Read xamtanga ይዃንስት ወንጌል 14 Bible Online

ይዃንስት ወንጌል 14 - xamtanga bible

ይዃንስት ወንጌል 14

¹እየሱስም ጝክንደጢዝ፦ «ክታዘንድ ጨጝቅሺነ፤ እደረት ኣምንጥን፤ ይትም ኣምንጥን።

²ይርት ጝኒል ንቕፀው ስፍረ እኩ፤ እኒን ኣየው ኣቓንመ ድቍጨ ዊኑን፤ ፊጠውድም ክታጭስ ስፍረ ኣስልጨ የጝ።

³ፊጥ ክታጭስ ስፍረ ኣስለት ግረ ያን ፅበዊል ክትንም ፅብርናንስ ማጥን እንደ ገነ ተጥ ፊስጭር።

⁴ያን ፊጠው ስፍረይል ችጝዘው ጒደነድየንትም ኣርቕርትርንቅ።» ዩ።

⁵ተውማስም፦ «ኣደረወ! ኣውል ፊርተጘ ኣርቒነቅም፤ እደስለ ኣወይን የጝ ክት ፊትረው ጒደነድየንት ኣርቕነውድ?» ዩ።

⁶እየሱስም፦ «ጒደነድ፣ እማንድ፣ ርዅየድም ያን የጝ፤ ይጐቱ ኣየውዝየ ኣይርትል ተረው እጀውም።

⁷ይት ኣርቕርናን ይርትም ኣርቕትርነ ዊንድርኑ፤ ነንስ ኪርምርን ግን ጝት ኣርቕትርንቅ፤ ቓልድርንምኵርኑ» ዩ።

⁸ፊልበውስም፦ «ኣደረወ! ይናጭስ ኣይርት ቓሊሽነ ኣጥጘች» ዩ።

⁹እየሱስም እንት ዩ፦ «እፈ ፊልበውስ! እንቝጠ ግርየ ክታጅቅ ፅባመ ነኳን ኣሽ ይት ኣርቒረረ? ይት ቓለውድ ኣይርት ቓልኩ፤ እደስለ ወረጘ የጝ፦ ‹ኣይርት ቓሊሽ› ይረውድ?

¹⁰ያን ኣይርትል ፅበጘ፣ ኣይርም ይግል ፅበጘ ኣምናርመ? ያን ክታጭስ ደቈው ቃልድ ይቕምቲስም ኣየው፤ ዊገድ ግን ሰቭድየንትቅ ሰራሸውድ ይግል ፅበው ኣይር የጝ።

¹¹ያን ኣይርትል ፅበጘ፣ ኣይርም ይግል ፅበጘ ኣምንጥን፤ ኣለዝየ ይሰቪዝቍዝ ኣምንጥን።

¹²እማን እማን የኵን! ይት ኣምነውድቅ ያን ሰራጨው ሰቭድ ሰራሽጡ፤ እንዲያውም ያን ኣይርትል ፊጠር ኣቓንስቅ ጝጊስ ዲቈው ሰቭ ሰራሽጡ።

¹³ኣይርም ዅርት ምላሰንዝ ኪብራንስ ማጥን ይሽⶔዝ ጨውርነውድየንትቅ ያን ፃቭጭር።

¹⁴ኣውማው ዊገድቅ ይሽⶔዝ ጨውርነውዝየ ያን ጝት ፃቭጭር።»

¹⁵«ይት ቀንድርነቅ ኣርነውዝየ ይትዛዝድ ሊሚድጥን።

¹⁶ያን ኣይርት ጨውጭር፤ ጘጝም ዘላልም ክታጅቅ ፅበው ላየ ዲብሰተ ክታጭስ ነይጡ።

¹⁷ጘጝም እማንዙ መንፈስ የጝ፤ ኣልምድ ጝት ቓላው ኣቓንስቅ፣ ኣርቓው ኣቓንስቅም ጝት ለምርጠ ቸላውም፤ ክትን ግን ጘጝ ክታጅቅ ኣቓንስቅ፣ ክታኣቒልም ፅበው ኣቓንስቅ ጝት ኣርቕትርንቅ።

¹⁸ኣቅል እጀቍ ዅሊዝጘ ክታለ በጠቅም፤ ዋጥር ክታጐ ተጭር።

¹⁹ዊቱ ግርየዝ ግረ ኣልም ይት ቓላውም፤ ክትን ግን ቓልትርንቅ፤ ያን ፅበር ኣቓንስቅ ክትንም ፅበቍ ኣትርንቅ።

²⁰ያን ኣይርትል ፅበጘ፣ ክትንም ይግል ፅብርነጘ፣ ያንም ቈሽ ክታግል ፅበጘ ኣይንድ ኣርቕትርንቅ።

²¹ይት ቀነውድ ይትዛዝድ ለምር ሊሚደውድ የጝ፤ ይት ቀነውድየንትም ይር ቀንጡ፤ ያንም ቀንጭር፤ ይቕምትም ጝጭስ ጋልፅጭር።»

²²ኣይንድም ኣስቈረትትውድ ኣየው ላየ ይዅዳ፦ «ኣደረወ! እደስለ ክቕምት ኣልሚዝ ኣዪጝቀ ይናጭስ ጋልፅረውድ ኣወሽር የጝ?» ዩ።

²³እየሱስም እንት ዩ፦ «ይት ቀነው ፅብሽ ይቃልድ ሊሚድጡ፤ ይርም ጝት ቀንጡ፤ ይንም ጝጐ ተርንቅ፤ ጝጅቅም ፅብንቅ።

²⁴ይት ቀናውድ ይቃልድየንት ሊሚዳውም፤ እኒን ወሽርነው ቃልድ ኣይርቱ የጝጚ ይውም ኣየው።

²⁵ነን ክታጅቅ ፅባ እኒንትቅ ድቍኩን።

²⁶ኣይር ይሽዝ እፃቐው ዲብሰተ ኣቐው መንፈስ ቅዱስ ግን እጝቅትቅ ክታጭስ ክንስጡ፤ ያን ክታጭስ ድቈውድየንትም ኣጅስጡ።

²⁷ዲግተ ክታግል በጭር፤ ይዲግተድየንትም ነቅጭር፤ ያን ክታጭስ ነቀውድ ኣልምድ ነየውድ ተከውም ኣየው፤ ክታእዘንድ ጨጝቅሺነ፤ ጐውቲነም።

²⁸« ‹ያን ፊጭር፤ ዋጥርም ክታጐ ተጭር› የጘ ወሽርንኵርኑ፤ ይት ቀንድርናንስ ይጊስ ኣይር ዲቈው ኣቓንስቅ ያን ኣይርትል ፊረነዊዝ ዲስ ይትርነ ዊንድርኑ።

²⁹ነን ያን ድቈውድየን እግረ ፋፅምሻንድ ኣምንድርናስ ማጥን በውርስ ድቍኩን።

³⁰እን ኣልሚዙ ቅመተድ ተራ ኣቓንስቅ ነስየ ክታጅቅ ንቕፀቍ ዊግጠቅም፤ ጘጝም ይግል ውረውረ ስልጣንም እጀው።

³¹ዊገድ ግን ያን ኣይርት ቀነር ኣቐጘ ኣልም ኣርቓንስ ማጥን ኣይር ይት ኣዘውድየንትቅ ፋፅምጭር፤ ነስየ ጕጥን እኒስ ፊርነ።»