Read xamtanga ይዃንስት ወንጌል 15 Bible Online

ይዃንስት ወንጌል 15 - xamtanga bible

ይዃንስት ወንጌል 15

¹«እማንተው ወይኒዙ ግንድድ ያን የጝ፤ ኣርሸድም ይር የጝ።

²ጘጝም ይግል ፅበው፣ ፍርም ፍርዛው ጫፍድየንትቅ ቀቭ ማለኵ፤ ፍር ፍርዘው ጫፍድየንትቅ ግን ቐናዝ ፍርዛንስ ማጥን ጊርዘኵ[13]።

³ክትንም ያን ክታጭስ ድቈው ቃሊዝቍዝ ነን ንፅዃን የጝ።

⁴ክትን ይግል ፅብጥን፤ ያንም ክታግል ፅብጭር፤ ጫፍ ወይኒዙ ግንዲል ፅቢየውዝየ ጝለ ፍር ፍርዝጠ ቸላው ኣቐጘ ክትንም ይግል ፅቢርነውዝየ ፍር ፍርዝትርነ ቸላይርነቅም።

⁵«ያን ወይንዙ ግንድ የጝ፤ ክትንም ጫፋን የጝ፤ ኣውማውቅ ይግል ፅባን፣ ያንም ጝግል ፅባን፣ ጘጝ ንቕፀው ፍረ ፍርዝጡ፤ ዊገድ ግን ይት እጀው ውረውረቅ ፍርዝትርነ ችላይርነቅም።

⁶ይግል ፅባውድቅ ቢዘይል ሊቭ ይዘው ጫፊዝጘ ኣጡ፤ እነየቍ ጫፋንድ እቅ ጥቅልጝ ልየል ማልጥቍ፤ ቃጥልጥቍም።

⁷ይግል ፅብርናን፣ ይቃልድም ክታግል ፅባን፣ በንርነው ዊገድቅ ጨውርንሽ ችጝትርንቅ።

⁸ንቕፀው ፍረ ፍርዘነውዝ ይክንደጥ ኣቐነውድ ጋልፅርናን፣ እንዝ ይር ኪብርጡ።

⁹«ኣይር ይት ቀነጘ ያንም ክታት ቀንኩን፤ ይፍቅሪዝ ፅብጥን።

¹⁰ያን ይርት ትዛዝድ ፋፅም ጝፍቅሪዝ ፅባንትጘ ክትንም ይትዛዝድ ሊሚድርናን ይፍቅሪዝ ፅብትርንቅ።

¹¹ይዲስተድ ክታግል ኣቓንስመ ክታዲስተድም እቻቐው ኣቓንስ ማጥን እኒንት ድቍኩን።

¹²ይትዛዝድም ያን ክታት ቀነጘ ክትንም ክታስ ክታይ ቀነ ቀንሽርናንስ የጝ።

¹³ጝወደጃኒዝ ቺ ጝርዅየድ ዲቍስን ይወነዊስ ዲቈው ፍቅር ኣውማውም እጀው።

¹⁴ያን ኣዘውድየንት ፋፅምርንሽ ክትን ይወደጃን የጝ።

¹⁵ምላሰንድም ኣገልጋይ ጝኣደረድ ፃቨውድየንት ኣርቓውም፤ ነስየይስ ክታት ኣገልጋያን የቅም፤ ዊገድ ግን ይርቲስ ወጨውድየንትቅ ክታጭስ ጋልፃንስቅ ይወደጃን የርኩን።

¹⁶ያን ክታት ማርፁንጚ ክትን ይት ማርፂርነቅም፤ ፊትርናንስ፣ ፍርም ፍርዝርናንስ፣ ክታፍረድም ፅበው ኣቓንስ ማጥን ክታት ይሙን፤ እንዝ ማጥንም ኣይር ይሽዝ ጨውርነውድየንትቅ ነይጡ።

¹⁷ያን ክታት ኣዘውድ ክታስ ክታይ ቀነቀንሽርናንስ ማጥን የጝ።»

¹⁸«ኣልም ክታት ሽክትሽ ክታበዊል ይት ሽክተጘ ኣርቕጥን።

¹⁹ኣልሚስ ኣቕርናን፣ ኣልምድ ጝቕምትቊዝጘ ፃቭ ቀንጠ ዊኑ፤ ያን ክታት ኣልሚስ ቲዝ ማርፃንስቅ ክትን ኣልሚዝቍም ኣይርነቅ፤ ኣልም ክታት ሽክተውድም እንዝ ማጥን የጝ።

²⁰‹ኣገልጋይ ጝኣደረይስ ዲቋውም› የር ድቈው ዊገድ ኣጅጥን፤ ይት ሲድሰቍ ኣጘውዝየ ክታትም ሲድስጥቍ፤ ይቃልድ ሊሚደቍ ኣጘውዝየ ክታቃልድየንትም ሊሚድጥቍ።

²¹ይት እፃቐውድየንት ኣርቓቍ ኣጛንስቅ ይሽⶔዝቍዝ እኒን ሚከረድየንትቅ ክታግል ችጝዝጥቍ።

²²ያን ተጥ ድቊቀር ኣቓን፣ ጛጭስ ኽጥያት ኣጠም ዊኒየው፤ ነን ግን ጝታኽጥያቲዝ ምላሰነው ዊገም እጀቍ።

²³ይት ሽክተውድቅ ይርትም ሽክተኵ።

²⁴ላየ እጅር ፃቪየው ዊገድ ጝታማኽሊል ፃቪቀር ኣቓን፣ ጛጭስ ኽጥያት ኣጠም ዊኒየው፤ ነን ግን እንዛይ ታምራንዝቍ ምልክታንድዛት ቓልጝኵ፤ ኣቕሽም ይትም ይርትም ሽክትጝኵ።

²⁵እንም ጝታኽጊዝ፦ ‹ይት ጊነ ሽክት› ይሽት ፃፍሸው ቃልድ ፋፅምሻንስ ማጥን የጝ።

²⁶«ያን ኣይርቲስ ክታጐ እፃቐው እማንተው መንፈስድ ክታግል ተራንድ፣ ይማጥን ሚዝርድጡ፤ ጘጝም ኣይርቲስ ፈው ዲብሰተ የጝ።

²⁷ክትንም በውገይስ ኪርምርን ይጅቅ ዊንድርነቅ ኣቕርናንስቅ ሚዝርድትርንቅ።»