ጛጭስ ዘላልምዙ ርዅየ ይውጭር፤ እንዝ ማጥን ስሪስቅ ድዛቍም፤ ጛት ይናኒስ ናጥቅ ፊሰው ኣውማውም እጀው።

²⁹ጛት ይጭስ ነየው ይር እጝቂስቅ ዲቈኵ፤ ይርት ናኒስ ጛት ናጥቅጠ ቸለው ኣውማውም እጀው።

³⁰ይስመ ኣይርስ ላው የጝ» ዩ።

³¹ኣይዅዳንድም ኣይንድ እንደ ገነ ድድብጥጘ ቕርጘ ጕይ።

³²እየሱስም፦ «ይርቲስ ንቕፀው ቀሰው ሰቭ ቓሊስኩን፤ ጛጊስ ኣውየን ዊገይዝቍዝ ይጝ ይት ጣዝትርነ በንርነውድ?» ዩ።

³³ኣይዅዳንድም፦ «ይን ክት ጣዝነ በንነውድ እደረት ዛሽራንስቅ የጝጚ ሰራሽረው ቀሰው ሰቪዝቍዝም ኣየው፤ እንም፣ ክት እጅር ኣቕር ፅብራ ክቕምት ኣምላክ ፃቭራንስቅ የጝ» ይ።

³⁴እየሱስም፦ «ውረ ክታኽጊዝ፦ ‹ያን ክትን ኣምላካን የጝ ዩን› ይሽት ፃፍሽ እጀውቀ?

³⁵እደስለ እደረት ቃልድ ጝታጐ ተረቍ እቅድዛት፦ ‹ኣምላካን› የውዝየ፣ ቅዱሳን መፃፋንድ ይጘውድም ሸርሻው ኣቐውዝየ፣

³⁶ውር ቃጥ የጝ ኣይር ቀድሰውድየንት፣ ኣልሚልም እፃቐውድየንት፦ ‹ያን እደረት ዅር የጝ› ዩዝ፦ ‹እደረት ዛሸኵ› ይርነውድ?

³⁷ያን ይርት ሰቭድ ሰራጨቅ ኣቐውዝየ ይት ኣምንትርነ።

³⁸ሰራጨር ኣቐውዝየ ግን ይት ኣምኒርንሽ እኳ ኣይር ይግል ፅበጘ፣ ያንም ኣይርትል ፅበጘ፣ ኣርቕርናንስመ ኣስክስርናንስ ማጥን ይሰቪዝ ኣምንጥን» ዩ።

³⁹ጛይም እንደ ገነ ፃይጥጘ በን፤ ጘጝ ግን ጝታማኽሊስ ኣምልጥ ፊሩ።

⁴⁰ጝጊስም ዮርዳኖስ ዊርቨይዝ እጂ ከር እንዝ ሚቅ ይዃንስ ጣምቃ ዊነው ስፍረይል ፊሩ፤ ጝግልም ሳብጡ።

⁴¹ንቕፀቍ እቅም ጝጐ ፊርጝ፦ «ይዃንስ ውረውረ ታምርም ፃቪየው፤ ዊገድ ግን እን እጅሪዝ ማጥን ዊግተው ዊገድቅ እማን ዊኑ» ይ።

⁴²ጝጊስም ንቕፀቍ እቅ ጝት ኣምን።