Read xamtanga ይዃንስት ወንጌል 16 Bible Online

ይዃንስት ወንጌል 16 - xamtanga bible

ይዃንስት ወንጌል 16

¹«እኒንትቅ ድቈውድ ፅጋራይርነጘ የጝ።

²ክታት ጝታምኵራቪስ ፊስጥቍ፤ እንዲያውም ክታት ቍወውድቅ፦ «እደረት ኣግልግለኵን» የው ኻስቨው ግርየ ተርጡ።

³እኒንትቅ ፃቭጘውድም ይትም ኣይርትም ኣርቓቍ ኣጛንስቅ የጝ።

⁴እኒንትቅ ነን በውርስ ድቈውድ እግረ ግርየድ ችጛንድ ኣጅርናንስ ማጥን የር የጝ፤ ክታጅቅ ዊናንስቅ እኒንት እንዝ ሚቅ ክታጭስ ዲቊቀርም።»

⁵«ነን ግን ይት እፃቐዊዝጐ ፊጨ የጝ፤ ኣነጚ ክታጊስ፦ ‹ፊትረውድ ኣውል የጝ?› የው ዋቕረውም እጀው።

⁶እኒንት ዊግጣንስቅም ክታእዘንድ ጭቕጘ ኻዝንኩ።

⁷ዊገድ ግን እማን እማን የኵን! ክታጭስ ያን ፊጣን ቺዘኵ፤ ያን ፊጢቀውዝየ ዲብሰተድ ክታግል ተራውም፤ ፊጠውዝየ ግን ጝት ክታጐ እፃጭር።

⁸ጘጝም ተራንድ ኣልምድየንት ኽጥያዝቍዝ፣ ፅድቅዝቍዝ፣ ፍርድዝቍዝም ዊቅስጡ።

⁹ኽጥያትዝቍዝ ዊቅሰውድ፣ እቅ ይት ኣምናቍ ኣጛንስቅ የጝ።

¹⁰ፅድቅዝቍዝ ዊቅሰውድ፣ ያን ኣይርትል ፊጠር ኣቓንስቅ፣ ክትንም ነስየ ይት ቓላይርነቅ ኣቕርናንስቅ የጝ።

¹¹ፍርድዝቍዝ ዊቅሰውድም፣ እን ኣልሚዙ ቅመተድ ፊርድሻንስቅ የጝ።

¹²«ገነ ክታጭስ ድቍጨ በነው ንቕፀው ዊገ ዊኑ፤ ዊገድ ግን ነን መውርትርነ ቸላይርነቅም።

¹³እማንዙ መንፈስድ ተራንድ ክታት እማኒልቅ ሚሪጡ፤ ጘጝ ጝቕምቲስ ዊግታውም፤ ወሸውድየንት ጭቝ ዊግትጡ፤ ነስየይስ ኣጡድየንትም ድቍጡ።

¹⁴ጘጝ ክታጭስ ድቈውድ ይው ኣቐዊስ ፊስ ኣቓንስቅ ይት ኪብርዝጡ።

¹⁵ኣይርቱ ኣቐውድቅ ይው የጝ፤ እንዝ ማጥን የጝ፦ ‹ጘጝ ክታጭስ ድቈውድ ይው ኣቐዊስ ፊስ የጝ› የውድ።»

¹⁶«ዊቱ ግርየዝ ግረ ይት ቓላይርነቅም፤ ኣነጚ ዊቱ ግርየዝ ግረ ቈሽ ቓልትርንቅ።»

¹⁷ጝክንደጢስም ላው ላውድ፦ «ዊቱ ግርየዝ ግረ ይት ቓላይርነቅም፤ ኣነጚ ዊቱ ግርየዝ ግረ ቈሽ ቓልትርንቅ» እኒዝጘም፦ «ኣይርትል ፊጠር ኣቓንስቅ» የውድ ወረጘ የነት የጝ?»

¹⁸ዊቱ ግርየ የነውድስ ወረጘ የነት ኣጢ? ጘጝ ዊግተው ዊገድ ኣርቒነቅም» ይጛ ጛስ ጛይ ዋቕረዋቕርሽ።

¹⁹እየሱስም ጝት ዋቕርጥጘ በንጘጘ ኣርቕ እንት ዩ፦ «ያን፦ ‹ዊቱ ግርየዝ ግረ ይት ቓላይርነቅም፤ ኣነጚ ዊቱ ግርየዝ ግረ ቈሽ ቓልትርንቅ› ያንስቅመ ወረጘ የነት ኣቐጘ ክታስ ክታይ ዋቕረዋቕርሽርና?

²⁰እማን እማን የኵን! ክትን ሊዝትርንቅ፤ ኻዝንትርንቅም፤ ኣልምድ ግን ጭቕጘ ዲስ ይጡ፤ ክትን ግን ኻዝንትርንቅ፤ ኣነጚ ክታኽዝንድ ዲስተዝ ላውጥሽጡ።

²¹እውነ እዅርተ ጕራንድ ጝርቅምት ግርየድ ችጛንስቅ ጨጝቅሸች፤ እዅርደት ግረ ግን ኣልሚል ድድመ እዅርሻንስቅ፣ ጭቕጘ ዲስ የች፤ ጝርሚከረድም ትዝ ያይም።

²²እኒዝጘም ክትን ነን ኻዝንትርንቅ፤ ኣነጚ እንደ ገነ ሊጘት ቓለር ኣቓንስቅ ክታእዘንድ ዲስ ይጡ፤ ክታዲስተድየንትም ፊሰውም እጀው።

²³ኣይንት ግርየይዝ ይጊስ ውረውረም ጨዋይርነቅ፤ እማን እማን የኵን! ኣይር ይሽዝ ጨውርነውድየንትቅ ነይጡ።

²⁴ነኳን ኣሽ ይሽዝ ውረውረቅ ጨዊርነቅም፤ ጨውጥን፤ ለምርትርንቅ፤ ክታዲስተድም እቻቐው ኣጡ።

²⁵«ነኳን ኣሽ ክታጭስ ድቈውድ ተከዝ ኣቕሽም እኳ፣ ነስየ ግን ኣይርት ክታጭስ ተከዝ ኣዪጝቀ ግልፅዝ ድቈው ግርየ ተርጡ።

²⁶ኣይንት ግርየይዝ ይሽዝ ጨውትርንቅ፤ ያንም፦ ‹ክታማጥን ኣይርት ጨውጭር› የቅም።

²⁷ምላሰንድም ክትን ይት ቀንድርናንስቅ ያን እደረቲስ ፈጘም ኣምንድርናንስቅ ኣይር ጝቕም ክታት ቀንጡ።

²⁸ኣይርቲስ ፍ ኣልሚዝጐ ተጥኩን፤ ነን ግን ኣልምድ በጥ ኣይርትል ፊጨ የጝ።»

²⁹ጝክንደጥድም ኣይንድ፦ «እንወ ነን ተከዝ ኣዪጝቀ ግልፅዝ ዊግትሩ።

³⁰ክት እጝቅትቅ ኣርቕረር ኣረጘ፣ ኣውማውቅ ክት ዋቕርጠም በንዛው ኣቐጘ ነን ኣርቕኑን፤ ኣቓንስቅም ይን ክት እደረቲስ ፍረጘ ኣምነኵን» ይ።

³¹እየሱስም ዊስ፦ «ነን ኣምንድርኑ የነትመ?

³²እንወ ክታይታእጝቅቅ ክታይታጝንል ቢትንሽርነው፣ ይትም ይለ በትርነው ግርየ ተርጡ፤ ጘጝ ግርየድም ነን ችጝኩ፤ ዊገድ ግን ኣይር ይጅቅ ኣቓንስቅ ይለም ኣይቀር።

³³ይቍዝ ዲግተ ፃይርነቅ ኣቕርናንስ ማጥን እኒንት ድቍኩን፤ ኣልሚል ፅብርናንድ ሚከረ ፃይርነቅ የጝ፤ ዊገድ ግን ኣይዝዀጥን፤ ያን ኣልምድየንት ኻቕኩን» ዩ።