Read xamtanga ይዃንስት ወንጌል 11 Bible Online

ይዃንስት ወንጌል 11 - xamtanga bible

ይዃንስት ወንጌል 11

¹ቢታንየ ፅበው ኣላዛር የነው ላው እጅር ፅዊት ዊኑ፤ ቢታንየ ማርያምስመ ጝርስን ማርተስታ ኪው ዊንች።

²እኝቸን ማርያም፣ ኣደረት ሽቱ ቓስረይ፣ ጝልኵድየንትም ጝርኣውር ፅቭቀይዝ ዊልውልደይሸን ጚ፤ ፅዊተው እጅርድም ጝርዝን ዊኑ።

³እንዛይ ጝፅንድም፦ «ኣደረወ! ክቀንደው ክወደጅድ ፅዊትኩ» ይጝ እየሱስትል እፃ በርስ።

⁴እየሱስም እኒንት ወሻንድ፦ «እኒን ፅውዘድ እደረት ዅር ጝዝ ኪብራንስመ እደረስም ክቭር ኣቓንስ ማጥን የጝጚ፣ ክርጘል ችጝዘውም ኣየው» ዩ።

⁵እየሱስም ማርተስመ ጝርስን ማርያምስ ኣላዛርትም ቀነው ዊኑ።

⁶ኣቕሽም ኣላዛርት ፅዊተነውድ ወሻንድ ጝዊነው ስፍረይል ሊጘ ግርቅ ደዩ።

⁷እንዝ ግረ ጝክንደጥድዛት፦ «እንደ ገነ ይዅዳ ኻግሪል ፊርነ» ዩ።

⁸ጝክንደጥድም፦ «ክንሰተወ! ኣይዅዳንድ እንዝ ሚቅ ክት ቁጡጘ ደምዝጛ ዊን፤ እደስለ እንደ ገነመ ዊስር ፊርተ?» ይ።

⁹እየሱስም፦ «ጊርቅ የነውድ ፅጭ ሊጘ ሰት ኣየውቀ? ጊርቅዝ ፃጘው እጅርድ እን ኣልሚዙ ብርኻንድ ቓለው ኣቓንስቅ ፅጋራውም።

¹⁰ኻርዝ ፃጘውድ ግን ብርኻን እጀው ኣቓንስቅ ፅጋረኵ» የው ዊሱ።

¹¹ጛጭስ እኒንት ዊግተት ግረ፦ «ይናወደጅ ኣላዛር ዝመውርኩ፤ ያን ግን ጝዝመዊስ ጒስጨ ፊጨ የጝ» ዩ።

¹²ጝክንደጥድም፦ «ኣደረወ! ዝመውር ኣቐውዝየስ ቓድጡ» ይ።

¹³እየሱስ እኒንት ዊግተውድ ኣላዛርት ክርጘይዝቍዝ ዊኑ፤ ጛጭስ ግን ዝመውዝ ማጥን ዊግተው ተኩ።

¹⁴እንዝ ማጥን ጋልፅ፦ «ኣላዛር ክርኩ፤

¹⁵ክትን ኣምንድርናንስ ማጥን ጝግል ዊኒቀር ኣቐነዊዝ ክታማጥን ዲስ የኵን፤ ነን ግን ጝጐ ፊርነ» የው ድቁ።

¹⁶ኣይንድ ዲድመስ ይሽተው ተውማስ ላጥ ክንደጥድዛት፦ «ይንም ጝጅቅ ክርናንስ ማጥን ፊርነ» ዩ።

¹⁷እየሱስም ጝግል ችጛንድ ኣላዛር ዲቭሽተት ሲዘ ግርቅ ኣቕ ዊኑ።

¹⁸ቢታንየም እየሩሳልየምቲስ እክልድረውድ ሻቘ ኪለው ሚትር ኣጠ የጝ።

¹⁹ንቕፀቍ ኣይዅዳንም ማርተስመ ማርያምስ ጝታዝንትቍዝ ዲብስጥጘ ተርጝ ዊን።

²⁰ማርተም እየሱስ ተረጘ ወሽራንድ፣ ጝት ለምርተ ጕር ፍች፤ ማርያም ግን ጝኒል እዳቕር ዊንች።

²¹ማርተም እየሱስት፦ «ኣደረወ! ክት እንል ዊንዳን ይዝን ክርጠም ዊኒየው።

²²ነንም ኣቕሽ ክት ጨውረውድየንትቅ እደረ ክጭስ ነይጡ ኣቐጘ ኣርቐኵን» ይች።

²³እየሱስም፦ «ክዝን ክርጘይስ ጕጡ» ዩ።

²⁴ማርተም፦ «ክርጘይስ ጐነው ኻትሸነ ግርየይዝ ጕጠጘ ኣርቐኵን» ይች።

²⁵እየሱስም፦ «ክርጘይስ ጐነዝመ ርዅየዝ ያን የጝ፤ ይት ኣምነውድቅ ክርሽም እኳ ርዅየዝ ፅብጡ።

²⁶ርዅየዝ ፅበው፣ ይትም ኣምነውድቅ፣ ስሪስቅ ክራውም፤ እኒንት ኣምንደኵመ?» ዩ።

²⁷ጚይም፦ «የይ ክንሰተወ! ክት ኣልሚል ተትረር ክርስቶስ እደረት ዅር ኣረጘ ኣምነኵን» ይች።

²⁸እኒንት ይር በትርም ዋጥርድር ፊትር ጝርስት ጝሪለ ጭጝር፦ «ክንሰተድ ተርኩ፤ ክትም ጭጘኵ» ይች።

²⁹ማርያምም እኒንት ወሽራንድ በውዝ ጕር ጝጐ ፊርች።

³⁰እየሱስም ኣይንድ ማርተ ጝት ለምትረው ስፍረይል ዊኑ፤ ኪዊልም ጥዊየው ዊኑ።

³¹ጝርት ዲብስጛ ጝኒል ዊነቍ ኣይዅዳንድም ጕን ይር ፍረጘ ቓልጛንድ መቃቭሪል ፊትር ሊዝተ ተክሩዝ ጝርት ቲክንጝ ፊር።

³²ማርያምም እየሱስ ፅበዊል ፊትር ጝት ቓልዳንድ ጝልኲል ሊቭር፦ «ኣደረወ! ክት እንል ዊንዳን ይዝን ክርጠም ዊኒየው» ይች።

³³እየሱስም ጚ ሊዝራንድ፣ ጝርት ቲክንጝ ተረቍ ኣይዅዳንድም ሊዝጛንድ ቓላንድ፣ ጝመንፈሲዝ ኽዝንዝ ጭቕጘ ኻውክሽ፦

³⁴«ኣውል የጝ ዲቭርነውድ?» ዩ። ጛይም፦ «ኣደረወ! ለው ተትር ቓላ» ይ።

³⁵እየሱስም ጝእርድ ቅብሱ።

³⁶ኣይዅዳንድም፦ «ኣወሽ ቀነው ዊነጘ ቓልድርነኵመ?» ይ።

³⁷ጛጊስም ላው ላውድ፦ «እኒን ኻርቨይዝ እልጣንድ ቓዘውድ እኒንትስ ክራየጘ ፃቭጠ ቸላውመ ዊኑ?» ይ።

³⁸እየሱስም ጭቕጘ ኻዝና መቃቭሪል ፊሩ፤ መቃቭርድም ቕርጘዝ ዲቭሽተው ጋ ዊኑ።

³⁹ጘጝም፦ «ቕርጘድ ጕይጥን» ዩ። ክረዊዝ ጝስን ማርተም፦ «ኣደረወ! ነንመ ክረት ሲዘ ግርቅ ኣቓንስቅ ኻርጠ የጝ» ይች።

⁴⁰እየሱስም፦ « ‹ኣምንደውዝየ እደረት ክቭርድ ቓልትር› የር ድቊቀርቀ?» ዩ።

⁴¹ጛይም ቕርጘድ ጕይ። ጘጝም ጝእልጣንድ ኒየ ጕይ፦ «ኣየወ! ይት ወሽራንስቅ ሚዝየንዘኵን።

⁴²ዊትርቅም ይት ወሽረር ኣረጘ ኣርቐኵን፤ ዊገድ ግን እኒንት ዊግጠውድ እንል ችብረቍድ ይት እፃረርድ ክት ኣረጘ ኣርቕጥጘ ማጥን የር የጝ» ዩ።

⁴³እኒንት ዊግተት ግረ ጝድመድ ኣጕስ ሸው፦ «ኣላዛርወ! ለው ፍ!» የው ዊግቱ።

⁴⁴ክረውድም ጝናንጣኒዝመ ጝልኵጣኒዝ ሚግንዝዝ ጊንሽተጘ፣ ጝጋፅድም ፃርቀዝ ጣጥምሸጘ መቃቭሪስ ፉ። እየሱስም፦ «ጊንዝሽተው ኣልቨድየንት እክስጥንነ ፊርነ» ዩ።

⁴⁵ማርያምት ዲብስጥጘ ተርጝ ዊነቍ ኣይዅዳኒስም እክሰቍድ እየሱስ ፃቨውድየንት ቓልጛንድ ጝት ኣምን።

⁴⁶ላው ላውድ ግን ፊርጝ ጘጝ ፃቨው ዊገድየንት ፈሪሳኒዝ ድቍ።

⁴⁷እንዝ ማጥን ካኽነጣነ ኻልቅጢዝመ ፈሪሳኒዝ ኣይዅዳኒዙ ሸጐውድየንት ኣኸቨ ጭጝጝ፦ «እን እጅርድየን ንቕፀቍ ታምራንዝቍ ምልክታን ፃቫ ኣቓንስቅ ውር ፃቭናን ቺዝጡ?

⁴⁸ዝም ይን በርናን፣ እጅርድቅ ጝት ኣምንጠ የጝ፤ ረውማንድም ተርጝ ይናኻግሪዝመ[12] ይናኽዝቪዝ ድስጥጘ የጝ» ይ።

⁴⁹ጝታማኽሊስም ላውድ ጚ ኣምረየንስ ካኽነጣነ ኻልቀ ዊነው ቀያፈ የነውድ፦ «እፈ ክትን ውርም ኣርቓይርነቅ!

⁵⁰ኽዝቭድቅ ድዘነዊስ ሽ ኽዝቪዝ ማጥን ላው እጅር ክራን ቺዝጠጘመ ኣስክሳይርነቀ?» ዩ።

⁵¹እኒንትም ዊግተውድ ጝቕምቲስ ፊስም ኣየው ዊኑ፤ ዊገድ ግን ጚ ኣምረየንስ ካኽነጣነ ኻልቀ ዊናንስቅ እየሱስ ኽዝቪዝ ማጥን ክርጠ ጥውሸው ኣቐጘ ቓሊሳንድ እኒን ትንቪትድ ዊግቱ።

⁵²ክረውድም ጘጝ ኽዝቪዝ ማጥን ጭቝ ኣዪጝቀ ቢትንሸቍ እደረት ቝርድዛትም ላው ፃቭ ኣኽቭጠ የጝ።

⁵³ኣቓንስቅም ጚ ግርየየንቲስ ኪርምጝ ጝት ቁጥጘ ኣድም።

⁵⁴እንዝ ማጥን እየሱስ ኣይንቲስ ኪርም ኣይዅዳኒዝ ማኽሊዝ ግልፅዝ ዋጥርጥሪየውም፤ ዊገድ ግን ጝጊስ ፍ በራኸይዝ ጋቢል ፅብረይ የፍርየም የነይ ኻትመትል ፊሩ፤ ጝግልም ጝክንደጢጅቅ ሳብጡ።

⁵⁵ኣይዅዳኒዙ ፈዝየድም ችጝጠ ጓንድ በልድ ችጘነዊዝ በውገ ዊር የነዊዙ ስረትድ ፋፅምጥጘ ንቕፀቍ እቅ ጝታይተኻግሪስ እየሩሳልየም ፍ።

⁵⁶እየሱስትም ደምዝጛ ዊን፤ መቅደስ ጝኒልም ችብርጝ ጛስ ጛይ፦ «ወረጘ ይርና? በሊል ተራውመ ኣጢ?» ይ።

⁵⁷ካኽነጣነ ኻልቅጢዝመ ፈሪሳኒዝ ግን እየሱስት ፃይጥጘ በንጝ ጝት ቓለው እጅር ፅብሽ ጛጭስ ጣቍማንስ ኣዝጝ ዊን።