Read xamtanga ይዃንስት ወንጌል 13 Bible Online

ይዃንስት ወንጌል 13 - xamtanga bible

ይዃንስት ወንጌል 13

¹ፈዝየ በልድም ችጝ ዊኑ፤ እየሱስም እን ኣልምድየንት በር ኣይር ትጐ ፊረው ግርየድ ችጘጘ ኣርቑ፤ እን ኣልሚል ፅበቍ፣ ጝቕምትቍም ኣቐቍ እቅድዛትም ቀኑ፤ ፍፅም ፍቅርዝም ቀኑ።

²ድረይም ዅጛ ሲጝቀ እየሱስት ዲቍስ ይዋንስ ማጥን ዳቪለውስ ስሙንት ዅር ኣስቈረትቱ ይዅዳት እዘኒል ጭቓ ኻሰቭ ጭሱ።

³እየሱስም ኣይር እጝቅ ስልጣንድየንት ጝጭስ ዲቍስ ይወጘ፣ እደረቲስም እፃሸጘ፣ እደረትልም ፊርጠጘ ኣርቕ ዊኑ።

⁴እንዝ ማጥን መዲስ ጕ ጝኣልቨድየንት እቝሩ፤ ዊልውለነው ፈውጠም ጝይዊል ከምሹ።

⁵እንዝ ግረም ቓረነይል ኣቝ ድው ጝክንደጢዝ ልኵጣንድ ቓሳ ከምር ዊነው ፈውጠይዝ ዊልውልጠ ኪርሙ።

⁶ስሙን ቢጥሮስትልም ተሩ፤ ጘጝም፦ «ኣደረወ! ክትመ ይልኵጣንድ ቓስተ?» ዩ።

⁷እየሱስም፦ «ያን ፃቨውድየንት ነን ኣርቓርም፤ እግረ ግን ኣስክስትር» ዩ።

⁸ቢጥሮስም፦ «ስሪስቅ ይልኵጣንድ ክት ቓሳርም» ዩ። እየሱስም፦ «ያን እቓሲቀውዝየመ ይጅቅ ኣቐነው እድል እጅረርም» ዩ።

⁹ስሙን ቢጥሮስም፦ «ኣደረወ! እደስለስ ይልኵድ ጭቝ ኣዪጘቀ ይናንድም ይኣውርድም ቓሽ» ዩ።

¹⁰እየሱስም፦ «ሰውነትድ ቓረው እጅር ጝዅለመነድቅ ንፅዅ ኣቓንስቅ ቓረነው በንዘውድ ልኵድ ጭቝ የጝ፤ ክትንም ንፁኻን የጝ፤ ዊገድ ግን ክታእጝቅቅም ንፁኻን ኣይርነቅ» ዩ።

¹¹«ክታእጝቅቅም ንፅዃን ኣይርነቅ» የውድ ጝት ዲቍስ ይውጡድ ኣው ኣቐጘ ኣርቓ ዊናንስቅ የጝ።

¹²ጝታልኵጣንድም ቓስ ኻተት ግረ ጝኣልቨድ ሲር ዋጥር ጝጐይተይል ጐይ፦ «ያን ፃቨውድየንት ኣስክስርኑመ?

¹³ክትን ይት፦ ‹ክንሰተ› ‹ኣደረ› ይርነኵ፤ የይ፤ ያን ክንሰተም ኣደረም እቓንስቅ ይርነውድ እማን የጝ።

¹⁴ነስየ ያን ክታክንሰተም ክታኣደረም ኣቕ ፅባ ክታልኵጣንድ ቓሰውዝየ ክትንም እኒዝጘ ክታስ ክታይ ክታልኵጣንድ ቓሰቓስሽትትርነ ጥውሸኵ።

¹⁵ያን ክታጭስ ፃቨጘ ክትንም ክታስ ክታይ ፃቭርናንስ ማጥን ክታጭስ ተከ ነቅኩን።

¹⁶እማን እማን የኵን! ኣገልጋይ ጝኣደረይስ፣ እፃሸረም ጝት እፃቐዊስ ድቋውም።

¹⁷ነስየ እንዛት ኣርቕርነውዝየ ፋፅምርነውዝየም ቀቫሽርነቅ የጝ።

¹⁸«እኒንት ዊግጠውድ ክታእጝቅት ማጥንም ኣየው፤ ያን ማርፀቍድ ይቕም ኣርቐኵን፤ ዊገድ ግን፦ ‹ይሚድ ይጅቅ ዀውድ ጝልኵድየንት ይግል ጕዩ› ይሽት ፃፍሸው መፃፊዙ ቃልድ ፋፅምሽጠ ጥውሸኵ።

¹⁹እንቅ ኣቐት ግረ ያን ኣው ኣቐጘ ኣምንድርናንስ ማጥን ኣቐነዊስ በውገ ክታጭስ በውርስ ድቈኵን።

²⁰እማን እማን የኵን! ያን እፃቐውድየንት ለምረውድቅ ይት ለምረኵ፤ ይት ለምረውድም ይት እፃቐውድየንት ለምረኵ።

²¹እየሱስ እኒንት ዊግተት ግረ ጝመንፈሲዝ ጨጝቅሽ፦ «እማን እማን የኵን! ክታጊስ ላውድ ይት ዲቍስ ይውጡ» የው ግልፅዝ ዊግቱ።

²²ጝክንደጥድም እኒንት ዊግተውድ ኣውት ማጥን ኣቐጘ ኣርቐነ ብጛንስቅ ግራ ጥውጝ ጛስ ጛይ ቓለ ቓሊሽት።

²³ጛጊስ ላውድ እየሱስ ቀነው ዊነው ክንደተድ እየሱስትል ኣልት ጐይ ዊኑ።

²⁴ስሙን ቢጥሮስም ጝት ምልክትዝ ጣቅስ፦ «ኣውት ማጥን ኣቐጘ ዋቕር» ዩ።

²⁵ጘጝም እየሱስትል ኣልት የው፦ «ኣደረወ! ክት ዲቍስ ይውጡድ ኣው የጝ?» የው ዋቕሩ።

²⁶ኣየሱስም፦ «ያን እኒን ቈርሽተው ሚድ ዳቕስ ይወው እጅርድ የጝ» ዩ። ቈርሽተው ሚድም ጒ ዳቕስ ስሙንት ዅር ኣስቈረትቱ ይዅዳስ ይዉ።

²⁷ይዅዳም ሚድ ለምረጘ በውዝ ሲጣን ጝግል ጥዉ፤ እየሱስም፦ «ፃቭተ በንረድየንት ቃዝይር ፃቭ» ዩ።

²⁸መዲል ጐይጝ ዊነቍድ ግን ውር ማጥን እነይ ዊግተጘ ኣርቒየቍም።

²⁹ላው ላውድም ቍርሻንድ ፃየውድ ይዅዳ ኣቓንስቅ፦ «በሊዝ ኣስለነውድየንት ጅቭ» ዊንም፦ «ድኺዝ ምፅዋት ይይ» የው ተኩ።

³⁰ይዅዳም ሚድ ለምረጘ በውዝ ፍ ፊሩ፤ ሰትድም ኻር ዊኑ።

³¹ይዅዳ ፈት ግረ እየሱስ፦ «ነን እጅር ዅር ኪብሩ፤ እደረም ጝቍዝ ኪብሩ።

³²ነስየ እደረ ጝቍዝ ኪብረውዝየ እደረም ጝት ጝቕምትዊዝ ኪብርዝጡ፤ በውዝም ኪብርዝጡ።

³³ይቝርወ! ክታጅቅ ዊነውድ ዊትቍ ግርቅ የጝ፤ ክትንም ይት ደምዝትርንቅ፤ ኣይዅዳኒዝ፦ ‹ያን ፊጠዊል ክትን ተርትርነ ቸላይርነቅም› የር ዊግጠጘ ክታጭስም እኒንት ዊግጠኵን።

³⁴ኣይር ትዛዝ ነቀኵን፤ እንም ክታስ ክታይ ቀነቀንሽርናንስ ማጥን የጝ፤ ያን ክታት ቀነጘ ክትንም ክታስ ክታይ ቀነቀነሽትጥን።

³⁵ክታስ ክታይ ቀነቀንሽርነውዝየ እጅር እጝቅ ይክንደጥ ኣቕርነጘ እንዝ ኣርቕጡ» ዩ።

³⁶እንዝ ግረ ስሙን ቢጥሮስ እየሱስት፦ «ኣደረወ! ኣውል የጝ ፊትረውድ?» ዩ። እየሱስም ያን ፊጠዊል ነን ቲክንተ ቸላርም፤ እግረ ግን ቸልትር» ዩ።

³⁷ቢጥሮስም፦ «ኣደረወ! ነን ቲክንጨ ቸላይቀውድ ወረጘ የጝ? ክማጥን ይርዅየሸንት እኳ ዲቍስ ይውጭር» ዩ።

³⁸እየሱስም፦ «እማን ክርዅየሸንት ይማጥን ዲቍስር ይውታ? እማን እማን የኵን! ጅርወ ዋቒጝቀ ይት ሸውን ኻዲትር» ዩ።