Read xamtanga ይዃንስት ወንጌል 17 Bible Online

ይዃንስት ወንጌል 17 - xamtanga bible

ይዃንስት ወንጌል 17

¹እየሱስም እኒንት ዊግተት ግረ ንየ ጭቅ የው ሲመይ ቓላ እንት የው ፃልዩ፦ «ኣየወ! እንወ ሰትድ ችጝኩ፤ ክዅር ክት ኪብርዛንስ ማጥን ክትም ክዅርት ኪብርዝ።

²ምላሰንድም ክት ጝጭስ ይውረቊዝቅ ዘላልምዙ ርዅየ ይዋንስ ማጥን እጝቅ እጅርዝ ኒየይልቅ ጝጭስ ስልጣን ይውርኵሩ።

³ዘላልምዙ ርዅየድም ክት ጭቝ እማንተው ኣምላክ ኣረሪዝመ ክት እፃረው እየሱስ ክርስቶስት ኣርቐነው የጝ።

⁴ያን ክት ነይረው ሰቭድየንት ፋፅም ዝቨይስ ኪብርዙን።

⁵ኣየወ! ኣልም ፋጥርሺጝቀ ክጅቅ ፃቅ ዊነው ክቭሪዝ ነንም ክበዊዝ ኪብርዝ።

⁶«እንዛይ እን ኣልሚስ ነይረቍ እቂዝ ክሽድ ጋልፅኩን፤ ጛይ ክቍ ዊን፤ ክትም ይጭስ ነይሩ፤ ጛይም ክቃልድ ሊሚድጝኵ።

⁷ይጭስ ነይረውድቅ ክጊስ ኣቐጘ ነን ኣርቕጝኵ።

⁸ምላሰንድም ክት ይጭስ ነይረው ቃልድየንት ይውኩን፤ ጛይም ለምርጝኵ፤ ያንም ክጊስ ፍ ተጠጘ እርግጥ ኣርቕጝኵ፤ ይት እፃረርድ ክት ኣረጘም ኣርቕጝኵ።

⁹ጛይ ክቍ ኣጛንስቅ ጝታማጥን ፃልየኵን፤ እንዛይ ክት ይጭስ ነይረቍዝ፣ ክቍም ኣቐቊዝ ማጥንጚ፣ ኣልሚዝ ማጥን ፃልየቅም።

¹⁰ይው ኣቐውድቅ እጝቅ ኩ የጝ፤ ኩ ኣቐውድም እጝቅ ይው የጝ፤ ያንም ጝታቍዝ ኪብርኩን።

¹¹ነስየይስ ያን ኣልሚል ዊነቅም፤ ጛይ ግን ኣልሚል ፅብጥጘ የጝ፤ ያን ክጐ ተጨ የጝ፤ ቅዱስ ኣየወ! ይን ላው ኣነጘ ጛይም ላው ኣጛንስ ማጥን ይጭስ ነይረው ክሽዝ ጛት ሊሚጭ።

¹²«ያን ጛጅቅ ፅባ ክት ነይረው ክሽⶔዝ ጛት ገርዱን፤ ሊሚጡንም፤ መፃፊዙ ቃልድ ፋፅምሻንስ ማጥን ድዘርዙ ዅር ኣቐው ላዊዝለ ጛጊስ ላውም ድዚየው።

¹³ነን ክጐ ተጨ የጝ፤ ዊገድ ግን ይዲስተድ ጛጭስ እቻቐው ኣቓንስ ማጥን ነን ኣልሚል ፅባ እኒንት ዊግጠኵን።

¹⁴ያን ክቃልድ ይውኩን፤ ያን ኣልሚስ ኣይቀር ኣቐጘ፣ ጛይም ኣልሚስ ኣየቍ ኣጛንስቅ፣ ኣልምድ ጛት ሽክትኩ።

¹⁵ክት ጨወውድም ጛት ጭቓይስ ሊሚድራንስ የጝጚ ኣልሚስ ፊስራንስም ኣየው።

¹⁶ያን ኣልሚስ ኣይቀር ኣቐጘ፣ ጛይም ኣልሚስም ኣየቍ።

¹⁷ክቃልድ እማን የጝ፤ ክእማኒዝ ጛት ቀድሽ።

¹⁸ክት ይት ኣልሚል እፃረጘ ያንም ጛት ኣልሚል እፃቕኩን።

¹⁹ጛይ እማንዝ ቀድስሽተቍ ኣጛንስ ማጥን ያን ጝታማጥን ይቕምት ቀድስኩን።

²⁰«ጛይ ክንስጘው ክንድጝድ ለምርጝ ይት ኣምነቊዝቅጚ እንዛዝ ማጥን ጭቝም ኣየው ፃልየውድ።

²¹ኣየወ! እጝቅቅ ላው ኣጛንስ፣ ክት ይግል ፅብረጘ፣ ያንም ክግል ፀበጘ፣ ጛይም ይናግል ፅብጛንስ ማጥን ፃልየኵን፤ እንም ክት ይት እፃረጘ ኣልምድ ኣምናንስ የጝ።

²²ይን ላው ኣነጘ ጛይም ላው ኣጛንስ ማጥን ይጭስ ነይረው ክቭርድየንት ጛጭስ ይውኩን።

²³እንም ያን ጛግል ፅበጘ፣ ክትም ይግል ፅብረጘ፣ ጛይም ፍፅም ላው ኣጛንስ ማጥን የጝ፤ እኒዝጘም ክት ይት እፃረጘ፣ ይት ቀንደው ፍቅሪዝም ጛት ቀንደጘ ኣልምድ ኣርቓንስ ማጥን የጝ።

²⁴«ኣየወ! እንዛይ ይጭስ ነይረቍድ ያን ፅበዊል ኣጛንስ ማጥን ኣልም ፋጥርሺጝቀ ይት ቀንዳንስቅ ክት ነይረው ይክቭርድየንት ቓልጥጘ በነኵን።

²⁵«ፃድቅ ኣየወ! ኣልምድ ክት ኣርቒይሽም ያን ኣርቐኵን፤ እንዛይም ይት ክት እፃረጘ ኣርቕጥቍ።

²⁶ክት ይት ቀንደው ፍቅርድ ጛግል ኣቓንስ፣ ያንም ጛግል ኣቓንስ ማጥን ክት ኣርቕጥጘ ፃቭኩን፤ ኣርቕጥጘም ፃቭጭር።»