Read xamtanga ይዃንስት ወንጌል 12 Bible Online

ይዃንስት ወንጌል 12 - xamtanga bible

ይዃንስት ወንጌል 12

¹እየሱስም ፈዝየ በልድ ችጝጠ ዋልጠ ግርቅ እዳጛንድ ጝቕም ክርጘይስ ጒሰው ኣላዛር ፅበው ቢታንየ ትጐ ፊሩ።

²ጝጊስም ድረይ ጝጭስ ኣስል፤ ማርተም ኣቭንውዝራ ዊንች፤ ኣላዛርም ጝጅቅ መዲል ጐየቍስ ላውድ ዊኑ።

³ማርያምም ጝወየድ ጭቕጘ ኪብረው ሊትር ግቨር ኣቐው ናርዶስ የነው ሽቱ ነስር እየሱስት ልኵጣኒል ኣርክፍክፍች፤ ጝርኣውር ፅቭቀይዝም ጝልኵጣንድ ዊልውልች፤ ጝኻረድም ጝንድየንትቅ እቻቑ።

⁴ጝክንደጢስም ላው ኣስቈረትቱ ይዅዳ የነው እግረ እየሱስት ዲቍስ ይውጡድ፦

⁵«እኒን ሽቱድ ውር ቃጥ ይጝ ሻቘ ላ ዲናርዝ ቅይሽ ጊንዝቭድ ድኺዝ ይውሽቲየውድ?» ዩ።

⁶እኒንት ዊግተውድም ድኺዝ ኻዝን ኣዪጝቀ ቓፅጘ ዊናንስቅ፣ ጊንዝቭ እቝረነው ኸረጢትድም ፃየውድ ጘጝ ዊናንስቅ፣ ጝግል እቝርንቊስ ስⶓነው ክንድ ዊናንስቅ የጝ።

⁷እየሱስም፦ «እኒን ሽቱድ ይዲቭሽተነ ግርየይዝ ኣስልደው ኣቓንስቅ በጥን።

⁸ድኽድ ዊትርቅ ክታጅቅ እኵ፤ ያን ግን ዊትርቅ ክታጅቅ ፅበቅም።» ዩ።

⁹ኣይንድ ንቕፀቍ ኣይዅዳን እየሱስ ጝግል ፀበጘ ወሽጛንስቅ ቢታንየ ተር፤ ተርጘውድም እየሱስት ማጥን ጭቝ ኣዪጝቀ እየሱስ ክርጘይስ ጒሰው ኣላዛርትም ቓልጥጘ የጝ።

¹⁰ካኽነጣነ ኻልቅጥድ ግን ኣላዛርት ቈሽ ቁጥጘ ማኽርኽርሽ።

¹¹ምላሰንድም ጝቍዝ ንቕፀቍ ኣይዅዳን ፊርጛ እየሱስት ኣምንጛ ዊንጛንስቅ የጝ።

¹²ጛምርሲዝም ፈዝየ በሊል ተረው ንቕፀው ኽዝቭ እየሱስ እየሩሳልየም ተረው ኣቐጘ ወሹ።

¹³እንዝ ማጥን ሰልየንዙ ኻፀ ጫጝቕዝጝ ጝት ለምርጥጘ ፍ፤ ጝታድመድም ኣጕስ ሽጝ፦ «ዀሳይነ! ኣደረት ሽዝ ተረው እስራየልት ንጕስ በርክሸው የጝ» ይ።

¹⁴እየሱስም ድዃረት እወል ችጝ ድቃሩ፤ እንም ኣቐውድ፦

¹⁵«እፈ ፂወንት ቝረወ! ጐውተ! እንወ ክንጕስድ ድዃረት እወሊል ድቃር ተርጡ» ይሽት ፃፍሸውድ ፋፅምሻንስ የጝ።

¹⁶ጝክንደጥድ በውገ እኒንትቅ ኣስክሲየቍም ዊን፤ ጝማጥን ፃፍሸቊዝመ እንዛይ ጝጭስ ፃቭሽተቍ ዊቂዝ ኣጅጘውድ እየሱስ ኪብረት ግረ የጝ።

¹⁷ኣላዛርት መቃቭሪስ ጭጝ ጒሳንድ ጝጅቅ ዊነቍድቅ ክርጘይስ ጒሰጘ ሚዝርድጛ ዊን።

¹⁸ንቕፀቍ እቅም እኒን ታምርዙ ምልክትድ ፃቫንድ ወሽጛንስቅ ጝት ለምርጥጘ ፍ።

¹⁹እንዝ ማጥን ፈሪሳንድ ጛስ ጛይ፦ «ቓልድርነኵመ ነስየ ውርቅ ፃቭነ ቸላይነቅ ኣነጛ? እንወ ኣልምድቅ ጝት ቲክን ፊርኩ» ይ።

²⁰በልድ ኪብርዝጥጘ እየሩሳልየም ፊርጝ ዊነቍ እቂዝ ማኽሊስም ላው ላው ግሪካን እቅ ዊን።

²¹ጛይም ገሊለትወ በተሰይደስ ተረው ፊልበውስ ትጐ ኣልትጝ፦ «ኣደረወ! ኣለቀይ እየሱስት ቓልነ በን ዊኑን» ይ።

²²ፊልበውስም ፊር እንድርያስስ ድቁ፤ እንድርያስስመ ፊልበውስስም ላብጠ ፊርጝ እየሱስስ ድቍ።

²³እየሱስም እንት ዩ፦ «እጅር ዅር ኪብረው ሰትድ ችጝኩ።

²⁴እማን እማን የኵን፤ ዚሩ ፍረ ዝቨይል ሊቭር ክሪረውዝየ ጝርለ እዳቲ፤ ክትርሽ ግን ንቕፀቍ ፍር ፍርዝቲ።

²⁵ጝርዅየሸንት ቀነወድቅ ድስጡ፤ እን ኣልሚስ ጝርዅየሸንት ሽክተውድ ግን ዘላልምዙ ርዅየዝ ሊሚድጡ።

²⁶ይት ኣግልግልጠ በነውድቅ ይእግርገይል ቲክነ፤ ያን ፅበዊል ይኣገልጋይድም ፅብጡ፤ ይት ኣግልግለውድየንትም ኣይር ኪብርዝጡ።

²⁷«ነንስ ይኒቭስሸን ጨጝቅሽርኵች፤ ወረጘ ይጨ? ‹ኣየወ! እኒን ሰቲስ ይት ቓዝመ ይጭራ?› ኣየውም፤ ተጠውድ እኒን ሚከረይዙ ሰቲዝ ማጥን የጝ።

²⁸ኣየወ! ክሽድ ኪብርዝ።» ኣይንድም፦ «ኪብርዝኩን፤ ቈሽም ኪብርዝጭር» የው ድመ ሲመይስ ተሩ።

²⁹ጝግል ችብርጝ ዊነቍድም እኒን ድመድ ወሽጛንድ፦ «ነጐድጓድ የጝ» ይ፤ ላጥድ ቈሽ፦ «መላክ የጝ ዊግተውድ» ይ።

³⁰እየሱስ ግን፦ «እኒን ድመድ ተረውድ ይማጥን ኣዪጝቀ ክታማጥን የጝ።

³¹እኒን ኣልምድ ፊርድሸው ግርየድ ነን የጝ፤ እን ኣልሚዙ ቅመተድ ነን ቢዘ ሊቭጡ።

³²ያንም ዝቨይስ ኒየ ንየስ ንየስ ያንድ እቅድዛትቅ ይቕም ትጐ ዊትርጭር» ዩ።

³³እየሱስ እኒንት ዊግተውድ ኣወየው ክርጘዝ ክርጠጘ ጣቍመነት ዊኑ።

³⁴ኽዝቭድም፦ «ይንስ ክርስቶስ ዘላልም ፅብጠጘ ኽጊስ ፃፍሽ ችጝንኵኑን፤ እደስለ ወረጘ የጝ ክት፦ ‹እጅር ዅር ንየስ ንየስ ይጡ› ይረውድ? እኒን እጅር ዅርድስ ኣው የጝ?» ይ።

³⁵እየሱስም፦ «ገነ ዊቱ ግርየ ክታግል ብርኻን እኩ፤ ጥመድ ክታግል ችጚጝቀ ብርኻንድ ፅባ ዋጥርጥርጥን፤ ጥመዝ ዋጥርጥረው እጅር ኣውል ፊርጠጘ ኣርቓውም።

³⁶ብርኻንዝ ቝር ኣቕርናንስ ማጥን ብርኻን ፅባ እኒን ብርኻኒዝ ኣምንጥን» የው ዊሱ። እየሱስ እኒንት ዊግት ኻተት ግረ ጛጊስ ቲት ፊር ሲውርሹ።

³⁷እየሱስ ውርም እኳ እንቝጥጘ ታምራንዝቍ ምልክታን ጝታበዊል ፃቭሽም፣ ኣይዅዳንድ ጝት ኣምኒየቍም።

³⁸እንም ነቭይ ይሳያስ፦ «ኣደረወ! ይናሚዝርነይድ ኣው ኣምኑ? ኣደረት ኻይልድስ ኣውስ ጋልፅሽቱ?» የው ዊግተው ቃልድ ፋፅምሻንስ ማጥን የጝ።

³⁹ይሳያስም ቈሽ ላየ ስፍረዝ፦ «ጝታእልጣንድ ፅምርዝኩ፤ ጝታእዘንድም ዲንድንዝኩ፤ ኣቓንስቅም ጝታእልጣኒዝ ቓላቍም፤ ጝታእዘኒዝም ኣስክሳቍም፤ ያን ጛት ቓዛይቀጘም ይጐ ዋጥራቍም» የው ጋልፅኩ፤ እንዝ ማጥን ጝት ኣምነነ ብ።

⁴⁰

⁴¹ይሳያስ እኒንት የውድ እየሱስት ክቭርድ ቓላንስቅ የጝ፤ ጝማጥንም እኒንት ዊግቱ።

⁴²ኣነጚ ኣይዅዳነ ኻልቅጢስ ንቕፀቍድ ጝት ኣምን፤ ዊገድ ግን ፈሪሳንድ ምኵራቪስ ፊሳይጘጘ ጐውትጛንስቅ ግልፅዝ ጝማጥን ሚዝርዲየቍም።

⁴³እንም እደረቲስ ሚዝየንሽተነው ሽ እቅዝ ሚዘንሽትጥጘ በንጛንስቅ የጝ።

⁴⁴እየሱስም ጝድመድ ኣጕስ ሸው፦ «ኣውማው እጅር ይት ኣምንሽ ይት ጭቝ ኣዪጝቀ ይት እፃቐውድየንትም ኣምኑ የነት የጝ።

⁴⁵ይት ቓለውድም ይት እፃቐውድየንት ቓለኵ።

⁴⁶ይት ኣምነውድቅ ጥመል ጐያየጘ ያን ብርኻን ኣቕ ኣልሚል ተጥኩን።

⁴⁷ይቃልድ ወሽ በር ፋፅማው እጅርድየንት ያንም ኣይቀር ፊርጠርድ፤ ያን ተጠውድ ኣልምድየንት ቓዝጨጚ ኣልምድየንት ፊርድጨም ኣየው።

⁴⁸ይት ለምራዊዝመ ይቃልድየንት ነቀዊዝ ፊርደው እኩ፤ ያን ዊግጠው ቃልድ ጝቕም ኻትሸነ ግርየይዝ ፊርድጡ።

⁴⁹ያን ይቕምቲስም ዊግጢቀር፤ ዊገድ ግን ይት እፃቐው ኣይር ወረጘ ዊግጣንስ፣ ኣወሽም ዊግጣንስ ማጥን ይት ኣዙ።

⁵⁰ጝትዛዝድ ዘላልምዙ ርዅየል ችጝዝጠጘ ኣርቐኵን፤ እንዝ ማጥን ያን ዊግጠውድ ኣይር ይጭስ ድቈውድየንት የጝ።